Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Septiembre  2017

“Ximoyolchikaua [...] uan xikchiua tlen moneki”

“Ximoyolchikaua [...] uan xikchiua tlen moneki”

“Ximoyolchikaua uan ximochijchikaua uan xikchiua tlen moneki. Amo ximomojti porque Jehová [...] mouan kajki” (1 CRÓN. 28:20).

TLAKUIKALMEJ: 23 UAN 29

1, 2. (1) ¿Tlen tekitl okimakakej Salomón? (2) ¿Tlen okitekipachoaya David?

JEHOVÁ okipejpenki Salomón ma kita se tekitl miak ipati tlen mochiuaskia itech teokali ompa Jerusalén. Teokali sapanoa ueyi yetoskia uan miakej altepemej kixmatiskiaj porque yetoskia kuajkualtsin. Pero tlen okachi miak ipati yetoskia “ikalijtik Jehová” (1 Crón. 22:1, 5, 9-11).

2 Ueyi tekiua David okineltokaya Jehová kipaleuiskia Salomón pero omotekipachoaya porque itelpoch amo okimatiaya tlen kichiuas. ¿Kiseliskia Salomón non tekitl? ¿Amo kiseliskia porque ok okatka telpochtli uan amo okimatiaya tlen kichiuas? Salomón omonekiaya yetos yolchikauak tla okinekiaya nochi kuali ma kisa iteki.

3. ¿Ken okimachti David ikone ma yeto yolchikauak?

3 David okatka yolchikauak uan okimachti ikone ma yeto yolchikauak. Ijkuak David okatka telpochtli okinmikti yolkamej tlen okinekiayaj kinkuaskej ichkauan itajtsin (1 Sam. 17:34, 35). Noijki omoteui iuan Goliat. ToTajtsin Dios okipaleui David ma kimikti Goliat ika se tetl uan ijkon okitlanili (1 Sam. 17:45, 49, 50).

4. ¿Tleka omonekiaya Salomón yetos yolchikauak?

 4 Ken tikitaj David okimakak se kuali neskayotl ikone uan non okipaleui Salomón ma yeto yolchikauak ijkuak okichijchi teokali (xiktlajtolti 1 Crónicas 28:20). Tla Salomón momojtiskia, amo ueliskia kichijchiuas teokali nion uelis kipeualtiskia.

5. ¿Tleka moneki ma tiyetokan tiyolchikauakej?

5 Ijkon ken Salomón tejuan noijki moneki ma techpaleui Jehová ma tiyetokan tiyolchikauakej uan ijkon tikchiuaskej tekitl tlen otechmakak. Ik non, ma tikinmitakan inneskayo sekimej itekipanojkauan Jehová tlen okatkaj yolchikauakej. Ijkuak timomachtijtiaskej ma timokuayejyekokan ken uelis tiyetoskej tiyolchikauakej uan tikchiuaskej tlen moneki.

ITEKIPANOJKAUAN JEHOVÁ TLEN OKATKAJ YOLCHIKAUAKEJ

6. ¿Mitstlajtlachialtia José okatka yolchikauak?

6 Ijkuak isiua Potifar okinekiaya kichiualtis José iuan ma moteka, ye amo okinek, ik non, okiteititi okatka yolchikauak. Ye okimatiaya kipiaskia miak ouijkayotl tla amo iuan motekaskia. Pero ken okatka yolchikauak san niman okilui amo iuan motekaskia (Gén. 39:10, 12).

7. Xikyekijto ken Rahab okiteititi okatka yolchikauak. (Xikita tlaixkopinal tlen ika peua tlamachtil).

7 Axkan ma tikitakan ineskayo Rahab tlen ochantiaya Jericó. Ome tlakamej ichtaka otlachiatoj itech non altepetl, uan ijkuak oyajkej ikalijtik, uelis momojtiskia uan amo kinpaleuiskia. Pero okintlati uan okinpaleui ma cholokan porque ye otlaneltokaya itech Jehová (Jos. 2:4, 5, 9, 12-16). Rahab okineltokaya Jehová itlaj kichiuaskia para kinmakaskia israelitas non altepetl. Ik non, amo okimomojtijkej oksekimej ken ueyi tekiua tlen ompa otlanauatiaya uan akinmej okipaleuiayaj. Ken ye okatka yolchikauak, ikalchanejkauan amo omikej (Jos. 6:22, 23).

8. ¿Ken okinpaleui itlatitlaniluan Jesús ijkuak okitakej ye okatka yolchikauak?

8 Itlatitlaniluan Jesús noijki okiteititijkej okatkaj yolchikauakej. Okitakej Jesús okatka yolchikauak uan non okinpaleui (Mat. 8:28-32; Juan 2:13-17; 18:3-5). Ijkuak sekimej teopixkej saduceos okinmiluijkej ayakmo ma tetlapouikan itech Jesús, yejuan okijtojkej amo kintlakamatiskiaj (Hech. 5:17, 18, 27-29).

9. Ijkon ken kijtoa 2 Timoteo 1:7, ¿tlen techpaleuis ma tiyetokan tiyolchikauakej?

9 José, Rahab, Jesús uan tlatitlanilmej okiteititijkej okinekiayaj kichiuaskej tlen kuali. Yejuan okatkaj yolchikauakej porque otlaneltokayaj itech Jehová uan amo san intech yejuan. Ik non, ijkuak tejuan tikixnamikij ouijkayotl moneki ma titlaneltokakan itech Jehová uan amo san totech (xiktlajtolti 2 Timoteo 1:7). Ma tikitakan ome tlamantli kanin moneki tiyetoskej tiyolchikauakej iuan tokalchanejkauan uan itech tlanechikol.

IJKUAK MONEKI TIYETOSKEJ TIYOLCHIKAUAKEJ

10. ¿Tleka telpokamej uan ichpokamej moneki yetoskej yolchikauakej?

10 Telpokamej uan ichpokamej kixnamikij miak ouijkayotl uan tla kinekij yetoskej yolmelajkej ixpan Jehová, moneki yetoskej yolchikauakej. Ineskayo Salomón kinpaleuis. Ye okatka yolchikauak ijkuak okipejpenki tlen kichiuaskia uan ijkon otlanki okichijchi teokali. Pero tetajmej moneki ma kinpaleuikan inkoneuan uan ma kinyekanakan. Pero onka seki tlamantli tlen san yejuan moneki kipejpenaskej tlen kichiuaskej (Prov. 27:11). Moneki yejuan kipejpenaskej akinmej iuan mouikaskej, tlen ika moyolpaktiskej, ken kipiaskej chipauak intlalnamikilis uan keman moapolaktiskej. Moneki yetoskej yolchikauakej para uelis kipejpenaskej tlen kuali porque kixnamikij Satanás  akin kipinauia Jehová uan noijki itlanauatiluan.

11. ¿Ken okiteititi Moisés okatka yolchikauak?

11 Telpokamej uan ichpokamej moneki kipejpenaskej tlen kichiuaskej itech innemilis. Itech seki altepemej kinmiluiaj ma yakan universidad uan ijkon kipiaskej se tekitl kanin kuali kintlaxtlauiskej. Oksekimej amo kipiaj tomin uan mokuayejyekoaj moneki sapanoa tekitiskej uan ijkon kinmakaskej tlen ika mopanoltiskej inkalchanejkauan. Tla ijkon mitspanotok, ximokuayejyeko itech tlen okichi Moisés. Ye omoskalti ikalijtik ichpoch faraón, ik non, tla ye kinekiskia uelis kipiaskia miak tomin uan yetoskia ueyititok. Uelis ijkon okiluiayaj ma kichiua akinmej okimachtiayaj, akinmej okinojnotsayaj uan tlen inmiuan ochantiaya. Pero amo ijkon okichi, ye okatka yolchikauak uan okipejpenki kitekichiuilis Jehová. Okika nochi tlen okipiaya Egipto uan omopaleui itech Jehová (Heb. 11:24-26). Jehová okiteochi uan noijki kiteochiuas satepan.

12. ¿Ken uelis kichiuaskej ken Moisés telpokamej uan ichpokamej?

12 Jehová kinteochiua telpokamej uan ichpokamej ijkuak kitekichiuiliaj uan achto kitlaliaj iTekiuajkayo ijkon ken okichi Moisés. Jehová kinpaleuis inkalchanejkauan ma kipiakan tlen ika mopanoltiskej. Itech achto siglo Timoteo okipejpenki kitekichiuilis Jehová uan te noijki ijkon uelis tikchiuas * (xiktlajtolti Filipenses 2:19-22).

¿Tlen techpaleuis nochipa ma tiyetokan tiyolchikauakej? (Xikita párrafo 13 a 17).

13. ¿Ken okipaleui se ichpochtli ma yeto yolchikauak?

13 Ma tikitakan tlen okichi se ichpochtli tlen ichan Alabama (Estados Unidos). Ye sapanoa omoyolchika uan ijkon okachi opejki kitekichiuilia Jehová. Ye okijto: “Ne amo okachi onitlajtoaya. Onikmachiliaya oui nimotlapouis iuan tokniuan itech tlanechikol. Uan ijkuak omonekiaya nitetlapouiti amo oniknekiaya ikaj niktlapouis”. Itatajuan uan oksekimej tokniuan okipaleuijkej uan omochi precursora regular. Noijki okijto: “Nochi tlen kiyekana Satanás san kineki ma tiakan universidad, miakej ma techixmatikan uan ma tikpiakan miak tomin. Pero amo ikaj ueli ijkon kichiua uan okachi san motekipachoaj uan tlajyouiaj. Pero niktekichiuilis Jehová kichiua sapanoa ma niyolpaki”.

14. ¿Keman moneki yetoskej yolchikauakej tetajmej?

14 Tetajmej akinmej kichiuaj ken Cristo moneki yetoskej yolchikauakej. Se neskayotl, uelis kijtos akin kipaleuiaj okachi ma tekitikan ijkuak yejuan yikipiaj tlen tonal momachtiskej ken kalchanejkej, keman tetlapouiskej uan monechikoskej. Moneki yetoskej yolchikauakej uan ijkon kiluiskej akin kipaleuiaj amo okachi tekitiskej. Ijkon kinmakaskej se kuali neskayotl inkoneuan. Uelis sekimej tokniuan kinkauiliaj inkoneuan ma kichiuakan seki tlamantli uan oksekimej amo kinkauiliaj. Tetajmej, ¿tlen nankichiuaskej tla oksekimej tetajmej namechtlajtlaniskej tleka amo nankinkauiliaj namokoneuan ma kichiuakan seki tlamantli? Moneki nanyetoskej nanyolchikauakej uan nankiyekijtoskej tleka amo nankinkauiliaj ma kichiuakan seki tlamantli.

15. ¿Ken uelis kinpaleuis tetajmej Salmo 37:25 uan Hebreos 13:5?

15 Tetajmej noijki kiteititiaj yolchikauakej ijkuak kinpaleuiaj inkoneuan okachi ma kitekichiuilikan Jehová. Sekimej tetajmej uelis amo kinekij inkoneuan ma mochiuakan precursores, ma tlapaleuitij kanin okachi moneki ma tetlapouikan, ma yakan Betel noso ma tlapaleuitij kanin kinchijchiuaj kalmej para monechikoskej tokniuan. Uelis momojtiaj inkoneuan amo kinmaluiskej ijkuak kipiaskej miak  xiuitl. Pero tla tetajmej ixtlamatkej, kiteititiskej yolchikauakej uan tlaneltokaskej Jehová kichiuas tlen yokijto (xiktlajtolti Salmo 37:25; Hebreos 13:5). Ijkuak tetajmej kitemakaj kuali neskayotl, kinpaleuiaj inkoneuan ma yetokan yolchikauakej uan ma tlaneltokakan itech Jehová (1 Sam. 1:27, 28; 2 Tim. 3:14, 15).

16. (1) ¿Tlen okichijkej sekimej tetajmej para kinpaleuiskej inkoneuan okachi ma kitekichiuilikan Jehová? (2) ¿Uan ken yokinpaleui inkoneuan?

16 Ma tikitakan tlen okichi se tokni uan isiua tlen chantij Estados Unidos, yejuan okinpaleuijkej inkoneuan okachi ma kitekichiuilikan Jehová. Teta kijtoa: “Ijkuak tokoneuan ayamo otlajtoayaj uan ayamo onenejnemiayaj, otikintlapouiayaj ken sapanoa tiyolpakij otimochijkej precursores uan titlapaleuiaj itech tlanechikol”. Axkan yejuan kitekichiuiliaj Jehová. Uan non kinpaleuia ma kixtopeuakan nochi tlen Satanás kitekitiltia uan okachi ma kitekichiuilikan Jehová. Okse tokni tlen kinpia ome ikoneuan kijtoa: “Miakej tetajmej kitekitiltiaj miak tomin uan chikauak tekitij para inkoneuan ma yakan escuela, ma mauiltitij noso kanaj ma paxialotij. Pero okachi kuali ma tikinpaleuikan ma kichiuakan tlen kipaktia Jehová uan kuali iuan ma mouikakan. Sapanoa tiyolpakij ijkuak tikitaj tokoneuan mochijchikauaj okachi kitekichiuiliskej Jehová. Jehová kinteochiuas tetajmej tla kinpaleuiaj inkoneuan okachi ma kitekichiuilikan.

MA TIYETOKAN TIYOLCHIKAUAKEJ ITECH TLANECHIKOL

17. Xikijto itech tlen tlamantli moneki tiyetoskej tiyolchikauakej.

17 Noijki moneki ma tiyetokan tiyolchikauakej itech tlanechikol. Se neskayotl, tlayekankej moneki yetoskej yolchikauakej ijkuak kixkomakaskej akin otlajtlakolchi uan noijki ijkuak ikaj kipaleuiskej tlen kajki hospital. Sekimej yauij tlamachtitiuij telpiloyan uan noijki ompa monechikoaj. Noijki ichpokamej uelis okachi kitekichiuiliskej Jehová. Uelis mochiuaskej precursoras, tlapaleuiskej kanin okachi moneki uan uelis kinpaleuiskej tokniuan tlen kijtoaj ken kinchijchiuaskej kalmej kanin timonechikoaj uan uelis kitemitiskej amatl  para kiseliskej Tlamachtil para ma tetlapouikan Tekiuajkayotl. Noijki sekimej uelis yaskej Tlamachtil ika Biblia tlen kichiua Watchtower itech Galaad.

18. ¿Ken uelis kiteititiskej yolchikauakej tokniuan tlen yikipiaj miak xiuitl?

18 Sapanoa tikintlasojtlaj tokniuan siuamej tlen yikipiaj miak xiuitl uan tikintlasojkamatiliaj touan katej. Uelis sekimej ayakmo okachi tetlapouiaj pero ok uelis kiteititiskej yolchikauakej uan ok uelis tlapaleuiskej itech tlanechikol (xiktlajtolti Tito 2:3-5). Tla tlayekankej kinmiluiaj ma motlapouikan iuan se tokni ichpochtli ken moneki motlakentis, yejuan moneki yetoskej yolchikauakej para iuan motlapouiskej. Pero amo kijtosneki kajuaskej, okachi kuali, kipaleuiskej ma mokuayejyeko ken motlakentia uelis kinmijtlakos oksekimej (1 Tim. 2:9, 10TNM). Ijkuak tokniuan tlen yikipiaj miak xiuitl tetlasojtlaj, tlapaleuiaj itech tlanechikol.

19. (1) ¿Ken uelis yetoskej yolchikauakej tokniuan tlakamej tlen yomoapolaktijkej? (2) ¿Ken kinpaleuia Filipenses 2:13 uan 2 Corintios 4:7 tokniuan tlakamej tlen yomoapolaktijkej?

19 Tokniuan tlakamej tlen yomoapolaktijkej noijki moneki yetoskej yolchikauakej uan kichiuaskej tlen moneki. Sapanoa tlapaleuiaj ijkuak yejuan kiseliaj okachi tekitl uan kichiuaj (1 Tim. 3:1). Pero sekimej mokuayejyekoaj amo uelis okachi tekitiskej. ¿Tleka ijkon mokuayejyekoaj? Uelis yiuejkika itlaj amo kuali okichijkej, ik non, mokuayejyekoaj amo kinnamiki mochiuaskej siervos ministeriales noso tlayekankej. Noso mokuayejyekoaj amo kuali kichiuaskej inteki. Tla ijkon mitspanotok, Jehová mitspaleuis (xiktlajtolti Filipenses 2:13; 2 Corintios 4:7). Xikilnamiki Moisés ijkon okipanok. Okimachiliaya amo ueliskia kichiuas tlen Jehová okinauati (Éx. 3:11). Pero Jehová okipaleui ma yeto yolchikauak uan okichi tlen Jehová okinauati. Tla te noijki tikneki ma mitsyolchikaua Jehová, xikilui ma mitspaleui uan nochipa xiktlajtolti Biblia. Noijki mitspaleuis tla timokuayejyekos itech itekipanojkauan toTajtsin Dios tlen okatkaj yolchikauakej. Noijki xikinmilui tlayekankej ma mitsmachtikan ken titekitis uan xikinpaleui. Tikinyoleuaj tokniuan tlakamej tlen yomoapolaktijkej ma yetokan yolchikauakej uan ma tekitikan itech tlanechikol.

‘JEHOVÁ MOUAN KAJKI’

20, 21. (1) ¿Tlen okilui David ikone? (2) ¿Tlen uelis tikneltokaskej?

20 Ueyi tekiua David okilui ikone kipaleuiskia Jehová hasta ijkuak tlamiskia kichijchiuaskia teokali (1 Crón. 28:20). Salomón uelis omokuayejyeko itech non tlamantli, ik non, maski ok okatka telpochtli uan amo okimatiaya tlen kichiuas, okichijchi teokali. Okatka yolchikauak uan okichi tlen omonekiaya, Jehová okipaleui uan otlanki okichijchi teokali itech chikome xiuitl uan tlajko.

21 Ijkon ken Jehová okipaleui Salomón, tejuan noijki uelis techpaleuis ma tiyetokan tiyolchikauakej uan ma tikinpaleuikan tokalchanejkauan uan noijki ma titlapaleuikan itech tlanechikol (Is. 41:10, 13). Tla tiyolchikauakej uan tiktekichiuiliaj Jehová, ye techteochiuas axkan uan satepan. Ik non, ma tikchiuakan tlen okijto David: “Ximoyolchikaua [...] uan xikchiua tlen moneki”.

^ párr. 12 Tikajsis okseki tlamantli tlen mitspaleuis ken okachi tiktekichiuilis Jehová itech tlamachtil “Fijémonos metas espirituales para glorificar al Creador”, itech revista La Atalaya 15 de julio 2004.