Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Enero de 2016

“Namouan tiaskej”

“Namouan tiaskej”

“Namouan tiaskej, pampa otikkakej Dios kajki namouan” (ZACARÍAS 8:23).

TLAKUIKALMEJ: 32 UAN 31

1, 2. (1) ¿Tlen okijto Jehová panoskia axkan? (2) ¿Tlen tlajtlanilmej tikinnankiliskej? (Xikita tlaixkopinal tlen ika peua tlamachtil).

JEHOVÁ okijto itech totonaluan “majtlaktli tlakamej tlen tlatlamantli tlajtoaj itech altepemej kikitskiskej, kema, melauak kikitskiskej ikue se tlakatl judío, uan kijtoskej: ‘Melauak namouan tiaskej, pampa otikkakej Dios kajki namouan’” (Zacarías 8:23). Tlakatl judío kineskayotia akinmej okinpejpenkej ika espíritu santo. Biblia kintokayotia Israel de Dios (Gálatas 6:16). Uan “majtlaktli tlakamej” kineskayotiaj akinmej yetoskej itech Tlaltikpak. ¿Tleka kinekij yaskej inmiuan tlapejpenalmej? Pampa kimatokej toTajtsin Dios kinselia uan kitaj se tlateochiualistli inmiuan kiueyichiuaskej toTajtsin Dios.

2 Ijkon ken Zacarías, Jesús okijto itekipanojkauan toTajtsin Dios san sekan tekitiskiaj. Okintokayoti “amo nonmiakeh [...] noichkawah” akinmej yetoskej itech iluikak. Uan akinmej mokauaskej Tlaltikpak  Jesús okintokayoti “oksikimeh ichkameh”. Jesús okijto “yetoskeh sansikah” uan kitokaskiaj ken san se “tlájpixki” (Lucas 12:32; Juan 10:16). Uelis timotlajtlaniaj: ¿Moneki tikmatiskej intoka nochtin tlapejpenalmej? ¿Tlen moneki kichiuaskej tlapejpenalmej? Tla se tokni itech tonechikol peua kikua pan uan koni vino tlen motekitiltia itech iCena toTeko, ¿tlen moneki tikchiuaskej? Uan tla axkan okachi miakej mochiuaj akinmej yaskej iluikak, ¿moneki timotekipachoskej? Axkan nin timomachtiskej.

¿MONEKI TIKMATISKEJ INTOKA TLAPEJPENALMEJ TLEN OK MOKAUAJ ITECH TLALTIKPAK?

3. ¿Tleka amo uelis tikmatiskej akinmej pouiskej iuan 144,000 tlapejpenalmej?

3 ¿Moneki tikmatiskej intoka tlapejpenalmej tlen ok mokauaj itech Tlaltikpak? Amo. ¿Tleka? Pampa amo tikmatij kox satepan yaskej iluikak. [1] (Xikita nota kanin tlami tlamachtil). ToTajtsin Dios okinpejpenki pampa yaskej iluikak, pero amo tikmatij kox tlaxikoskej itlamian tonalmej. Satanás kimatok, ik non, kintekitiltia “profetas tekajkayajkeh” pampa kichiuas amo ma tlaxikokan (Mateo 24:24). Tlapejpenalmej yaskej iluikak ijkuak toTajtsin Dios kijtos. Jehová kuali kinmiluia yaskej iluikak achto mikiskej noso ijkuak achto peuas “weyi tlaijyowílistli” (Apocalipsis 2:10; 7:3, 14).

Tiitekipanojkauan Jehová san tikchiuaj ken Jesús.

4. Tla amo tikmatij tlen intoka tlapejpenalmej tlen ok mokauaj itech Tlaltikpak, ¿tleka kijtoaj: “Namouan tiaskej”?

4 Tla amo tikmatij tlen intoka tlapejpenalmej, ¿tleka kijtoaj: “Namouan tiaskej”? Biblia kijtoa “majtlaktli tlakamej” kikitskiskej ikue “se judío” uan kijtoskej: “Melauak namouan tiaskej, pampa otikkakej Dios kajki namouan”. Ken tikitaj, nin tlaxelol tlajtoa itech se “judío”, pero satepan kijtoa “namouan”. “Judío” amo kineskayotia san se tlakatl, kineskayotia nochtin tlapejpenalmej ken san se nechikol. Okseki ichkamej kuali kimatokej, ik non, uelis kijtoaj yejuan yauij iuan tlapejpenalmej, noso, san sekan kitekichiuiliaj Jehová. Amo moneki tikmatiskej tlen intoka tlapejpenalmej pampa inmiuan titekitiskej. ¿Tleka? Pampa Biblia kijtoa san ma tiktokakan Jesús (Mateo 23:10).

¿TLEN MONEKI KICHIUASKEJ TLAPEJPENALMEJ?

5. (1) ¿Tlen tlanauatil moneki kitlakamatiskej tlapejpenalmej? (2) ¿Tleka sapanoa miak ipati nin tlanauatil?

5 Tlapejpenalmej moneki kitlakamatiskej tlen kijtoa 1 Corintios 11:27-29 (xiktlajtolti). Tla se tlapejpenal amo kuali mouika iuan Jehová uan ok kikua pan uan koni vino ijkuak moilnamiki iCena toTeko, “tlajtlakolchiwa”. Kijtosneki amo tetlakaita (Hebreos 6:4-6; 10:26-29). Nin tlanauatil moneki  kitlakamatiskej, pampa tla se tlapejpenal amo yolmelajki iixpan Jehová, amo kiselis ‘tlatliokolil non Ye techmajmakas kan ilwikak’ (Filipenses 3:13-16).

6. ¿Tlen moneki kichiuaskej tlapejpenalmej?

6 Tlatitlanil Pablo okijto: “Nomechtlatlaujtia xiyeknemikah kemi moneki, porke nomejwah Dios onoméchnotski para xiyetokah iaxkawah”. ¿Ken kichiuaskiaj? Okinyekilui: “Nochipa ximoiknelikah iwa xitenotsakah, ximosepanyekwikakah iwa ximosepanxikokah ika tlasojtlálistli. Ximochijchikawakah para n Espíritu maseitito nomowah, ika n yolsewílistli, non seititok nomowah” (Efesios 4:1-3). Iespíritu santo Jehová kinpaleuia itekipanojkauan ma yetokan yolyamankej uan amo ma moueyinekikan (Colosenses 3:12). Ik non, tlapejpenalmej amo kimachiliaj okachi inpati ken oksekimej. Amo mokuayejyekoaj pampa yejuan tlapejpenalmej kipiaj okachi miak espíritu santo uan oksekimej amo. Amo kijtoaj yejuan okachi kuali kajsikamatij Biblia. Noijki amo ikaj kiluiaj ma kikua pan uan ma koni vino san pampa mokuayejyekoaj ye noijki tlapejpenal. Ken yejuan yolyamankej kimatij san Jehová uelis kijtos akin yas iluikak.

7, 8. ¿Tlen amo moneki kichiuaskej tlapejpenalmej, uan tleka?

7 Maski tlapejpenalmej kimatokej se tlateochiualistli yaskej iluikak, amo kichiaj ma kinpatioitakan (Efesios 1:18, 19; xiktlajtolti Filipenses 2:2, 3). Kimatokej ijkuak Jehová okinpejpenki, amo okinmatilti nochtin tlaltikpaktlakamej. Ik non, se tlapejpenal amo motekipachoa tla amo kineltokaj ye tlapejpenal. Ye kimatok Biblia kijtoa amo san niman ma tikneltokakan tla ikaj kijtoa toTajtsin Dios okimakak se tekitl tlen miak ipati (Apocalipsis 2:2). Ijkuak se tlapejpenal kinmixmati oksekimej amo kinmiluia ye se tlapejpenal. ¿Tleka? Pampa amo kineki ma kitakan ken ikaj sapanoa ipati. Uan uelis amo ikaj kiluia. Noijki amo kijtojtinemi tlen kichiuas iluikak (1 Corintios 1:28, 29; xiktlajtolti 1 Corintios 4:6-8).

8 Tlapejpenalmej amo kineltokaj moneki yetoskej san inmiuan oksekimej tlapejpenalmej. Amo momachtiaj Biblia san inmiuan oksekimej tlapejpenalmej (Gálatas 1:15-17). Tla ijkon kichiuaskiaj, kixeloskiaj tlanechikol. Kixnamikiskiaj espíritu santo tlen kipaleuia ialtepe toTajtsin Dios pampa ma yetokan san sekan ika yolseuilistli (xiktlajtolti Romanos 16:17, 18).

¿KEN MONEKI TIKINMITASKEJ AKINMEJ KIKUAJ PAN UAN KONIJ VINO?

9. ¿Tleka moneki tikitaskej ken tikinnotsaj tlapejpenalmej? (Xikita recuadro “ Akin tetlasojtla tetlakaita”).

9 Jesús okinmilui imachtijkauan: “Nochteh nonmiknimeh”. Uan noijki okijto: “Porke akin inewia moweyilia, satepa moiknomatinemis, pero akin amo moweyilia, kiweyijkatlaliskeh” (Mateo 23:8-12). Amo kuali ikaj tikueyichiuaskej, noso tikitaskej ken sapanoa ipati, maski ma yeto tlapejpenal. Biblia techyekiluia  ma tikchiuakan ken tlayekankej, pero amo techiluia ma tikintokakan (Hebreos 13:7). Maski Biblia kijtoa ma tikinpatioitakan, pero amo pampa yejuan tlapejpenalmej, ma tikintlakaitakan pampa chikauak tekitij itech tetlapouilistli uan itech tlamachtilistli (1 Timoteo 5:17). Tla tikchiuaj ma momachilikan ken ikaj tlen sapanoa miak ipati, uelis tikchiuaskej ma mopinatikan. Noso uelis tikchiuaskej ma moueyinekikan (Romanos 12:3). Amo ma tikchiuakan itlaj tlen kichiuas ma tlajtlakolchiuakan tlapejpenalmej (Lucas 17:29).

¿Ken moneki tikitas akin kikua pan uan koni vino ijkuak tikilnamikij iCena toTeko? (Xikinmita párrafos 9-11).

10. ¿Ken uelis tikintlakaitaskej tlapejpenalmej?

10 ¿Ken tikteititiaj tikintlakaitaj tlapejpenalmej? Achto, amo moneki tikintlajtlaniskej ken omochijkej tlapejpenalmej, nin san yejuan kimatij uan amo toteki (1 Tesalonicenses 4:11; 2 Tesalonicenses 3:11). Noijki amo timokuayejyekoaj inkalchanejkauan noijki tlapejpenalmej. Nin amo uelis kinpanoltiliskej inkalchanejkauan (1 Tesalonicenses 2:12). Uan noijki amo tikintlajtlaniaj itlaj tlen kinyolkokos. Se neskayotl, isiua se tlapejpenal amo tiktlajtlaniaj tlen kimachilia pampa kimatok inamik amo iuan yetos itech Xochitlali. Tikmatij itech Xochitlali Jehová techmakas nochi tlen tiknekiskej (Salmo 145:16).

11. ¿Tleka amo moneki ma “kinyektenewah oksikimeh”?

11 Tikinmitaskej tlapejpenalmej ken oksekimej techpaleuia. ¿Tleka? Pampa Biblia kijtoa itech tlanechikol uelis yetoskej ‘sikimeh tlakah non motenewah tokniwah pero mach milák’ noijki uelis kijtoskej yejuan tlapejpenalmej (Gálatas 2:4, 5; 1 Juan 2:19). Sekimej tlapejpenalmej uelis ayakmo yetoskej yolmelajkej (Mateo 25:10-12; 2 Pedro 2:20, 21). Tlatitlanil Judas okijto amo ma “kinyektenewah oksikimeh”. Kijtosneki amo ma tikintokakan oksekimej itech tlanechikol, san pampa tlapejpenalmej noso san pampa yikipiaj miak xiuitl yikitekichiuiliaj Jehová noso sapanoa kinmixmatij.

¿MONEKI TIMOTEKIPACHOSKEJ KESKI TLAPEJPENALMEJ OK MOKAUAJ?

12, 13. ¿Tleka amo ma timotekipachokan itech akinmej kikuaj pan uan konij vino?

12 Okachi miakej akinmej kichiuaj ken Cristo kikuaj pan uan konij vino itech iCena toTeko sejse xiuitl. Ninmej okachi miakej yomochijkej. ¿Moneki timotekipachoskej keski tlapejpenalmej mokauaj? Amo. Ma tikitakan tleka.

13 “[Jehová] kinmixmatok nochteh iaxkawah” (2 Timoteo 2:19). Jehová kuali kimatok akinmej tlapejpenalmej uan akinmej amo. Pero tokniuan tlen kinpoaj akinmej konij vino uan kikuaj pan amo kimatij. Ik non, sekimej maski kinpoaj, amo tlapejpenalmej. Se neskayotl, sekimej okikuajkej pan uan okonikej vino, pero satepan ayakmo ijkon okichijkej. Uan oksekimej amo kuali mokuayejyekoaj, ik non, kineltokaj yejuan yaskej iluikak.

14. ¿Tlen kijtoa Biblia itech keski tlapejpenalmej yetoskej ijkuak peuas ueyi tlajyouilistli?

14 Tlapejpenalmej yetoskej itech  nochi Tlaltikpak, ijkuak Jesús uits pampa kinuikas iluikak. Biblia kijtoa Jesús “kintitlanis iangelwah iwa kinmoololos nochteh n tlakah non Ye yokinmopejpenili itech nochi n tlaltíkpaktli” (Mateo 24:31). Biblia kijtoa itlamian tonalmej amo miakej tlapejpenalmej yetoskej itech Tlaltikpak (Apocalipsis 12:17). Pero amo kijtoa keski mokauaskej ijkuak peuas ueyi tlajyouilistli.

15, 16. ¿Tlen ome tlamantli moneki ma tikajsikamatikan itech tlapejpenalmej?

15 Jehová kijtoa keman kinpejpena (Romanos 8:28-30). Satepan ijkuak okiyoliti Jesús, Jehová ika iespíritu santo opejki kinpejpena sekimej tlaltikpaktlakamej. Ijkuakon nochtin akinmej okichiuayaj ken Cristo okatkaj tlapejpenalmej. Satepan, sapanoa miakej akinmej okijtoayaj kichiuaj ken Cristo, amo melauak okichiuayaj ken Cristo. Pero Jehová okinpejpenki ika iespíritu santo san akinmej melauak okichiuayaj ken Cristo. Ninmej ken trigo tlen Jesús okijto moskaltiskia itlajkotia xiuitl tlen amo kuali (Mateo 13:24-30). Itech itlamian tonalmej, Jehová ok kinpejpentok akinmej pouiskej itech 144,000. [2] (Xikita nota kanin tlami tlamachtil). Tla Jehová kinekis kinpejpenas oksekimej itech itlamian tonalmej, tikneltokaj Jehová kichiuas tlen kuali (Isaías 45:9; Daniel 4:35; xiktlajtolti Romanos 9:11, 16). [3] (Xikita nota kanin tlami tlamachtil). Amo tiknekij tikchiuaskej ken tlakeualmej tlen Jesús okijto itech  neskayotl. Yejuan okijtojkej amo kuali okichi akin okintlakej, pampa sekimej yitiotlak opejkej tekitij (xiktlajtolti Mateo 20:8-15).

16 Amo nochtin tlapejpenalmej pouij itech “tlakeuali yolmelajki uan ixtlamatki” (Mateo 24:45-47, TNM). Itech achto siglo, Jehová okintekitilti san sekimej pampa ma kiyekanakan tetlapouilistli, axkan noijki ijkon kichiua. Itech achto siglo san sekimej tlapejpenalmej okijkuilojkej Escrituras Griegas Cristianas. Uan axkan san sekimej tlapejpenalmej kimakaj ialtepe Jehová “tlakuali ijkuak moneki”.

17. ¿Tlen otimomachtijkej?

17 ¿Tlen yotimomachtijkej? Jehová okinpejpenki akinmej mokauaskej itech Tlaltikpak uan akinmej tlanauatiskej iuan Jesús itech iluikak. Jehová kinteochiuas nochtin itekipanojkauan, “majtlaktli tlakamej” uan “tlakatl judío”. Uan kichia nochtin ma kitlakamatikan uan ma yetokan yolmelajkej. Moneki yetoskej yolyamankej. San sekan moneki ma kitekichiuilikan Jehová. Uan nochtin moneki mochijchikauaskej pampa itech tlanechikol ma yeto yolseuilistli. Ijkuak tikchiaj ma tlami nochi tlen amo kuali, ma timochijchikauakan pampa san sekan ma tiktekichiuilikan Jehová uan ma tikchiuakan ken Jesús.

^ [1] (Párrafo 3). Ken kijtoa Salmo 87:5, 6, uelis toTajtsin Dios kitematiltis intoka akinmej yaskej iluikak ijkuak tlanauatiskej iuan Jesús (Romanos 8:19).

^ [2] (Párrafo 15). Itech Hechos 2:33 kijtoa Jesús kipaleuia iTajtsin pampa kinpejpenaskej akinmej yaskej iluikak. Pero san Jehová kijtoa akin yas iluikak.

^ [3] (Párrafo 15). Pampa tikmatis okachi xikita “Preguntas de los lectores” itech La Atalaya (ika náhuatl del centro Akin Tetlapouijtok) 1 de mayo 2007, páginas 30, 31.