Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Febrero de 2016

Ma tikchiuakan ken akinmej mouikaj iuan Jehová

Ma tikchiuakan ken akinmej mouikaj iuan Jehová

“Jehová kuali mouika iuan akinmej kimauiliaj” (SALMO 25:14).

TLAKUIKALMEJ: 27 UAN 21

1-3. (1) ¿Tleka tikmatij uelis timouikaskej iuan Jehová? (2) ¿Tlen timomachtiskej?

ITECH Biblia eyi uelta moijtoa Abrahán iyolikni Jehová (2 Crónicas 20:7; Isaías 41:8; Santiago 2:23). Itech Biblia amo moijtoa okse tlen noijki omouikaya iuan Jehová. ¿Kijtosneki amo ikaj uelis mouikas iuan Jehová? Amo. Tinochtin uelis timouikaskej iuan Jehová. ¿Tleka ijkon tikijtoaj?

2 Itech Biblia tikinmajsij intoka miakej siuamej uan tlakamej yolmelajkej akinmej okitlakamatkej Jehová, itech otlaneltokakej uan kuali iuan omouikakej (xiktlajtolti Salmo 25:14 *). Nochtin yejuan pouij itech “miakeh tokniwah non kuali yokiteititijkeh intlaneltokalis” tlen intech otlajkuilo tlatitlanil Pablo (Hebreos 12:1).

3 Axkan timomachtiskej inneskayo ome siuamej uan se tlakatl tlen kuali omouikakej iuan toTajtsin Dios. Achto tikitaskej ineskayo Rut, se ichpochtli iknosiuatl akin ochantiaya itech ueyi altepetl Moab, uan okatka yolmelajki iixpan Jehová. Satepan  tikitaskej ineskayo ueyi tekiua Ezequías, akin otlanauati itech Judá uan tlen amo keman okika Jehová. Uan satepan tikitaskej ineskayo María, inantsin Jesús, akin okiteititi yolyamanilistli. Tikitaskej tlen okichijkej pampa uelis kuali mouikaskej iuan Jehová.

RUT OKATKA YOLMELAJKI

4, 5. (1) ¿Tlen omonekiaya kipejpenas Rut? (2) ¿Tleka sapanoa oui tlen kipejpenaskia? (Xikita tlaixkopinal tlen ika peua tlamachtil).

4 Noemí se siuatl israelita tlen ochantiaya Moab onejnentoka pampa mokuepaskia Israel. Iuan oyayaj Rut uan Orpá, ome isiuamouan. Ijkuak onejnentokaj, Orpá okinek mokuepas iuan itatajuan itech ueyi altepetl Moab. Pero Noemí okinekiaya ajsiti itech ueyi altepetl Israel. ¿Tlen kichiuaskia Rut? ¿Mokuepaskia Moab iuan ikalchanejkauan? ¿Noso yaskia iuan Noemí? (Rut 1:1-8, 14). Sapanoa oui pampa kipejpenaskia tlen kichiuaskia. ¿Tleka?

5 Tla Rut mokuepaskia Moab, uelis chantiskia iuan ikalchanejkauan akinmej kuali kimaluiskiaj. Uan noijki chantiskia kanin oneski uan tlajtoskia ken okimachtijkej. Uan Noemí amo okilui noijki ijkon uelis yetoskia itech ueyi altepetl Israel. Noijki Noemí okilui amo uelis kipaleuiskia ma kipia inamik uan ikalchanejkauan. Ik non, Noemí okilui Rut ma mokuepa ikalijtik. Ken yotikitakej, Orpá kema omokuepki ialtepe uan iuan iteotsitsiuan (Rut 1:9-15). Pero Rut amo okinek mokuepas ialtepe nion kinueyichiuas teotsitsintin.

6. (1) ¿Tlen kuali tlamantli okipejpenki Rut? (2) ¿Tleka Boaz okijto Rut okitemo tlapaleuilistli itlampa iajasuan Jehová?

6 Uelis Rut okimatki itech Jehová pampa inamik noso Noemí okitlapouijkej. Okimatki Jehová amo ken teotsitsintin tlen okinueyichiuayaj itech Moab. Ye okitlasojtlak Jehová uan okajsikamatki omonekiaya ma kitlasojtla uan ma kiueyichiua. Ik non, kuali okipejpenki tlen kichiuas. Ye okilui Noemí: “Moaltepe yetos noaltepe, uan moDios yetos noDios” (Rut 1:16). Melauak techyolpaktia tikitaskej ken Rut sapanoa okitlasojtlaya Noemí. Pero okachi techyolpaktia tikitaskej ken Rut sapanoa okitlasojtlaya Jehová. Ik non, se israelita tlen omotokayotiaya Boaz okilui Rut kuali tlen okichi pampa okitemo tlapaleuilistli itech toTajtsin Dios (xiktlajtolti Rut 2:12 *). Tlen Boaz okijto techilnamiktia tlen kichiua se piotsin, ye kalaki itlampa iajasuan inantsin pampa ma kimalui (Salmo 36:7; 91:1-4). Uan non tlen okichi Rut. Ye okitemo itlasojtlalis Jehová uan noijki ma kimalui, uan toTajtsin Dios okiteochi pampa itech otlaneltokak. Rut amo keman omoyolkoko pampa tlen okipejpenki.

7. ¿Tlen kinpaleuis akinmej amo kinekij motemakaskej iixpan Jehová?

7 Sapanoa miakej tlaltikpaktlakamej momachtiaj itech Jehová, pero amo kinekij kitemoskej tlapaleuilistli itlampa iajasuan. Amo motemakaj iixpan Jehová nion moapolaktiaj. Tla ijkon mitspanoa, ¿tlen uelis tikchiuas? Achto, ximokuayejyeko tleka amo tikneki timotemakas iixpan Jehová. Ome, xikilnamiki axkan tinochtin tiktekichiuiliaj Jehová noso se teotsin (Josué 24:15). Tlen okachi kuali, moneki tiktekichiuiliskej akin melauak toTajtsin Dios. Uan eyi, xikilnamiki, ijkuak timotemakaj iixpan Jehová, tikteititiaj tikneltokaj ye techmaluis  uan techpaleuis ijkuak itlaj techtlajyouiltis. Uan non tlen toTajtsin Dios okichi iuan Rut.

EZEQUÍAS OKIPEJPENKI KUALI MOUIKAS IUAN JEHOVÁ

8. ¿Tlen tlamantli okipanok Ezequías ijkuak omoskalti?

8 Ezequías amo okatka ken Rut, pampa ye oneski itech se altepetl tlen okijto kitekichiuiliskia Jehová. Pero sekimej israelitas amo nochipa okitekichiuilijkej Jehová. Se neskayotl, itajtsin Ezequías okatka se ueyi tekiua tlen sapanoa okichiuaya tlen amo kuali. Nin ueyi tekiua amo okitlakaitak iteokal toTajtsin Dios uan okinmilui judíos ma kinueyichiuakan oksekimej teotsitsintin. Uan noijki, miakej iikniuan Ezequías okintlamanili iteotsitsiuan. Ijkuak Ezequías okatka konetl okipanok miak tlamantli amo kuali (2 Reyes 16:2-4, 10-17; 2 Crónicas 28:1-3).

9, 10. (1) ¿Tleka Ezequías uelis kualaniskia? (2) ¿Tleka amo moneki ma tikualanikan iuan Jehová? (3) ¿Tleka amo moneki timokuayejyekoskej totatajuan kijtoskej tlen tikchiuaskej?

9 Itajtsin amo kuali okimachti Ezequías, ik non, ye uelis kualaniskia iuan Jehová. Pero Ezequías amo ijkon okichi. Axkan, miakej amo kinpanoa miak tlamantli amo kuali ken Ezequías, pero mokuayejyekoaj tlen kinpanoa kichiua ma kualanikan iuan Jehová noso iuan ialtepe (Proverbios 19:3). Oksekimej kineltokaj ken inkalchanejkauan amo okitlakamatkej Jehová, yejuan noijki kichiuaskej tlen amo kuali ijkon ken intatajuan (Ezequiel 18:2, 3). Pero ¿melauak uelis ijkon kichiuaskej?

10 Tlen okipanok Ezequías techmachtia nin amo melauak. Nion se tlamantli kichiuas ma timokualanikan iuan Jehová. Amo itlajtlakol tlamantli amo kuali tlen kinpanoa tlaltikpaktlakamej (Job 34:10). Uan maski tetajmej uelis kinmachtiskej inkoneuan ma kichiuakan tlen kuali noso tlen amo kuali (Proverbios 22:6; Colosenses 3:21). Amo moneki timokuayejyekoskej totatajuan kijtoskej tla tikchiuaskej tlen kuali noso amo. ¿Tleka? Pampa Jehová otechchijchi sejse tejuan ma tikijtokan tlen tikchiuaskej (Deuteronomio 30:19). ¿Tlen okichi Ezequías ika tlen Jehová okimakak?

Miakej telpokamej kipejpenaj kitekichiuiliskej Jehová, maski intatajuan kichiuaj tlen amo kuali. (Xikinmita párrafos 9, 10).

11. ¿Tleka Ezequías okatka se kuali ueyi tekiua?

11 Maski itajtsin Ezequías sapanoa okichi  tlen amo kuali itech altepetl Judá, Ezequías okichi tlen kuali (xiktlajtolti 2 Reyes 18:5, 6 *). ¿Tleka? Pampa okipejpenki amo kichiuas ken itajtsin. Okipejpenki kinkakis tlen okijtojkej iteotlajtojkej Jehová, ken Isaías, Miqueas uan Oseas. Ik non, ye okiyektlali miak tlamantli amo kuali tlen okichi itajtsin. Okichipa teokali, okitlatlaujti Jehová ma kitlapojpolui nochi tlen amo kuali okichi altepetl uan noijki okinpojpolo teotsitsintin tlen okatkaj itech nochi altepetl (2 Crónicas 29:1-11, 18-24; 31:1). Satepan, ijkuak Senaquerib ueyi tekiua itech Asiria okinekiaya kimoaxkatis Judá, Ezequías okiteititi otlaneltokaya itech Jehová uan okatka yolchikauak. Uan noijki okinmilui judíos ma tlaneltokakan itech Jehová pampa ye kinmakixtiskia (2 Crónicas 32:7, 8). Se uelta omoueyineki, pero okiseli ijkuak okiyektlalijkej uan satepan oksepa okiteititi yolyamanilistli (2 Crónicas 32:24-26). Ken tikitaj, Ezequías amo okichi tlen amo kuali san pampa ikalchanejkauan okichijkej tlen amo kuali. Okiteititi kuali omouikaya iuan Jehová. Tinochtin moneki ma tikchiuakan ken nin ueyi tekiua.

12. ¿Tlen okichijkej miakej tokniuan ijkon ken Ezequías?

12 Axkan tlaltikpaktlakamej kichiuaj miak tlamantli amo kuali. Ik non, miakej tetajmej amo kintlasojtlaj nion kinmaluiaj inkoneuan (2 Timoteo 3:1-5). Miakej tokniuan noijki ijkon okinmiskaltijkej, pampa itech ikalchanejkauan okatka miak tlajyouilistli, pero yejuan okipejpenkej mouikaskej iuan Jehová. Ijkon ken Ezequías, okiteititijkej yejuan amo omonekiaya kichiuaskej tlen amo kuali ken intatajuan. ToTajtsin Dios otechchijchi pampa ma tikpejpenakan kox tiktekichiuiliskej uan tikueyichiuaskej, ijkon ken okichi Ezequías.

“NEJ NIITEKIPANOJ IN SEÑOR”

13, 14. (1) ¿Tlen tlamantli uelis okitekipachoaya María? (2) ¿Tlen okijto María?

13 Miak xiuitl satepan, itech altepetl Israel okatka se ichpochtli yolyamanki tlen omotokayotiaya María. Ye noijki kuali omouikaya iuan Jehová. Ik non, okimakak se kuali tekitl. Kipiaskia iKone toTajtsin Dios uan omonekiaya ma kiskalti. Jehová okimakak nin tlateochiualistli pampa okitlasojtlaya uan itech otlaneltokaya. Pero ¿tlen okichi María ijkuak okimatki tlen kichiuaskia?

“Nej niitekipanoj in Señor”. (Xikinmita párrafos 13, 14).

14 Nochipa techiluiaj ken toTajtsin Dios okiteochi María. Pero ¿yotimokuayejyeko tlen okitekipachoaya? Se neskayotl, ángel Gabriel okilui kipiaskia se konetl, pero amo motekaskia iuan se tlakatl. Pero ángel amo okinmilui ikalchanejkauan uan oksekimej ken kipiaskia non konetl. Ik non, uelis  María omotekipachoaya tlen kijtoskiaj oksekimej. ¿Uan tlen kiluiskia José pampa ma kineltoka amo okikajkaya? Uan noijki omonekiaya kiskaltis uan kimachtis ikone toTajtsin Dios, nin se tekitl tlen sapanoa oui. Amo tikmatij nochi tlen okitekipachoaya María. Pero kema tikmatij tlen okinankili ángel Gabriel. María okijto: “Nej niitekipanoj in Señor. Ma kichiwa nowan ijkón ken yotikijtoj” (Lucas 1:26-38, ITlajtol toTajtzin Dios).

15. ¿Tleka María sapanoa otlaneltokaya?

15 María sapanoa otlaneltokaya itech Jehová. Ye okinekiaya kichiuas san tlen kiluiskia, ijkon ken se tlakeuali. Okineltokaya Jehová kimaluiskia. ¿Tleka otlaneltokaya itech Jehová? Ijkuak oneski amo okipiaya tlaneltokilistli. Pero kema omochijchika pampa kichikauas itlaneltokilis, uan toTajtsin Dios okiteochi (Gálatas 5:22; Efesios 2:8). ¿Tleka tikijtoaj María okichika itlaneltokilis? Pampa ken otlakakiaya uan itech nochi tlamantli tlen okijtoaya.

16. ¿Tleka tikijtoaj María kuali otlakakiaya?

16 ¿Ken otlakakiaya? Itech Biblia Jehová kijtoa: “Nonnochteh san xitlamatokah ijkuak nonkinkakiskeh oksikimeh, amo san nima xitlajtokah” (Santiago 1:19). Uan non tlen okichiuaya María. Biblia kijtoa ye kuali otlakakiaya, uan okachi ijkuak okitlapouiayaj itech Jehová. Uan noijki okixeloaya kauitl pampa itech mokuayejyekos. Se neskayotl, ye ijkon okichi ijkuak oneski Jesús uan tlajpixkej okitlapouijkej tlen okinmilui ángel. Uan ijkuak Jesús okipiaya 12 xiuitl, ye okijto itlaj tlen oajsik itech iyolo María. Itech ninmej ome neskayomej, ye kuali otlakakik, omokuayejyeko itech tlen okiluijkej uan amo okilka (xiktlajtolti Lucas 2:16-19, 49, 51).

17. ¿Tlen techmachtia tlen María okijtoaya?

17 Tlen okijtoaya. Biblia amo kipia miakej tlajtolmej tlen okinmijto María. San itech Lucas 1:46-55 tikinmajsij miakej tlajtolmej tlen okinmijto María. Ninmej tlaxelolmej techmachtiaj María kuali okimatiaya Tlen omoijkuilo ika tlajtoli hebreo uan arameo. ¿Tleka ijkon tikijtoaj? Pampa tlen María okijto, techilnamiktia itlaj tlen okijto Ana, inantsin Samuel ijkuak okitlatlaujti Jehová (1 Samuel 2:1-10). Uelis san itech non tonal María kanaj 20 veces okijto itlaj itech iTlajtol toTajtsin Dios. Tikitaj ye okipaktiaya kintlapouis oksekimej itech nochi tlen omomachtiaya itech iyolikni, Jehová.

18. ¿Ken uelis titlaneltokaskej ken María?

18 Tla se tonal moneki tikchiuaskej itlaj tlen sapanoa oui, uelis timomachiliskej ken María. ¿Tlen uelis tikchiuaskej? Ma titlaneltokakan ijkon ken ye. ¿Ken uelis ijkon tikchiuaskej? Ma tikselikan tekitl ika yolyamanilistli uan ma tikneltokakan Jehová techpaleuis. Kuali ma tikkakikan Jehová uan ma timokuayejyekokan tlen itech yotimomachtijkej uan tlen kichiuas satepan. Uan ika miak yolpakilistli ma tikintlapouikan oksekimej itech tlen yotimomachtijkej (Salmo 77:11, 12; Lucas 8:18; Romanos 10:15).

19. ¿Tlen tlateochiualistli tikpiaskej tla tikchiuaj ken iyolikniuan Jehová?

19 Ken yotimomachtijkej, Rut, Ezequías uan María kuali omouikayaj iuan Jehová ijkon ken Abrahán. Itech “miakeh tokniwah non kuali yokiteititijkeh intlaneltokalis” katej miakej itekipanojkauan Jehová akinmej noijki kuali iuan omouikakej. Nochipa ma titlaneltokakan ken yejuan (Hebreos 6:11, 12). Tla ijkon tikchiuaj, noijki uelis kuali timouikaskej iuan Jehová.

^ párr. 2 Salmo 25:14 kijtoa: “Jehová kuali mouika iuan akinmej kimauiliaj, uan ye kichiua ma kixmatikan itlajtolsenkaualis”.

^ párr. 6 Rut 2:12 kijtoa: “Jehová ma mitsteochiua pampa nochi tlen otikchi uan ijkon xikpia se kuali tlaxtlauili tlen uits itech Jehová iDios Israel, pampa itlampa iajasuan otimopaleuiko”.

^ párr. 11 2 Reyes 18:5, 6 kijtoa: “Ye otlaneltokak itech Jehová iTajtsin Dios Israel; amo okatka nion se ken ye itech nochtin uejueyij tekiuajkej itech Judá nion achto nion satepan. Ye omotokijtia itech Jehová. Ye amo omoxelo kitokas, ye okintlakamatiaya itlanauatiluan Jehová tlen okitemakak ika Moisés”.