Xikita nochi

Tlen kiualika

Ma timomaluikan pampa amo ma techkajkayaua Satanás

Ma timomaluikan pampa amo ma techkajkayaua Satanás

“Kuali xitlachixtokah. Porke nomokokolikni n amokualitlakatl kitemojtinemi akin kixpolos, kemi yaskia se lío non kitemojtinemi akin kitlankokototsas iwa kikuas.” (1 PEDRO 5:8)

1. ¿Tlen okichi se ángel tlen kuali omouikaya iuan Jehová?

YIUEJKIKA se ángel kuali omouikaya iuan Jehová. Pero oajsik tonal ijkuak ye okinek tlaltikpaktlakamej ma kiueyichiuakan uan amo toTajtsin Dios. Satepan otlajtlakolchi pampa non tlen okinekiaya (Santiago 1:14, 15). Okixnamik Jehová uan ijkon omochi “teta de nochteh non tlakajkayawah” (Juan 8:44). Amo tikmatij ken omotokayotiaya, pero axkan tiktokayotiaj Satanás.

2, 3. 1) ¿Tleka akin amo kineki Jehová tiktokayotiaj “Satanás”? 2) ¿Tleka tiktokayotiaj “Diablo”? 3) ¿Tleka tiktokayotiaj “koatl”? 4) ¿Tleka tiktokayotiaj “dragón”?

2 Satanás ye akin okachi amo kineki Jehová nion tlaltikpaktlakamej. Biblia techiluia nochi tlamantli amo kuali tlen ye kichiua. Biblia kijtoa itoka Satanás, nin tokayotl kijtosneki “akin tlaixnamiki”. Ijkon kitokayotia pampa ye kixnamiki Jehová uan amo kineki ma tlanauati.

 3 Apocalipsis 12:9 kijtoa Satanás noijki itoka Diablo. ¿Tleka? Pampa nin tokayotl kijtosneki “akin kijtoa tlen amo melauak itech oksekimej”. Uan Satanás nochipa kijtoa Jehová tlakajkayaua. Noijki itoka “koatl non yowejka kajki”, pampa ika se koatl okikajkaya Eva. Uan noijki itoka “weyi dragón”, pampa ye ken akin sapanoa temomojtia uan tetlajyouiltia. Ye amo kineki ma mochiua itlanekilis Jehová. Uan noijki kineki nochtin itekipanojkauan ma mikikan.

4. ¿Tlen timomachtiskej axkan?

4 Satanás amo kineki Jehová nion ialtepe. Ye kinektok ayakmo ma tiktekichiuilikan Jehová. Ik non, Biblia techiluia: “Xiisatokah iwa kuali xitlachixtokah. Porke nomokokolikni n amokualitlakatl kitemojtinemi akin kixpolos, kemi yaskia se lío non kitemojtinemi akin kitlankokototsas iwa kikuas” (1 Pedro 5:8). Axkan timomachtiskej eyi tlamantli tlen techilnamiktia tleka moneki timomaluiskej itech Satanás.

SATANÁS KIPIA CHIKAUALISTLI

5, 6. 1) Xikijto seki neskayomej tlen techititia ángeles kipiaj chikaualistli. 2) ¿Tleka Biblia kijtoa Satanás temiktia?

5 Ángeles kipiaj chikaualistli (Salmo 103:20). Yejuan okachi ixtlamatkej uan chikauakej, amo ken tejuan. Ángeles yolmelajkej ika inchikaualis kichiuaj tlen kuali. Se neskayotl, Biblia kijtoa yiuejkika se ángel okinmikti 185,000 soldados asirios, uan nin okichi san itech se yoak. Nin amo uelis kichiuaskiaj miakej soldados uan nion se tlaltikpaktlakatl (2 Reyes 19:35). Okse tonal, se ángel okinkixtij kanin otsaktokaj itlatitlaniluan Jesús. Okitlapo kaltlatsakuil, okinkixti uan satepan oksepa okitsak kaltlatsakuil, uan akinmej otlamaluiayaj nion okitakej ken omochi nin (Hechos 5:18-23).

6 Ken tikitaj, ika inchikaualis ángeles tlen yolkualmej kichiuaj tlamantli kuali. Pero Satanás kichiua tlen amo kuali. Uan ye kipia miak chikaualistli, ik non, Biblia kijtoa ye tlanauatia itech Tlaltikpak (Juan 12:31; 2 Corintios 4:4). Noijki kijtoa Satanás ueli temiktia (Hebreos 2:14). Nin amo kijtosneki ye ineuia kinmiktia nochtin tlaltikpaktlakamej. ¿Tleka moijtoa ye temiktia? Achto, ye kichiua tlaltikpaktlakamej amo ma motlasojtlakan uan ma motlajyouiltikan. Ome, ken ye okichi Adán uan Eva ma tlajtlakolchiuakan, axkan tinochtin titlajtlakolejkej uan timikij (Romanos 5:12). Ik non, Jesús okijto Satanás “se temikti” (Juan 8:44). Satanás kipia chikaualistli.

Tla Jehová techpaleuia uelis tiktlaniliskej Satanás

7. ¿Tleka tikijtoaj amo kuali ejekamej kipiaj chikaualistli?

7 Ijkuak tikixnamikij Satanás, noijki tikinmixnamikij akinmej kichiuaj ken ye. Tikinmixnamikij demonios noso amo kuali ejekamej akinmej  noijki amo otetlakamatkej (Apocalipsis 12:3, 4). Itech Biblia tikinmajsij miakej neskayomej tlen techmachtiaj yejuan kipiaj miak chikaualistli uan uelis techtlajyouiltiskej (Mateo 8:28-32; Marcos 5:1-5). Amo keman ma tikilkauakan yejuan kipiaj chikaualistli (Mateo 9:34). San uelis tikintlaniliskej tla timopaleuiaj itech Jehová.

SATANÁS TETLAJYOUILTIA

8. 1) ¿Tlen kineki kichiuas Satanás? (Xikita tlaixkopinal tlen ika peua tlamachtil.) 2) ¿Tejuatsin tleka tikneltoka sapanoa onka tlajyouilistli?

8 Satanás sapanoa tetlajyouiltia. Ken otimomachtijkej itech párrafo 4, Biblia kijtoa Satanás nemi ken se león non apismiki. Yitlanauatijtok itech Tlaltikpak (1 Juan 5:19). Pero Satanás noijki kineki kinmixpolos tlapejpenalmej tlen ok katej itech Tlaltikpak, uan noijki kineki kinmixpolos akinmej mokauaskej itech Tlaltikpak (Juan 10:16; Apocalipsis 12:17). Ik non, yiuejkika uan axkan kichijtok ma kintojtokakan uan ma kintlajyouiltikan akinmej melauak kichiuaj ken Cristo.

9, 10. 1) ¿Tlen okichi Satanás pampa kitlajyouiltis altepetl Israel? 2) ¿Tleka okinekiaya kitlajyouiltis altepetl Israel? 3) ¿Tejuatsin tlen tikneltoka kimachilia Satanás ijkuak ikaj kichiuaj se ueyi tlajtlakoli?

9 Se león non apismiki amo kinmiknomati akinmej kinmiktis, amo kinmiknomati achto kinmiktis nion kinmiknomati ijkuak yokinkua. Noijki Satanás amo kinmiknomati tlaltikpaktlakamej akinmej  kintlajyouiltia. Ma timokuayejyekokan ken Satanás okitlajyouilti altepetl Israel. Satanás okichi Zimrí, se israelita, ma auilnemi iuan ichpokamej, uan noijki okichi Guehazí ma kineki tlen amo iaxka. Nin tlamantli sapanoa otetlajyouilti. Uan Satanás melauak oyolpakik pampa okitak nochi tlen okichi (Números 25:6-8, 14, 15; 2 Reyes 5:20-27).

Satanás yolpaki ijkuak se itekipanojka Jehová tlajtlakolchiua (Xikita párrafo 10)

10 ¿Tleka Satanás okinekiaya kitlajyouiltis altepetl Israel? Pampa ye okimatiaya ompa nesiskia Mesías. Uan noijki okimatiaya Mesías kimiktiskia Satanás uan kiteititis san Jehová kinamiki tlanauatis (Génesis 3:15). Satanás amo okinekiaya israelitas ma kichiuakan tlen toTajtsin Dios okinekiaya, ik non, okichi miak tlamantli pampa ma tlajtlakolchiuakan. Ye amo okiknomatki David ijkuak okichi auilnemilistli. Noijki amo okiknomatki Moisés ijkuak ayakmo okikauilijkej ma kalaki itech Tlali tlen Jehová okijto kinmakaskia israelitas. Satanás melauak yolpaki ijkuak se itekipanojka Jehová kichiua se ueyi tlajtlakoli. Ijkon Satanás kipinatia Jehová (Proverbios 27:11).

11. ¿Tleka uelis Satanás okinekiaya Sara ma tlajtlakolchiua?

11 Satanás amo okintlasojtlaya kalchanejkej kanin nesiskia Mesías. Se neskayotl, ma tikilnamikikan tlen opanok ijkuak Jehová okijto iixuiuan Abrahán mochiuaskiaj se ueyi altepetl (Génesis 12:1-3). Ijkuak Abrahán uan Sara okatkaj altepetl Egipto, ueyi tekiua tlen ompa otlanauatiaya okinekiaya monamiktis iuan Sara. Pero Jehová okimakixti (xiktlajtolti Génesis 12:14-20). Noijki ijkon okipanok iuan okse ueyi tekiua itech altepetl Guerar, nin opanok achto nesiskia Isaac (Génesis 20:1-7). ¿Satanás okichi ninmej tekiuajkej ma kinekikan monamiktiskej iuan Sara? Itech Biblia amo techiluia. Pero ma tikilnamikikan ken ijkuak Sara ochantito itech mantajkalmej okikajte miak tlamantli kualtsin uan patio itech altepetl Ur. Uelis Satanás okinekiaya kiyejyekos ika nochi tlamantli kuali tlen kipiaj tekiuajkej, uan ijkon kikajkayauaskia inamik uan Jehová. Satanás yolpakiskia tla Sara ayakmo yetoskia isitsin Mesías. Ye amo okitekipachoaya tlen kipoloskia nin siuatl, inamiktilis, ken omouikaya iuan Jehová nion ken okitayaj oksekimej. ¡Satanás sapanoa amo yolkuali!

Satanás amo kitekipachoa tlen kuali uan tlen amo kuali

12, 13. 1) ¿Tlen okichi Satanás ijkuak oneski Jesús? 2) ¿Tlen mokuayejyekoa Satanás itech telpokamej akinmej axkan kitekichiuiliaj Jehová?

12 Miak xiuitl satepan Jesús oneski. Satanás amo okipatioitaya nin konetl nion okitak kuajkualtsin uan yolkuali. Satanás okimatiaya nin konetl ye Mesías, uan ikojkol omotokayotiaya Abrahán. Uan noijki okimatiaya  Jesús kitlajtlamis nochi tlen Satanás yokichi (1 Juan 3:8). ¿Satanás omokuayejyeko amo kuali okatka kimiktiskej se konetl? Amo. Ye amo okitekipachoaya kox kuali noso amo kuali tlen kichiuaskia. Uan san niman okinekiaya kimiktis Jesús. ¿Ken okichi?

13 Ijkuak ueyi tekiua Herodes okimatki yoneski “inrey n judíoteh”, san niman okualanki uan okinekiaya kimiktis konetsintli (Mateo 2:1-3, 13). Ik non, otlanauati ma kinmiktikan nochtin konemej tlen ayamo okajxitiayaj ome xiuitl, nochtin akinmej ochantiayaj Belén uan itech okseki altepemej (xiktlajtolti Mateo 2:13-18). Jesús amo omikik. Pero ¿tlen techmachtia nin itech Satanás? Ye amo kinpatioita tlaltikpaktlakamej nion konemej. Satanás melauak ken se león. ¡Amo keman ma tikilkauakan! Ye kipaktia tetlajyouiltis.

SATANÁS KINEKI TECHKAJKAYAUAS

14, 15. ¿Tlen kitekitiltia Satanás pampa kinkajkayauas miakej?

14 Satanás kinkajkayaua tlaltikpaktlakamej pampa ma kixnamikikan Jehová (1 Juan 4:8). ¿Ken kichiua? Ye kichiua tlaltikpaktlakamej amo ma kitakan ken miak ipati kuali ma mouikakan iuan toTajtsin Dios (Mateo 5:3, TNM). Diablo yokinkajkaya miakej tlaltikpaktlakamej pampa amo ma kimatikan tlen melauak itech toTajtsin Dios (2 Corintios 4:4).

15 Satanás kimati Jehová kineki san ye ma tikueyichiuakan (Éxodo 20:5). Ik non, ika tlaneltokalismej Satanás kinkajkayaua tlaltikpaktlakamej. Sapanoa yolpaki ijkuak tlaltikpaktlakamej kinueyichiuaj inkojkoluan, tlen onka itech Tlaltikpak, yolkamej uan miak okseki tlamantli, pero amo kiueyichiuaj Jehová. Akinmej ijkon kichiuaj mokuayejyekoaj toTajtsin Dios kipaktia tlen kichiuaj, pero nochi tlen kichiuaj amo itlaj ipati. Ijkuak okatka teotlajtojki Isaías noijki ijkon okichiuayaj miakej. Ik non, Jehová okinmilui: “¿Tleka nankitlaxtlajtokej pampa tlen amo pan, uan tleka nankitlaxtlajtokej pampa tlen amo nanmechyolpaktia? Kuali xinechkakikan uan xikkuakan tlen kuali, uan nanyolpakiskej ika tlen melauak uelik” (Isaías 55:2).

Satanás noijki uelis kinkajkayauas akinmej melauak kitekichiuiliaj toTajtsin Dios

16, 17. 1) ¿Tleka Jesús okijto Pedro omokuayejyekojtoka ken Satanás? 2) ¿Ken kineki techkajkayauas Satanás?

16 Satanás noijki uelis kinkajkayauas akinmej melauak kitekichiuiliaj toTajtsin Dios. Se neskayotl, ma tikilnamikikan tlen opanok ijkuak Jesús okinmilui imachtijkauan ayakmo miak okipoloaya pampa mikiskia. Tlatitlanil Pedro sapanoa okitlasojtlaya Jesús, ik non, okilui ma moyolseui. Pero Jesús okilui ma moketsa ikuitlapan pampa  omokuayejyekojtoka ken Satanás (Mateo 16:22, 23, TNM). ¿Tleka ijkon okilui? Pampa Jesús okimatiaya omonekiaya ma miki uan ijkon kinmakixtis tlaltikpaktlakamej uan kiteititis Satanás tlakajkayaua. Nin sapanoa miak ipati. Ik non, amo omonekiaya Jesús ma moyolseui. Omonekiaya ma ijsato noso ma tlachixto, pampa tla amo kichiuaskia kiyolpaktiskia Satanás.

17 Ayakmo miak poliui uan tlamis nochi tlen amo kuali. Uan axkan noijki miak ipati tlen panotok. Pero Satanás kineki amo ma timotekipachokan uan ma tiyolpakikan ika nochi tlen onka itech Tlaltikpak. Kineki ma tikneltokakan poliui miak pampa tlamis nochi tlen amo kuali, noso ma tikneltokakan amo keman tlamis nochi. Pero nin amo melauak. Ik non, ma tiijsatokan uan ma titlachixtokan pampa ayakmo miak poliui uan tlamis nochi tlen amo kuali (Mateo 24:42).

18, 19. 1) ¿Tlen kineki Satanás ma tikneltokakan? 2) ¿Ken techpaleuia Jehová?

18 Satanás noijki kineki ma tikneltokakan Jehová amo techtlasojtla uan amo keman techtlapojpoluis. Pero nin amo melauak. Biblia kijtoa: “Porke Totajtsi Dios yolmilajka, iwa ayik kilkawas tlan nomejwah ononkichijkeh iwa nonkichijtokeh keman nonkimpalewiah nomokniwah tlaneltokakeh” (Hebreos 6:10). Jehová kipatioita nochi tlen tikchiuaj (xiktlajtolti 1 Corintios 15:58). Jehová amo kitlasojtla Satanás nion kitlapojpoluis. Ik non, amo ma techkajkayaua Satanás.

19 Axkan otimomachtijkej Satanás kipia chikaualistli, tetlajyouiltia uan kineki techkajkayauas. Pero uelis tiktlaniliskej pampa Jehová techpaleuia. Itech Biblia techiluia nochi tlen Satanás kitekitiltia pampa techkajkayauas (2 Corintios 2:11). Pero amo san moneki ma tikmatikan tlen kitekitiltia Satanás. Moneki ma timochijchikauakan pampa amo ma techtlani. Ik non, Biblia kijtoa: “Ximochijchikawakah para amo manomechtlani n amokualitlakatl, iwa ye nomechcholilis” (Santiago 4:7). Chikome timomachtiskej ken uelis tikixtopeuaskej eyi tlamantli tlen kitekitiltia Satanás.