Xikita nochi

Tlen kiualika

 TLAMACHTIL 39

“Onikinmitak senmiaktikeh tlaltikpaktlakah”

“Onikinmitak senmiaktikeh tlaltikpaktlakah”

“Onikinmitak senmiaktikeh tlaltikpaktlakah non ayakmaka oweletia okimpoaya, omoketokah iyakapa n weyi yáyantli iwa iyakapa n Ichkatsi” (APOC. 7:9).

TLAKUIKALI 60 Ma tikinpaleuikan ma momakixtikan

XIKILNAMIKTO *

1. ¿Tlen okixnamiktoka Juan itlamian achto siglo?

ITLAMIAN achto siglo Juan okixnamiktoka itlaj amo kuali. Yokipiaya miak xiuitl, otsaktoka ompa itech isla tlen itoka Patmos uan xamo san ye okatka saiktlami tlatitlanil (Apoc. 1:9). Okimatiaya akinmej amo otlamachtiayaj tlen melauak itech toTajtsin Dios okinkajkayajtokaj tokniuan uan okinxexelojtokaj. Omotaya ayakmo yetoskiaj akinmej melauak kichiuaj ken Cristo (Jud. 4; Apoc. 2:15, 20; 3:1, 17).

Tlatitlanil Juan “onikinmitak senmiaktikeh tlaltikpaktlakah”. Yejuan otlakentitokaj istak uan okipixtokaj soyatl. (Xikita párrafo 2).

2. Ijkon ken kijtoa Apocalipsis 7:9-14, ¿tlen tetlajtlachialti okitak Juan? (Xikita ixko revista).

2 Maski Juan okixnamiktoka itlaj amo kuali, okitak itlaj tetlajtlachialti. Ijkuak okitak non tlamantli, okinmiluijkej sekimej ángeles ma kitsakuilijtokan ejekatl tlen ika teixpoloskej ijkuak tlamis kinnechikoskej oksekimej tlakeualmej (Apoc. 7:1-3). Ninmej moixmatij ken 144,000 (ciento cuarenta y cuatro mil) tlen kichiuaj ken Cristo uan tlanauatiskej iuan Jesús ompa iluikak (Luc. 12:32; Apoc. 7:4). Pero satepan Juan okijto okinmitak oksekimej. Nin kiteititia xamo omotlajtlachialti ijkuak ijkon okijto. ¿Akinmej okinmitak? Ye okijto: “Onikinmitak senmiaktikeh tlaltikpaktlakah non ayakmaka oweletia okimpoaya, omoketokah iyakapa n weyi yáyantli iwa iyakapa n Ichkatsi” (xiktlajtolti Apocalipsis 7:9-14). Xamo sapanoa oyolpakik porque okitak satepan miakej kiueyichiuaskiaj Jehová.

3. (1) Tleka moneki ma techyolchikaua tlen okitak Juan? (2) ¿Tlen timomachtiskej?

3 Tlen okitak Juan sapanoa okiyolchika. Tejuan noijki moneki okachi ma timoyolchikauakan porque tlen okitak  Juan axkan mochijtok. Axkan tikitaj sapanoa miakej kiueyichiuaj Jehová uan kichiaj ma kinmakixtikan ijkuak techtlajyouiltiskej uan kichiaj kipiaskej yolilistli tlen amo keman tlamis. Axkan tikitaskej ken Jehová okinpaleui tokniuan ma kajsikamatikan akinmej “senmiaktikeh tlaltikpaktlakah” uan nin opanok yikipia ochenta xiuitl. Noijki tikitaskej ome tlamantli tlen okitak Juan. Sapanoa miakej okinmitak uan uitsej itech miakej altepemej. Tlen timomachtiskej kinyolchikauas akinmej pouij itech “senmiaktikeh tlaltikpaktlakah”.

¿KANIN CHANTISKEJ “SENMIAKTIKEH TLALTIKPAKTLAKAH”?

4. (1) ¿Tlen amo kajsikamatij akinmej pouij itech okseki religiones? (2) ¿Tlen okajsikamatkej akinmej omomachtiayaj Biblia?

4 Akinmej pouij itech religiones amo tlamachtiaj akinmej kitlakamatij toTajtsin Dios chantiskej tlaltikpak (2 Cor. 4:3, 4). Axkan miakej kineltokaj akinmej yolkualmej yaskej iluikak ijkuak ixpoliuiskej. Pero itlamian siglo diecinueve, yokineltokayaj okse tlamantli akinmej omomachtiayaj Biblia uan okijkuiloayaj revista tlen axkan moixmati ken Akin Tetlapouijtok. Okajsikamatkej toTajtsin Dios kikopas tlaltikpak se kualtsin xochitlali uan miakej ompa chantiskej uan amo yaskej iluikak. Pero oui okajsikamatkej akinmej chantiskiaj nikan tlaltikpak (Mat. 6:10).

5. ¿Tlen okajsikamatkej akinmej omomachtiayaj Biblia akinmej 144,000?

5 Akinmej omomachtiayaj Biblia, okajsikamatkej iTlajtol toTajtsin Dios kijtoa sekimej okinkojkej nikan tlaltikpak uan tlanauatiskej iuan Jesús ompa iluikak (Apoc. 14:3). Ninmej yetoskiaj 144,000 tlen okitekichiuilijkej toTajtsin Dios itech tlaltikpak uan sapanoa oyolpakiayaj. Ik non, ¿akinmej pouij itech “senmiaktikeh tlaltikpaktlakah”?

6. ¿Tlen okineltokayaj tokniuan akinmej pouij itech “senmiaktikeh tlaltikpaktlakah”?

6 Juan okinmitak “senmiaktikeh tlaltikpaktlakah” uan “omoketokah iyakapa n weyi yáyantli iwa iyakapa n Ichkatsi” (Apoc. 7:9). Akinmej omomachtiayaj Biblia, okajsikamatkej nin “senmiaktikeh tlaltikpaktlakah” yaskiaj iluikak ijkon ken 144,000. Pero ¿tleka tlatlamantli okatkaj tla nochtin yetoskiaj iluikak? Akinmej omomachtiayaj Biblia, okineltokayaj “senmiaktikeh tlaltikpaktlakah” yejuan akinmej amo nochipa okitlakamatkej toTajtsin Dios. Okineltokayaj sekimej okitlakamatiayaj Jehová uan opouiayaj itech okseki religiones. Satepan okijtojkej yejuan akinmej amo okachi kuali okitekichiuilijkej Jehová uan amo uelis tlanauatiskej iuan Jesús. Amo okachi okitlasojtlakej Jehová, ik non, yetoskiaj iluikak pero san ompa tlachixtoskiaj uan amo kintlaliskiaj ipan introno.

7. (1) Akinmej omomachtiayaj Biblia, ¿akinmej okijtoayaj chantiskiaj tlaltikpak ijkuak tlanauatiskia Cristo? (2) ¿Tlen okijtoayaj kinpanoskia akinmej okitekichiuilijkej toTajtsin Dios ijkuak ayamo oualaya Cristo?

7 Tla ijkon, ¿akinmej chantiskiaj tlaltikpak? Akinmej omomachtiayaj Biblia okineltokayaj ijkuak 144,000 yaskiaj iluikak uan “senmiaktikeh tlaltikpaktlakah”, sapanoa miakej uelis yetoskiaj nikan tlaltikpak uan Cristo kinteochiuaskia ijkuak tlanauatiskia mil xiuitl. Akinmej omomachtiayaj Biblia, amo keman omokuayejyekojkej miakej kitekichiuiliskej Jehová ijkuak ayamo peuaskia tlanauatis Cristo. Porque yejuan  omokuayejyekoayaj “senmiaktikeh tlaltikpaktlakah” kinmititiskiaj ken kitekichiuiliskej Jehová ijkuak tlanauatijtoskia Cristo mil xiuitl. Satepan akinmej kichiuaskiaj tlen kineki toTajtsin Dios, nochipa yoltoskiaj uan kinpojpoloskiaj akinmej amo yolkualmej. Noijki okajsikamatiayaj akinmej kintlaliskiaj “príncipes” itech mil xiuitl ijkuak tlanauatijtoskia Cristo, sekimej kinkauiliskiaj nochipa ma yetokan ompa iluikak hasta ma tlami tlanauati Cristo. Noijki kinyolitiskiaj akinmej okitekichiuilijkej toTajtsin Dios ijkuak ayamo oualaya Cristo (Sal. 45:16).

8. ¿Keski grupos okineltokayaj okatkaj akinmej omomachtiayaj Biblia?

8 Akinmej omomachtiayaj Biblia okineltokayaj okatkaj eyi grupos. Se, 144,000 tlen tlanauatiskiaj iuan Cristo. Ome, “senmiaktikeh tlaltikpaktlakah” tlen amo okachi okitlasojtlakej Jehová, yetoskiaj iluikak uan amo kintlaliskiaj ipan introno uan yetoskej ixpan Cristo. Eyi, sapanoa miakej kinmititiskiaj ken kitekichiuiliskej Jehová ijkuak Cristo tlanauatijtoskia mil xiuitl. * Pero Jehová satepan okinmatilti ken omonekiaya kajsikamatiskej non tlamantli (Prov. 4:18).

OKAJSIKAMATKEJ ITLAJTOL TOTAJTSIN DIOS

Itech 1935 miakej omoapolaktijkej tlen kichiaj chantiskej nikan tlaltikpak. (Xikita párrafo 9).

9. (1) ¿Tleka moijtoa “senmiaktikeh tlaltikpaktlakah” uelis ‘moketoskeh iyakapa n weyi yáyantli iwa iyakapa n Ichkatsi’ maski katej nikan tlaltikpak? (2) ¿Tleka kuali okajsikamatkej Apocalipsis 7:9?

9 Itech 1935 iTlaixpantijkauan Jehová okajsikamatkej akinmej pouij itech “senmiaktikeh tlaltikpaktlakah” tlen okitak Juan. Okajsikamatkej “senmiaktikeh tlaltikpaktlakah” amo moneki ‘moketoskeh iyakapa n weyi yáyantli iwa iyakapa n Ichkatsi’. Nin san itlaj kineskayotia. Akinmej pouij itech “senmiaktikeh tlaltikpaktlakah” chantij nikan tlaltikpak uan ‘moketoskeh iyakapa n weyi yáyantli’ tla kitlakamatij Jehová uan kiseliaj san ye kinamiki tlanauatis itech nochi semanauak (Is. 66:1). Noijki moketokej “iyakapa n Ichkatsi” tla kineltokaj Jesús inpatka omotemakak. Noijki ijkon itlaj kijtoa Mateo 25:31, 32. Ompa kijtoa “nochteh n tlaltikpaktlakah” uan noijki akinmej amo yolkualmej kinnechikoskej ixpan Jesús kanin kajki itrono. Nin kiteititia “nochteh” katej tlaltikpak uan amo ompa iluikak. Kuali tlen okajsikamatkej 1935. Okajsikamatkej tleka Biblia kijtoa “senmiaktikeh tlaltikpaktlakah” amo yaskej iluikak. Biblia kijtoa san 144,000 yetoskej iluikak uan ualtlanauatiskej iuan Jesús (Apoc. 5:10).

10. ¿Tleka axkan moneki kimatiskej “senmiaktikeh tlaltikpaktlakah” tlen tlanauatia Jehová?

10 Itech 1935 tiiTlaixpantijkauan Jehová opejki tikajsikamatij “senmiaktikeh tlaltikpaktlakah” tlen okitak Juan, ompa pouij akinmej nochipa chantiskej nikan tlaltikpak. Akinmej kinekij ‘makisaskeh de nochi tlan panos’ itech ueyi tlajyouilistli, moneki kimatiskej tlen tlanauatia Jehová uan axkan ma tlaneltokakan ijkuak ayamo tlanauatia Cristo mil xiuitl (Luc. 21:34-36).

11. ¿Tleka akinmej omomachtiayaj Biblia okineltokayaj sekimej yaskiaj iluikak ijkuak tlamiskia tlanauatis Cristo?

11 Itech párrafo chikome otikitakej akinmej omomachtiayaj Biblia, okineltokayaj sekimej yaskiaj iluikak ijkuak tlamiskia tlanauatis Cristo. ¿Tleka ijkon omokuayejyekoayaj? Non omoijto itech revista Akin Tetlapouijtok 15 de febrero  1913. Ompa okijtoaya tla akinmej amo okachi okitlakamatiayaj toTajtsin Dios yaskiaj iluikak, ¿tleka akinmej yiuejkika okitekichiuilijkej Jehová san mokauaskiaj nikan tlaltikpak? Ijkon omokuayejyekoayaj porque okineltokayaj ome tlamantli. Okineltokayaj “senmiaktikeh tlaltikpaktlakah” yetoskiaj iluikak. Noijki okineltokayaj “senmiaktikeh tlaltikpaktlakah” yejuan akinmej amo okachi okitlakamatiayaj toTajtsin Dios.

12, 13. ¿Tlen kineltokaj akinmej tlapejpenalmej uan akinmej “senmiaktikeh tlaltikpaktlakah”?

12 Pero 1935, iTlaixpantijkauan Jehová okajsikamatkej tlen okitak Juan. “Senmiaktikeh tlaltikpaktlakah” yejuan akinmej kinmakixtiskej itech Armagedón. Ninmej yetoskej “akimeh yopanokeh itech n weyi tlaijyowílistli” uan chikauak kijtoskej: “¡Totemakixtilis wits de Todios iwa n Ichkatsi, Akin ewatok ipan weyi yáyantli!” (Apoc. 7:10, 14). Noijki Biblia kijtoa akinmej kinyolitiskej iluikak kiseliskej itlaj miak ipati uan amo ken akinmej yiuejkika okitekichiuilijkej toTajtsin Dios (Heb. 11:40). Ik non, tokniuan opejki nochtin kinmiluiaj ma kitekichiuilikan Jehová uan ijkon uelis nochipa yoltoskiaj nikan tlaltikpak.

13 Sapanoa yolpakij akinmej chantiskej nikan tlaltikpak. Kajsikamatij ye Jehová kijtos kox tiyetoskej iluikak noso nikan tlaltikpak. Tlapejpenalmej uan “senmiaktikeh tlaltikpaktlakah” kineltokaj kiseliskej nin tetliokolil porque Jehová topatka okitemakak Jesús (Rom. 3:24).

“SENMIAKTIKEH TLALTIKPAKTLAKAH”

14. ¿Tlen omotlajtlaniayaj miakej tokniuan itech 1935?

14 Itech 1935 ijkuak okiyekijtojkej akinmej pouij itech “senmiaktikeh tlaltikpaktlakah”, miakej omotlajtlaniayaj ken momiaktiliskiaj akinmej nochipa chantiskiaj nikan tlaltikpak. Ma tikitakan tlen okijto Ronald Parkin. Ye okipiaya doce xiuitl ijkuak okiyekijtojkej akinmej okatkaj “senmiaktikeh tlaltikpaktlakah”. Okijto: “Okatkaj kanaj 56,000 mil tokniuan tlen otetlapouiayaj uan miakej okatkaj tlapejpenalmej. Ik non, amo omotaya akinmej yetoskiaj ‘senmiaktikeh tlaltikpaktlakah’”.

15. Xikijto ken yomomiaktilijkej tokniuan tlen chantiskej nikan tlaltikpak.

15 Pero satepan okintitlankej miakej misioneros ma tetlapouitij itech miakej altepemej uan sapanoa omomiaktilijkej iTlaixpantijkauan Jehová. Itech 1968 opejki tlamachtiaj ika amochtli La verdad  que lleva a vida eterna. Amo oui okajsikamatiayaj tlen tlamachtia Biblia uan miakej okinpakti. Ipan naui xiuitl omoapolaktijkej kanaj tlajko millón. Miakej omoapolaktijkej tlen ayakmo oyayaj teopan ompa América Latina uan okseki altepemej. Noijki opejki okachi momiaktiliaj tokniuan ijkuak otechkauilijkej ma timonechikokan uan ma titetlapouikan ompa Europa oriental uan okseki altepemej tlen pouij África (Is. 60:22). Amo yikipia miak xiuitl ialtepe Jehová okichi miak tlamantli tlen ika titetlapouiaj uan ika titlamachtiaj. Nin yotlapaleui ma yetokan kanaj ocho millones tokniuan.

UITSEJ ITECH MIAKEJ ALTEPEMEJ

16. ¿Kanin uitsej nochtin “senmiaktikeh tlaltikpaktlakah”?

16 Juan okitak “senmiaktikeh tlaltikpaktlakah” uitsej itech miakej “altepemeh non tlatlamantli otlachixtokah iwa tlatlamantli intlajtol okipiayah”. Profeta Zacarías noijki ijkon okijkuilo. Okijkuilo: “Itech non tonalmej majtlaktli tlakamej tlen tlatlamantli tlajtoaj itech altepemej kikitskiskej, kema, melauak kikitskiskej ikue se tlakatl judío uan kijtoskej: ‘Melauak namouan tiaskej porque otikkakej Dios kajki namouan’” (Zac. 8:23).

17. ¿Tlen tikchiuaskej tla tiknekij tikinpaleuiskej oksekimej?

 17 TiiTlaixpantijkauan Jehová tikmatokej moneki titetlapouiskej ika miakej tlajtolmej tla tiknekij oksekimej ma kimatikan tlen kineki toTajtsin Dios. Ik non, yikipia kanaj ciento treinta xiuitl tikintlajtolkopaj amatlajkuilolmej. Axkan titlajtolkopaj ika kanaj novecientos tlajtolmej. Jehová kinnechikojtok “senmiaktikeh tlaltikpaktlakah” tlen uitsej itech miakej altepemej. San sekan kitekichiuiliaj Jehová porque onka amatlajkuilolmej ika miakej tlajtolmej tlen kinpaleuia ma kipiakan chikauak intlaneltokilis. TiiTlaixpantijkauan Jehová techixmatij ken akinmej techpaktia titetlapouiskej uan tikintlasojtlaj tokniuan. Nochi nin tlamantli techyolchikaua (Mat. 24:14, TNM; Juan 13:35).

¿KEN TECHPALEUIA TLEN OKITAK JUAN?

18. (1) Ijkon ken kijtoa Isaías 46:10, 11, ¿tleka amo techtlajtlachialtia Jehová kichiua tlen kijtoa? (2) ¿Tleka amo moyolkokoaj akinmej chantiskej nikan tlaltikpak?

18 Sapanoa techyolchikaua tlen okitak Juan. Amo techtlajtlachialtia Jehová kichiua tlen kijtoa (xiktlajtolti Isaías 46:10, 11). “Senmiaktikeh tlaltikpaktlakah” sapanoa kitlasojkamatiliaj Jehová porque kichiuas nochipa ma chantikan itech xochitlali. Amo moyolkokoaj porque amo yaskej iluikak tlanauatitiuij iuan Jesús. Biblia kijtoa miakej tlakamej uan siuamej omoyekankej ika iespíritu santo toTajtsin Dios ken Juan akin oteapolaktiaya uan tekiua David. Pero yejuan amo pouij itech 144,000 (Mat. 11:11; Hech. 2:34). Yejuan uan oksekimej kinyolitiskej uan chantiskej itech xochitlali. Nochtin yejuan uan oksekimej “senmiaktikeh tlaltikpaktlakah” kiteititiskej katej yolmelajkej ixpan Jehová uan san ye kinamiki tlanauatis.

19. ¿Tlen tikchiuaskej tla tikajsikamatij tlen okitak Juan?

19 Amo keman otikitayaj toTajtsin Dios sapanoa miakej kinnechikojtok para ma kiueyichiuakan. Moneki nochtin tikinpaleuiskej maski tikchiaj tiyetoskej iluikak noso nikan tlaltikpak uan ijkon monechikoskej “oksikimeh ichkameh” (Juan 10:16). Ayakmo miak poliui uan Jehová kichiuas ma yeto ueyi tlajyouilistli uan ompa pojpoliuiskej nochtin tekiuajkej uan nochtin akinmej pouij itech okseki religiones. Nochtin “senmiaktikeh tlaltikpaktlakah” nochipa kitekichiuiliskej Jehová (Apoc. 7:14).

TLAKUIKALI 139 Amo ma tikilkauakan xochitlali

^ párr. 5 Itech nin tlamachtil tikitaskej ijkuak tlatitlanil Juan okitak okinnechikojkej “senmiaktikeh tlaltikpaktlakah”. Nin techpaleuis ma tikpiakan chikauak totlaneltokilis akinmej tipouij itech “senmiaktikeh tlaltikpaktlakah”.

^ párr. 8 Xikita amochtli Los testigos de Jehová, proclamadores del Reino de Dios, páginas 159 a 163.