Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Mayo de 2015

Pampa tikchiuaskej ken Jehová ma timokuayejyekokan

Pampa tikchiuaskej ken Jehová ma timokuayejyekokan

“Xikchiuakan ken toTajtsin Dios, ken ikoneuan tlen namechtlasojtla.” (EFESIOS 5:1, TNM)

1. ¿Tlen tlamantli tlen miak ipati otechmakak Jehová?

JEHOVÁ otechmakak itlaj tlen sapanoa miak ipati. ¿Tlen otechmakak? Uelis timokuayejyekoskej tlen kimachiliaj oksekimej tlaltikpaktlakamej maski amo ijkon techpanoa (xiktlajtolti Efesios 5:1, 2). ¿Ken uelis timokuayejyekoskej pampa tikchiuaskej ken Jehová? ¿Uan tleka moneki tikmaluiskej tlen timokuayejyekoaj?

2. ¿Tlen kimachilia Jehová ijkuak titlajyouiaj?

2 Jehová okinmilui tlapejpenalmej uelis yoltoskej nochipa itech iluikak. Uan oksekimej tlaltikpaktlakamej uelis yoltoskej nochipa itech Tlaltikpak. Ijkuak tinochtin tikpiaskej yolilistli tlen amo keman tlamis ayakmo itlaj techtlajyouiltis (Juan 10:16; 17:3; 1 Corintios 15:53). Pero toTajtsin Dios kimati axkan onka seki tlamantli tlen techtlajyouiltia. Ye sapanoa moyolkokoa. Se neskayotl, Biblia kijtoa sapanoa omoyolkokoaya kinmitas israelitas otlajyouiayaj itech Egipto (Isaías 63:9). Uan  noijki ijkuak okiyektlalijtokaj teokali, Jehová okimatiaya oksekimej tlaltikpaktlakamej akinmej amo okintlasojtlayaj israelitas sapanoa okintlajyouiltiayaj. Ye okijto ijkuak ikaj kintlajyouiltia itekipanojkauan, Jehová kikokoa ken kikokoskia iixtololo (Zacarías 2:8). Jehová techtlasojtla miak, ik non, kineki techpaleuis ijkuak techita titlajyouiaj. Techtlasojtla ijkon ken se siuatl kitlasojtla ikone (Isaías 49:15). ¿Ken uelis tikchiuaskej ken Jehová? Uelis timokuayejyekoskej tlen kimachiliaj akinmej tlajyouiaj (Salmo 103:13, 14).

JESÚS NOIJKI OKINTLASOJTLAYA TLALTIKPAKTLAKAMEJ

3. ¿Tleka Jesús okintlasojtlaya tlaltikpaktlakamej?

3 Ijkuak Jesús okatka itech Tlaltikpak okajsikamatki tlen tikmachiliaj maski amo keman okipanok tlen techpanoa. Se neskayotl, ye okimatiaya tlayekankej teopixkej sapanoa otetlajyouiltiayaj. Yejuan okinkajkayauayaj tlaltikpaktlakamej uan okinmakayaj tlanauatilmej tlen amo okinmijto toTajtsin Dios. Uan tlaltikpaktlakamej sapanoa okinmakasiayaj (Mateo 23:4; Marcos 7:1-5; Juan 7:13). Jesús amo okinmakasiaya nion okineltokaya tlen okijtoayaj. Pero okimatiaya tlen okimachiliayaj tlaltikpaktlakamej, ik non omoyolkokoaya. Okijto “oyetokah inselti kemi ichkameh non amo kipiah tlajpixki non kinyakanas” (Mateo 9:36). Jesús okintlasojtlaya tlaltikpaktlakamej pampa iTajtsin, Jehová, ijkon kichiua (Salmo 103:8).

4. ¿Tlen okichiuaya Jesús ijkuak okinmitaya tlaltikpaktlakamej otlajyouiayaj?

4 Jesús okinpaleuiaya tlaltikpaktlakamej akinmej otlajyouiayaj pampa okintlasojtlaya. Non tlen okimachti iTajtsin. Se tonal imachtijkauan Jesús uejka onejnenkej pampa uelis tetlapouiskiaj. Sapanoa osotlauakej uan okinekiayaj moseuiskej. Pero Jesús okinmitak miakej tlaltikpaktlakamej tlen okinekiayaj ma kinmachti. Okimatiaya okinekiayaj ma kinpaleui. Ik non, okinmachti miak tlamantli (Marcos 6:30, 31, 34).

MA TITETLASOJTLAKAN KEN JEHOVÁ

5, 6. ¿Tlen uelis tikchiuaskej pampa titetlasojtlaskej ken Jehová? Xikijto se neskayotl. (Xikita tlaixkopinal tlen ika peua tlamachtil.)

5 Tla tiknekij titetlasojtlaskej ken Jehová moneki ma timokuayejyekokan tlen kimachiliaj oksekimej. Ma timokuayejyekokan se telpochtli mokuayejyekojtok itech se tokni tlen yikipia miak xiuitl uan akin amo okachi tlachia uan amo okachi ueli nejnemi. Telpochtli kimati Jesús okijto: “Xikchiwakah tlan kuali, ijkó kemi nomejwah nonkinekih makichiwakah tlan kuali nomowah” (Lucas 6:31). Telpochtli uelis mokuayejyekos tokni kipaktiskia ma kiyoleuakan pampa ma mauiltiti fútbol. Pero ijkuakon kilnamiki tokni ayakmo okachi tlachia uan amo ueli motlaloa. Ik non, motlajtlania: “Tla niyetoskia ken tokni, ¿ken nechpaktiskia ma nechpaleuikan?”.

6 Telpochtli kineki mokuayejyekos tlen kimachiliskia tla ye kipiaskia miak xiuitl. Ik non, kixeloa kauitl pampa kikakis tlen kijtoa tokni. Ijkuakon  kajsikamati tokni ayakmo okachi ueli kitlajtoltia Biblia, uan noijki amo okachi ueli nejnemi ijkuak tetlapouia. Ijkon kajsikamati ken kineki ma kipaleuikan tokni tlen yikipia miak xiuitl. Tikchiuaskej ken Jehová tla timochijchikauaj pampa tikajsikamatiskej tlen kimachiliaj tokniuan uan tikintlasojtlaj (1 Corintios 12:26).

Xikchiua tlen kuali ken Jehová (Xikita párrafo 7)

7. ¿Ken uelis tikinpaleuiskej tokniuan akinmej tlajyouiaj?

7 Oui tikajsikamatiskej tlen kinpanoa oksekimej tlaltikpaktlakamej, uan okachi tla amo keman ijkon otechpanok. Se neskayotl, miakej tokniuan mokokoaj, sapanoa motekipachoaj, itlaj amo kuali okinpanok, yikipia miak xiuitl noso ikaj okintlajyouilti. Oksekimej inselti kinmiskaltiaj inkoneuan. Uan oksekimej kitekichiuiliaj Jehová maski intatajuan amo. Nochtin titlajyouiaj. Ik non, sejse tokniuan moneki tlatlamantli ma tikinpaleuikan. Ik non, moneki ma tikinpaleuikan tokniuan uan ma tikintlasojtlakan. ¿Ken uelis tikchiuaskej? Ma tikinkakikan, ma timokuayejyekokan tlen kimachiliaj uan ma timochijchikauakan pampa tikajsikamatiskej tlen kinpanoa. Noijki uelis tikinmiluiskej Jehová kinpatioita. Uan uelis noijki tikinpaleuiskej noso tikinyolchikauaskej. Ijkon tikchijtoskej ken Jehová (xiktlajtolti Romanos 12:15 uan 1 Pedro 3:8).

MA TIKINCHIUILIKAN TLEN KUALI OKSEKIMEJ IJKON KEN JEHOVÁ

8. ¿Tleka Jesús okinchiuiliaya tlen kuali oksekimej?

8 Jehová uan Jesús kinchiuiliaj tlen kuali nochtin tlaltikpaktlakamej (Lucas 6:35). ¿Tleka Jesús okinchiuiliaya tlen kuali oksekimej tlaltikpaktlakamej? Omokuayejyekoaya tlen kimachiliskiaj ika tlen kinchiuiliskia. Se neskayotl, se tonal se siuatl tlen okichi miak tlamantli amo kuali okitato Jesús. Siuatl sapanoa ochokak, ik non, iikxiuan Jesús osiauakej. Ye okitak siuatl omoyolkuepki uan okitak tla kichiuiliskia tlen amo kuali ye okachi tlajyouiskia. Ik non, okitlapojpolui uan okilui kuali tlen okichijtoka. Se tlayekanki teopixki amo okipakti Jesús ma kitlapojpolui nin siuatl. Pero Jesús noijki okichiuili tlen kuali (Lucas 7:36-48).

Achto tikchiuas itlaj moneki ximokuayejyeko kox kinmijtlakos oksekimej tlen tikchiuas

9. ¿Tlen moneki ma tikchiuakan pampa ma tikchiuakan tlen kuali ken Jehová? Xikijto se neskayotl.

9 ¿Tlen moneki ma tikchiuakan pampa ma tikinchiuilikan tlen kuali oksekimej ijkon ken Jehová? Achto titlajtoskej moneki ma timokuayejyekokan  tlen kimachiliskej oksekimej. Nin techpaleuis pampa ma titetlasojtlakan uan amo ma tikinyolkokokan. Pablo okijto: “Se itékitki n Toteko mach kinamiki mamokualanijtinemi, yej moneki mamoyekwika iwan nochteh” (2 Timoteo 2:24). Ximokuayejyeko itech nin tlamantli. Tla akin mitsyekana kanin titekiti amo kuali kichiua iteki, ¿tlen tikchiuas? Tla se tokni tlen youejka amo omonechikoaya oksepa monechikoa touan, ¿tlen tikiluis? Tla titetlapouijtok uan ikaj mitsiluia amo majxilia, ¿tlen tikchiuas? Noso tla monamik mitsiluia tleka otikchi seki tlamantli uan amo achto otiktlajtlani, ¿tlen tikiluis? Ijkuakon moneki timokuayejyekoskej tlen kimachiliaj oksekimej uan tlen kimachiliskej ika tlen tikijtoskej. Ijkuakon tikintlakaitaskej uan tikchiuaskej ken Jehová (xiktlajtolti Proverbios 15:28).

MA TIIXTLAMATIKAN KEN JEHOVÁ

10, 11. ¿Ken uelis tiyetoskej tiixtlamatkej ken Jehová? Xikijto se neskayotl.

10 Jehová sapanoa ixtlamatki uan kimati tlen panos satepan. Tejuan amo uelis tikitaskej tlen panos satepan, pero kema uelis tikteititiskej tiixtlamatkej ken Jehová. ¿Ken uelis tikchiuaskej? Achto tikchiuaskej itlaj moneki timokuayejyekoskej kox techijtlakos tejuan noso oksekimej. Amo ma tikchiuakan ken israelitas. Yejuan amo omokuayejyekojkej tlen kinpanoskia pampa amo okitlakamatkej Jehová. Amo okitlasojkamatilijkej Jehová nion okipatioitakej tlen okinmakak nion ken iuan omouikayaj. Moisés okitaya amo kuali okichijtokaj, ik non, okinmilui ma kiteititikan ixtlamatilistli. Okinmilui tla yetoskiaj ixtlamatkej, uelis mokuayejyekoskiaj tlen kinpanoskia pampa amo otetlakamatkej (Deuteronomio 31:29, 30; 32:28, 29).

11 Pampa uelis tikajsikamatiskej ken uelis tiyetoskej tiixtlamatkej, ma tikitakan se neskayotl. Tla tinemi iuan se telpochtli noso iuan se ichpochtli, xikilnamiki sapanoa oui amo nankiteititiskej tlen nankimachiliaj uan amo nankichiuaskej auilnemilistli. ¿Ken uelis tiyetos tiixtlamatki? Ximochijchikaua pampa amo tiknekis tikchiuas tlen amo kuali. Ximomalui pampa amo tikchiuas itlaj tlen kichiuas ayakmo kuali ximouika iuan Jehová. Uan xikilnamiki, Jehová kineki xiyeto tiixtlamatki. Tla amo tikchiuas uelis titlajyouis (Proverbios 22:3).

MA TIKMALUIKAN TLEN TIMOKUAYEJYEKOAJ

12. ¿Tleka moneki ma tikmaluikan tlen timokuayejyekoaj?

12 Tla tiixtlamatkej, tikmaluiskej tlen timokuayejyekoaj. Tlen timokuayejyekoaj  ken tlitl. Tla timomaluiaj, tlitl uelis techpaleuis ken ijkuak titlakualchiuaj. Pero tla amo timomaluiaj, tlitl uelis kitlatis tokalijtik uan kichiuas ma timikikan. Ijkon panoa ika tlen timokuayejyekoaj. Noijki kuali tiyetoskej tla timokuayejyekoaj itech tlen techmaka Jehová. Pero tla timokuayejyekoaj tlen amo kuali, tla timokuayejyekoaj tiauilnemij, ajsis tonal ijkuak ijkon tikchiuaskej. Uan ijkuakon ayakmo timouikaskej iuan Jehová (xiktlajtolti Santiago 1:14, 15).

13. ¿Tlen omokuayejyeko Eva?

13 Ma tikitakan ineskayo Eva. Jehová okinnauati Adán uan Eva amo ma kikuakan “kuauitl itech ixtlamatilistli tlen kuali uan tlen amo kuali” (Génesis 2:16, 17). Pero Satanás okilui Eva: “Te melauak, amo timikis. Pampa Dios kimati itech tonal ijkuak te tikkuas nin, motlaposkej moixtololouan uan tiyetos ken Dios, tikmatis tlen kuali uan tlen amo kuali”. Okilui ye uelis kijtoskia tlen tlamantli kuali uan tlen amo kuali. Eva omokuayejyeko okachi kuali yetoskia. Itech non omokuayejyekoaya uan okachi okinekiaya kikuas tlakilotl. Uan oajsik tonal ijkuak okikua non tlakilotl. Satepan okimakak inamik uan ye noijki okikua (Génesis 3:1-6). Ik non, “por itlajtlakol se tlakatl n tlajtlákoli okalak itech nin tlaltíkpaktli iwa okualík mikílistli” (Romanos 5:12). Eva amo okimalui tlen omokuayejyekoaya.

14. ¿Tlen kijtoa Biblia itech auilnemilistli?

14 Eva amo oauilnenki. Pero Biblia kijtoa amo kuali ma timokuayejyekokan itech auilnemilistli. Jesús okijto: “Nochi tlakatl non kelewia se siwatl non amo iaxka, kijtosneki yokimomekati itech iyolo” (Mateo 5:28). Tlatitlanil Pablo noijki okijto: “Amo matiknekikah matikchiwakah tlan pitsotik” (Romanos 13:14).

15. ¿Tlen tlamantli okachi moneki ma tikchiuakan, uan tleka?

15 Biblia noijki techiluia amo moneki timokuayejyekoskej tikpiaskej miak tomin, okachi kuali timokuayejyekoskej tikchiuaskej itlanekilis Jehová. Tomin amo uelis kichiuas ma tiyolpakikan uan kuali ma timomachilikan (Proverbios 18:11). Jesús okijto ikaj amo kuali mokuayejyekoa tla kinektok kipias miak tomin uan ayakmo okachi kitekichiuilis Jehová. Maski kipias miak tomin “amitla kipiah ixpa n Dios” (Lucas 12:16-21). Miak ipati ma timochijchikauakan pampa tikchiuaskej tlen kineki toTajtsin Dios, pampa ijkon ‘tikoololoskej itech ilwikak tlan milák ipati’. Ijkon tiyolpakiskej uan noijki Jehová yolpakis (Mateo 6:20; Proverbios 27:11). Okachi ipati kuali ma timouikakan iuan toTajtsin Dios.

AMO MA TIMOTEKIPACHOKAN

16. 1) ¿Tleka moneki amo ximotekipacho? 2) ¿Tlen uelis mitspaleuis amo ximotekipacho?

16 Sapanoa titlajyouiskej tla tiknekij tikpiaskej miak tomin (Mateo 6:19). Jesús okijto tla nochipa timokuayejyekoaj tikpiaskej tomin, sapanoa oui tiknekiskej tikchiuaskej itlanekilis Jehová (Mateo 13:18, 19, 22). Pero noijki sekimej tlaltikpaktlakamej motekipachoaj pampa mokuayejyekoaj  itlaj amo kuali kinpanos. Pero tla ijkon techpanoa uelis timokokoskej uan ayakmo titlaneltokaskej itech Jehová. Okachi kuali ma titlaneltokakan Jehová kema techpaleuis. Biblia kijtoa: “Tlen kineki se tlakatl non tlen kitekipachojtok, pero se kuali tlajtoli non tlen kiyolchikaua” (Proverbios 12:25). Ik non, tla tejuatsin sapanoa timotekipachoa, ximotlapoui iuan se iTlaixpantijka Jehová uan xikilui itech ma mitsmachti. Motatajuan, monamik, se mokalchanejka noso se moyolikni uelis mitspaleuiskej okachi xitlaneltoka itech Jehová uan amo okachi ximotekipacho.

Tla itlaj mitstekipachoa, xiktlatlaujti Jehová uan ximokuayejyeko ken mitspaleuia

17. ¿Ken mitspaleuia Jehová ijkuak itlaj mitstekipachoa?

17 Jehová kajsikamati tlen tikmachiliaj uan techpaleuis ijkuak itlaj okachi techtekipachos. Tlatitlanil Pablo okijto: “Amitla manomechtekipacho, yej nochipa xikilikah n Toteko tlan nonkinekih keman nonmotiotsajtsiliah, xiktlajtlanilikah iwa ximotlasojkamatikah. Iyolsewilis Dios, non amaka weleti kajsikamati, kimokuitlawis nomoyolo iwa nomotlayejyekolis por Cristo Jesús” (Filipenses 4:6, 7). Ik non, tla itlaj mitstekipachoa, ximokuayejyeko itech nochi tlen kichiua Jehová pampa uelis iuan timouikas. Ye techpaleuia ika tokniuan itech tlanechikol, tlayekankej, ika tlakeuali yolmelajki, ángeles uan ika Jesús.

18. ¿Itech tlen uelis timokuayejyekoskej?

18 Axkan otimomachtijkej uelis tikchiuaskej ken Jehová tla timokuayejyekoaj tlen kimachiliaj oksekimej (1 Timoteo 1:11; 1 Juan 4:8). Uelis tiyolpakiskej tla tikintlasojtlaj uan tikinpaleuiaj oksekimej, tla timokuayejyekoaj tlen uelis tikchiuaskej uan tla amo timotekipachoaj. Ik non, ma timokuayejyekokan ken yetos xochitlali ijkuak tlanauatijtos iTekiuajkayo toTajtsin Dios uan noijki ma tikchiuakan ken Jehová (Romanos 12:12).