Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Mayo de 2015

Tikintlasojtlaj ijkuak tikinkixtiaj itech tlanechikol

Tikintlasojtlaj ijkuak tikinkixtiaj itech tlanechikol

SE TOKNI tlen itoka Julian kijtoa ye iuan ikone sapanoa kuali omouikayaj uan okichiuayaj miak tlamantli. Pero se tonal ikone okipatlak inemilis uan opejki kichiua miak tlamantli amo kuali. Julian sapanoa omoyolkoko ijkuak okijtojkej ikone ayakmo iTlaixpantijka Jehová. Isiua sapanoa ochokaya uan ye amo okimatiaya ken kiyolseuis. Ye kijtoa omotlajtlaniayaj tlen tlamantli amo kuali okichijkej.

¿Tleka Biblia kijtoa uelis ikaj kikixtiskej itech tlanechikol? Uan tla kinyolkokoa, ¿tleka tikijtoaj tikintlasojtlaj ijkuak tikinkixtiaj?

TLEKA SEKIMEJ KINKIXTIAJ ITECH TLANECHIKOL

Tikinkixtiaj itech tlanechikol ijkuak se iTlaixpantijka Jehová akin yomoapolakti kichiua itlaj amo kuali uan amo moyolkuepa.

Jehová kimati tinochtin titlajtlakolejkej. Pero kema kineki ma tiktlakamatikan itlanauatiluan. Se neskayotl, ye tlanauatia amo ma tiauilnemikan, amo ma tikinueyichiuakan teotsitsintin, amo ma titlachtekikan, amo ma timoteuikan, amo ma titemiktikan nion ma tikchiuakan naualotl (1 Corintios 6:9, 10; Apocalipsis 21:8).

Itlanauatiluan Jehová techpaleuiaj uan kichiuaj ma tiyolpakikan. Se neskayotl, itech tlanechikol kuali timomachiliaj pampa tokniuan kichiuaj tlen kuali, amo tlachtekij uan yolkualmej. ¿Tleka ijkon tikchiuaj? Pampa ijkuak otimoapolaktijkej otikiluijkej Jehová nochipa tiktlakamatiskej itlanauatiluan.

Pero ¿tlen panoa tla se tokni akin yomoapolakti tlajtlakolchiua? Yiuejkika sekimej itekipanojkauan Jehová noijki otlajtlakolchijkej, pero Jehová ok okinseli. Se neskayotl, ueyi tekiua David oauilnenki uan okimikti se tlakatl, pero toTajtsin Dios okitlapojpolui (2 Samuel 12:13).

¿Tleka okitlapojpolui? Okitlapojpolui pampa David melauak omoyolkuepki  (Salmo 32:1-5). Axkan noijki ijkon panoa. Tla se tokni tlajtlakolchiua uelis amo kikixtiskej itech tlanechikol tla moyolkuepa uan ayakmo oksepa tlajtlakolchiua (Hechos 3:19; 26:20). Pero tlayekankej uelis kikixtiskej itech tlanechikol tla kitaj amo melauak omoyolkuepki.

Tejuan uelis amo techpaktia ijkuak kikixtiaj itech tlanechikol se tokalchanejka noso akin iuan timouikaj. Uan uelis tikijtoskej amo kuali tlen okichiuilijkej. Pero Biblia techmachtia kinkixtiaj itech tlanechikol pampa kintlasojtlaj. ¿Tleka ijkon kijtoa Biblia?

TLAPALEUIA IJKUAK TIKINKIXTIAJ ITECH TLANECHIKOL

Jesús okijto pampa tikmatiskej kox kuali kisas tlen otikpejpenkej tikchiuaskej moneki tikitaskej ken tlapaleuis tlen otikpejpenkej (Mateo 11:19). ¿Ken tlapaleuia ijkuak tikinkixtiaj itech tlanechikol? Ma timomachtikan.

Kichiua kuali ma tlajtokan itech Jehová. Ma tiktlalikan se neskayotl. Tla konetl kichiua tlen kuali, akinmej kitaskej kijtoskej kuali okiskaltijkej itatajuan. Pero tla amo kuali kichiua kinteneuaskej intatajuan. Ijkon panoa iuan toTajtsin Jehová. Ijkuak okatka Ezequiel akinmej amo okatkaj judíos ijkuak okikakiaya tlajtoli judíos san niman okilnamikiayaj Jehová (Ezequiel 36:19-23). Axkan noijki miakej ijkuak techitaj noijki tlajtoaj itech Jehová pampa tiiTlaixpantijkauan (Isaías 43:10). Tla tiktlakamatij toTajtsin Dios, tlaltikpaktlakamej kuali tlajtoskej itech Jehová. Pero kiteneuaskej tla amo tiktlakamatij.

Se neskayotl, amo kuali tlajtoskej itech Jehová tla se tokni auilnemi. Pero kuali tlajtoskej itech Jehová tla tokni kitlakamati nochi itlanauatiluan Jehová. Ik non, tlatitlanil Pedro okijto: “Kemi tepilwah tetlakitakeh, amo xikchijtinemikah tlan achto ononkichiwayah ijkuak ayamó ononkixmatiah Dios. Okachi kuali xinemikah non yolchipawakeh, porke Dios Akin onomechnotski, Ye yolchipawak” (1 Pedro 1:14-16).

Tla se tokni kichiua tlen amo kuali oksekimej tlaltikpaktlakamej uelis kimatiskej. Pero tla kimatij yokikixtijkej itech tlanechikol uan axkan ayakmo iTlaixpantijka Jehová, kajsikamatiskej tiktlakamatij Biblia uan timochijchikauaj pampa ma yeto chipauak tlanechikol. Itech ueyi altepetl Suiza se tlakatl oyajki itech kali kanin timonechikoaj pampa okinekiaya mochiuas iTlaixpantijka Jehová. ¿Tleka? Pampa iuelti otlajtlakolchi pero okikixtijkej itech tlanechikol. Nin tlakatl okitlajtlachialti ken ialtepe Jehová kinkixtiaj akinmej amo kuali innemilis.

Kichiua ma yeto chipauak tlanechikol. Tlatitlanil Pablo okinmilui tokniuan itech Corinto ma kikixtikan itech tlanechikol se tokni tlen okichi se ueyi tlajtlakoli uan amo omoyolkuepki. ¿Tleka okinmilui ma kikixtikan? Pampa oksekimej tokniuan noijki uelis kichiuaskiaj tlen amo kuali. Pablo okineskayoti tlen okichijtoka tokni ken levadura tlen kixokolia pan. Ik non, okinmilui tokniuan ma kikixtikan itech tlanechikol (1 Corintios 5:6, 11-13).

Nin tlakatl sapanoa amo yolkuali okatka pampa inmixpan oksekimej oauilnemiaya. Uan itech tlanechikol sekimej okijtoayaj kuali tlen okichijtoka nin tlakatl (1 Corintios 5:1, 2). Nin sapanoa amo kuali, pampa oksekimej tokniuan noijki uelis kichiuaskiaj tlen amo kuali ken akinmej ochantiayaj itech altepetl Corinto. Axkan noijki ijkon tlapanoa. Tla ikaj amo moyolkuepa ijkuak kichiua itlaj amo kuali uan  amo kikixtiaj, oksekimej mokuayejyekoskej amo ipati tiktlakamatiskej nochi tlen kijtoa Biblia (Eclesiastés 8:11). Jehová kijtoa akinmej tlajtlakolchiuaj uan amo moyolkuepaj katej ken temej tlen katej ijtik atl uan kichiuaj barcos ma apolakikan (Judas 4, 12). Akinmej tlajtlakolchiuaj uelis kichiuaskej oksekimej tokniuan itech tlanechikol ayakmo okachi ma tlaneltokakan itech toTajtsin Dios.

Akin tlajtlakolchiua uelis moyolkuepas. Jesús otlamachti itech se telpochtli tlen okiski itech ikalijtik, okitlami tomin tlen okimakak itajtsin uan sapanoa oauilnenki. Satepan nin telpochtli okitak sapanoa otlajyouijtoka pampa amo okatka iuan ikalchanejkauan. Omoyolkuepki itech nochi tlen okichi uan omokuepki ikalijtik. Ijkuak itajtsin okitak omoyolkuepki nin telpochtli, sapanoa oyolpakik uan oksepa okiseli (Lucas 15:11-24). Nin neskayotl techmachtia tlen kimachilia Jehová ijkuak ikaj moyolkuepa. Biblia kijtoa Jehová amo kipaktia ma mikikan akinmej amo yolkualmej. Ye kineki ma kipatlakan innemilis uan ma yoltokan nochipa (Ezequiel 33:11).

Tlanechikol ken se kalchanejke. Ijkuak ikaj kikixtiaj ayakmo tokalchanejka. Ijkuak kitas tlen kipanos pampa otlajtlakolchi, uelis kajsikamatis amo kuali tlen okichi. Uelis kilnamikis ken kuali okatka ijkuak omouikaya iuan Jehová uan tlanechikol. Ijkuakon uelis moyolkuepas uan mokuepas tlanechikol.

¿Ken uelis tikpaleuiskej akin okikixtijkej itech tlanechikol pampa oksepa ma mokuepa? Ijkuak ikaj kikixtiskej moneki tiktlakamatiskej nochi principios tlen katej itech Biblia. Ijkon tikteititiskej tiktlasojtlaj akin okikixtijkej itech tlanechikol. Ma tiktlalikan se neskayotl. Tla ikaj tlakuajtok uan omotoskatsak, ayakmo ueli tlajtoa uan amo itlaj ueli kichiua uan tla amo ikaj kipaleuia uelis mikis, pero se iyolikni kikuitlapanuiteki uan ijkon kipaleuia. Tlen okichi iyolikni ueli okikoko pero okipaleui pampa amo ma miki. David okijto tla ikaj yolkuali okiuitekiaya yetoskia se tlateochiualistli uan kiteititiskia kitlasojtla (Salmo 141:5). David okimatiaya techyolkokoa ijkuak techyektlaliaj pero nin uelis techmakixtis.

Ijkuak kinkixtiaj itech tlanechikol ken ijkuak kikuitlapanuitekij akin omotoskatsak. Uelis kichiuas ma moyolkuepakan uan oksepa ma kitekichiuilikan Jehová akinmej otlajtlakolchijkej. Ijkon okipanok ikone Julian. Ye okipatlak inemilis uan majtlaktli xiuitl satepan oksepa omochi iTlaixpantijka Jehová. Axkan ye tlayekanki itech tlanechikol. Ye kijtoa ijkuak okikixtijkej itech tlanechikol ye ueli okitak ken amo kuali kajki ijkuak amo kitlakamatij Jehová. Ik non, okijto omonekiaya ma kiyektlalikan (Hebreos 12:7-11).

KEN UELIS TIKINTLASOJTLASKEJ AKINMEJ OTIKINKIXTIJKEJ ITECH TLANECHIKOL

Techyolkokoa miak tikinkixtiskej itech tlanechikol. Pero moneki ma tikilnamikikan akin tlajtlakolchiua uelis oksepa mouikas iuan Jehová. Uan nochtin uelis titlapaleuiskej pampa ma moyektlali ijkuak kikixtiaj itech tlanechikol. ¿Ken uelis tikchiuaskej?

Tlayekankej kinpaleuiaj akinmej otlajtlakolchijkej pampa oksepa ma mochiuakan iTlaixpantijkauan Jehová

Tlayekankej moneki tetlasojtlaskej ken Jehová, uan okachi ijkuak kiluiskej ayakmo iTlaixpantijka Jehová. Moneki ika tlasojtlalistli kiyekiluiskej tleka kikixtiaj uan noijki moneki ma kiluikan tlen moneki ma kichiua pampa oksepa ma mouika iuan Jehová. Satepan, tla tlayekankej  kitaj yokipatlak inemilis, tlayekankej moneki motlapouiskej iuan pampa ma kiluikan tlen moneki ma kichiua pampa oksepa ma mochiua iTlaixpantijka Jehová. * (Xikita tlajtoli tlen kiualika tlakxitlan.)

Ikalchanejkauan moneki kitlakaitaskej tlen okijtojkej tlayekankej. Ijkon kalchanejkej kiteititiaj kitlasojtlaj akin okikixtijkej uan noijki tokniuan itech tlanechikol. Julian kijtoa: “Tejuan amo otimouikayaj iuan tokone pampa amo okipiaya kuali inemilis, pero keman otiktlasojtlayaj”.

Tokniuan itech tlanechikol moneki kitlakaitaskej ijkuak Jehová ikaj kiyektlalia. Ijkon kiteititiskej kitlasojtlaj akin okikixtijkej. Ik non, amo mouikaj iuan akin okikixtijkej uan nion iuan motlapouiaj (1 Corintios 5:11; 2 Juan 10, 11). Uan tokniuan itech tlanechikol noijki moneki kintlasojtlaskej inkalchanejkauan akin okikixtijkej. Yejuan sapanoa tlajyouijtokej, ik non, amo ikaj moneki kinmitaskej ken ayakmo yetoskiaj iTlaixpantijkauan Jehová (Romanos 12:13, 15).

Julian kijtoa moneki kinkixtiskej akinmej tlajtlakolchiuaj, pampa nin techilnamiktia moneki tiktlakamatiskej Jehová. Noijki kijtoa: “Maski teyolkokoa, satepan tikitaj ken tlapaleuia. Tla tokone amo tikitaskiaj ken ikaj akin okikixtijkej, uelis amo keman oksepa mochiuaskia iTlaixpantijka Jehová”.

^ párr. 24 Xikita La Atalaya (ika náhuatl del centro Akin Tetlapouijtok) 15 de abril 1991, páginas 21 a 23.