Xikita nochi

Tlen kiualika

 TLAMACHTIL 41

Ma tiyetokan tiyolmelajkej ijkuak panos ueyi tlajyouilistli

Ma tiyetokan tiyolmelajkej ijkuak panos ueyi tlajyouilistli

“Xiktlasojtlakan Jehová nochtin namejuan akinmej amo nankikauaj. Jehová kinmaluia yolmelajkej” (SAL. 31:23).

TLAKUIKALI 129 Jehová nechpaleuis ma nitlaxiko

XIKILNAMIKTO *

1, 2. (1) ¿Tlen yikijtoskej tekiuajkej? (2) ¿Tlen tlajtlanilmej tikinnankiliskej?

MA TIMOKUAYEJYEKOKAN tekiuajkej yokijtojkej “axa kema ya tikateh ika kuali, iwa ya tikpiah yolsewílistli”. Xamo kijtoskej tinochtin yikuali tikatej. Kinekiskej ma tikneltokakan yejuan ueli tlanauatiaj. Pero non amo melauak porque amo kixikoskej tlen satepan panos. ¿Tleka amo? Biblia kijtoa “kualinmajsiki n tlaixpoliwílistli [...] iwa amaka weletis cholos” (1 Tes. 5:3).

2 Ik non, moneki ma timotlajtlanikan: ¿Tlen panos itech ueyi tlajyouilistli? ¿Tlen kineki Jehová ma tikchiuakan? ¿Tlen tikchiuaskej axkan tla tiknekij tiyetoskej tiyolmelajkej ijkuak panos ueyi tlajyouilistli? (Mat. 24: 21).

¿TLEN PANOS ITECH UEYI TLAJYOUILISTLI?

3. Ijkon ken kijtoa Apocalipsis 17:5, 15-18, ¿ken kipojpolos toTajtsin Dios “weyi Babilonia”?

3 (Xiktlajtolti Apocalipsis 17:5, 15-18). Kipojpoloskej “weyi Babilonia”. Yotimomachtijkej tekiuajkej amitlaj uelis kichiuaskej ijkuak ijkon panos. ¿Tleka? Porque toTajtsin Dios “yokitlali itech inyolo” ijkon kichiuaskej. ¿Tlen kijtosneki? Kinpojpoloskej nochi religiones tlen tlakajkayauaj uan kijtoaj kichiuaj ken Cristo. ToTajtsin Dios ‘kitlalis itech inyolo’ tlen kichiuaskej akinmej pouij itech “májtlaktli ikuakuanwah” “se yolkatl chichiltik”. ‘Májtlaktli kuakuajmeh’ kinneskayotiaj nochtin tekiuajkej  tlen kipaleuiaj “yolkatl” uan nin kijtosneki yejuan akinmej pouij itech Naciones Unidas (Apoc. 17:3, 11-13; 18:8). Peuas ueyi tlajyouilistli ijkuak tekiuajkej kinmixnamikiskej religiones tlen san tlakajkayauaj. San totoka ijkon kichiuaskej uan sapanoa temomojti yetos itech nochi tlaltikpak.

4. (1) ¿Tlen tlamantli xamo kijtoskej tekiuajkej ijkuak kinmixnamikiskej akinmej tlayekanaj itech religiones? (2) ¿Tlen kichiuaskej akinmej omonechikoayaj itech nonmej religiones?

4 Amo tikmatij ken peuas kixnamikiskej tekiuajkej “weyi Babilonia”. Xamo kijtoskej nochtin akinmej pouij itech religiones amo tlapaleuiaj ma yeto yolseuilistli uan nochipa mokajkalakiaj itech política. Xamo kijtoskej yikipiaj miak tomin uan miak tlamantli (Apoc. 18:3, 7). Ijkuak tekiuajkej kixnamikiskej “weyi Babilonia” amo kijtosneki nochtin kinmixpoloskej akinmej pouij itech nonmej religiones. Nesi kijtosneki ayakmo yetoskej religiones. Ijkuak ayakmo yetoskej religiones, akinmej inmiuan omonechikoayaj kitaskej teopixkej san okinkajkayajkej uan xamo ayakmo inmiuan monechikoskej.

5. ¿Tlen yokijto kichiuas Jehová itech ueyi tlajyouilistli uan tleka?

5 Biblia amo kijtoa kox uejkauas ijkuak kipojpoloskej “weyi Babilonia”. Pero nesi amo okachi uejkauas (Apoc. 18:10, 21). Jehová yokijto itech ueyi tlajyouilistli ‘kintsikitsintilis nonteh tonatijmeh’ uan ijkon uelis kinmakixtiskej akinmej “Ye okimpéjpenki” uan noijki religión tlen melauak kiueyichiua (Mar. 13:19, 20). ¿Tlen kineki Jehová ma tikchiuakan ijkuak peuas ueyi tlajyouilistli uan itech Armagedón?

MA TIKTEKICHIUILIJTOKAN JEHOVÁ

6. ¿Tlen kineki Jehová ma tikchiuakan?

6 Itech okse tlamachtil otikitakej Jehová kijtoa ma tikkauakan nochi tlen poui  itech “weyi Babilonia”. Pero ok moneki itlaj tikchiuaskej. Moneki ma tiktekichiuilijtokan Jehová. Ma tikitakan ome tlamantli ken tikchiuaskej.

Nochipa ma timonechikokan maski tikixnamikiskej ouijkayotl. (Xikita párrafo 7). *

7. (1) ¿Ken tikteititiaj tikintlakamatij itlanauatiluan toTajtsin Dios? (2) Ijkon ken kijtoa Hebreos 10:24, 25, ¿tleka axkan okachi moneki ma timonechikokan?

7 Achto moneki ma tikintlakamatikan itlanauatiluan toTajtsin Dios. Amo keman ma tikchiuakan tlen oksekimej kichiuaj. Tejuan tikitaj tlajtlakoli ijkuak ikaj auilnemi, ijkuak se tlakatl monamiktia iuan se tlakatl uan ijkuak se siuatl monamiktia iuan se siuatl. Noijki ijkuak tlakamej mosiuakopaj noso ijkuak siuamej motlakakopaj (Mat. 19:4, 5; Rom. 1:26, 27). Noijki moneki san sekan ma tikueyichiuakan toTajtsin Dios iuan tokniuan. Tikueyichiuaj itech kali kanin timonechikoaj uan ichtaka timonechikoskej tla monekis. Amo tikmatij tlen panos pero ma timochijchikauakan ma timonechikokan uan ma tiktekichiuilikan toTajtsin Dios. Moneki ma timonechikokan porque “ya tikitah n tonati ijkuak Toteko wits ya walajsi” (xiktlajtolti Hebreos 10:24, 25).

8. ¿Tlen xamo mopatlas ijkuak panos ueyi tlajyouilistli?

8 Xamo ayakmo titetlapouiskej ken axkan ijkuak panos ueyi tlajyouilistli. Axkan titetlapouiaj tlen kichiuas iTekiuajkayo toTajtsin Dios uan tikinpaleuiaj oksekimej ma mochiuakan imachtijkauan Jesús. Pero ijkuak panos ueyi tlajyouilistli xamo tikinmiluiskej tlen kinpanos uan Biblia kijtoa non yetos ken uejueyij tesiuitl tlen tikinmiluiskej (Apoc. 16:21). Xamo ijkuakon titetlapouiskej totoka pojpoliuis nochi tlen kiyekana Satanás. Satepan techmatiltiskej tlen tikijtoskej uan ken tikchiuaskej. ¿Titetlapouiskej ijkon ken tikchijtiuitsej nin cien xiuitl noso tikpatlaskej? Moneki timochiaskej tla tiknekij tikmatiskej. Amo tikmatij ken tikchiuaskej pero moneki tiyetoskej tiyolchikauakej ijkuak tiktematiltiskej tlen Jehová kichiuas (Ezeq. 2:3-5).

9. ¿Tlen uelis kijtoskej tekiuajkej uan tlen ma tikneltokakan?

9 Xamo ijkuak ijkon panos tekiuajkej ayakmo techkauiliskej ma titetlapouikan. Pero noijki ma tikneltokakan Jehová techyolchikauas ma titetlapouikan ijkon ken axkan kichiua. Noijki ma tikneltokakan Jehová techpaleuis ma tikchiuakan tlen ye kineki (Miq. 3:8).

MA TIMOYOLCHIKAUAKAN TLA TIKNEKIJ TITLAXIKOSKEJ IJKUAK KITLAJYOUILTISKEJ IALTEPE JEHOVÁ

10. Ijkon ken kijtoa Lucas 21:25-28, ¿tlen panos itech ueyi tlajyouilistli?

10 (Xiktlajtolti Lucas 21:25-28). Miakej momojtiskej ijkuak panos ueyi tlajyouilistli. Ijkuakon kitaskej ken peuas pojpoliuis nochi tlen omokuayejyekoayaj nochipa yetos. Nochipa san momojtiskej porque xamo kinmiktiskej uan okachi yetos tlajyouilistli (Sof. 1:14, 15). Xamo noijki titlajyouiskej porque tiktekichiuiliaj toTajtsin Dios uan amo tikchiuaj ken oksekimej. Noijki xamo amo tikpiaskej tlen okachi moneki ika timopanoltiskej.

11. (1) ¿Tleka miakej san kitemojtoskej ken techixpoloskej? (2) ¿Tleka amo ma timomojtikan ijkuak panos ueyi tlajyouilistli?

11 Ijkuakon sapanoa tikinkualaniskej akinmej okitakej ken okinpojpolojkej nochi religiones porque toreligión amo kipojpoloskej.  Xamo sapanoa miakej kualaniskej uan noijki miak tlamantli kijtoskej itech Internet. Tekiuajkej uan Satanás sapanoa techkokoliskej porque san toreligión yetos. Tekiuajkej uan Satanás amo uelis kipojpoloskej nin religión itech nochi tlaltikpak. Ik non, san kitemojtoskej ken techtlajyouiltiskej. Ijkuakon itlaj kichiuaskej tekiuajkej tlen kintokayotiaj Gog de Magog. * Yejuan monechikoskej uan kinekiskej kitlajyouiltiskej ialtepe Jehová (Ezeq. 38:2, 14-16). Tejuan xamo timotekipachoskej porque amo tikmatij tlen panos. Pero amo ma timomojtikan porque Jehová techiluis tlen tikchiuaskej (Sal. 34:19). ‘Timoyolchikawaskeh iwa tiajkotlachiaskeh porke san nima techmakixtis’ toTajtsin Dios. *

12. ¿Ken yotechmachti “tlakeuali yolmelajki uan ixtlamatki”?

12 Axkan “tlakeuali yolmelajki uan ixtlamatki” techiluia tlen moneki tikchiuaskej tla tiknekij tiyetoskej tiyolmelajkej ijkuak peuas ueyi tlajyouilistli (Mat. 24:45TNM). Yotechmachti miak tlamantli uan ijkon yomotak itech uejueyij nechikolmej tlen yomochijkej 2016 a 2018. Ompa otechyolchikajkej ma tikpiakan kuali toyelis tla tiknekij titlaxikoskej ijkuak ajsiki itonal Jehová. Ma tikitakan tlen otimomachtijkej.

MA TIYETOKAN TIYOLMELAJKEJ, AMO MA TIMOSOTLAUAKAN UAN MA TIMOYOLCHIKAUAKAN

Axkan ma timoyolchikauakan tla tiknekij tiyetoskej tiyolmelajkej ijkuak panos ueyi tlajyouilistli. (Xikinmita párrafos 13 a 16). *

13. ¿Ken uelis okachi timoyolchikauaskej tla tiknekij titlaxikoskej itech ueyi tlajyouilistli uan tleka moneki axkan ma tikchiuakan?

13 Ma tiyetokan tiyolmelajkej. Ueyi nechikol tlen omochi 2016 omotokayoti “Ma tiyetokan tiyolmelajkej iixpan Jehová”. Ompa otechmachtijkej tla tiknekij tiyetoskej tiyolmelajkej moneki kuali timouikaskej iuan Jehová. Otechilnamiktijkej ma tiktlatlaujtikan Jehová uan nochipa ma timomachtikan iTlajtol. Non techpaleuis ma titlaxikokan maski titlajyouiskej. Motas kox tikatej tiyolmelajkej ixpan toTajtsin Dios uan kox tikpaleuiaj iTekiuajkayo ijkuak yikipojpoloskej nochi tlen kiyekana Satanás. Xamo ijkuakon techpinauiskej (2 Ped. 3:3, 4). Ijkon kichiuaskej porque tejuan amo kanaj timokajkalakiaj. Ik non, moneki axkan ma timoyolchikauakan tla tiknekij titlaxikoskej itech ueyi tlajyouilistli.

14. (1) ¿Tleka kinpatlaskej akinmej techyekanaj nikan tlaltikpak? (2) ¿Tleka monekis ma titetlakamatikan?

14 Ijkuak panos ueyi tlajyouilistli kinpatlaskej akinmej techyekanaj nikan tlaltikpak. Nochtin tlapejpenalmej tlen ok yetoskej tlaltikpak moneki yaskej iluikak uan ijkon tlapaleuiskej ijkuak panos Armagedón (Mat. 24:31; Apoc. 2:26, 27). Nin kijtosneki akinmej pouij itech Cuerpo Gobernante ayakmo nikan yetoskej. Pero kinmiluiskej tlen kichiuaskej akinmej nikan mokauaskej. Tlayekanaskej sekimej tokniuan tlen chantiskej nikan tlaltikpak. Tikteititiskej tiyolmelajkej tla tikintlakamatiskej porque toTajtsin  Dios kinmiluis tlen tikchiuaskej. Moneki titetlakamatiskej tla amo tiknekij timikiskej.

15. ¿Tlen techpaleuis amo ma timosotlauakan uan tleka axkan ma tikchiuakan?

15 Amo ma timosotlauakan. Ueyi nechikol tlen omochi 2017 omotokayoti “¡Amo ximosotlaua!”. Ompa otechiluijkej amo ma timosotlauakan maski tikpiaskej ouijkayotl. Otikitakej amo kijtosneki san titlaxikoskej ijkuak kuali tikatej uan techpaleuis tla titlaneltokaj itech Jehová (Rom. 12:12). Amo ma tikilkauakan tlen okijto Jesús: “Akin nochi kixikos, momakixtis” (Mat. 24:13). Nin kijtosneki tiyetoskej tiyolmelajkej maski san tlen tlamantli techpanos. Tla axkan titlaxikoaj, okachi titlaxikoskej itech ueyi tlajyouilistli.

16. ¿Tlen moneki tikchiuaskej tla tiknekij tiyetoskej tiyolchikauakej axkan uan satepan?

16 Ma timoyolchikauakan. Ueyi nechikol tlen omochi 2018 omotokayoti “¡Xiyeto tiyolchikauak!”. Ompa otechilnamiktijkej amo tiyetoskej tiyolchikauakej porque tikmatij tikchiuaskej miak tlamantli. Otechiluijkej ma titlaneltokakan itech Jehová tla tiknekij titlaxikoskej. ¿Tlen techpaleuis okachi ma titlaneltokakan itech Jehová? Mojmostla ma tiktlajtoltikan Biblia uan ma timokuayejyekokan ken okinmakixti itekipanojkauan Jehová yiuejkika (Sal. 68:20; 2 Ped. 2:9). Moneki tiyetoskej tiyolchikauakej uan ma titlaneltokakan itech Jehová ijkuak techtlajyouiltiskej tekiuajkej (Sal. 112:7, 8; Heb. 13:6). Tla axkan titlaneltokaj itech Jehová, tiyetoskej tiyolchikauakej ijkuak techtlajyouiltiskej akinmej kintokayotiaj Gog. *

TIKCHIAJ MA TECHMAKIXTIKAN

Ayakmo miak poliui Jesús uan ángeles kinmixpoloskej akinmej kixnamikij toTajtsin Dios ijkuak mochiuas guerra Armagedón. (Xikita párrafo 17).

17. ¿Tleka amo ma timomojtikan ijkuak panos Armagedón? (Xikita ixko revista).

17 Itech okse tlamachtil otikitakej tinochtin tikatej itlamian tonalmej. Pero tikchiaj Jehová ma techmakixti itech ueyi  tlajyouilistli uan Armagedón kichiuas ma tlami nochi tlen amo kuali. Amo ma timomojtikan porque non yetos iguerra toTajtsin Dios (Prov. 1:33; Ezeq. 38:18-20; Zac. 14:3). Jehová tlanauatis keman ijkon panos uan Jesucristo kinyekanas nochtin tlen tlateuikiuij. Kipaleuiskej tlapejpenalmej uan sapanoa miakej ángeles. Nochtin yejuan mopaleuiskej uan kiteuiskej Satanás, amo kuali ejekamej uan nochtin akinmej kipaleuiskej Satanás (Dan. 12:1; Apoc. 6:2; 17:14).

18. (1) ¿Tlen yokijto Jehová? (2) ¿Ken techpaleuia Apocalipsis 7:9, 13-17 ma tikneltokakan kuali tiyetoskej satepan?

18 Jehová yokijto ‘maski san tlen tepostli ika techxnamikiskej, amo techtlaniliskej’ (Is. 54:17). “Senmiaktikeh tlaltikpaktlakah” tlen kitekichiuiliaj Jehová kinmakixtis itech “weyi tlaijyowílistli” uan ok kitekichiuiliskej (xiktlajtolti Apocalipsis 7:9, 13-17). Tlen kijtoa Biblia techyolchikaua uan tikchiaj kuali tiyetoskej satepan. Tikmatij “Jehová kinmaluia yolmelajkej” (Sal. 31:23). Tinochtin akinmej tiktlasojtlaj Jehová uan tikueyichiuaj sapanoa tiyolpakiskej ijkuak kichipauas itoka (Ezeq. 38:23).

19. ¿Tlen tikchiaj ma mochiua?

19 ¿Ken tikyekijtoskej 2 Tim. 3:1-5 ijkuak ayakmo yetos Satanás? (xikita recuadro “ Satepan ijkin kipiaskej inyelis”). Tokni George Gangas * tlen opouiaya itech Cuerpo Gobernante, okijto: “¡Sapanoa kualtsin yetos ijkuak tinochtin san sekan tiktekichiuiliskej toTajtsin Dios! Ayakmo miak poliui uan tichantiskej itech xochitlali. Nochipa tiyoltoskej ijkon ken Jehová”. ¡Sapanoa kualtsin yetos ijkuak ijkon tiyetoskej!

TLAKUIKALI 122 ¡Ma titlaxikojtokan!

^ párr. 5 Tikmatokej ayakmo miak poliui peuas ueyi tlajyouilistli. ¿Tlen techpanos tejuan tlen tiktekichiuiliaj toTajtsin Dios? ¿Tlen kineki Jehová ma tikchiuakan? ¿Tlen tikchiuaskej tla tiknekij tiyetoskej tiyolmelajkej? Itech nin tlamachtil tikitaskej tlen moneki tikchiuaskej.

^ párr. 11 TLEN OKACHI IPATI: Gog de Magog uan Gog kijtosneki nochtin tekiuajkej tlen kintlajyouiltiskej itekipanojkauan Jehová itech ueyi tlajyouilistli.

^ párr. 11 NOTA: Amochtli El Reino de Dios ya está gobernando itech capítulo 21 kijtoa tlen okseki tlamantli panos ijkuak peuas Armagedón. Itech revista Akin Tetlapouijtok 15 de julio 2015 páginas 9 a 15, ompa kijtoa okseki tlamantli ken techtlajyouiltiskej akinmej kintokayotiaj Gog de Magog uan noijki kijtoa ken kinpaleuis Jehová itekipanojkauan.

^ párr. 16 Ueyi nechikol regional tlen mochijtok 2019 itoka “¡Tlasojtlalistli amo tlamis!”. Nin ueyi nechikol techpaleuia ma tikneltokakan Jehová nochipa techmaluis (1 Cor. 13:8).

^ párr. 19 Xikita revista Akin Tetlapouijtok 1 de diciembre 1994, itech tlamachtil “Sus obras lo siguen”.

^ párr. 64 FOTO: Itech ueyi tlajyouilistli sekimej tokniuan yolchikauakej monechikoaj ijtik kuajyo.

^ párr. 66 FOTO: “Senmiaktikeh tlaltikpaktlakah” tlen kitekichiuiliaj Jehová kinmakixtiskej itech “weyi tlaijyowílistli” uan yolpakiskej.