Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Marzo de 2016

San sekan ma titekitikan pampa san sekan ma yeto tlanechikol

San sekan ma titekitikan pampa san sekan ma yeto tlanechikol

“Iwa por Cristo nochi n kuerpo moseitilijtih iwa mosalojtiwih nochteh n omiomeh” (EFESIOS 4:16).

TLAKUIKALMEJ: 53 UAN 16

1. ¿Ken tekiti Jehová iuan itekipanojkauan?

JEHOVÁ uan Jesús yiuejkika san sekan tekitij. Jehová achto okichijchi Jesús. Satepan Jesús otekitik “inauak ken se kuali tekipanojki” (Proverbios 8:30). Noijki ijkon itekipanojkauan Jehová san sekan tekitij pampa kichiuaskej tlen Jehová okinnanauati. Se neskayotl, Noé uan ikalchanejkauan san sekan otekitikej pampa kichijchiuaskej akali. Miak xiuitl satepan, israelitas san sekan otekitikej pampa kichijchiuaskej tabernáculo, pampa kixixiniskej uan oksekan kiuikaskej. Ijkuak yokatka teokali, israelitas san sekan otlakuikakej uan otlatsotsonkej pampa ika kualtsitsintin tlakuikalmej okiueyichijkej Jehová. Itekipanojkauan Jehová kichiuaj nochi nin tlamantli pampa san sekan katej uan tekitij (Génesis 6:14-16, 22; Números 4:4-32; 1 Crónicas 25:1-8).

2. (1) ¿Tlen okichiuayaj tokniuan itech achto siglo? (2) ¿Tlen timomachtiskej axkan?

 2 Tetlajtlachialtia tikitaskej akinmej achto okichiuayaj ken Cristo noijki san sekan otekitiayaj. Tlatitlanil Pablo okijto sejse kipia iteki uan tlen uelis kichiuas, pero san sekan okatkaj pampa nochtin okichiuayaj ken Cristo. Tlatitlanil Pablo okijto okatkaj ken se tlalnakayotl, tlen kipia miak tlamantli pero san sekan tekitij (xiktlajtolti 1 Corintios 12:4-6, 12). ¿Uan tejuan? ¿Ken uelis san sekan titekitiskej ijkuak titetlapouiaj, itech tlanechikol uan tokalchanejkauan? Nin axkan timomachtiskej.

MA TIMOCHIJCHIKAUAKAN SAN SEKAN MA TITETLAPOUIKAN

3. ¿Tlen okitak tlatitlanil Juan?

3 Se tonal Jehová okichi tlatitlanil Juan ma kinmita chikome ángeles tlen okipitsayaj intlapitsaluan. Ijkuak non makuili ángel okipitski itlapitsal, tlatitlanil Juan okitak “se sítlali non owetsiko ipan tlaltíkpaktli”. Uan non “sítlali” okitekitilti llave pampa kitlapos “sentlawejkatlantik poso” kanin tlayoa. Ijkuakon itech nin “sentlawejkatlantik poso” opejki kisa miak poktli. “Iwa ijtik non poktli okiskeh wejweyi chapulimeh”. Pero ninmej chapulimej amo okikuajkej xiuitl, oyajkej inpan tlaltikpaktlakamej “akimeh amo kipiah ixneskayo Dios itech inmixkuak” (Apocalipsis 9:1-4). Tlatitlanil Juan okimatiaya ninmej chapulimej sapanoa tetlajyouiltiaj, ijkon ken opanok itech ueyi altepetl Egipto (Éxodo 10:12-15). Ninmej chapulimej tlen tlatitlanil Juan okinmitak kineskayotiaj tlapejpenalmej tlen tetlapouijtokej itlaj chikauak itech tlaneltokalismej tlen amo melauak. Inmiuan noijki katej sapanoa miakej tlaltikpaktlakamej tlen kichiaj yetoskej itech Tlaltikpak. Tinochtin san sekan titekitij itech nin tekitl tlen yokinpaleui miakej tlaltikpaktlakamej ma momakixtikan itech tlaneltokalistli tlen amo melauak uan itech nochi tlen kiyekantok Satanás.

Pampa uelis titetlapouiskej itech nochi Tlaltikpak, moneki san sekan ma tiyetokan.

4. (1) ¿Tlen ueyi tekitl moneki tikchiuaskej? (2) ¿Tlen moneki ma tikchiuakan pampa tikchiuaskej tlen kijtoa Jehová?

4 Jehová yotechmakak se ueyi tekitl. Moneki ma titetlapouikan itech Tekiuajkayotl achto tlamis nochi tlen amo kuali (Mateo 24:14, TNM; 28:19, 20, TNM). Moneki ma tikinyoleuakan nochtin ma konikan “nin atl, non kitemaka semijkak yolílistli”. Kijtosneki, moneki tikinmachtiskej nochtin akinmej kinekij kimatiskej tlen melauak itech Biblia (Apocalipsis 22:17). Tla tiknekij tikchiuaskej tlen toTajtsin Dios techiluia, moneki ma titekitikan san sekan iuan tlanechikol (Efesios 4:16).

5, 6. ¿Tlen tlamantli kiteititia tiiTlaixpantijkauan Jehová san sekan titetlapouiaj?

5 Pampa uelis tikintlapouiskej sapanoa miakej tlaltikpaktlakamej, moneki ma timoyektlalikan. Uan techpaleuis nochi tlen moijtoa itech tlanechikol, ken ijkuak  timonechikoaj pampa titetlapouitiuij. Ika nochi tlen ompa moijtoa uelis okachi kuali titetlapouiskej itech Tekiuajkayotl itech nochi Tlaltikpak uan uelis tikinmachtiskej sapanoa miakej tlaltikpaktlakamej. Uan ualeua techiluiaj ma tikchiuakan seki tekitl tlen okachi ipati. Ijkuak ijkon tikchiuaj, san sekan titekitij iuan sapanoa miakej tokniuan tlen katej itech nochi Tlaltikpak. Uan noijki titekitij iuan ángeles, pampa yejuan techpaleuiaj ma titetlapouikan (Apocalipsis 14:6).

6 Uan melauak nochi tlen moijtoa itech tetlapouilistli tlen kijkuiloaj itech amochtli Anuario techyolpaktia. Noijki ueyi nechikol regional techpaleuia san sekan ma tiyetokan. Seki tonalmej achto mochiuas ueyi nechikol tikinyoleuaj miakej noijki touan ma monechikokan. Uan itech ueyi nechikol, tinochtin tikkakij tlen ompa moijtoa. Tlapoualismej, neskayomej uan tlamauisolmej techpaleuiaj okachi kuali ma tiktekichiuilikan Jehová. Uan noijki yoak ijkuak tikilnamikij imikilis Jesús, tlen tikchiuaj itech tonal 14 metstli nisán, techpaleuia san sekan ma tiyetokan (1 Corintios 11:23-26). Seki semanas achto tikilnamikiskej imikilis Jesús tinochtin tikinyoleuaj miakej tlaltikpaktlakamej touan ma monechikokan. Uan satepan tinochtin timonechikoaj itech non tonal ijkuak yokalak Tonaltsin. Ijkon tikteititiaj tiktlakamatij Jesús uan tikteititiaj tiktlasojkamatiliaj tlen Jehová topampa okichi.

7. ¿Tlen ueli tikchiuaj pampa san sekan titekitij?

7 San se chapuli amo uelis kichiuas miak tlamantli. Noijki toselti amo uelis tikintlapouiskej miakej tlaltikpaktlakamej. Pero ijkon ken chapulimej, san sekan titekitij. Ijkon ueli tikintlapouiaj sapanoa miakej tlaltikpaktlakamej itech Jehová uan tikinpaleuiaj ma kiueyichiuakan.

MA TITLAPALEUIKAN PAMPA SAN SEKAN MA YETO TLANECHIKOL

8, 9. (1) ¿Ika tlen neskayotl okijto Pablo moneki ma yeto san sekan tlanechikol? (2) ¿Tlen uelis tikchiuaskej pampa tlanechikol san sekan ma yeto?

8 Tlatitlanil Pablo okinyekilui tokniuan tlen okatkaj Éfeso ken kajki tlanechikol uan noijki okinmilui ma moskaltikan itech nochi tlamantli (xiktlajtolti Efesios 4:15, 16). Tlatitlanil Pablo okineskayoti ika itlalnakayo se tlaltikpaktlakatl ken tinochtin uelis titlapaleuiskej pampa san sekan ma yeto tlanechikol uan ma tikchiuakan ken Cristo akin kajki ken “itsonteko n kuerpo”. Tlatitlanil Pablo okijto itech itlalnakayo se tlaltikpaktlakatl nochi kuali kajki pampa articulaciones kuali tekitij. Pero maski titelpokamej noso yitikpiaj okachi miak xiuitl, timokokoaj noso amo, ¿tlen uelis tikchiuaskej pampa san sekan ma yeto tlanechikol?

¿Ken uelis titlapaleuiskej san sekan ma yeto tlanechikol?

9 Jesús okintlali tlayekankej pampa ma tlayekanakan itech tlanechikol. Ye kineki ma tikintlakaitakan uan ma tikchiuakan ijkon ken kijtoaj (Hebreos 13:7, 17). Pero ualeua oui ijkon tikchiuaskej. Pero tla tikiluiaj Jehová ma techpaleui ye techmakas  iespíritu santo uan techpaleuis ma titetlakamatikan. Tla tiyolyamankej uan san sekan titekitij iuan tlayekankej, okachi titlapaleuiskej itech tlanechikol. Tinochtin san sekan tiyetoskej uan okachi timotlasojtlaskej.

10. ¿Ken tlapaleuiaj siervos ministeriales pampa tlanechikol san sekan ma yeto? (Xikita tlaixkopinal tlen ika peua tlamachtil).

10 Siervos ministeriales noijki tlapaleuiaj pampa tlanechikol san sekan ma yeto. Yejuan mochijchikauaj pampa kinpaleuiskej tlayekankej uan kintlasojkamatiliaj tlen kichiuaj. Se neskayotl, mochijchikauaj ma tikinpiakan amatlajkuilolmej tlen ika titetlapouiskej. Uan noijki kuali kinseliaj akinmej touan monechikoaj. Uan noijki tlapaleuiaj ijkuak moyektlalia uan mochipaua kali kanin timonechikoaj. Ijkuak tikinpaleuiaj siervos ministeriales, titlapaleuiaj tlanechikol san sekan ma yeto uan san sekan ma tiktekichiuilikan Jehová (noijki xikita Hechos 6:3-6).

11. ¿Ken uelis tlapaleuiskej telpokamej san sekan ma yeto tlanechikol?

11 Sekimej tlayekankej yiuejkika chikauak tekititokej itech tlanechikol. Pero uelis axkan yikipiaj miak xiuitl uan ayakmo uelij tekitij miak ken achto okichiuayaj. Pero telpokamej uelis kinpaleuiskej. Tla kinmachtiaj, yejuan uelis kichiuaskej okachi miak tekitl. Uan noijki siervos ministeriales moneki ma mochijchikauakan pampa satepan uelis tekitiskej ken tlayekankej (1 Timoteo 3:1, 10). Oksekimej tlayekankej tlen ok telpokamej chikauak tekitij uan axkan tlayekanaj itech circuito uan ijkon kinpaleuiaj miakej tlanechikolmej. Tikintlasojkamatiliaj pampa miakej telpokamej kinekij kinpaleuiskej oksekimej tokniuan (xiktlajtolti Salmo 110:3 *; Eclesiastés 12:1 *).

SAN SEKAN MA YETOKAN KALCHANEJKEJ

12, 13. ¿Tlen uelis kichiuaskej tokalchanejkauan pampa san sekan ma yetokan?

12 ¿Tlen uelis tikchiuaskej pampa tokalchanejkauan san sekan ma yetokan? Miak ipati nochi semanas ma tikueyichiuakan Jehová ken kalchanejke. Tla tetajmej uan inkoneuan kixeloaj kauitl pampa motlapouiskej, ijkon okachi motlasojtlaskej. Se neskayotl, uelis momachtiskej tlen kijtoskej ijkuak tetlapouiskej. Nin kinpaleuis okachi kuali ma moyektlalikan. Ijkuak tikinkakij tokalchanejkauan tetlapouiaj itech Jehová uan kitlasojtlaj uan kinekij kiyolpaktiskej, nochtin kalchanejkej okachi san sekan katej.

Tla akinmej yomonamiktijkej kitlasojtlaj Jehová uan san sekan kitekichiuiliaj, yejuan okachi yolpakiskej uan kuali mouikaskej.

13 Jehová kineki ma mopaleuikan akinmej yomonamiktijkej pampa san sekan ma yetokan (Mateo 19:6). Tla yejuan  kitlasojtlaj Jehová uan san sekan kitekichiuiliaj, uelis yolpakiskej uan san sekan yetoskej. Miak ipati ma motlasojtlakan, ijkon ken Abrahán uan Sara, Isaac uan Rebeca uan Elqaná uan Ana (Génesis 26:8; 1 Samuel 1:5, 8; 1 Pedro 3:5, 6). Ijkon san sekan yetoskej uan kuali mouikaskej iuan toTajtsin Dios (xiktlajtolti Eclesiastés 4:12 *).

Ijkuak kiueyichiuaj Jehová ken kalchanejkej, kinpaleuia telpokamej uan akinmej yikipiaj miak xiuitl san sekan ma yetokan. (Xikinmita párrafos 12, 15).

14. Tla tonamik amo kitekichiuilia Jehová, ¿tlen uelis tikchiuaskej pampa san sekan ma tiyetokan?

14 Biblia kuali kijtoa amo ma timonamiktikan iuan akin amo kitekichiuilia Jehová (2 Corintios 6:14). Pero sekimej tokniuan innamik amo iTlaixpantijka Jehová. ¿Tleka? Sekimej uelis opejkej momachtiaj ijkuak yokipiayaj innamik, pero innamik amo kineki mochiuas iTlaixpantijka Jehová. Oksekimej uelis omonamiktijkej iuan akin okatka iTlaixpantijka Jehová pero axkan ayakmo kineki. Tla ikaj ijkon kipanoa, itech inamiktilis uelis yolpakis tla kitlakamati nochi tlen kijtoa Biblia, maski ualeua oui. Ma tikitakan tlen okipanok Mary uan David. Yejuan okatkaj iTlaixpantijkauan Jehová, pero satepan David ayakmo okinek monechikos. Mary omochijchika kuali kichiuas iteki uan yetos se kuali siuatl. Okintlapoui itech Jehová chikuase ikoneuan uan nochipa omonechiko. Seki xiuitl satepan, ijkuak inkoneuan okachi omoskaltijkej ayakmo okatkaj inkalijtik. Mary okitak okachi oui kitekichiuilis Jehová, pero amo keman okika. Uan noijki itech ikalijtik okintlaliaya revistas pampa inamik uelis kinmitaskia. Se tonal David opejki kintlajtoltia. Seki kauitl satepan, opejki oksepa monechikoa. Se iixui tlen okipiaya 6 xiuitl nochipa okixeloaya kanin motlaliskia. Uan tla David amo oajsiaya, iixui okiluiaya: “Nokojkol, onimitschixtoka itech nechikol”. 25 xiuitl satepan David oksepa opejki kitekichiuilia Jehová. Axkan ye uan inamik san sekan kitekichiuiliaj Jehová uan sapanoa yolpakij.

15. ¿Tlen uelis kichiuaskej akinmej yiuejkika omonamiktijkej?

 15 Satanás kintlajyouiltijtok kalchanejkej. Ik non, nochtin akinmej yomonamiktijkej uan kitekichiuiliaj Jehová moneki san sekan tekitiskej. Maski yiuejkika noso yikin onanmonamiktijkej, moneki nanmokuayejyekoskej ken uelis okachi mochikauas namonamiktilis. Akinmej yiuejkika omonamiktijkej, uelis kinmachtiskej tlen kichiuaskej akinmej yikin omonamiktijkej. Uelis kinyoleuaskej ijkuak kiueyichiuaj Jehová ken kalchanejke. Ijkon telpokamej uelis kitaskej maski panos miak xiuitl, akinmej yomonamiktijkej uelis san sekan yetoskej uan motlasojtlaskej (Tito 2:3-7).

“MA TITLEJKOKAN ITECH ITEPE JEHOVÁ”

16, 17. Tla san sekan tikatej, ¿tlen tlateochiualismej tikseliskej?

16 Ijkuak israelitas san sekan oyayaj Jerusalén pampa iluichiuaskej, nochtin san sekan oyayaj. Okiyektlaliayaj nochi tlen omonekiaya uan satepan omopaleuiayaj ijkuak oyajtokaj. Ijkuak oajsiayaj itech teokali, san sekan okiueyichiuayaj Jehová (Lucas 2:41-44). Axkan tejuan timoyektlaliaj pampa tiyoltoskej itech Xochitlali. Ik non, miak ipati san sekan ma titekitikan. ¿Onka seki tlamantli tlen uelis tikchiuaskej pampa tikinpaleuiskej tokniuan?

17 Axkan tlaltikpaktlakamej tlatlamantli kichiuaj, ik non, moteuiaj. Pero tiktlasojkamatiliaj Jehová pampa tikpiaj yolseuilistli uan tikajsikamatij tlen kijtoa Biblia. Itech nochi Tlaltikpak itekipanojkauan Jehová tikueyichiuaj ken ye kineki. Uan noijki axkan okachi san sekan tikatej. Ijkon ken okijtojkej Isaías uan Miqueas, tinochtin “ma titlejkokan itech itepe Jehová” (Isaías 2:2-4; xiktlajtolti Miqueas 4:2 *). Tla san sekan tikatej, tikseliskej miakej tlateochiualismej. Uan ayakmo miak poliui tikitaskej ken itech nochi Tlaltikpak tinochtin san sekan tikueyichiuaskej Jehová.

^ párr. 11 Salmo 110:3 kijtoa: “Ika miak pakilistli motemakas moaltepe itech tonal ijkuak tikteititis tikinyekana soldados. Ijkuak motematiltis tlen santo, desde kanin kisa Tonaltsin, tikpia inpaleuilis miakej telpokamej ijkon ken ajuachtli”.

^ párr. 11 Eclesiastés 12:1 kijtoa: “Uan xikiInamiki akin Omitschijchi ijkuak ok titelpochtli ijkuak ayamo uits ouijkayotl pampa ijkuak ejkoskej non tonalmej tikijtos: ‘Onikauilchi noyolilis’”.

^ párr. 13 Eclesiastés 4:12 kijtoa: “Uan tla ikaj uelis kitlanis se, ome uelis kixnamikiskej. Uan se mekatl tlen kipia eyi ichtli amo uelis san niman kotonis”.

^ párr. 17 Miqueas 4:2 kijtoa: “Uan itech itlamian tonalmej tepetl kanin kajki ichan Jehová kuali yetos inkuapak tepemej, uan mouejkapantlalis inkuapak tepemej; uan inauak moneki uitsej nochi altepemej”.