Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Marzo de 2016

Sekimej techtlajtlaniaj

Sekimej techtlajtlaniaj

¿Keman opejki katej itekipanojkauan Jehová itech Ueyi Babilonia uan keman otlanki?

Itekipanojkauan toTajtsin Dios okatkaj tlakeualmej itech Ueyi Babilonia uan nin opejki kanaj itech xiuitl 100 uan otlanki itech xiuitl 1919. Nin se yankuik tlamachtil. ¿Tleka miak ipati nin yankuik tlamachtil?

Kuali tikitaj tlapejpenalmej okiskej itech ueyi Babilonia itech xiuitl 1919 uan ijkuakon opejkej kinnechikoaj itech se chipauak tlanechikol. ¿Tleka ijkon tikijtoaj? Ma timokuayejyekokan: san niman ijkuak iTekiuajkayo toTajtsin Dios opejki tlanauatia itech iluikak itech xiuitl 1914, nochtin itekipanojkauan toTajtsin Dios opejkej kinyejyekoaj uan ajachitsin opejkej kinchipauaj itech nochi tlaneltokalismej tlen amo melauak (Malaquías 3:1-4). * (Xikita tlajtoli tlen kiualika tlakxitlan). Itech xiuitl 1919, Jesús okitlali “tlakeuali yolmelajki uan ixtlamatki” pampa ma kitemakakan “tlakuali ijkuak moneki” nochtin itekipanojkauan toTajtsin Dios tlen axkan chipauakej (Mateo 24:45-47, TNM). Itech non xiuitl itekipanojkauan toTajtsin Dios okinkixtijkej itech ueyi Babilonia, kijtosneki itech tlaneltokalismej tlen amo melauak (Apocalipsis 18:4). Pero ¿keman opejkej mochiuaj itlakeualuan ueyi Babilonia?

Tiitekipanojkauan toTajtsin Dios otikijtoayaj amo miak kauitl okatkaj itlakeualuan ueyi Babilonia, pampa otikneltokayaj opejkej itech xiuitl 1918. Se neskayotl, revista La Atalaya (ika náhuatl del centro Akin Tetlapouijtok) 15 de marzo 1992 okijto: “Ijkon ken yiuejkika ialtepe Jehová amo miak kauitl okinuikakej ken tlakeualmej, itech xiuitl 1918 itekipanojkauan Jehová amo uejkika okatkaj ken itlakeualuan Ueyi Babilonia”. Pero pampa okachi yotimomachtijkej, otikajsikamatkej itekipanojkauan Jehová opejkej mochiuaj itlakeualuan Babilonia miak xiuitl achto, amo itech xiuitl 1918.

Tlen omoijkuilo itech Ezequiel 37:1-14 okijto itekipanojkauan Jehová yetoskiaj tlakeualmej uan satepan kinmakixtiskiaj. Ezequiel okitak se ixtlauak tlen otentoka ika inomiouan miakej tlaltikpaktlakamej tlen yomikej. Uan itech tlaxelol 11 kijtoa nochi nin omitl kijtosneki nochi ikalijtik Israel. Nin kali kineskayotia ueyi altepetl Israel uan noijki Israel tlen iaxka toTajtsin Dios noso “nochteh akimeh milák iaxkawah Dios” kijtosneki  tlapejpenalmej (Gálatas 6:16; Hechos 3:21). Itech nin kochtemikilistli tlen okitak Ezequiel omimej oksepa omoyolitijkej uan omochijkej miakej soldados. Nin kineskayotia ken itekipanojkauan toTajtsin Dios okinmakixtijkej itech Ueyi Babilonia itech xiuitl 1919. Pero itech nin tlaxelol, ¿kanin moijtoa miak xiuitl okatkaj ken tlakeualmej? Ma tikitakan.

Achto, itech nin kochtemikilistli Ezequiel okinmitak omimej sapanoa uakej okatkaj (Ezequiel 37:2, 11). Nin kijtosneki youejka omikej. Uan noijki, ninmej tlaltikpaktlakamej yolik okinyolitijkej, amo san niman omochi. Ezequiel achto okikak itlaj, uan omimej opejkej moliniaj uan opejkej mosetiliaj. Satepan opejkej kipiaj tendones uan monakayotiaj, uan satepan opejkej moeuayotiaj. Ijkuakon opejkej mijyotiaj uan oksepa moyolitiaj. Ijkuak oksepa oyoltokaj Jehová okinmakak se tlali kanin uelis chantiskiaj. Pampa uelis mochiuaskia nochi nin tlamantli omonekiaya ma pano seki kauitl (Ezequiel 37:7-10, 14).

Ijkon ken okijto Ezequiel, yiuejkika israelitas miak xiuitl okatkaj ken tlakeualmej. Nin opejki itech xiuitl 740 achto itech xiuitl 1 (a.i.x. 1), ijkuak majtlaktli tlanechikolmej itech Israel okinchiualtijkej ma kisakan itech intlal. Itech xiuitl 607 a.i.x. 1 babilonios okipojpolojkej Jerusalén, uan ome tlanechikolmej itech Judá noijki okinchiualtijkej ma kisakan itech intlal. Okinmakixtijkej itech xiuitl 537 a.i.x. 1, ijkuak sekimej judíos omokuepkej pampa kiyektlaliskej teokali uan oksepa kiueyichiuaskiaj Jehová itech Jerusalén.

Nochi nin techmachtia tlapejpenalmej amo san se xiuitl (1918-1919) okatka ken itlakeualuan ueyi Babilonia. Nin omochi itech miak kauitl. Jesús noijki okijto itech nin tlamantli ijkuak okijto trigo moskaltiskia san sekan iuan “sasaliksakatl”, kijtosneki akinmej “iaxkawah Dios” san sekan yetoskiaj iuan akinmej amo melauak kichiuaj ken Cristo (Mateo 13:36-43). Ijkuakon san sekimej melauak okichiuayaj ken Cristo. Miakej tlen okijtoayaj okichiuayaj ken Cristo opejkej tlamachtiaj tlen amo melauak, kijtosneki amo okiselijkej tlen melauak uan okiselijkej nochi tlen otlamachtiayaj tlaneltokalismej tlen amo melauak. Ik non, tikijtoaj akinmej melauak kichiuaj ken Cristo okatka ken itlakeualuan ueyi Babilonia. Nin opejki mochiua kanaj itech xiuitl 100 uan otlanki ijkuak teokali espiritual tlen iaxka toTajtsin Dios okichipajkej itech itlamian tonalmej (Hechos 20:29, 30; 2 Tesalonicenses 2:3, 6; 1 Juan 2:18, 19).

Itech nochi nin kauitl tlayekankej teopixkej okachi otlanauatiayaj amo ken tekiuajkej. Okinekiayaj kinnauatiskej nochtin tlaltikpaktlakamej. Se neskayotl, amo okinkauiliayaj oksekimej ma kipiakan Biblia  nion ma kitlajtoltikan ika se tlajtoli tlen uelis kajsikamatiskej. Akinmej okinekej kitlajtoltiskej Biblia okintlatijkej. Uan sapanoa okintlajyouiltijkej akinmej okijtojkej amo kuali tlen otlamachtiayaj tlayekankej. Ijkuakon, sapanoa oui se kimatis tlen melauak.

Ezequiel noijki okijto ialtepe toTajtsin Dios oksepa moyolitiskia uan yolik momakixtiskia itech tlaneltokalistli tlen amo melauak. ¿Keman uan ken opejki mochiua tlen okijkuilo Ezequiel? Ye okijto itlaj momatiskia. Nin opejki mochiua seki xiuitl achto tlamis nochi tlen amo kuali. Ijkuakon sekimej tlaltikpaktlakamej yolmelajkej okinekiayaj kimatiskej tlen melauak uan okinekiayaj kitekichiuiliskej Jehová maski miakej amo ijkon okichiuayaj. Omomachtijkej Biblia uan okintlapouijkej oksekimej itech tlen omomachtiayaj. Oksekimej omochijchikajkej kitlajtolkuepaskej Biblia ika tlatlamantli tlajtolmej tlen kajsikamatij tlaltikpaktlakamej.

Kanaj itech xiuitl 1870 opanok itlaj tlen uelis tikijtoskej omimej opejkej monakayotiaj uan opejkej moeuayotiaj. Charles Taze Russell uan iyolikniuan opejkej okachi momachtiaj Biblia uan omochijchikajkej kitekichiuiliskej Jehová. Uan noijki okinpaleuijkej oksekimej ma kajsikamatikan Biblia ika nin revista uan okseki amatlajkuilolmej. Pampa kinpaleuiskej itekipanojkauan toTajtsin Dios ma kipiakan chikauak intlaneltokilis, itech xiuitl 1914 okiski “Foto-Drama de la Creación” uan itech xiuitl 1917 okiski amochtli El misterio Terminado. Itech xiuitl 1919 opanok ken ialtepe toTajtsin Dios oksepa yoltoskia uan yetoskia itech se yankuik tlali. Ijkuakon akinmej kichiaj yoltoskej itech Tlaltikpak opejkej san sekan tekitij iuan tlapejpenalmej. Uan axkan tinochtin san sekan tiktekichiuiliaj Jehová uan tikatej ken miakej soldados (Ezequiel 37:10; Zacarías 8:20-23). * (Xikita tlajtoli tlen kiualika tlakxitlan).

Kuali tikmatij itekipanojkauan toTajtsin Dios omochijkej itlakeualuan Ueyi Babilonia kanaj itech xiuitl 100, ijkuak miakej omoxelojkej itech tlaneltokalistli tlen melauak. Ijkuakon sapanoa oui kitekichiuiliskej Jehová, noijki ijkon ken ijkuak israelitas okinuikakej Babilonia. Pero axkan tikintlapouijtokej nochtin tlaltikpaktlakamej itech tlen melauak. Techyolpaktia tikmatiskej axkan tikatej itech kauitl ijkuak akinmej kipiaskej ixtlamatilistli petlaniskej, ijkuak miakej mochipauaskej uan kiseliskej tlaneltokalistli tlen melauak (Daniel 12:3, 10).

Ijkuak Satanás okiyejyeko Jesús, ¿melauak okiuikak itech teokali? ¿Noso san itech se kochtemikilistli?

Amo kuali tikmatij tlen okichi Satanás pampa Jesús kitaskia teokali. Ma tikitakan tleka ijkon tikijtoaj.

Mateo uan Lucas okiyekijtojkej tlen okichi Satanás iuan Jesús itech non tonal. Mateo kijtoa Satanás “okiwík n Jesús kan Jerusalén, okitlejkolti ikpak n Weyi Tiopa” (Mateo 4:5). Lucas okijkuilo Satanás “okiwík n Jesús kan altepetl de Jerusalén, okitlejkolti ikpak n Weyi Tiopa kan okachi wejkapa” (Lucas 4:9).

Yiuejkika toamatlajkuiloluan okijtoayaj ijkuak Satanás okiyejyeko Jesús amo okiuikak itech teokali tlen okatka Jerusalén. Se neskayotl, revista La Atalaya (ika náhuatl del centro Akin Tetlapouijtok) 15 de  julio de 1961 okijto nin ken ijkuak Satanás okiyejyeko Jesús uan okiuikak ipan se tepetl uan okinmititi nochtin altepemej tlen katej itech Tlaltikpak. Revista okijto amo okatka melauak se tepetl pampa amo onka se tepetl kanin uelis motaskej nochtin altepemej. Ik non, revista okijto uelis tikijtoskej Satanás amo melauak okiuikak Jesús itech teokali. Pero revistas Akin Tetlapouijtok tlen okachi yankuikej kijtoaj tla Jesús mokajkauaskia itech teokali uelis mikiskia.

Sekimej kijtoaj ken Jesús amo okatka levita, tlanauatilmej tlen okinpiaya judíos amo kikauiliskia ma tlejko ipan santuario tlen okatka itech teokali. Ik non, kijtoaj Satanás okiyejyeko Jesús san ika se kochtemikilistli. Miak xiuitl achto, Ezequiel ika se kochtemikilistli okiuikakej itech teokali (Ezequiel 8:3, 7-10; 11:1, 24; 37:1, 2).

Tla Satanás okiyejyeko Jesús ika se kochtemikilistli, sekimej uelis motlajtlaniskej:

  • ¿Melauak kinekiskia mokajkauayas Jesús itech teokali?

  • Ika okseki tlamantli tlen okijyeyeko Jesús, Satanás okilui temej ma kinkuepa pan uan ma kiueyichiua, nin amo okichi ika se kochtemikilistli. Ik non, ¿uelis Satanás okilui Jesús ma mokajkaua itech teokali uan amo san itech se kochtemikilistli?

Pero tla Satanás melauak okiuikak Jesús itech teokali, sekimej uelis motlajtlaniskej:

  • ¿Jesús amo okintlakamatki tlanauatilmej ijkuak otlejkok ipan santuario itech teokali?

  • ¿Ken oajsito Jesús itech teokali tla okatka kanin tlauaki?

Ma tikitakan itlaj tlen uelis techpaleuis ma tikinnankilikan ome tlajtlanilmej tlen yikin otikinmijtojkej.

Se tlakatl tlen omomachti kijtoa ijkuak Mateo uan Lucas otlajtojkej itech teokali, amo san okijtojkej itech santuario, kanin san uelis kalakiskiaj levitas. Uelis okijkuilojkej itech nochi teokali. Itech nin teokali uelis tlen okachi uejkapan okatka ik sureste, kanin ikuapak tlamanik noso plano. Uelis Satanás ompa okiuikak Jesús. Ompa hasta ixtlauak itech Cedrón okipiaya kanaj 140 metros uejkapan. Se tlakatl ixtlamatki tlen omotokayotiaya Josefo okijto sapanoa uejkapan, uan tla ikaj ompa omotokiaya pampa tlachias tlakxitlan sapanoa omomojtiaya. Maski Jesús amo okatka levita, ye uelis ompa tlejkoskia uan amo ikaj uelis kiluiskia tleka amo okitlakamatki tlanauatil.

Pero ¿ken uelis ajsiskia Jesús itech Jerusalén tla ye okatka kanin tlauaki? Nin amo tikmatij. Biblia san kijtoa Satanás okiuikak Jesús itech Jerusalén. Amo kijtoa kox Jesús uejka okatka noso amo, nion keski uelta okiyejyeko Satanás. Ik non, Jesús uelis nejnemiskia Jerusalén maski sapanoa uejkauaskia.

Ijkuak Satanás okititi Jesús nochtin altepemej, uelis san okichi ika se kochtemikilistli, pampa amo onka se tepetl tlen sapanoa ueyi kanin uelis tikinmitaskej nochtin altepemej. Nin uelis tikneskayotiskej ken ijkuak ikaj kinmititiaj seki tlaixkopinalmej itech okseki altepemej pero kichiuaj itech se televisión. Pero maski Satanás san okiyejyeko ika se kochtemikilistli, ye melauak okinekiaya ma kiueyichiua uan iixpan ma motlankuaketsa (Mateo 4:8, 9). Ik non, ijkuak Satanás okiuikak Jesús itech teokali, uelis Satanás melauak okinekiaya Jesús ma mokajkaua itech teokali. Pero Jesús amo okichi. Ijkon melauak kiyejyekoskia, amo ijkon panoskia tla kichiuaskia ika se kochtemikilistli.

Uelis tikijtoskej Jesús oyajki Jerusalén uan otlejkok kanin okachi tlajpak itech teokali. Pero ken otikijtojkej kanin peua nin tlamachtil, amo tikmatij tlen okichi Satanás pampa Jesús ma kita teokali. San tikmatij Satanás miak uelta okiyejyeko Jesús pampa ma kichiua tlen amo kuali, pero Jesús amo keman okichi.

^ párr. 2 Xikita revista La Atalaya (ika náhuatl del centro Akin Tetlapouijtok) 15 de julio 2013, páginas 10-12, párrafos 5-8, 12.

^ párr. 2 Itech Ezequiel 37:1-14 uan Apocalipsis 11:7-12 techiluiaj itech seki tlamantli tlen mochiuaskia itech xiuitl 1919. Tlen ijkuilitok itech Ezequiel 37:1-14 techiluia nochtin itekipanojkauan toTajtsin Dios mokuepaskiaj itech tlaneltokalistli tlen melauak, nin opanok itech xiuitl 1919, nin opanok miak xiuitl satepan omochijkej itlakeualuan ueyi Babilonia. Pero Apocalipsis 11:7-12 techiluia itech xiuitl 1919 amo miakej tlapejpenalmej tlen kinyekanaj itekipanojkauan toTajtsin Dios ken oksepa moyolitiskiaj. Ninmej tokniuan amo okinkauiliayaj ma kitekichiuilikan toTajtsin Dios.