Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Septiembre  2017

Ma titeiknomatikan ijkon ken Jehová

Ma titeiknomatikan ijkon ken Jehová

“Jehová, Jehová, se Dios teiknomatki uan teajsikamatki” (ÉX. 34:6).

TLAKUIKALMEJ: 142 UAN 12

1. ¿Tlen okilui toTajtsin Dios ijkuak okimonextili Moisés uan tleka non miak ipati?

SE TONAL, toTajtsin Dios okimonextili Moisés uan okilui tlen itoka uan ken iyelis. Amo okijto sapanoa chikauak uan ixtlamatki, okachi kuali, okijto ye teiknomati uan teajsikamatki (xiktlajtolti Éxodo 34:5-7). Jehová okimatiaya Moisés okinekiaya kimatis kox kipaleuiskia, ik non, okiteititi ye kineki kinpaleuis itekipanojkauan (Éx. 33:13). ¿Amo melauak techyolseuia tikmatiskej toTajtsin Dios totech motekipachoa? Itech nin tlamachtil tikitaskej tleka miak ipati ma titeiknomatikan uan ma tikinpaleuikan akinmej tlajyouiaj.

2. ¿Tleka titeiknomatij?

2 Ken tikitaj Jehová teiknomati. Otechchijchi ken ye, ik non, timotekipachoaj intech oksekimej. Hasta akinmej amo kixmatij toTajtsin Dios teiknomatij (Gén. 1:27). Biblia kijtoa miakej oteiknomatkej. Se neskayotl, ome siuamej oyajkej ixpan Salomón para kimatiskiaj akin okatka inantsin  se konetsintli. Ijkuak Salomón otlanauati ma kitlajkotekikan konetsintli, inantsin nin konetsintli sapanoa omotekipacho, ik non, okijto okachi kuali ma kimokaui okse siuatl para amo ma kimiktikan (1 Rey. 3:23-27). Noijki ma tikilnamikikan ichpoch faraón. Ijkuak okajsik Moisés itech aueyatl, okimatki okatka hebreo uan amo omonekiaya ma kimakixti. Pero okiknomatki uan okiskalti ken yetoskia ikone (Éx. 2:5, 6).

3. ¿Tleka moneki ma titeiknomatikan?

3 ¿Tleka moneki ma titeiknomatikan? Porque Biblia kijtoa moneki ma tikchiuakan ken Jehová (Efes. 5:1, Itlajtol totajtzin Dios). Ye otechchijchi para ma titeiknomatikan. Pero ken Adán otechpanoltili tlajtlakoli, ualeua san totech timotekipachoaj. Ualeua amo tikmatij kox tikinpaleuiskej oksekimej noso san totech timotekipachoskej. ¿Tlen techpaleuis okachi ma titeiknomatikan? Achto ma tikitakan ken oteiknomatki Jehová uan sekimej itekipanojkauan. Satepan tikitaskej ken uelis titeiknomatiskej ijkon ken Jehová uan ken techpaleuis tla ijkon tikchiuaskej.

JEHOVÁ TECHMACHTIA KEN TITEIKNOMATISKEJ

4. (1) ¿Tleka Jehová okintitlanki sekimej ángeles Sodoma? (2) ¿Tlen techmachtia tlen okipanok Lot uan ikalchanejkauan?

4 Biblia techiluia ken oteiknomatki toTajtsin Dios. Ma tikitakan ken okipaleui Lot, ye okatka se tlakatl yolmelauak uan omotekipachoaya porque akinmej ochantiayaj Sodoma uan Gomorra okichiuayaj tlen amo kuali. Oauilnemiayaj, ik non, toTajtsin Dios okijto okinmixpoloskia (2 Ped. 2:7, 8). Jehová okinualtitlanki sekimej ángeles ma kiluitij Lot kinmixpoloskiaj akinmej ompa ochantiayaj uan omonekiaya choloskia ye uan ikalchanejkauan para momakixtiskiaj. “Ijkuak ouejka” ángeles “okimatilankej ye uan isiua uan ome ichpokauan uan okinkixtijkej itech altepetl” (Gén. 19:16). Nin neskayotl techmachtia Jehová kimati tlen ouijkayotl kipiaj itekipanojkauan (Is. 63:7-9; Sant. 5:11; 2 Ped. 2:9).

5. ¿Ken techpaleuia iTlajtol toTajtsin Dios ma titeiknomatikan?

5 Jehová amo san techiknomati, noijki techmachtia ma titeiknomatikan. Ma timokuayejyekokan itech seki tlanauatilmej tlen okinmakak israelitas. Tla se israelita okitetlanetiaya tomin, akin okitlaneuiaya omonekiaya kikajteuilis itlaken uan ijkon okiteititiaya kikuepaskia tomin (xiktlajtolti Éxodo 22:26, 27). Akin okitetlaneti tomin uelis kimokauiskia itlaken akin okitlaneuiaya uan amo kipiaskia tlen ika motlakentiskia yoak. Ik non, Jehová okinmilui israelitas ma teiknomatikan uan ma kinkuepilikan intlaken achto tiotlakiskia. ¿Tlen techmachtia nin tlanauatil? Tla se tokni kipia se ouijkayotl uan uelis tikpaleuiskej, ma tikpaleuikan (Col. 3:12; Sant. 2:15, 16; xiktlajtolti 1 Juan 3:17).

6. ¿Tlen techmachtia Jehová ijkuak okinmiknomatki israelitas?

6 Jehová okinmiknomatki israelitas maski otlajtlakolchijkej. Biblia kijtoa: “Jehová inDios namokojkoluan miak uelta okinnejmachti ika teotlajtojkej, porque okiknomatiaya iteokal uan  ialtepe” (2 Crón. 36:15). Tejuan noijki moneki ma tikinmiknomatikan akinmej amo kixmatij toTajtsin Dios porque ok uelis moyolkuepaskej uan kuali iuan mouikaskej. Jehová kineki nochtin ma momakixtikan (2 Ped. 3:9). Ik non, nochtin ma tikinnejmachtikan para ma mopaleuikan ika iteiknomatilis toTajtsin Dios.

7, 8. ¿Tleka se kalchanejkej okitakej Jehová okinmiknomatki?

7 Itech ninmej tonalmej, miakej tokniuan yokitakej ken toTajtsin Dios yokinmiknomatki. Ma tikitakan tlen opanok altepetl Bosnia itech 1990 ijkuak ompa omoteuijtokaj. Sekimej tokniuan tlen ochantiayaj Bosnia oyajkej Serbia itech autobús. Ompa oyaya se chokotsin tlen okipiaya 12 xiuitl uan omotokayotiaya Milan. Nochtin oyayaj ueyi nechikol kanin moapolaktiskiaj itatajuan Milan. Ijkuak yikalakiskiaj itech non altepetl, sekimej soldados okintemouijkej ikalchanejkauan Milan porque yejuan oualayaj itech okse altepetl, pero oksekimej tokniuan okinpanoltijkej. Ome tonal satepan, se soldado okinotski akin okinyekanaya soldados para kitlajtlaniskia tlen kinchiuiliskia ikalchanejkauan Milan. Nin soldado okatka inmixpan tokniuan, ik non, okikakej ijkuak akin okinyekanaya soldados okinankili: “¡Xikinkixti uan xikinmikti!”.

8 Ijkuak nin soldado okintlapouijtoka oksekimej soldados, ome tlakamej omotokijkej innauak ikalchanejkauan Milan uan ichtakatsin okinmiluijkej: “Tejuan tiiTlaixpantijkauan Jehová; tokniuan tlen oyayaj itech autobús otechiluijkej tlen opanok”. Soldados amo okinmitayaj inmiamauan konemej, ik non, okiluijkej Milan uan ikni ma tlejkokan itech incarro para kalakiskiaj itech altepetl. Satepan okinmiluijkej itatajuan Milan: “Namejuan xinejnemikan inkuitlapan soldados”. Milan amo okimatiaya kox yolpakiskia noso chokaskia ijkuak ijkon okikak. Itatajuan omotlajtlanijkej: “¿Techkauiliskej ma tipanokan?”. Oyajkej maski soldados okinmitakej, amo itlaj okinmiluijkej ken yetoskia amo okinmitayaj. Itatajuan okinmajsitoj itech okse altepetl uan oyajkej ueyi nechikol uan yejuan okineltokayaj Jehová okikak intlatlaujtilis. Biblia techmachtia Jehová amo nochipa kinkixtilia ouijkayotl itekipanojkauan (Hech. 7:58-60). Pero Milan okijto: “Nesi ángeles okichijkej amo ma techitakan soldados uan Jehová otechmakixti” (Sal. 97:10).

9. ¿Tlen okichi Jesús ijkuak okinmitak ken omomachiliayaj tlaltikpaktlakamej? (Xikita tlaixkopinal tlen ika peua tlamachtil).

9 Jesús noijki techmachtia ma titeiknomatikan. ¿Tlen okichi ijkuak okinmitak sekimej “tlawel osotlawatokah iwa oyetokah inselti kemi ichkameh non amo kipiah tlajpixki”? Okinmiknomatki “iwa san miak opé kinmachtia” (Mat. 9:36; xiktlajtolti Marcos 6:34). Jesús amo okichi ken fariseos akinmej amo okinekiayaj kinpaleuiskej oksekimej (Mat. 12:9-14; 23:4; Juan 7:49). ¿Tikchiuaj ken Jesús uan tiknekij tikinpaleuiskej akinmej kinekij kixmatiskej Jehová?

10, 11. ¿Nochipa moneki titeiknomatiskej? Xikyekijto.

10 ¿Kijtosneki nochipa moneki titeiknomatiskej?  Amo. Para tikajsikamatiskej, ma tikitakan keman Jehová amo oteiknomatki. Ijkuak ye okinauati Saúl ma kinmikti amalequitas uan inyolkauan, Saúl amo okimikti ueyi tekiua nion sekimej yolkamej. Uelis Saúl omokuayejyeko omonekiaya kinmiknomatis pero toTajtsin Dios ayakmo okinek ma tlanauati porque amo okitlakamatki (1 Sam. 15:3, 9, 15). Jehová yolmelauak. Ye kita ken inyelis tlaltikpaktlakamej uan kimati keman amo moneki teiknomatis (Lam. 2:17; Ezeq. 5:11). Ayakmo miak poliui uan kinmixpolos akinmej amo kitlakamatij (2 Tes. 1:6-10). Ijkuakon amo kinmiknomatis akinmej amo yolkualmej uan kinmixpolos para kinmakixtis itekipanojkauan yolmelajkej.

11 Tejuan amo tikijtoskej akinmej momakixtiskej uan akinmej amo, okachi kuali, axkan moneki nochtin ma tikinpaleuikan. Ik non, ¿ken uelis tikinmiknomatiskej oksekimej? Ma tikitakan ken uelis tikchiuaskej.

¿KEN UELIS TITEIKNOMATISKEJ?

12. ¿Ken tikteititiskej titeiknomatij?

12 Ma timokuayejyekokan ken uelis tikinpaleuiskej oksekimej. Jehová kineki nochtin akinmej kichiuaj ken Cristo ma kinmiknomatikan inmikniuan uan oksekimej (Juan 13:34, 35; 1 Ped. 3:8). Titeiknomatiskej kijtosneki “tikmachiliskej ijkuak oksekimej tlajyouiaj”. Noijki kijtosneki tiknekiskej tikinpaleuiskej akinmej tlajyouiaj. Ma timokuayejyekokan keman tikinpaleuiskej. Se neskayotl, uelis tikinpaleuiskej tla itlaj moneki kichiuaskej inkalijtik noso uelis tikintlakouitiuij (Mat. 7:12).

Tikteititiaj titeiknomatij ijkuak tikinpaleuiaj oksekimej. (Xikita párrafo 12).

13. ¿Ken kiteititiaj teiknomatij iTlaixpantijkauan Jehová ijkuak panoa se tlaxixinilistli?

13 Ma titlapaleuikan ijkuak panoa se tlaxixinilistli. Miakej tokniuan kinpaleuiaj oksekimej ijkuak panoa se tlaxixinilistli. ITlaixpantijkauan Jehová kinmixmatij porque kinpaktia tlapaleuiskej (1 Ped. 2:17). Ompa Japón itech 2011 chikauak otlalolinki uan opanok se tsunami. Se  tokni tlen ompa ochatiaya omoyolchika uan kuali omomachili ijkuak okitak miakej tokniuan otlapaleuitoj para kinyektlaliliskiaj inkaluan uan kalmej kanin omonechikoayaj. Ye okijkuilo: “Tlen onechpanok onechmachti Jehová techtlasojtla uan tokniuan totech motekipachoaj. Uan miakej tokniuan tlen katej itech nochi Tlaltikpak kitlajtlaniliaj Jehová ma techpaleui”.

14. ¿Ken uelis tikinpaleuiskej akinmej yikipiaj miak xiuitl uan akinmej mokokoaj?

14 Ma tikinpaleuikan akinmej yikipiaj miak xiuitl uan akinmej mokokoaj. Tikinmiknomatij akinmej yikipiaj miak xiuitl uan akinmej mokokoaj. Tiktlatlaujtiaj Jehová ma uiki iTekiuajkayo para ayakmo ikaj ma kokoxkati noso ma ueuejti nion ikaj ma mokoko. Pero axkan ok timochijchikauaj nochtin tikinpaleuiskej. Se tlakatl okijto tlen okipanok inantsin, ye okipiaya se kokolistli tlen itoka Alzheimer. Se tonal, inantsin amo oajsito baño uan omosokioti. Ijkuak okinekiaya tlachipauas, oajsitoj ome tokniuan tlen yokitlajpaloayaj. Yejuan okitlajtlanijkej kox uelis kipaleuiskiaj. Siuatl okinmilui kema maski opinauaya. Ik non, tokniuan okipaleuijkej, okiposonilijkej té noso tsopelikatl uan omokajkej para iuan motlapouiskiaj. Ikone nin siuatl okintlasojkamatili tokniuan uan okijto kimokixtiliskia isombrero porque okichiuayaj tlen otetlapouiayaj. ¿Tikinmiknomatij uan tikinpaleuiaj akinmej yikipiaj miak xiuitl uan akinmej mokokoaj? (Filip. 2:3, 4).

15. ¿Tleka ijkuak titetlapouiaj tikinpaleuiaj oksekimej?

15 Ma tikinpaleuikan oksekimej ma kixmatikan Jehová. Axkan miakej kipiaj ouijkayotl uan motekipachoaj. Uelis tikinpaleuiskej tla tikinmachtiaj tlen kichiuas iTekiuajkayo toTajtsin Dios. Noijki uelis tikinmiluiskej ma kitakan ken kinpaleuis ma kintlakamatikan itlanauatiluan toTajtsin Dios (Is. 48:17, 18). Ijkuak titetlapouiaj, tikueyichiuaj Jehová uan tikteititiaj tikinmiknomatij oksekimej. ¿Uelis okachi titetlapouiskej? (1 Tim. 2:3, 4).

TLA TITEIKNOMATIJ NOIJKI TECHPALEUIA

16. ¿Ken techpaleuia titeiknomatiskej?

16 Miakej akinmej tlapajtiaj kijtoaj tla titeiknomatij okachi tichikajtoskej uan kuali timouikaskej iuan oksekimej. Ijkuak tikinpaleuiaj akinmej tlajyouiaj, okachi tiyolpakij, amo toselti timomachiliaj uan kuali timokuayejyekoaj. Melauak techpaleuia tla titeiknomatij (Efes. 4:31, 32). Tla titetlasojtlaj uan titlapaleuiaj, kuali tikpiaskej totlalnamikilis porque tikmatoskej tikchijtokej tlen Jehová kineki. Ijkon kuali tikpiaskej toyelis. Noijki akinmej teiknomatij kinpaleuia ijkuak tlajyouiaj (xiktlajtolti Mateo 5:7; Lucas 6:38).

17. ¿Tleka tikneki titeiknomatis?

17 Amo titeiknomatij san porque tiknekij satepan ma techpaleuikan. Titeiknomatij porque tiknekij tikueyichiuaskej uan tikchiuaskej ken Jehová akin tetlasojtla uan teiknomati (Prov. 14:31). Ik non, ma timochijchikauakan ma tikchiuakan ken ye. Ijkon kuali timouikaskej iuan tokniuan uan oksekimej (Gál. 6:10; 1 Juan 4:16).