Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Febrero de 2016

Ma tiktekichiuilikan Jehová ika yolpakilistli

Ma tiktekichiuilikan Jehová ika yolpakilistli

¿KEMAN okachi otiyolpakik? Sekimej kijtoskej ijkuak omonamiktijkej. Oksekimej kijtoskej ijkuak oneski achto inkone. Pero uelis tejuatsin okachi otiyolpakik ijkuak otimoapolakti. Akinmej noijki kitekichiuiliaj Jehová, sapanoa oyolpakej ijkuak okitakej te otikteititi tiktlasojtla Jehová ika nochi moyolo, monemilis, motlalnamikilis uan mochikaualis (Marcos 12:30).

Uan desde ijkuak otimoapolakti sapanoa tiyolpaki tiktekichiuilia Jehová. Pero oksekimej tokniuan ayakmo okachi yolpakij ijkuak kitekichiuiliaj Jehová. ¿Tleka? ¿Tleka moneki ma tiyolpakikan ijkuak tiktekichiuiliaj Jehová? Ma tikitakan.

¿TLEKA SEKIMEJ AYAKMO YOLPAKIJ?

Tlen kichiuas iTekiuajkayo Jehová sapanoa techyolpaktia, pampa Jehová techiluia nin Tekiuajkayotl kitlajtlamis nochi tlen amo kuali uan kikuepas Tlaltikpak se kualtsin Xochitlali. Sofonías 1:14 kijtoa: “Iueyi tonal Jehová amo uejka kajki”. Pero maski moijtoa “amo uejka kajki”, uelis tikneltokaj nin tonal uejkaua. Tla ijkon timokuayejyekoaj ayakmo tiyolpakiskej ijkuak tiktekichiuiliaj Jehová (Proverbios 13:12).

Tiyetoskej iuan tokniuan kichiua ma tiktekichiuilikan Jehová ika yolpakilistli. Uan noijki, uelis tikatej tiiTlaixpantijkauan Jehová pampa otikitakej ken inyelis akinmej kitekichiuiliaj Jehová (1 Pedro 2:12). Pero uelis timoyolkokoaj uan ayakmo tiyolpakij pampa se tokni kichiua itlaj amo kuali uan kiyektlaliaj.

Noijki ayakmo tiyolpakiskej pampa tiknekij tikpiaskej miak tlamantli uan tomin. Satanás uan nochi tlen kiyekantok kineki ma tikneltokakan moneki ma tikkoakan tlamantli tlen amo tiktekitiltiaj. Pero ma tikilnamikikan tlen okijto Jesús: “Amaka tlakatl weletis kintekitilis ome inteko, porke se kitlawelitas iwa non ok se kitlasojtlas, noso se kitlakitas iwa non ok se mach kitlakitas. Amaka weletis kimopantis Dios tla satlawel momijmiktia para kitlawelpias tomi” (Mateo 6:24). Tla tiknekij tikpiaskej nochi tlen onka itech Tlaltikpak, amo tiyolpakiskej ijkuak tiktekichiuiliaj Jehová.

¿TLEKA MONEKI MA TIKTEKICHIUILIKAN JEHOVÁ IKA YOLPAKILISTLI?

Ijkuak tiktlasojtlaj Jehová, amo tikitaj ken itlaj etik tiktekichiuiliskej (1 Juan 5:3). Jesús okijto: “Xiwikih nonawak nonnochteh akimeh tekitih chikawak iwa yononsotlawakeh, iwa Ne nomechsewis. Xikwikakah notlamamal, iwa xikchiwakah tlan Ne nikchiwa, porke Ne niyolyámanki iwa niteiknoma. Iwa nonkajsiskeh yolsewílistli itech nomoyolo. Porke n tekitl non Ne nikneki xikchiwakah amo owi se kitlakitas, iwa tlan Ne nomechnawatia, noiwa amo tesotla” (Mateo 11:28-30). Ik non, tla melauak tikchiuaj ken Cristo sapanoa tiyolpakiskej. Onka miak tlamantli tlen kichiuas ma tiyolpakikan  ijkuak tiktekichiuiliaj Jehová. Ma tikitakan eyi tlamantli (Habacuc 3:18).

Tiktekichiuiliaj akin oTechchijchi ye toTajtsin Dios akin sapanoa yolpaki (Hechos 17:28; 1 Timoteo 1:11). Tinochtin tikmatij tiyoltokej pampa Jehová otechchijchi. Ijkon timokuayejyekoskej kichiuas ma tiktekichiuilikan ika yolpakilistli, maski youejka noso yikin otimoapolaktijkej.

Héctor mochijchikaua tetlapouis uan mokuayejyekoa itech Xochitlali.

Ximokuayejyeko tlen okipanok se tokni tlen itoka Héctor. Ye otekitik ken tlayekanki itech circuito kanaj 40 xiuitl. Maski axkan yikipia miak xiuitl, ye ok yolpaki kitekichiuilia Jehová (Salmo 92:12-14). Isiua sapanoa mokokoa, uan ye ayakmo okachi kitekichiuilia Jehová ken ijkuak okipiaya chikaualistli. Pero ye ok yolpaki. Ye kijtoa kiyolkokoa kitas isiua okachi mokokoa. Uan maski oui kimaluis isiua, nin amo kichiua ayakmo ma yolpaki ijkuak kitekichiuilia Jehová. Ijkuak mokuayejyekoa tleka okichijchi Jehová, ye okachi kitlasojtla uan kineki kitekichiuilis ika nochi iyolo. Ik non, mochijchikaua okachi tetlapouis uan nochipa kilnamiktok tlen yetos itech Xochitlali. Nin kipaleuia ma kitekichiuili Jehová ika yolpakilistli.

Jehová okitemakak iKone ma mikiki topampa. Biblia kijtoa: “Totajtsi Dios saikpanoa okintlasojtlak n tlaltikpaktlakah, yika okitemakti non sanwel Ye se Ikone, para nochteh akimeh kineltokaskeh amo mamoixpolokah, yej makipiakah se yankuik nemílistli non ayik tlami” (Juan 3:16). Tla titlaneltokaj itech nin kualtsin tetliokolil tlen otechmakak Jehová, ye uelis techtlapojpoluis uan uelis kichiuas nochipa ma tiyoltokan. Nin kichiua ma tiktlasojkamatilikan Jehová. Tla tiktlasojkamatiliaj Jehová, tiktekichiuiliskej ika yolpakilistli.

Jesús okipejpenki ayakmo kipias miak tlamantli uan axkan youejka kitekichiuilijtok Jehová ika yolpakilistli.

Itech ueyi altepetl México kajki se tokni tlen itoka Jesús, ye sapanoa otekitiaya. Ualeua otekitiaya miak horas pampa uelis kipiaskia okachi tomin. Pero ijkuakon okixmatki Jehová uan okimatki ye okitemakak iKone ma mikiki topampa. Sapanoa okinekiaya kitekichiuilis Jehová, ik non, omotemakak iixpan Jehová uan okijto kitekichiuiliskia ika nochi iyolilis. Uan maski yokipiaya 28 xiuitl otekitiaya, ye omokuayejyeko kikauas non tekitl. Axkan yikipia miak xiuitl kitekichiuilijtok Jehová uan sapanoa yolpaki.

Akinmej tikchiuaj ken Cristo tikpiaj chipauak tonemilis. ¿Tikilnamiki tlen otikchiuaya ijkuak ayamo otikixmatiaya Jehová? Tlatitlanil Pablo okinmilui tokniuan tlen okatkaj Roma tlen okichiuayaj ijkuak ayamo okitekichiuiliayaj Jehová, ye okinmilui “maya achto ononmotemaktijkah itech tlajtlákoli”, axkan “ya nontlanémakteh itech n yekmilawálistli”. Ken innemilis chipauak, yejuan uelis yoltoskiaj nochipa (Romanos 6:17-22).  Tejuan noijki tiktlakamatij tlen technauatia toTajtsin Dios. Ik non, tejuan amo titlajyouiaj pampa tonemilis chipauak noso amo tikchiuaj tlen amo kuali. Nochi nin kichiua ma tiyolpakikan.

Jaime kijtoa okachi oyolpakik ijkuak opejki kitekichiuilia Jehová.

Ma tikitakan ineskayo se tokni tlen itoka Jaime. Ijkuak ayamo omochiuaya iTlaixpantijka Jehová ye okatka boxeador. Uan noijki amo otlaneltokaya itech toTajtsin Dios, ye okineltokaya tiuitsej itech se yolkatl. Ijkuak opejki monechikoa iuan iTlaixpantijkauan Jehová, sapanoa okitlajtlachialti ken motlasojtlaj. Okinek kipatlas inemilis, pero okitlatlaujti Jehová ma kipaleui pampa itech tlaneltokas. Jaime kijtoa: “Yolik onikmatki Jehová ye toTajtsin Dios akin sapanoa tetlasojtla uan teiknomati”. Ye kuali kimati kitlakamatis Jehová sapanoa yokipaleui. Kijtoa tla amo kipatlaskia inemilis uelis axkan ayakmo yoltoskia, ijkon ken oksekimej tlen noijki omoteuiayaj. Ye kuali kimati, okachi oyolpakik ijkuak opejki kitekichiuilia Jehová.

AMO MA TIMOSOTLAUAKAN

Ijkuak tikchiaj ma tlami nochi tlen amo kuali, ¿tlen moneki ma tikchiuakan? Yitikchijtokej tlen kineki toTajtsin Dios uan tikchiaj tiyoltoskej nochipa. Ik non, ma tikchiuakan ken kijtoa Biblia: “Nochipa matikchiwakah tlan kuali iwa amo matimosotlawakah, porke ajsiki n tonati tipixkaskeh, tla amo timosotlawah” (Gálatas 6:8, 9). Ma tiktlasojkamatilikan Jehová uan ma timochijchikauakan amo ma timosotlauakan, pampa tikpiaskej toyelis ken moneki ijkuak tlamis nochi tlen amo kuali uan nochipa ma tiktekichiuilikan Jehová ika yolpakilistli (Apocalipsis 7:9, 13, 14; Santiago 1:2-4).

Tla titlaxikoaj, Jehová techteochiuas. ¿Tleka? Pampa ye kimati nochi tlen tikchiuaj uan kimati tiktlasojtlaj. Tla tiktekichiuiliaj ika yolpakilistli, timomachiliskej ken David ijkuak okijto: “Nochipa nikpia Jehová noixpan. Pampa ye kajki noyekma, amo keman necholiniskej. Ik non, niyolpaki” (Salmos 16:8, 9).