Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Marzo de 2016

¿Kinekij tokniuan ma tikinpaleuikan itech inkalijtik noso ma tikinyolchikauakan ika Biblia?

¿Uelis titlapaleuis itech motlanechikol?

¿Uelis titlapaleuis itech motlanechikol?

IJKUAK Jesús yiyaskia iluikak okinmilui imachtijkauan ma tetlapouikan “itech nochi n tlaltíkpaktli” (Hechos 1:8). ¿Ken uelis tetlapouiskiaj itech nochi Tlaltikpak?

Martin Goodman, akin tlamachtia itech Universidad de Oxford, kijtoa ijkuak otlanauatijtokaj romanos, akinmej okichiuayaj ken Cristo amo okichiuayaj ken okseki tlaneltokalismej nion okichiuayaj ken judíos. ¿Tleka okse tlamantli okichiuayaj? Pampa akinmej okichiuayaj ken Cristo san kanin okintlapouiayaj tlaltikpaktlakamej. Uan non tlen okichi Jesús. Uan akinmej melauak okichiuayaj ken Cristo noijki ijkon okichijkej. Yejuan otetlapouijkej “n kualitlájtoli intech oksikimeh altepemeh”, pampa okintemoayaj akinmej okinekiayaj momachtiskej tlen melauak (Lucas 4:43). Ik non, Biblia kijtoa ijkuakon okatkaj “itlamachtijkawah” Jesús, kijtosneki tlaltikpaktlakamej tlen itlaj kichiuaj (Marcos 3:14). Jesús okinmilui imachtijkauan: “Xiakan, uan ijkon, xikinchiuakan nomachtijkauan itech nochi altepemej” (Mateo 28:18-20, TNM).

Axkan itech Tlaltikpak ayakmo katej 12 itlatitlaniluan Jesús, pero miakej itekipanojkauan Jehová kichiuaj ijkon ken yejuan. ¿Ken kichiuaj? Yejuan ika miak yolpakilistli yauij oksekan pampa uelis tetlapouiskej kanin okachi moneki. Yejuan kijtoaj: “¡Nikan nika ne! Xinechtitlani ne” (Isaías 6:8). Sekimej tokniuan yauij itech seki uejueyij altepemej tlen uejka mokauaj. Nin tlen okichijkej miakej tokniuan tlen omomachtitoj itech Tlamachtil ika Biblia tlen kichiua Watchtower itech Galaad. Oksekimej oyajkej itech okseki altepemej itech inueyi altepetl. Uan miakej tokniuan momachtiaj okse tlajtoli pampa uelis  tlapaleuiskej itech okse tlanechikol. Uan nin tekitl melauak oui. Pero nochtin tokniuan akinmej ijkon okichijkej, okichijkej nochi nin pampa kitlasojtlaj Jehová uan tlaltikpaktlakamej. Kuali omoyektlalijkej, uan kuali okitekitiltijkej kauitl, intomin uan inchikaualis pampa uelis tetlapouiskej kanin okachi moneki (Lucas 14:28-30). Nochi tekitl tlen yejuan kichiuaj sapanoa miak ipati.

Miakej amo uelis momachtiskej okse tlajtoli noso yaskej itech okse ueyi altepetl. Pero tinochtin uelis titekitiskej ken misioneros itech totlanechikol. ¿Ken uelis tikchiuaskej? Ma tikitakan.

MA TITEKITIKAN KEN MISIONEROS ITECH TOTLANECHIKOL

¿Ken uelis tikinpaleuiskej oksekimej tokniuan?

Miakej akinmej okichiuayaj ken Cristo itech achto siglo amo okatkaj misioneros, yejuan otetlapouiayaj itech inmialtepe. Pero nochtin otetlapouiayaj ika yolpakilistli. Okichiuayaj ken tlatitlanil Pablo ijkuak okilui Timoteo: “Xikmosenmaka xiktetlapowi n kualitlájtoli, iwa nochipa xikyekchiwa n tekitl non Dios omitsmák” (2 Timoteo 4:5). Tejuan noijki moneki tikchiuaskej ken okijto tlatitlanil Pablo. Tinochtin moneki titetlapouiskej itech Tekiuajkayotl uan timochijchikauaskej pampa oksekimej ma mochiuakan imachtijkauan Jesús, pampa ijkon otechnauatijkej. Tinochtin uelis titekitiskej ken misioneros itech totlanechikol.

Ijkuak se tokni yaui itech okse ueyi altepetl pampa tekitis ken misionero, moneki mochijchikauas pampa uelis san niman momatis. Tejuan uelis amo tiaskej titetlapouitiuij itech okse ueyi altepetl. Pero ¿uelis timochijchikauaskej pampa okse tlamantli titetlapouiskej? Se neskayotl, itech xiuitl 1940 okinmiluijkej tokniuan ma mochijchikauakan pampa se tonal itech semana uelis tetlapouiskiaj itech ojtli. ¿Uan tejuan? ¿Tikintlapouiaj tlaltikpaktlakamej tlen tikinmajsij itech ojtli? ¿Timochijchikauaj okse tlamantli titetlapouiskej, ken ika mesas uan carritos?

Tikinyolchikauaskej ma tetlapouikan.

Tla kuali tikitaj toteki, melauak tiyolpakiskej ijkuak titetlapouiskej. Tokniuan tlen momachtiaj okse tlajtoli noso yauij itech okse ueyi altepetl, nochipa mochijchikauaj kinpaleuiskej tokniuan itech tlanechikol. Se neskayotl, yejuan mochijchikauaj pampa okachi tetlapouiskej. Uan miakej misioneros tlayekanaj itech tlanechikolmej uan ijkon kinmachtiaj tokniuan  akinmej ompa chantij pampa satepan yejuan uelis kichiuaskej. Tla titlakatl uan yotimoapolakti, ¿tikneki titekitis itech motlanechikol ken siervo ministerial noso tlayekanki? (1 Timoteo 3:1).

XIKINPALEUI UAN XIKINYOLCHIKAUA TOKNIUAN

Melauak ma tikinpaleuikan.

Pero onka okseki tlamantli tlen ika uelis tikinpaleuiskej tokniuan itech tlanechikol. Uelis tikinpaleuiskej uan tikinyolchikauaskej tokniuan, uan itech nin tekitl tinochtin uelis titlapaleuiskej (Colosenses 4:11).

Tla tiknekij tikinpaleuiskej tokniuan, achto moneki kuali ma tikinmixmatikan. Biblia kijtoa ijkuak timonechikoaj, moneki timokuayejyekoskej tlen uelis kinpaleuis tokniuan (Hebreos 10:24). Nin amo kijtosneki tikmatiskej nochi tlen kinpanoa. Kijtosneki moneki timochijchikauaskej tikajsikamatiskej tlen kimachiliaj uan tlen kinekij. Uelis kinekij ma tikinpaleuikan ika seki tlamantli itech inkalijtik noso uelis kinekij ma tikinyolchikauakan ika Biblia. Uan ualeua san uelis kinpaleuiskej tlayekankej noso siervos ministeriales (Gálatas 6:1). Pero tinochtin uelis tikinpaleuiskej tokniuan tlen yikipiaj miak xiuitl noso akinmej tlajyouijtokej.

Ma tikinpaleuikan akinmej tlajyouijtokej.

Ma timokuayejyekokan itech tlen okipanok se tokni tlen itoka Salvatore. Ye sapanoa otlajyoui pampa amo okipiaya tomin, ik non, okinemakak ikalijtik, kanin otlanemakaya uan miak tlamantli. Sapanoa okitekipachoaya ikalchanejkauan. Itech tlanechikol, sekimej tokniuan okimatkej tlen okipanoaya. Ik non, tokniuan okimakakej seki tomin, uan okipaleuijkej ye uan isiua pampa uelis kipiaskiaj tekitl. Miakej tonalmej okinkakiayaj uan okinyolchikauayaj ikalchanejkauan Salvatore. Nochtin yejuan kuali omouikakej. Axkan kuali kilnamikij ken san sekan okatkaj ijkuak okachi otlajyouijkej.

Akinmej melauak tikchiuaj ken Cristo nochipa tiknekij tikintlapouiskej oksekimej tlaltikpaktlakamej. Moneki tikchiuaskej ken Jesús uan tikintlapouiskej oksekimej itech nochi tlamantli kuali tlen kichiuas toTajtsin Dios. Sekimej tokniuan uelis yaskej kanin okachi moneki ma tlapaleuikan uan oksekimej amo, pero tinochtin uelis timochijchikauaskej pampa tikinpaleuiskej tokniuan itech totlanechikol (Gálatas 6:10). Tla ijkon tikchiuaj okachi tiyolpakiskej uan ‘nochipa weletis tikchiwaskeh tlan kuali iwa tlan kipaktia’ toTajtsin Dios (Colosenses 1:10; Hechos 20:35).