Xikita nochi

Tlen kiualika

Amo ma tikajauilmatikan tomin

Amo ma tikajauilmatikan tomin

Miakej moyekanaj ika principios bíblicos uan non kinpaleuia amo ma moouijtilikan ika tomin.

MA TIKITAKAN KEN TIKTEKITILTISKEJ TOTOMIN

PRINCIPIO BÍBLICO: “Kuali kisas tlen kichiua akin kipaktia tekipanos pero amitlaj kipias akin san niman itlaj kichijtikisa” (Proverbios 21:5).

¿TLEN KIJTOSNEKI? Ma tikitakan ken tiktekitiltiskej totomin tla amo tiknekij timoouijtiliskej. Ma tikilnamiktokan amo uelis tikmokouiskej nochi tlen tiknekij. Ik non, achto ma tikitakan kox techajxilis.

¿TLEN UELIS TIKCHIUASKEJ?

  • Ma tikitakan kox techajxilis totomin. Achto ma tikitakan tlen tiknekij tikmokouiskej uan satepan ma tikitakan tlen okachi moneki tikkouaskej. Sekan ma tiktlalikan tomin tlen ika titlakojtiaskej. Ma tikitakan ken tikchiuaskej. Ma tikijtokan kanaj otitlakuatoj uan otitlatlaxtlajkej miak. Ijkuakon uelis tiktilanaskej tomin tlen ika tikmokouiskiaj okse tlamantli.

  • Amo ma tikmotlaneuikan tomin tla amo moneki. Amitlaj ma tikkouakan tlen san ajachi tiktlaxtlajtiaskej. Moneki achto ma tikololokan totomin tla tiknekij itlaj tikmokouiskej. Tla tikmotlaneuiskej tomin, san niman ma tikitakan ken tikkopaskej tla amo tiknekij timoouijtiliskej. Pero tla yitikteuikiliaj tomin, san niman ma tikitakan ken tiktekopiliskej.

    Ijkuak ikaj nochipa kimotlaneuia tomin, san totoka kitlamia. Ik non, kuali ma timokuayejyekokan kox tikmotlaneuiskej tomin.

MA TIKCHIUAKAN TLEN TECHPALEUIS

PRINCIPIO BÍBLICO: “Akin tlatsiui amo kineki tlaxouas ijkuak seua, ik non, amitlaj kipias ijkuak pixkaskej maski tlatemojtinemis” (Proverbios 20:4).

 ¿TLEN KIJTOSNEKI? Amitlaj tikpiaskej tla titlatsiuij. Ik non, ma titekitikan, ma tikitakan ken tiktekitiltiskej totomin uan ijkon tikpiaskej tlen ika timopanoltiskej.

¿TLEN UELIS TIKCHIUASKEJ?

  • Ma titekipanokan. Tla kuali titekipanoaj uan amo timotonalpoloaj, xamo uejkika techmakaskej tekitl kanin titekipanoaj. Porque akinmej tetlakeuaj kinpaktia tekipanoskej iuan akinmej amo tlatsiuij.

  • Amo ma titlachtekikan. Tla titlachtekij, oksekimej kimatiskej uan ayakmo kanaj techtlakeuaskej.

  • Amo ma titlaixnekikan. Tla nochipa san tiktemojtoskej ken tiktlaniskej miak tomin, timokokoskej uan ayakmo kuali timouikaskej iuan oksekimej. Ma tikilnamiktokan okachi ipati kuali ma tiyetokan uan amo ma tikixnekikan tomin.

OKSEKI PRINCIPIOS BÍBLICOS

Xiktlajtolti Biblia itech jw.org. Kajki ika miakej tlajtolmej.

AMO MA TIMOTONALPOLOKAN NION MA TIKAJAUILMATIKAN TOTOMIN

“Amitlaj kipias akin tlauana uan akin sapanoa tlakua uan san kochisneki, ik non, kipias itlaken yotlajtlanki” (PROVERBIOS 23:21).

AMO SAPANOA MA TIMOTEKIPACHOKAN

“Amo ximotekipachokah por tlan nonkimomajsewiskeh noso tlan nonkoniskeh para ika nonyolitoskeh, noso tlan nonkonakiskeh” (MATEO 6:25).

AMO MA TIYETOKAN TINEXIKOLTIN

“Akinmej moxikoaj san kinekij kipiaskej miak tlamantli pero amo kimatij satepan ayakmo itlaj kipiaskej” (PROVERBIOS 28:22).