Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Enero de 2016

¿Tiktlasojkamatiliaj tlen toTajtsin Dios okichi?

¿Tiktlasojkamatiliaj tlen toTajtsin Dios okichi?

“Timotlasojkamatih inawak Dios porke otechmák se tlatliokólili weyijkachitok” (2 CORINTIOS 9:15).

TLAKUIKALMEJ: 53 UAN 18

1, 2. (1) ¿Tlen tlamantli kijtosneki “se tlatliokólili weyijkachitok” tlen techmaka toTajtsin Dios? (2) ¿Tlen timomachtiskej axkan?

IJKUAK Jehová okiualtitlanki Jesús, iKone akin sapanoa kitlasojtla, otechmakak se tetliokolil tlen miak ipati (Juan 3:16; 1 Juan 4:9, 10). Tlatitlanil Pablo okijto nin “se tlatliokólili weyijkachitok” (2 Corintios 9:15). ¿Tleka ijkon okijto?

2 Tlatitlanil Pablo okimatiaya ika imikilis Jesús uelis mochiuas nochi tlen toTajtsin Dios yokijto (xiktlajtolti 2 Corintios 1:20). “Se tlatliokólili weyijkachitok” kijtosneki imikilis Jesús. Ik non, amo ueli tikijtoaj nochi tlen kijtosneki nin tetliokolil. ¿Ken moneki timomachiliskej? ¿Tlen uelis tikchiuaskej axkan pampa yiajsis tonal ijkuak tikilnamikiskej iCena toTeko?

 SE TETLIOKOLIL TLEN SAPANOA MIAK IPATI

3, 4. (1) ¿Tlen tikmachilia ijkuak itlaj mitstliokoliaj? (2) ¿Tlen tetliokolilmej uelis kipatlaskej tonemilis? Xikijto se neskayotl.

3 Tinochtin techpaktia itlaj ma techtliokolikan, pero katej seki tetliokolilmej tlen uelis kipatlas tonemilis. Ximokuayejyeko mitsiluiaj mitsmiktiskej pampa itlaj amo kuali otikchi. Axkan ximokuayejyeko yimitsmiktiskej uan tikita ikaj akin amo tikixmati kijtoa mopatka ma kimiktikan. ¿Ken timomachiliskia?

4 Uelis peuas timokuayejyekos tlen otikchi itech monemilis. Uelis tiknekis tikpatlas monemilis. Uelis okachi titetlasojtlaskia uan titetlapojpoluiskia. Melauak tiktlasojkamatilis akin mopatka okinek ma kimiktikan.

5. ¿Tleka tetliokolil tlen otechmakak toTajtsin Dios okachi ipati amo ken okseki tetliokolilmej?

5 Tlen okichi Jehová topatka ika Jesús okachi miak ipati, amo ken neskayotl tlen yotikijtojkej (1 Pedro 3:18). Tinochtin titlajtlakolejkej, ik non, ijkuak tinesij yititlajtlakolejkej (Romanos 5:12). Pero ken sapanoa techtlasojtla Jehová, okiualtitlanki iKone ma mikiki topatka (Hebreos 2:9). Imikilis Jesús kipojpolos mikilistli uan ijkon uelis tiyoltoskej nochipa (Isaías 25:7, 8; 1 Corintios 15:22, 26). Akinmej tlaneltokaskej itech Jesús uelis yolpakiskej uan yetoskej ika yolseuilistli nochipa itech iluikak pampa kinualnauatiskej akinmej mokauaskej itech Tlaltikpak (Romanos 6:23; Apocalipsis 5:9, 10). ¿Tlen okseki kijtosneki tetliokolil tlen techmaka toTajtsin Dios?

6. (1) Ika tetliokolil tlen otechmakak toTajtsin Dios, ¿tlen okachi tikneki ma mochiua? (2) ¿Tlen eyi tlamantli timomachtiskej?

6 Tetliokolil tlen techmaka toTajtsin Dios noijki kipojpolos kokolistli, kichiuas Tlaltikpak se xochitlali uan kinyolitis akinmej yomikej (Isaías 33:24; 35:5, 6; Juan 5:28, 29). Miak tlamantli techyoleua ma tiktlasojtlakan Jehová uan Jesús pampa otechmakakej se tetliokolil. Pero ayamo tiknankiliaj nin tlajtlanilistli: ¿tlen uelis tikchiuaskej pampa tiktlasojkamatiliskej Jehová? Tikinmitaskej eyi tlamantli 1) moneki tikchiuaskej ken Jesús, 2) moneki tikintlasojtlaskej tokniuan uan 3) moneki tikintlapojpoluiskej ika nochi toyolo akinmej itlaj techchiuiliaj.

“ITLASOJTLALIS CRISTO JESÚS TECHNAWATIA IJKÓ MATIKCHIWAKAH”

7, 8. Pampa techtlasojtla Jesús, ¿tlen moneki ma tikchiuakan?

7 Achto, moneki ma tikchiuakan ken Jesús, ken okijto tlatitlanil Pablo: “Itlasojtlalis Cristo Jesús technawatia ijkó matikchiwakah” (xiktlajtolti 2 Corintios 5:14, 15). Akin kuali kajsikamati nochi tlen okichi Jesús, momachilia ken tlatitlanil Pablo. Uan ijkuak kuali tikajsikamatij nochi tlen Jehová okichi topatka, okachi tiktlasojtlaj uan ika nochi toyolo tiknekij tikchiuaskej ken Jesús. ¿Ken uelis tikteititiskej?

8 Akinmej kitlasojtlaj Jehová kichiuaj ken Cristo uan mochijchikauaj ijkon kichiuaskej (1 Pedro 2:21; 1 Juan 2:6). Tla tikintlakamatij tikteititiskej tiktlasojtlaj Jehová uan Jesús. Jesús okijto: “Akin kixmati notlanawatil, iwa kichiwa tlan kijtoa, non tlakatl nechtlasojtla. Iwa  akin nechtlasojtla, Notajtsi kitlasojtlas iwa Ne noijkó niktlasojtlas iwa nimoteititis inawak” (Juan 14:21; 1 Juan 5:3).

9. ¿Tlen tikixnamikij mojmostla?

9 Axkan pampa yitikilnamikiskej iCena toTeko, miak ipati ma timotlajtlanikan: “¿Tlen nikchijtok itech nonemilis? ¿Melauak nikchijtok ken Jesús? ¿Uelis itlaj okachi kuali nikchiuas?”. Ninmej tlajtlanilmej miak inpati, pampa nochi tlen kiyekana Satanás kichiua ma tikchiuakan ken oksekimej tlaltikpaktlakamej (Romanos 12:2). Tla amo timomaluiaj uelis peuas tikchiuaskej ken akinmej sapanoa momachtiaj, noso ken akinmej tlakuikaj uan akinmej mauiltiaj (Colosenses 2:8; 1 Juan 2:15-17). ¿Tlen techpaleuis pampa amo tikchiuaskej ken oksekimej?

10. (1) ¿Tlen moneki ma timotlajtlanikan ijkuak tikilnamikiskej iCena toTeko? (2) ¿Tlen moneki tikchiuaskej satepan tikinnankiliskej ninmej tlajtlanilmej? (Xikita tlaixkopinal tlen ika peua tlamachtil).

10 Ijkuak tikilnamikiskej iCena toTeko miak ipati ma tikitakan tlen tikpiaj. Se neskayotl, ma tikitakan totlaken uan ma timotlajtlanikan: “¿Nipinauaskia tla Jesús nechitaskia ken nimotlakentia?” (xiktlajtolti 1 Timoteo 2:9, 10). “¿Oksekimej kitaskej melauak nikchiua ken Cristo?”. Noijki uelis ijkon tikchiuaskej ika tlen tikkakij uan tikitaj. ¿Jesús kikakiskia noso kitaskia tlen techpaktia? Noijki uelis ijkon tikchiuaskej ika teléfono, tableta noso computadora. ¿Nipinauaskia tla Jesús kitaskiaj tlen nikpia? ¿Uelis nikiluiskia tleka nechpaktia se videojuego? Pampa tiktlasojtlaj Jehová moneki ma tikkauakan tlen amo kuali maski sapanoa patio otiktlaxtlajkej (Hechos 19:19, 20). Ijkuak otimotemakakej iixpan Jehová, otikiluijkej itech nochi tonemilis timochijchikauaskej tikchiuaskej ken Cristo. Amo uelis tikpiaskej itlaj tlen amo techpaleuis (Mateo 5:29, 30; Filipenses 4:8).

11. (1) ¿Tlen tikchiuaskej tla tiktlasojtlaj Jehová uan Jesús? (2) ¿Ken uelis tikinpaleuiskej tokniuan itech tlanechikol?

11 Pampa tiktlasojtlaj Jehová uan Jesús, moneki ma titetlapouikan ika nochi toyolo uan tikinchiuaskej imachtijkauan (Mateo 28:19, 20; Lucas 4:43). Itech metstli ijkuak tikilnamikiskej iCena toTeko uelis titetlapouiskej 30 noso 50 horas ken precursores auxiliares. ¿Tikchiuas? Se tokni tlen kipia 84 xiuitl uan tlen yomikik isiua, omokuayejyekoaya amo uelis mochiuaskia precursor auxiliar pampa yopiaya miak xiuitl uan omokokoaya. Pero oksekimej precursores okipaleuijkej. Okipejpenkej kanin uelis tetlapouiskia uan sejse omoka keman iuan kisaskiaj. Nin okipaleui ma tetlapoui 30 horas itech se metstli. ¿Ikaj uelis tikpaleuis ma tekiti ken precursor itech metstli marzo noso abril? Amo nochtin uelis titekitiskej ken precursores, pero uelis okachi timochijchikauaskej pampa okachi titetlapouiskej. Ijkon uelis tikteititiskej tiktlasojtlaj Cristo ijkon ken okichi tlatitlanil Pablo. ¿Onka okse tlamantli tlen uelis tikchiuaskej?

MONEKI TIKINTLASOJTLASKEJ TOKNIUAN

12. ¿Tlen moneki tikchiuaskej tla tiknekij ma techtlasojtla toTajtsin Dios?

12 Tlasojtlalistli noijki techyoleua ma tikintlasojtlakan tokniuan. Tlatitlanil Juan okijto: “Notlasojikniwah matimosepantlasojtlakah”  (1 Juan 4:7-11). Amo uelis tikchiaskej Jehová ma techtlasojtla tla tejuan amo tikintlasojtlaj tokniuan (1 Juan 3:16). Amo san ma tikijtokan tikintlasojtlaj tokniuan. ¿Tlen uelis tikchiuaskej pampa tikteititiskej?

13. ¿Tlen kuali neskayotl otechmakak Jesús?

13 Jesús otechmakak se kuali neskayotl. Ijkuak ouala Tlaltikpak, okachi omotekipacho intech akinmej yolyamankej. Okinpajti akinmej omokokoayaj, amo ueli onejnemiayaj, amo otlakakiayaj, amo otlachiayaj uan amo otlajtoayaj (Mateo 11:4, 5). Jesús amo okichiuaya ken fariseos, pampa yejuan okinchiuiliayaj tlamantli amo kuali (Juan 7:49). Ye okipaktiaya kinmachtis akinmej okinekiayaj kimatiskej itech toTajtsin Dios. Okintlasojtlaya ika nochi iyolo uan okinchiuili tlen kuali (Mateo 20:28).

¿Uelis tikpaleuiskej se tokni okachi ma tetlapoui? Xikita párrafo 14).

14. ¿Tlen uelis tikchiuaskej pampa tikteititiskej tikintlasojtlaj tokniuan?

14 Ijkuak tikilnamikiskej iCena toTeko kichiua ma tikchiuakan ken Jesús, uelis tiktemoskej ken tikinpaleuiskej oksekimej tokniuan. Sekimej uelis yolpakiskej tla tikteititiaj tikintlasojtlaj, ken akinmej yiuejueyij, yokokoxkatikej noso youeuejtikej. ¿Tleka amo tikintlajpaloti ninmej tokniuan? Uelis tikinuikilis tlakuali, tikinpaleuis pampa tikyektlalis inkal, tikinuikas nechikol noso inmiuan titetlapouiti (xiktlajtolti Lucas 14:12-14). Amo keman xikilkaua, tla tiktlasojtlaj Jehová moneki tikteititiskej tikintlasojtlaj tokniuan.

MA TIKINTLAPOJPOLUIKAN TOKNIUAN IKA NOCHI TOYOLO

15. ¿Tlen moneki tikmatiskej?

15 Titetlapojpoluiaj pampa tiktlasojtlaj Jehová. Tinochtin tiikoneuan Adán, ik non, tinochtin titlajtlakolejkej uan timikij. Amo ikaj uelis kijtos amo kipaleuia imikilis Cristo. Maski ikaj tlen sapanoa kuali kitekichiuiliaj Jehová moneki kipias nin tetliokolil. Topatka yotlaxtlajkej miak, ik non, moneki ma tikpatioitakan ijkon ken kiteititia se neskayotl tlen okijto Jesús.

16, 17. ¿Tlen techmachtia neskayotl itech ueyi tekiua?

16 Jesús okijto se neskayotl itech se ueyi tekiua tlen okitlapojpolui itlakeual tlen okiuikiliaya 60 millones de denarios. Pero nin tlakeuali amo okinek kitlapojpoluis akin okiuikiliaya san 100 denarios. Ijkuak ueyi tekiua okimatki sapanoa okualanki. ¿Tleka ijkon okichi? Ueyi tekiua okilui itlakeual: “Ne onimitstlapojpolwili nochi tlan otechwikiliaya por otimotlatlauti nonawak. Omonekia te noiwa tikiknomatiskia neká tokni, ijkó kemi ne onimitsiknoma” (Mateo 18:23-35). Tlakeuali omonekiaya kitlapojpoluis  akin okiuikiliaya tomin, ijkon ken ueyi tekiua okitlapojpolui. Ijkon ken ueyi tekiua, Jehová yotechtlapojpolui totlajtlakoluan. ¿Tlen moneki tikchiuaskej?

17 Pampa yitikilnamikiskej iCena toTeko, moneki ma timotlajtlanikan kox ikaj ayamo tiktlapojpoluiaj. Tla ijkon, moneki san niman ma tikchiuakan ken Jehová, pampa ye melauak kineki techtlapojpoluis (Nehemías 9:17; Salmo 86:5). Tiktlasojkamatiliaj Jehová pampa techtlapojpoluia, ik non, timochijchikauaj tikintlapojpoluiskej oksekimej ika nochi toyolo. Amo uelis tikchiuaskej Jehová ma techtlasojtla tla tejuan amo tikintlapojpoluiaj oksekimej (Mateo 6:14, 15). Amo uelis kichiuas ma tikilkauakan tlen opanok, pero kema uelis kipatlas tlen tikseliskej satepan.

18. ¿Ken okipaleui Lily itlasojtlalis toTajtsin Dios pampa kixikos tlen okichiuaya Carol?

18 Tikmatij ualeua techchiuilia oui tikxikoskej tlen kichiuaj tokniuan (xiktlajtolti Efesios 4:32; Colosenses 3:13, 14). Se tokni tlen itoka Lily kimati nin, pampa okipaleuijtoka Carol, se tokni tlen omikik inamik. [1] (Xikita nota kanin tlami tlamachtil). Okiuikaya itech icarro pampa tlakouatiuij. Carol nochipa san okualantoka. Pero Lily omochijchikauaya kitas tlen kuali okichiuaya uan amo tlen amo kuali. Saiktlami, Carol omokoko uan omikik. Lily kijtoa: “Maski ijkon iyelis, melauak nikneki nikitas itech Xochitlali. Nikneki nikitas ken yetos ijkuak ayakmo kipias tlajtlakoli”. Ajsis tonal ijkuak nochi tlajtlakoli ayakmo yetos. Ik non, moneki ma timochijchikauakan ma tikxikokan tlen kichiuaj tokniuan, pampa itlasojtlalis toTajtsin Dios kichiua ijkon ma tikchiuakan.

19. ¿Tlen tikchiuaskej pampa tiktlasojkamatiliskej Jehová?

19 Jehová otechmakak “se tlatliokólili weyijkachitok”, se tetliokolil tlen sapanoa miak ipati. Amo keman ma tikilkauakan. Ijkuak tikilnamikiskej iCena toTeko ma timokuayejyekokan itech tlen Jehová uan Jesús okichijkej topatka. Uan kichiuas ma tiktlasojkamatilikan uan techpaleuis ma tikchiuakan ken Jesús, ma tikintlasojtlakan uan ika nochi toyolo ma tikintlapojpoluikan tokniuan.

^ [1] (Párrafo 18). Otikinpatilijkej intoka.