Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Mayo de 2015

Sekimej Techtlajtlaniaj

Sekimej Techtlajtlaniaj

¿Akin “Gog de Magog” tlen ijkuilitok itech amochtli Ezequiel?

Yiuejkika toamatlajkuiloluan kijtoaj Gog de Magog kijtosneki Satanás satepan ijkuak okiualkixtijkej itech iluikak. ¿Tleka ijkon kijtoaj toamatlajkuiloluan? Pampa itech Apocalipsis kijtoa Satanás ye akin itech nochi Tlaltikpak kichiuas ma kitlajyouiltikan ialtepe toTajtsin Dios (Apocalipsis 12:1-17). Ik non, otikneltokayaj Satanás noijki omotokayotiaya Gog.

Pero axkan mopatlas tlen otikneltokayaj. Achto ximokuayejyeko itech nin tlamantli, Biblia kijtoa ijkuak kixpoloskej Gog Jehová kichiuas ma kikuakan totomej uan yolkamej tlen kikuaj nakatl (Ezequiel 39:4). Uan noijki Biblia kijtoa Jehová kitokas itech altepetl Israel (Ezequiel 39:11). Pero ken Satanás se espíritu tlen amo mota, ¿ken uelis kikuaskej yolkamej uan totomej? ¿Uelis kitokaskej itech Tlaltikpak? Biblia kijtoa amo kikuaskej yolkamej nion kitokaskej itech Tlaltikpak, pampa Apocalipsis kijtoa Satanás kitsakuaskej mil xiuitl “kan sentlawejkatlantik” (Apocalipsis 20:1, 2).

Biblia kijtoa ijkuak tlamis mil xiuitl, Satanás oksepa kikajkauaskej uan ye “kinkajkayawati nochteh n tlaltikpaktlakah ik tlakpawik, tlatsintlawik, kan ik kisa iwa kan ik kalaki tonati. Kinkajkayawati n Gog iwa n Magog. Iwa kinseitilis insoldadojwah” (Apocalipsis 20:8). Itech nin tlaxelol tikitaj Satanás amo Gog pampa tla ijkon yetoskia ye iselti mokajkayauaskia. Kuali tikajsikamatij nion itech amochtli Ezequiel nion itech Apocalipsis “Gog” amo kijtosneki Satanás.

¿Axkan tlen kijtosneki “Gog de Magog”? Tikmatiskej akin ijkuak timomachtiskej Biblia uan tikmatiskej akin kitlajyouiltis ialtepe Jehová. Itech Biblia kijtoa ijkuak “Gog de Magog”, ueyi tekiua tlen kajki ik norte uan nochtin tekiuajkej itech nochi Tlaltikpak kitlajyouiltiskej ialtepe Jehová (Ezequiel 38:2, 10-13; Daniel 11:40, 44, 45; Apocalipsis 17:14; 19:19). ¿Nochi nin san se tlamantli kijtosneki? Uelis kema. Pampa Biblia kijtoa amo tlatlamantli akin kitlajyouiltis ialtepe Jehová. ¿Tleka ijkon tikijtoaj? Pampa Biblia kijtoa nochtin uejueyij altepemej kitlajyouiltiskej  ialtepe Jehová, ijkon peuas Armagedón (Apocalipsis 16:14, 16).

Tla tejuan tikitaj nochi tlen Biblia kijtoa itech ijkuak kitlajyouiltiskej ialtepe Jehová, kuali tikajsikamatij Gog de Magog amo kijtosneki Satanás. Kijtosneki seki uejueyij altepemej mosetiliskej. ¿Kinyekanas ueyi tekiua ik norte? Amo tikmatij. Pero uelis tikijtoskej kema, pampa Jehová okijto Gog akin uits ik norte kinnechikos miakej altepemej uan miakej soldados (Ezequiel 38:6, 15).

Teotlajtojki Daniel noijki okijto itech ueyi tekiua ik norte: “Pero tlen kikakis tlamochiua ik kanin kisa Tonaltsin uan ik norte sapanoa kitekipachos, uan kisas ika miak kualanilistli uan sapanoa miakej kinmixpolos. Uan ye kintlalis imantajkaluan kuajkualtsitsintin itlajkotia ueyi atl uan tepetl santo tlen Kuajkualtsin; uan ye ompa tlamis, uan amo ikaj kipaleuis” (Daniel 11:44, 45). Ezequiel uan Daniel okijkuilojkej tlen kichiuas Gog (Ezequiel 38:8-12, 16).

¿Tlen panos ijkuak kitlajyouiltiskej ialtepe toTajtsin Dios? Daniel okijto: “Itech non kauitl Miguel [Jesucristo] moketsas [itech Armagedón], ueyi príncipe tlen moketos [opejki itech xiuitl 1914] pampa kipaleuis moaltepe. Uan ijkuakon sapanoa tlajyouiskej [itech ueyi tlajyouilistli] ken amo keman omochiuaya desde ijkuak omochi altepetl. Uan itech non kauitl moaltepe cholos, nochtin akinmej ijkuilitokej itech non amochtli” (Daniel 12:1). Itech Apocalipsis 19:11-21 noijki ijkon techiluia tlen kichiuas Jesús ijkuak kitlajyouiltiskej ialtepe toTajtsin Dios.

Pero ¿akin “Gog iwa n Magog” tlen tikajsij itech Apocalipsis 20:8? Nin kijtosneki nochtin akinmej kixnamikiskej Jehová uan kitlajyouiltiskej ialtepe ijkuak tlamis mil xiuitl. Nochtin tlaltikpaktlakamej akinmej kitlajyouiltiskej ialtepe Jehová ijkuak tlamis mil xiuitl noijki kikokoliskej ialtepe Jehová ken Gog de Magog. Pero ijkon ken altepemej kintlajtlamiskej itech Armagedón, noijki ijkon kinmixpoloskej Gog uan Magog (Apocalipsis 19:20, 21; 20:9). Ik non, itech Biblia kijtoa nochtin akinmej kiixnamikiskej toTajtsin Dios ijkuak tlamis mil xiuitl intoka “Gog iwa n Magog”.

Akinmej kuali timomachtiaj Biblia, tikchixtokej ma mota akin yetos “ueyi tekiua ik norte”. Pero maski amo tikmatij akin kinyekanas nochtin altepemej tlen kitlajyouiltiskej ialtepe toTajtsin Dios, kema tikmatij ome tlamantli. Achto, Gog de Magog uan nochtin isoldados kinmiktiskej uan kintlajtlamiskej. Ome, toueyi Tekiua Jesús kimakixtis ialtepe toTajtsin Dios, uan kichiuas ma tiyoltokan itech se kualtsin xochitlali kanin ayakmo itlaj techmomojtis uan tikpiaskej yolseuilistli (Apocalipsis 7:14-17).