Xikita nochi

Tlen kiualika

Ma tikchiuakan ken itekipanojkauan Jehová tlen okatkaj yolmelajkej

Ma tikchiuakan ken itekipanojkauan Jehová tlen okatkaj yolmelajkej

“¿Uan tlen mitstlajtlanilia Jehová? ¡Moneki tikpias melajkayotl uan tiktlasojtlas yolmelajkayotl uan ika yolyamanilistli tinemis iuan moDios!” (MIQUEAS 6:8).

TLAKUIKALMEJ: 18 UAN 43

1, 2. ¿Ken okiteititi David okatka yolmelajki iixpan Jehová? (Xikita tlaixkopinal tlen ika peua tlamachtil).

DAVID iuan isoldados okatkaj kanin tlauaki itech Judá. Ompa omotlatijtokaj pampa Saúl uan 3,000 isoldados okitemoayaj David pampa kimiktiskej. Se yoak David uan oksekimej tlakamej okajsikej kanin Saúl uan isoldados okochtokaj. David uan se isoldado oajsitoj ichtaka kanin okatka Saúl. Abisai okilui David ma kikauili ma kimikti. Pero David amo okikauili uan okilui: “¿Akin itlaj yokichiuili itlapejpenal Jehová uan amo itlaj kipanoa?”. Uan David okilui: “¡Ne amo uelis itlaj nikchiuilis, ijkon ken kita Jehová, amo uelis itlaj nikchiuilis itlapejpenal Jehová!” (1 Samuel 26:8-12).

2 David kuali okimatiaya Saúl okatka tekiua pampa Jehová okipejpenki. Kuali okimatiaya tla okinekiaya yetos yolmelajki iixpan  Jehová, omonekiaya kitlakaitas Saúl. Ik non, amo omokuayejyeko itlaj kichiuilis. Axkan noijki Jehová kineki ma tiyetokan tiyolmelajkej iixpan uan ma tikintlakaitakan akinmej okintlali ma techyekanakan (xiktlajtolti Miqueas 6:8 *).

3. ¿Ken okiteititi Abisai okatka yolmelajki iixpan David?

3 Abisai okitlakaitaya David pampa okimatiaya ye Jehová okipejpenki pampa ma yeto ueyi tekiua. Pero David ijkuak yokatka ueyi tekiua otlajtlakolchi. Oauilnenki iuan isiua se tlakatl. Uan satepan okinauati Joab ma kimiktikan inamik nin siuatl itech se guerra (2 Samuel 11:2-4, 14, 15; 1 Crónicas 2:16). Joab okatka iikni Abisai, ik non, uelis okimatiaya tlen okichi David. Noijki, Abisai okinyekanaya soldados, pampa okipiaya non tekitl uelis kinekiskia yetos ueyi tekiua. Pero amo ijkon okichi. Okachi kuali okitlakaitak David iuan otekitik uan okimalui itech akinmej okikokoliayaj (2 Samuel 10:10; 20:6; 21:15-17).

4. (1) ¿Tleka tikijtoaj David itech nochi iyolilis nochipa okatka yolmelajki iixpan Jehová? (2) ¿Tlen timomachtiskej axkan?

4 David nochipa okatka yolmelajki. Ijkuak okatka telpochtli, okimikti se ueyi tlakatl itoka Goliat akin okipinati Jehová (1 Samuel 17:23, 26, 48-51). Uan ijkuak yokatka ueyi tekiua uan otlajtlakolchi, Jehová okititlanili teotlajtojki Natán pampa ma kilui tlen okichi. David okikak tlen okilui teotlajtojki uan omoyolkuepki (2 Samuel 12:1-5, 13). Uan ijkuak yokipiaya miak xiuitl, okitemakak miak tlamantli tlen okipiaya pampa ma kichijchiuakan iteokal Jehová (1 Crónicas 29:1-5). Ken tikitaj, maski sapanoa otlajtlakolchi, ye nochipa okatka yolmelajki iixpan Jehová (Salmo 51:4, 10; 86:2). Itech nin tlamachtil timomachtiskej itech ineskayo David uan itech oksekimej. Tikitaskej ken uelis tiyetoskej tiyolmelajkej iixpan Jehová uan amo iixpan se tlaltikpaktlakatl. Uan noijki tikitaskej ken moneki tikpiaskej toyelis pampa tiyetoskej tiyolmelajkej iixpan toTajtsin Dios.

¿TIYETOSKEJ TIYOLMELAJKEJ IIXPAN JEHOVÁ?

5. ¿Tlen techmachtia tlen okinekiaya kichiuas Abisai?

5 Ijkuak Abisai okinekiaya kimiktis Saúl ye okiteititijtoka okatka yolmelajki iixpan David. Pero amo okajsikamatiaya tla itlaj kichiuiliskia “itlapejpenal Jehová”, amo yetoskia yolmelajki iixpan Jehová. Uan David kuali okajsikamatiaya, ik non, amo okikauili Abisai ma kimikti Saúl (1 Samuel 26:8-11). ¿Tlen techmachtia tlen okinekiaya kichiuas Abisai? Ijkuak amo kuali tikmatij akin iixpan tiyetoskej tiyolmelajkej moneki ma timokuayejyekokan ika tlen principios timoyekanaskej pampa tikpejpenaskej tlen okachi kuali.

Okachi ipati ma tiyetokan tiyolmelajkej iixpan Jehová uan amo inmixpan oksekimej.

6. Maski tinochtin tiknekij tiyetoskej tiyolmelajkej inmixpan tokalchanejkauan uan toyolikniuan, ¿tleka moneki timomaluiskej?

6 Tinochtin tiknekij tiyetoskej tiyolmelajkej inmixpan akinmej tikintlasojtlaj ken tokalchanejkauan uan toyolikniuan. Pero moneki timomaluiskej, pampa titlajtlakolejkej uan tlen tikmachiliaj uelis techkajkayauas uan non kichiuas amo ma tiyetokan tiyolmelajkej iixpan Jehová (Jeremías 17:9). Ik non, tla  se tokalchanejka noso toyolikni kichiua itlaj amo kuali uan kikaua Jehová, okachi kuali ma tikpejpenakan tiyetoskej tiyolmelajkej iixpan Jehová uan amo iixpan se tlaltikpaktlakatl (xiktlajtolti Mateo 22:37).

7. ¿Ken okiteititi se tokni okatka yolmelajki iixpan Jehová?

7 Ijkuak kikixtiaj se tokalchanejka itech tlanechikol, moneki tikpejpenaskej kox tiyetoskej tiyolmelajkej iixpan Jehová. Ma tikitakan tlen okipanok se tokni tlen itoka Anne. [1] (Xikita nota kanin tlami tlamachtil). Se tonal inantsin okinotski, akin okikixtijkej itech tlanechikol. Okinotski pampa kiluis kox uelis kitlajpaloti. Noijki okilui sapanoa omoyolkokoaya pampa amo ikaj okinotsaya. Anne sapanoa omoyolkoko uan okilui kijkuililis se carta tla kitlajpaloti. Pero achto kijkuiloskia carta, Anne kuali omokuayejyeko itech seki tlaxelolmej tlen katej itech Biblia (1 Corintios 5:11; 2 Juan 9-11). Ika tlasojtlalistli okiyekilui inantsin ye okinka ikalchanejkauan ijkuak otlajtlakolchi uan amo omoyolkuepki. Uan noijki okilui tla okinekiaya oksepa yolpakis, omonekiaya oksepa mokuepas iuan Jehová (Santiago 4:8).

8. ¿Tlen eyi tlamantli techpaleuis ma tiyetokan tiyolmelajkej iixpan Jehová?

8 Sekimej itekipanojkauan toTajtsin Dios tlen okatkaj ijkuak oyoltoka David okatkaj yolmelajkej pampa okiteititijkej yolyamankej, otetlasojtlakej uan okipiaya yolchikaualistli. Ma tikitakan ninmej eyi tlamantli ken uelis techpaleuis pampa tiyetoskej tiyolmelajkej iixpan Jehová.

MA TIYETOKAN TIYOLYAMANKEJ

9. ¿Tleka Abner okinekiaya kimiktis David?

9 Jonatán okatka ikone ueyi tekiua Saúl. Abner okinyekanaya isoldados Saúl. Jonatán uan Abner okitakej ijkuak David okimakato Saúl itsonteko Goliat. Jonatán kuali omouikak iuan David uan nochipa okiteititi yolmelajkayotl (1 Samuel 17:57-18:3). Pero Abner amo okatka yolmelajki iixpan David. Ik non, okipaleui Saúl pampa uelis kimiktiskia David (1 Samuel 26:1-5; Salmo 54:3). Jonatán uan Abner okimatiayaj toTajtsin Dios okipejpenki David pampa ma yeto okse ueyi tekiua itech altepetl Israel. Pero ijkuak Saúl omikik, Abner amo okipaleui David pampa ma mochiua ueyi tekiua, Abner okipaleui okse ikone Saúl. Uan uelis noijki Abner okinekiaya yetos ueyi tekiua. Ik non, uelis omotekak iuan se isiua ueyi tekiua  Saúl (2 Samuel 2:8-10; 3:6-11). ¿Tleka Jonatán kuali omouikak iuan David, pero Abner okinekiaya kimiktis David? Jonatán okatka yolyamanki uan yolmelajki iixpan Jehová, pero Abner amo.

10. ¿Tleka Absalón amo okatka yolmelajki iixpan Jehová?

10 Absalón okatka ikone ueyi tekiua David. Ye amo okatka yolyamanki, ik non, amo okatka yolmelajki iixpan Jehová. Maski okimatiaya Jehová okipejpenki itajtsin ma yeto ueyi tekiua, Absalón okinekiaya kipias nin tekitl. Ik non, otlanauati ma kichijchiuilikan se carro tlen kiuikaskiaj caballos uan iixpan yaskiaj 50 tlakamej (2 Samuel 15:1). Uan noijki okichi miakej israelitas ma kipaleuikan. Uan noijki okinekiaya kimiktis itajtsin (2 Samuel 15:13, 14; 17:1-4).

11. ¿Tlen techmachtia ineskayo Abner, Absalón uan Baruc?

11 Ineskayo Abner uan Absalón techmachtiaj tla amo tiyolyamankej uan tiknekij okachi titlanauatiskej, sapanoa oui tiyetoskej tiyolmelajkej iixpan Jehová. Pero tla tiktlasojtlaj Jehová, amo titenexikolitaskej ken Abner uan Absalón. Uan noijki, amo tiknekiskej tikpiaskej miak tomin, se kuali tekitl noso sapanoa timomachtiskej tlen uelis kichiuas ma tikneltokakan sapanoa topati. Nin kichiuas ayakmo kuali ma timouikakan iuan Jehová. Non tlen okipanok Baruc, akin okipaleuiaya Jeremías. Itech seki kauitl okinekiaya kipias tlen amo okinamikiaya, ik non, ayakmo oyolpakiaya ijkuak okitekichiuiliaya Jehová. “Tlen onikchijchi nikxixinijtok, uan tlen oniktokak nikuiuitlatok, itech nochi tlali. Pero te tiktemoa tlamantli tlen ipati pampa te” (Jeremías 45:4, 5). Baruc okatka yolyamanki uan okikak tlen Jehová okilui. Tejuan noijki moneki ma tikkakikan tlen techiluia Jehová, pampa ayakmo miak poliui kitlajtlamis nochi tlen amo kuali.

Tla se tokni tikiluiaj ma kinmilui tlayekankej ma kipaleuikan, tikteititiaj tiktlasojtlaj uan tiyolmelajkej iixpan Jehová.

12. Ika se neskayotl xikijto tleka amo tiyetoskej tiyolmelajkej iuan Jehová tla tinexikoltin.

12 Daniel, se tokni tlen chanti itech ueyi altepetl México, se tonal omonekiaya kipejpenas iuan akin yetoskia yolmelajki. Okitlasojtlaya se ichpochtli tlen amo okatka iTlaixpantijka Jehová sapanoa okitlasojtlaya uan okinekiaya iuan monamiktis. Daniel techiluia: “Maski onitekitiaya ken precursor nochipa oniktlajkuililiaya”. Pero ijkuakon Daniel okitak amo okatka yolmelajki iuan Jehová. Okajsikamatki okatka nexikoli uan omonekiaya yetos yolyamanki. Ik  non, okilui se tokni tlayekanki ma kipaleui. Daniel kijtoa: “Tokni onechpaleui ma nikajsikamati tla oniknekiaya niyetos niyolmelajki iuan Jehová, omonekiaya ayakmo ma niktlajkuilili ichpochtli. Sapanoa onichokaya, pero tlatlaujtilistli onechpaleui. Satepan okachi oniyolpakiaya ijkuak onitetlapouiaya”. Axkan Daniel tlayekanki itech circuito uan isiua sapanoa kitlasojtla Jehová.

PAMPA TIYETOSKEJ TIYOLMELAJKEJ MA TITETLASOJTLAKAN

Tla tikmatij se toyolikni okichi itlaj amo kuali, moneki iuan ma timotlapouikan uan ma timochijchikauakan pampa tlayekankej ma kipaleuikan. (Xikita párrafo 14).

13. ¿Tleka Natán okatka yolmelajki iuan Jehová uan noijki iuan David?

13 Tla tiyolmelajkej iixpan Jehová, noijki uelis tiyetoskej tiyolmelajkej iuan oksekimej uan noijki tikinpaleuiskej. Ma tikitakan ineskayo teotlajtojki Natán. Ijkuak ueyi tekiua David omotekak uan isiua okse tlakatl, uan otlanauati ma kimiktikan nin tlakatl, Jehová okititlanki Natán ma kinojnotsa David. Teotlajtojki Natán okiteititi yolmelajkayotl iixpan Jehová uan noijki iixpan David. ¿Ken okichi? Okiteititi yolmelajkayotl iixpan Jehová pampa okitlakamatki uan okiteititi yolchikaualistli. Uan noijki okiteititi yolmelajkayotl iuan David pampa ika tlasojtlalistli okinojnotski. Teotlajtojki okitlapoui David se tlamantli tlen opanok, ijkon okipaleui ma kajsikamati tlen okichi sapanoa amo kuali. Okilui se tlakatl tlen okipiaya miak tomin okichtekili se tlakatl tlen okipiaya san se ichkatsin. Ijkuak David okikak nin, san niman okualanki uan okijto tlakatl akin okipiaya tomin okichi itlaj amo kuali. Ijkuakon Natán okilui: “¡Te non tlakatl!”. Ijkon David okimatki otlajtlakolchi iixpan Jehová (2 Samuel 12:1-7, 13).

14. ¿Ken techpaleuia tlasojtlalistli pampa tiyetoskej tiyolmelajkej iixpan Jehová uan oksekimej?

14 Titetlasojtlaskej noijki techpaleuis ma tiyetokan tiyolmelajkej iixpan Jehová uan noijki inmixpan oksekimej. Se neskayotl, ximokuayejyeko tejuatsin tikmati se tokni okichi itlaj amo kuali. Uelis tikneki tikpaleuis, uan okachi tla moyolikni noso mokalchanejka. Pero noijki tikmatij okachi ipati tiyetoskej tiyolmelajkej iixpan Jehová. ¿Tlen uelis tikchiuaskej? Ma tikchiuakan ken okichi Natán. Xiktlakamati Jehová uan xikteititi tiktlasojtla tokni akin otlajtlakolchi. Xikilui san niman ma kinmilui tlayekankej pampa ma kipaleuikan. Tla ye amo kinmiluia tlayekankej, tejuatsin moneki tikinmiluis. Ijkon tiyetos tiyolmelajki iixpan Jehová. Uan noijki tikteititis tiktlasojtla akin okichi tlen amo kuali, pampa tlayekankej ika tlasojtlalistli kipaleuiskej pampa kuali ma mouika iuan Jehová (xiktlajtolti Levítico 5:1 *; Gálatas 6:1).

PAMPA TIYETOSKEJ TIYOLMELAJKEJ MA TIKTEITITIKAN YOLCHIKAUALISTLI

15, 16. ¿Tleka Husai okiteititi yolchikaualistli?

15 Se iyolikni ueyi tekiua David omotokayotiaya Husai. Husai omonekiaya kiteititis yolchikaualistli pampa yetos yolmelajki iixpan Jehová uan David. ¿Tleka? Pampa israelitas okinekiayaj Absalón ma yeto inueyi tekiua. Husai  okimatiaya Absalón uan isoldados oajsitoj Jerusalén uan David ocholo (2 Samuel 15:13; 16:15). ¿Tlen okichi Husai? ¿Okipaleui Absalón uan okika David? Amo. Maski David yokipiaya miak xiuitl uan miakej okinekiayaj kimiktiskej, Husai okinekiaya yetos yolmelajki iuan David pampa okimatiaya Jehová okipejpenki ken ueyi tekiua. Ik non, oyajki okitemoto David itech tepetl Olivos (2 Samuel 15:30, 32).

16 David okilui Husai ma uia Jerusalén uan ma kijto ye kuali omouikaya iuan Absalón. Husai omonekiaya mochijchikauas pampa Absalón ma kikaki ye uan amo Ahitofel akin okipaleuiaya. Omonekiaya miak yolchikaualistli pampa kitlakamatiskia David uan yetoskia yolmelajki iixpan Jehová. ¿Tleka? Pampa tla kichiuaskia tlen David okilui uelis kimiktiskiaj. David okitlatlaujti Jehová ma kimalui Husai. Uan Jehová okipaleui. Absalón okikak Husai uan amo okikak Ahitofel (2 Samuel 15:31; 17:14).

17. ¿Tleka moneki yolchikaualistli pampa tiyetoskej tiyolmelajkej iixpan Jehová?

17 Noijki moneki ma tiyetokan tiyolchikauakej tla tiknekij tiyetoskej tiyolmelajkej iixpan Jehová. ¿Tleka? Pampa uelis ualeua tokalchanejkauan, akinmej inmiuan titekitij noso tekiuajkej techiluiskej ma tikchiuakan itlaj tlen amo kipaktia Jehová. Ma tikitakan tlen okipanok se tokni tlen itoka Taro, ye chanti itech ueyi altepetl Japón. Ye nochipa omochijchika kinyolpaktis itatajuan. Okintlakamatiaya uan inmixpan okatka yolmelajki pampa okintlasojtlaya, amo san pampa okiluiayaj. Pero ijkuak opejki momachtia iuan iTlaixpantijkauan Jehová, itatajuan okiluijkej ayakmo ma momachti. Ye sapanoa omoyolkoko. Uan maski okatka oui, ye okinmilui monechikoskia iuan tokniuan. Taro kijtoa: “Sapanoa okualankej, ik non, miak xiuitl amo onechkauilijkej ma nikintlajpaloti. Oniktlatlaujti Jehová ma nechyolchikaua pampa amo ma nikpatla tlen oniknekiaya nikchiuas. Axkan okse tlamantli mokuayejyekoaj uan yiueli nikintlajpaloti” (xiktlajtolti Proverbios 29:25 *).

18. ¿Tlen otimomachtijkej?

18 Tla tikchiuaj ken David, Jonatán, Natán uan Husai tiyolpakiskej pampa tiyetoskej tiyolmelajkej iixpan Jehová. Amo keman ma tikchiuakan ken Abner uan Absalón akinmej amo okatkaj yolmelajkej. Melauak tinochtin titlajtlakolejkej uan ualeua tikchiuaj tlen amo kuali. Pero uelis tikteititiskej okachi tikpatioitaj tiyetoskej tiyolmelajkej iixpan Jehová.

^ [1] (Párrafo 7). Otikinpatilijkej intoka.

^ párr. 2 Miqueas 7:8 kijtoa: “¿Uan tlen mitstlajtlanilia Jehová? ¡Moneki tikpias melajkayotl uan tiktlasojtlas yolmelajkayotl uan ika yolyamanilistli tinemis iuan moDios!”.

^ párr. 14 Levítico 5:1 kijtoa: “Tla ikaj tlajtlakolchiua pampa okikak ken okse tlauijuikaltia inmixpan miakej uan ixpan omochi, noso okikak noso okimatki itech non, tla amo kitematiltia, ye kitlaxtlauas itlajtlakol”.

^ párr. 17 Proverbios 29:25 kijtoa: “Akin kinmauilia tlaltikpaktlakamej uelis tlajyouis, pero akin moyolchikaua itech Jehová ye kipaleuis”.