1. ¿Tleka iTlaixpantijkauan Jehová sapanoa yolpakij? (Xikita foto kanin peua tlamachtil).

TIITLAIXPANTIJKAUAN Jehová sapanoa tiyolpakij. Tiyolpakij ijkuak timonechikoaj uan tikueyichiuaj toTajtsin Dios noso ijkuak san sekan tikatej. ¿Tleka sapanoa tiyolpakij? Porque tikixmatij “toTajtsin Dios akin yolpaki” (1 Tim. 1:11, TNM; Sal. 16:11). Jehová kichiua ma tiyolpakikan, ik non, techiluia tleka kineki ma tiyolpakikan (Deut. 12:7; Ecl. 3:12, 13).

2. ¿Tlen kijtosneki tiyolpakiskej?

² ¿Tejuan tiyolpakij? ¿Tlen tikchiuaskej para okachi tiyolpakiskej? Tiyolpakiskej kijtosneki kuali timomachiliskej maski amo tikpiaj miak tlamantli. Biblia kijtoa yolpakij akinmej kuali mouikaj iuan toTajtsin Dios. Pero axkan xamo oui tiyolpakiskej. ¿Tleka?

3. ¿Tlen tlamantli uelis kichiuas ayakmo ma tiyolpakikan?

³ Xamo sekimej ayakmo yolpakij ijkuak kipoloaj inteki, ijkuak mokajkauaj ixpan tekiuajkej, ijkuak kinkixtiaj itech  tlanechikol noso ijkuak mikij tlen sapanoa kintlasojtlaj. Noijki sekimej amo yolpakij porque inkalchanejkauan mokualaniaj, kinpinauiaj kanin tekipanoaj, kinpinauiaj itech escuela, ijkuak kintlajyouiltiaj uan kintsakuaj porque kitekichiuiliaj Jehová. Noso sapanoa timokokoaj uan timoyolkokoaj. Pero ma tikilnamiktokan Jesucristo tlanauatis uan kineki techyolchikauas uan noijki kineki ma tiyolpakikan (1 Tim. 6:15; Mat. 11:28-30). Ijkuak Jesús otlamachti itech tepetl, okijto tlen uelis kichiuas ma tiyolpakikan maski titlajyouiaj.

4, 5. ¿Tlen tikchiuaskej tla tiknekij tiyolpakiskej?

⁴ Jesús okijto itlaj miak ipati: “Ma yolpakikan akinmej kimatij moneki kitemoskej toTajtsin Dios porque inmiaxka yetos Tekiuajkayotl tlen kajki iluikak” (Mat. 5:3, TNM). ¿Ken tikteititiaj tiknekij tikixmatiskej toTajtsin Dios uan noijki tiknekij ma techyekana? Ijkuak timomachtiaj Biblia, ijkuak tikchiuaj tlen technauatia uan ijkuak tikpatioitaj tiktekichiuiliskej. Sapanoa tiyolpakiskej tla tikchiuaskej nin tlamantli uan okachi tikneltokaskej tlen Jehová kijtoa kichiuas. Noijki titlaxikoskej tla tikchiaskej ika pakilistli tlen toTajtsin Dios yokijto kichiuas (Tito 2:13).

⁵ Moneki kuali ma timouikakan iuan Jehová tla tiknekij tiyolpakiskej. Tlatitlanil Pablo okijkuilo: “Nochipa xipakikah itech Toteko [Jehová]. Oksepa nomechilia: ¡Xipakikah!” (Filip. 4:4). Moneki tikpiaskej ixtlamatilistli tla tiknekij timouikaskej iuan Jehová. ITlajtol toTajtsin Dios kijtoa: “Ma yolpaki tlakatl tlen kipia ixtlamatilistli uan tlakatl tlen kimati tlen kuali uan tlen amo kuali”. Uan noijki kijtoa: “Ixtlamatilistli kajki ken se kuauitl tlen kitemaka yolilistli uan yolpakiskej akinmej itech mokitskijtokej” (Prov. 3:13, 18).

6. ¿Tlen techpaleuis ma tiyolpakikan?

⁶ Moneki nochipa ma tikchiuakan tlen kijtoa Biblia uan ijkon tiyolpakiskej. Jesús okijto nin tlamantli sapanoa miak ipati: “Tla nonkajsikamatih iwa nonkichiwah tlan nomechilijtok, nonkipiaskeh miak pakílistli” (Juan 13:17; xiktlajtolti Santiago 1:25). Moneki tikchiuaskej nin tlamantli para tikpiaskej chikauak totlaneltokilis uan nochipa tiyolpakiskej. ¿Kox uelis tiyolpakiskej maski titlajyouiaj? Ma tikitakan tlen okijto Jesús ijkuak otlamachti itech tepetl.

7. ¿Tleka yolpakij akinmej tlajyouiaj?

⁷ “Mapakikah akimeh tlaijyowiah, porke Dios kinyolsewis” (Mat. 5:4). Xamo sekimej motlajtlaniaj: “¿Ken uelis ‘pakiskeh akimeh tlaijyowiah’?”. Jesús amo otlajto itech akinmej san niman kijtoaj tleka tlajyouiaj. Porque noijki akinmej amo kuali inyelis kijtoaj tleka tlajyouiaj “iksemi tonatijmeh” (2 Tim. 3:1). Pero yejuan amo yolpakij porque tlaixnekij uan non amo kinpaleuia ma mouikakan iuan Jehová. Jesús otlajtojtokaj itech akinmej okinekiayaj kipiaskej okachi chikauak  intlaneltokilis uan moyolkokoaj porque kinmitaj oksekimej amo kinekij kixmatiskej toTajtsin Dios. Kimatokej tlajtlakolejkej uan noijki kitaj panoa tlen amo kuali. Jehová kita akinmej kinekij kixmatiskej uan kinyolchikaua ika tlen kijtoa Biblia, kinpaleuia ma yolpakikan uan kinmiluia nochipa yoltoskej (xiktlajtolti Ezequiel 5:11; 9:4).

8. Xikijto tleka yolpakij akinmej amo san niman kualanij.

⁸ “Mapakikah non moikneliah [noso amo san niman kualanij], porke Dios kinmaxkatilis n tlaltíkpaktli” (Mat. 5:5). ¿Tleka yolpakij akinmej amo san niman kualanij? Sekimej achto sapanoa okualaniayaj, okimotemoliayaj ouijkayotl uan okatkaj kuejsijkej. Pero omomachtijkej tlen kijtoa Biblia uan okipatlakej inyelis. Axkan tetlasojtlaj, teiknomatij, yolyamankej, amo san niman kualanij uan nochi kixikoaj (Col. 3:9-12). Ik non, kuali mouikaj iuan oksekimej. Biblia noijki kijtoa akinmej kipiaj ijkon inyelis nochipa “yetoskej tlaltikpak” (Sal. 37:8-10, 29).

9. (1) ¿Tleka Jesús okijto kinmaktiliskej tlaltikpak akinmej amo san niman kualanij? (2) ¿Tleka yolpakiskej akinmej kinekij ma mochiua nochi ika “milajkachiwálistli”?

⁹ ¿Tleka Jesús okijto kinmaktiliskej tlaltikpak akinmej amo san niman kualanij? Tlapejpenalmej kinmaktiliskej tlaltikpak ijkuak yetoskej teopixkej uan tlanauatiskej iuan Jesús (Apoc. 20:6). Akinmej amo chantiskej iluikak, kinmaktiliskej tlaltikpak uan nochipa chantiskej ika yolseuilistli, ayakmo yetoskej tlajtlakolejkej uan yolpakiskej. Noijki okijto: “Mapakikah akimeh kinekih ika nochi inyolo nochi mamochiwa ika milajkachiwálistli” (Mat. 5:6). Nochi mochiuas ika “milajkachiwálistli” ijkuak toTajtsin Dios kitlajtlamis nochi tlen amo kuali (2 Ped. 3:13). Ijkuakon nochtin yolmelauakej yolpakiskej uan ayakmo kilnamikiskej nochi tlen amo kuali okatka (Sal. 37:17).

10. ¿Tlen kijtosneki titeiknomatiskej?

¹⁰ “Mapakikah non teiknomatih, porke Dios noiwa kimiknomatis” (Mat. 5:7). Tikteititiaj titeiknomatij ijkuak tikintlasojtlaj oksekimej uan tikmachiliaj tlen kinpanoa. Noijki tikteititiaj titeiknomatij ijkuak tiktemoaj ken tikinpaleuiskej oksekimej.

11. ¿Tlen techmachtia tlen okichi samaritano?

¹¹ (Xiktlajtolti Lucas 10:30-37). Jesús okijto tlen kijtosneki titeiknomatiskej ijkuak okijto tlen okichi samaritano. Samaritano okiknomatki tlakatl tlen okitlachtekijkej uan okitemo ken kipaleuis. Ijkuak otlanki okijto tlen okichi samaritano, okijto tinochtin ijkon ma titeiknomatikan. Ik non, ma timotlajtlanikan: “¿Niteiknomati ken samaritano? ¿Nikinmiknomati akinmej tlajyouiaj? ¿Niktemoa ken nikinpaleuis? ¿Nikinpaleuia akinmej ayakmo kipiaj innamik, akinmej yikipiaj miak xiuitl uan telpokamej uan ichpokamej tlen amo momachtiaj intatajuan? ¿Nikinyolchikaua akinmej moyolkokoaj?” (1 Tes. 5:14; Sant. 1:27).

12. ¿Tleka tiyolpakiskej tla titeiknomatij?

¹² ¿Tleka tiyolpakiskej tla titeiknomatij? Ijkuak tikinpaleuiaj oksekimej okachi tiyolpakij uan amo ijkuak itlaj tikseliaj. Noijki ijkuak ijkon tikchiuaj, tikyolpaktiaj  Jehová (Hech 20:35, TNM; xiktlajtolti Hebreos 13:16). Tekiua David okijto: “Jehová kimaluis uan kichiuas ma yolto. Kijtoskej yolpaki itech tlaltikpak” (Sal. 41:1, 2). Tla tikinmiknomatiskej oksekimej, Jehová noijki techiknomatis uan nochipa tiyolpakiskej (Sant. 2:13).

13, 14. ¿Tleka yolpakij akinmej kipiaj chipauak inyolo?

¹³ Jesús okijto: “Mapakikah non yolchipawakeh, porke yejwah kitaskeh Totajtsi Dios” (Mat. 5:8). Tla tiknekij tikpiaskej chipauak toyolo, moneki timokuayejyekoskej tlen kuali uan noijki tlen tiknekij tikchiuaskej. Moneki ijkon tikchiuaskej tla tiknekij ma kiseli Jehová ken tikueyichiuaj (xiktlajtolti 2 Corintios 4:2; 1 Tim. 1:5).

¹⁴ Yolpakij akinmej kipiaj chipauak inyolo porque kuali mouikaj iuan Jehová, ik non, ye okijto: “Ma pakikan katlej kipakaj intlaken” (Apoc. 22:14, Itlajtol totajtzin Dios, NHY). ¿Tlen kijtosneki “kipakaj intlaken”? Para tlapejpenalmej kijtosneki Jehová kinmita chipauakej, nochipa yoltoskej iluikak uan nochipa yolpakiskej. Para akinmej chantiskej tlaltikpak kijtosneki Jehová kinkauilia iuan ma mouikakan porque kinmita yolmelauakej. Biblia kijtoa “yejwah yokimpakeh intlakenwah iwa okinmistayaltijkeh ika iesso n Ichkatsi” (Apoc. 7:9, 13, 14).

15, 16. ¿Ken kitaj toTajtsin Dios akinmej kipiaj chipauak inyolo?

¹⁵ Biblia kijtoa toTajtsin Dios amo uelis tikitaskej. Ik non, ¿tleka Jesús okijto akinmej kipiaj chipauak inyolo “kitaskeh Totajtsi Dios”? (Éx. 33:20). Ika griego noijki motlajtolkuepa “timokuayejyekoskej ken iyelis”. Tikitaskej toTajtsin Dios kijtosneki tikmatiskej ken iyelis uan tikpatioitaskej iyelis (Efes. 1:18). Jesús okichi ken iTajtsin, ik non, okijto “akin yonechitak kijtosneki yokitak Notajtsi” (Juan 14:7-9).

¹⁶ Noijki tikitaj toTajtsin Dios ijkuak techpaleuia (Job 42:5). Noijki tikitaj ijkuak timokuayejyekoaj ken kinteochiuas akinmej kipiaj chipauak inyolo uan yolmelajkej. Tlapejpenalmej kitaj Jehová ijkuak kinyolitia uan yauij iluikak (1 Juan 3:2).

17. ¿Tleka yolpakij akinmej mochijchikauaj ma yeto yolseuilistli?

¹⁷ Jesús noijki okijto: “Mapakikah non  teyolsewiah” (Mat. 5:9). Tiyolpakij ijkuak tikintlapojpoluiaj oksekimej. Santiago okijkuilo: “Akimeh mochijchikawah mayeto yolsewílistli innawak nochteh n tlakah, Dios kinmakas yolsewílistli” (Sant. 3:18). Tla timokualaniaj iuan tokniuan noso iuan tokalchanejkauan, ma tikiluikan Jehová ma techpaleui ma tikintlapojpoluikan. Jehová techmakas iespíritu santo uan techpaleuis ma tikpiakan kuali toyelis uan ijkon tiyolpakiskej. Jesús okijto miak ipati ma tikintlapojpoluikan oksekimej. Porque okijto: “Tla ya tio tiktemakati motlamanal itech artal iwa tikilnamiki amo timowika iwan mokni, ompa xikkawa motlamanal iyakapa n artal iwa achto xio ximotlapojpolwiti iwa mokni. Ijkuakó ya weletis tiwalmokopas kan artal iwa tikyektemakas motlamanal” (Mat. 5:23, 24).

18, 19. ¿Tleka yolpakij tokniuan maski kintlajyouiltiaj?

¹⁸ “Mapakikah ijkuak fiero kintenewah, kintotojtokaskeh iwa kinwikaltiskeh por nechtlakitah”. ¿Tleka ijkon okijto Jesús? Satepan okijto: “Xipakikah porke nonkiseliskeh se weyi tlatliokólili kan ilwikak. Ijkó noiwa okintlaijyowiltijkeh n profetas non yonenkeh ijkuak nomejwah ayamó ononkatkah” (Mat. 5:11, 12). Ijkuak okintlajyouiltijkej tlatitlanilmej uan okinmiluijkej ayakmo ma tetlapouikan, “owalkiskeh de kan okatkah n tekiwajkeh ika miak pakílistli”. Amo okinpakti ma kintlajyouiltikan pero oyolpakej “porke Dios okinkawili matlaijyowikah iwa makimpijpinawikah por okitenewayah Itoka n Jesús” (Hech. 5:41).

¹⁹ Axkan noijki tiyolpakij ijkuak techtlajyouiltiaj porque tiktekichiuiliaj Jehová uan noijki porque tiktlakaitaj Jesús (xiktlajtolti Santiago 1:2-4). Amo techpaktia ma techtlajyouiltikan. Pero Jehová techteochiuas tla tiyetoskej tiyolmelajkej. Ma tikitakan tlen okipanok Henryk Dornik uan ikni. Agosto 1944, tekiuajkej okiuikakej Henryk Dornik uan ikni kanin otetsakuayaj Nazis. Akinmej okinkokoliayaj okijtojkej: “Namejuan amo uelis timechchiualtiskej itlaj xikchiuakan. Nesi namechpaktia ma timechtlajyouiltikan”. Pero tokni Henryk Dornik, okijto: “Amo onechpaktiaya ma nechtlajyouiltikan pero oniyolpakiaya porque oniknekiaya nikteititis onikatka niyolmelajki ixpan Jehová tla nikxikoskia nochi ouijkayotl”. Noijki okijto: “Onikmachiliaya onikatka iuan Jehová ijkuak oniktlatlaujtiaya ma nechpaleui. ¡Ye melauak onechpaleui!”.

20. ¿Tleka tiyolpakij tiktekichiuiliskej toTajtsin Dios akin sapanoa yolpaki?

²⁰ Maski techtlajyouiltiaj, timokokoaj, yitikpiaj miak xiuitl uan maski tokalchanejkauan amo kinekij ma timomachtikan Biblia. Tejuan tiktekichiuiliaj toTajtsin Dios akin sapanoa yolpaki uan techselia (1 Tim. 1:11, TNM). Noijki tiyolpakij porque tikneltokaj toTajtsin Dios kichiuas tlen yokijto (Tito 1:2). Ijkuak ijkon kichiuas ayakmo tikilnamikiskej tlen otechtlajyouiltiaya. Amo uelis timokuayejyekoskej ken tiyetoskej itech xochitlali. Pero tiyetoskej ika yolseuilistli uan sapanoa tiyolpakiskej (Sal. 37:11).