Xikita nochi

Tlen kiualika

 TLAMACHTIL 40

Ma tiktekichiuilikan Jehová itlamian ninmej tonalmej

Ma tiktekichiuilikan Jehová itlamian ninmej tonalmej

“Xiyektlakxilitokah iwa nochipa xiyeknemikah iwan [...] xikmopantikah iteki n Toteko” (1 COR. 15:58).

TLAKUIKALI 58 Nikintemos akinmej kikakij Jehová

XIKILNAMIKTO *

1. ¿Tleka tikneltokaj tikatej “itlamian tonalmej”?

¿OTINESKEJ ijkuak yopanok 1914? Non kijtosneki tiyoltokej “itech iksemi tonatijmeh” ijkuak yitlamis tlen amo kuali (2 Tim. 3:1). Tinochtin tikkakij panotok tlen Jesús okijto. Onka guerras, miakej apismikij, tlalolini, onka miak kokolistli, miakej okachi kichiuaj tlen amo kuali, kintlajyouiltiaj itekipanojkauan toTajtsin Dios uan kichiuaj okseki tlamantli (Mat. 24:3, 7-9, 12; Luc. 21:10-12). Miakej kichiuaj ken okijto tlatitlanil Pablo (xikita recuadro “ Axkan miakej ijkin inyelis”). TiiTekipanojkauan Jehová tikneltokaj tikatej “itlamian tonalmej” (Miq. 4:1).

2. ¿Tlen tlajtlanilmej tikinnankiliskej?

2 Yopanok miak xiuitl desde 1914. Nin kijtosneki yitikatej “itlamian tonalmej”. Yitlamis nochi tlen amo kuali, ik non, ma timotlajtlanikan: ¿Tlen panos “itlamian tonalmej”? ¿Tlen kineki Jehová ma tikchijtokan?

¿TLEN PANOS “ITLAMIAN TONALMEJ”?

3. Ijkon ken omoijto itech 1 Tesalonicenses 5:1-3, ¿tlen kijtoskej tekiuajkej?

3 (Xiktlajtolti 1 Tesalonicenses 5:1-3). Itech nonmej textos Pablo okijto “Toteko [Jehová] walmuikas”. Nonmej textos kiteititiaj yipeuas kitlajyouiltiskej “weyi Babilonia” noso nochi religiones tlen san tlakajkayauaj uan tlamis itech Armagedón (Apoc. 16:14, TNM, 16; 17:5).  Tekiuajkej kijtoskej: “Axa kema ya tikateh ika kuali, iwa ya tikpiah yolsewílistli” uan satepan “Toteko [Jehová] walmuikas”. Ualeua tekiuajkej ijkon kijtoaj ijkuak kinekij mouikaskej iuan akinmej chantij itech okseki altepemej. * Pero amo non kijtosneki tlen Biblia kijtoa. ¿Tleka? Porque miakej kineltokaskej tekiuajkej yokichijkej nochtin kuali ma yetokan. Pero ijkuakon peuas “tlaijyowílistli yetos satlawel temojti” uan “kualinmajsiki n tlaixpoliwílistli” (Mat. 24:21).

Amo ma techkajkayauakan ijkuak kijtoskej “axa kema ya tikateh ika kuali, iwa ya tikpiah yolsewílistli”. (Xikinmita párrafos 3 a 6). *

4. (1) ¿Tlen amo tikmatij panos ijkuak tekiuajkej kijtoskej “axa kema ya tikateh ika kuali, iwa ya tikpiah yolsewílistli”? (2) ¿Pero tlen yitikmatij?

4 Tikmatij seki tlamantli tlen panos ijkuak tekiuajkej kijtoskej yionka yolseuilistli uan yikuali tikatej. Pero amo tikmatij tleka ijkon kijtoskej uan ken kichiuaskej. Noijki amo tikmatij kox miak uelta ijkon kijtoskej noso san se uelta. Amo tikmatij ken kichiuaskej. Pero moneki timomaluiskej uan ijkon amo techkajkayauaskej tekiuajkej ijkuak kijtoskej tinochtin yitikatej ika yolseuilistli. Ijkuak ijkon kijtoskej kiteititis yoajsiko itonal Jehová tlen sapanoa tikchixtokej.

5. ¿Ken techpaleuia 1 Tesalonicenses 5:5, 6 ma tikchiakan itonal Jehová?

5 (Xiktlajtolti 1 Tesalonicenses 5:5, 6). Pablo techiluia tlen moneki tikchiuaskej tla tiknekij tikchiaskej itonal Jehová. “Amo matikochtokah kemi n oksikimeh”. Moneki ma tiijsatokan uan ma titlachixtokan. Ma tikitakan ken uelis tikchiuaskej. Amo ma timokajkalakikan itech política. Porque tla timokajkalakiskej tikchiuaskej “kemi kichiwah n tlaltikpaktlakah” (Juan 15:19). Tejuan kuali tikmatij san iTekiuajkayo toTajtsin Dios uelis kichiuas ma tiyetokan ika yolseuilistli.

6. ¿Tlen tiknekij tikinmachtiskej oksekimej uan tleka?

6 Noijki ma tikinpaleuikan oksekimej ma ijsakan. Nin kijtosneki ma tikinmachtikan tlen kinpanos akinmej amo yolkualmej. Porque ayakmo uelis kitemoskej Jehová ijkuak peuas ueyi tlajyouilistli. Ik non, moneki axkan totoka ma titetlapouikan. *

MA TIMOCHIJCHIKAUAKAN NOCHIPA MA TITETLAPOUIKAN

Ijkuak titetlapouiaj tikteititiaj san iTekiuajkayo toTajtsin Dios kichiuas kuali ma tiyetokan. (Xikinmita párrafos 7 a 9).

7. ¿Tlen kineki Jehová ma tikchiuakan axkan?

7 Jehová kineki ma titetlapouijtokan axkan porque ayamo ejko itonal. Moneki ‘matikmopantikah iteki n Toteko’ (1 Cor. 15:58). Jesús okijto tlen tikchiuaskiaj itlamian tonalmej ijkuak panoskia miak tlamantli. Okijto: “Achto moneki  mamotematilti n kualitlájtoli itech nochi n tlaltíkpaktli” (Mar. 13:4, 8, 10; Mat. 24:14TNM). Ma tikilnamiktokan ijkuak titetlapouiaj tikchiuaj tlen kijtoa nin profecía.

8. ¿Tlen kiteititia axkan momiaktilijtokej tokniuan?

8 Sejse xiuitl miakej kinekij kimatiskej tlen kichiuas iTekiuajkayo toTajtsin Dios. Ma tikitakan ken yomomiaktilijkej tokniuan itlamian ninmej tonalmej. Itech 1914 okatkaj 5,155 tokniuan itech 43 altepemej. Axkan katej kanaj 8,500,000 (ocho millones quinientos mil) tokniuan itech 240 altepemej uan okseki altepetsitsintin. Pero nin amo kijtosneki yotlanki otitetlapouijkej. Ok moneki titetlapouiskej san iTekiuajkayo toTajtsin Dios techpaleuis ayakmo ma titlajyouikan (Sal. 145:11-13).

9. ¿Tleka ok moneki ma titetlapouikan?

9 Ma timochijchikauakan nochipa ma titetlapouikan hasta ijkuak Jehová kijtos ayakmo ma titetlapouikan. Axkan ok uelis miakej kixmatiskej Jehová uan Jesucristo porque ayamo tlami tlen amo kuali (Juan 17:3). Amo tikmatij kox ok uejkauas titetlapouiskej. Pero axkan nochtin akinmej kinekij ‘yolitoskeh nochipa’ moneki ma kichiuakan tlen kijtoa toTajtsin Dios uan ma kitekichiuilikan (Hech. 13:48). ¿Ken tikinpaleuiskej oksekimej axkan ma kixmatikan toTajtsin Dios?

10. ¿Tlen techmaka Jehová uan ijkon kuali ma titlamachtikan?

10 Jehová kipaleuia ialtepe ma techmaka tlen moneki uan ijkon ma titlamachtikan. Ma tikitakan ken kichiua. Chichikometika tikpiaj se nechikol tlajko semana. Ompa techmachtiaj ken peuas titetlapouiskej, ken uelis oksepa titetlajpalotiuij uan ken kuali titlamachtiskej. Noijki ialtepe Jehová yotechmakak tlen ika titlamachtiskej. Nochi nin techpaleuis:

  • ma tikmatikan ken peuas titetlapouiskej,

  • ma tikinmiluikan oksekimej tleka miak ipati ma momachtikan,

  • ma tikinpaleuikan oksekimej okachi ma kitemokan tlen kijtoa Biblia,

  •   ma tikinmachtikan tlen kijtoa Biblia uan

  • ma tikinmiluikan akinmej okachi kinekij kimatiskej ma kalakikan itech página tlen tikpiaj itech Internet uan touan ma monechikotij.

Moneki ma timopaleuikan ika nin tlamantli uan amo san ompa ma tikinpixtokan. * Ma tikitakan ken tikchiuaskej. Ijkuak timotlapouiaj iuan akin okachi kineki kimatis, ma tikmakakan se amatsintli noso se revista uan ijkon uelis kitlajtoltis uan uelis tiktlapouis ijkuak oksepa tiktlajpaloti. Noijki ma tikilnamiktokan moneki nochipa ma titetlapouikan.

11. ¿Tleka okitlalijkej curso bíblico en línea?

11 Ma tikitakan okse tlamantli tlen ika techpaleuia Jehová ma tiktematiltikan iTlajtol. Página tlen tikpiaj itech Internet tlen itoka jw.org® kipia kanin kijtoa curso bíblico en línea. * ¿Tleka ompa okitlalijkej? Sejse metstli miakej kinekij momachtiskej Biblia itech Internet. Ika nin página miakej mopaleuiskej ma kimatikan tlen melauak tlamachtia iTlajtol toTajtsin Dios. Sekimej xamo amo kinekij momachtiskej ijkuak tikinmiluiaj uelis tikinmachtiskej. Ik non, ma tikinmiluikan página tlen tikpiaj itech Internet kipia kanin uelis momachtiskej noso ma tikintitlanilikan se tlamachtil ika intlajtol.

12. ¿Tlen uelis momachtiskej akinmej kinekij se curso bíblico en línea?

12 Nin curso bíblico en línea tlamachtia tlen kijtoa Biblia, akin otlanauati ma kijkuilokan Biblia, techtlapouia tlen okichijkej sekimej tlakamej uan siuamej. Noijki Biblia techiluia tlen kichiuas toTajtsin Dios uan non techyolchikaua. Akin momachtis kimatis:

  • Biblia techpaleuia,

  • akin Jehová, Jesús uan ángeles,

  • tleka otechchijchi toTajtsin Dios uan

  • tleka titlajyouiaj.

Noijki ompa momachtis:

  • tlen kichiuas Jehová uan ijkon ayakmo titlajyouiskej nion tiixpoliuiskej,

  • kinyolitis akinmej yoixpolikej uan

  • iTekiuajkayo toTajtsin Dios kinpatkayotis nochtin tekiuajkej tlen amitlaj inpati.

13. Xikijto kox curso bíblico en línea kijtosneki ayakmo titlamachtitiuij tekalijtik.

13 Nin amo kijtosneki ayakmo tikinmachtitiuij akinmej kinekij momachtiskej. Porque Jesús otechnauati ma tikinpaleuikan oksekimej ma mochiuakan imachtijkauan. Tiknekij ma kipatioitakan tlen momachtiaj uan ma kinekikan okachi kimatiskej akinmej kinekij se curso bíblico en línea. Xamo satepan kinekiskej ikaj ma kinmachtiti inkalijtik. Itech curso bíblico en línea, ijkuak tlami se tlamachtil, ompa kiluiaj akin momachtijtok ma kitlajtlani ikaj ma kimachtiti. Mojmostla, kanaj 230 kitlajtlanij itech página tlen tikpiaj ma tikinmachtikan. Pero noijki miak ipati ma tikinmachtitij inkalijtik.

MA TIKINPALEUIKAN OKSEKIMEJ MA MOCHIUAKAN IMACHTIJKAUAN JESÚS

14. Ijkon ken okijto Jesús itech Mateo 28:19, 20, ¿tlen moneki tikchiuaskej uan tleka?

14 (Xiktlajtolti Mateo 28:19, 20). Ijkuak titlamachtiaj ma tikinpaleuikan  oksekimej ma mochiuakan imachtijkauan Jesús uan ma kitlakamatikan tlen yotlanauati. Ma tikinpaleuikan ma kajsikamatikan moneki ma kitekichiuilikan Jehová uan ma kipaleuikan iTekiuajkayo. Nin kijtosneki tikinpaleuiskej ma kichiuakan tlen momachtiaj, ma motemakakan ixpan Jehová uan ma moapolaktikan. Non kinpaleuis amitlaj ma kinpano ijkuak uits itonal Jehová (1 Ped. 3:21TNM).

15. ¿Akinmej ayakmo tikinmachtiskej uan tleka?

15 Yotimomachtijkej ayakmo miak poliui tlamis nochi tlen amo kuali. Ik non, ayakmo timajxiliaj tikinmachtiskej akinmej amo kinekij kichiuaskej ken Cristo (1 Cor. 9:26). Amo ma tikajauilmatikan ijkuak titlamachtiaj porque axkan moneki miakej ma tikintlapouikan tlen kichiuas iTekiuajkayo toTajtsin Dios. Porque satepan ayakmo ijkon tikchiuaskej.

MA TIKKAUAKAN RELIGIÓN TLEN SAN TLAKAJKAYAUA

16. Ijkon ken kijtoa Apocalipsis 18:2, 4, 5, 8, ¿tlen moneki tinochtin ma tikchiuakan? (Xikita nota).

16 (Xiktlajtolti Apocalipsis 18:2, 4, 5, 8). Nonmej versículos techititia Jehová kineki ok itlaj ma tikchiuakan. Tinochtin akinmej tikchiuaj ken Cristo ayakmo itlaj ma tikchiuakan tlen poui itech ueyi Babilonia. Xamo akinmej tikinmachtiaj achto omonechikoayaj iuan okse religión. Noijki xamo okichiuayaj tlen ompa okinnauatiayaj uan okitemakayaj tomin. Moneki nochi kikauaskej tlen ompa okichiuayaj tla kinekij tetlapouiskej. Moneki kijkuiloskej se carta kanin kijtoa ayakmo pouiskej itech non religión uan ayakmo kichiuaskej tlen okinnauatiayaj. Satepan ma kinmaktilikan akinmej tlayekanaj itech non religión porque nochi non poui itech ueyi Babilonia. *

17. ¿Tlen tekitl amo tikseliskej akinmej tikchiuaj ken Cristo uan tleka?

17 Tejuan akinmej tikchiuaj ken Cristo amitlaj ma tikchiuakan tlen poui itech ueyi Babilonia (2 Cor. 6:14-17). Amo keman ma titekipanokan itech se teopan. Tla titekipanoaj itech se empresa, amo ma tikyektlalitij teopan ijkuak technauatiskej ompa ma titekipanotij. Noijki tla tikmatij tikchiuaskej se tekitl, amo ma tikinmiluikan ma techtlakeuakan nion ijkuak yejuan techiluiskej kuali techtlaxtlauiskej tla inmiuan titekipanoskej. Porque nochi non poui itech ueyi Babilonia. ¿Tleka amo ma tikchiuakan  tlen yotikijtojkej? Amo tiknekij tikpaleuiskej ueyi Babilonia nion iuan titlajtlakolchiuaskej porque nonmej religiones toTajtsin Dios kinmita sokiojkej (Is. 52:11). *

18. ¿Tlen okichi se tokni ijkuak okiluijkej ma tekipanoti itech se teopan?

18 Yikipia seki xiuitl se tlakatl okitlake se tokni tlayekanki tlen kuajxima, ma tekipanoti itech se teopan. Non tlakatl okimatiaya tokni nochipa okijtoaya amo keman ompa tekipanoskia. Pero tlakatl okinekiaya ikaj totoka ma kipaleuiti. Tokni omoyekanki ika principios bíblicos uan amo okipaleuito. Chikometika, okiski itech periódico se kuajxinki okitlalito se cruz ipan teopan. Tla tokni kichiuaskia non tekitl, ye kisaskia itech periódico. Ma timokuayejyekokan ken moyolkokoskia Jehová uan tokniuan.

¿TLEN OTIMOMACHTIJKEJ?

19, 20. (1) ¿Tlen yotimomachtijkej? (2) ¿Tlen okachi moneki timomachtiskej?

19 Ijkon ken kijtoaj profecías, ayakmo miak poliui uan tekiuajkej kijtoskej “axa kema ya tikateh ika kuali, iwa ya tikpiah yolsewílistli”. Pero Jehová yotechmachti tekiuajkej amo uelis kichiuaskej ma tiyetokan ika yolseuilistli. Ik non, ¿tlen moneki tikchiuaskej axkan ijkuak ayamo ualajsi “tlaixpoliwílistli”? Jehová kineki ma titetlapouikan itech iTekiuajkayo uan ma tikinpaleuikan oksekimej ma mochiuakan imachtijkauan Jesús. Pero noijki moneki ma tikinkauakan religiones tlen san tlakajkayauaj. Non kijtosneki ayakmo inmiuan tipouiskej uan amo tikchiuaskej tlen yejuan kichiuaj porque non poui itech ueyi Babilonia.

20 Okseki tlamantli panos itlamian tonalmej uan Jehová kinekis ma tikchiuakan okseki tlamantli. ¿Tlen tlamantli? ¿Tlen moneki tikchiuaskej uan ijkon tikxikoskej nochi tlen panos? Nin tikitaskej itech okse tlamachtil.

TLAKUIKALI 71 Tejuan tikpaleuiaj Jehová

^ párr. 5 San tikchixtokej tekiuajkej ma kijtokan yionka yolseuilistli uan yikuali tikatej. Non kiteititis yipeuas ueyi tlajyouilistli. Ik non, ¿tlen kineki Jehová ma tikchijtokan? Itech nin tlamachtil tikitaskej tlen moneki tikchiuaskej.

^ párr. 3 Página tlen kipia Organización de las Naciones Unidas kijtoa yejuan okachi kipatioitaj “nochtin kuali ma yetokan uan ika yolseuilistli”.

^ párr. 6 Itech nin revista xikita tlamachtil “¿Nochipa technejmachtia Jehová ijkuak techixkomakas?”.

^ párr. 23 Itech revista Akin Tetlapouijtok octubre 2018 itech tlamachtil “Ma titlamachtikan tlen melauak”, kijtoa ken uelis tiktekitiltiskej tlen ika titlamachtiaj.

^ párr. 11 Nin curso bíblico en línea kajki ika inglés uan portugués uan satepan yetos ika okseki tlajtolmej.

^ párr. 16 Moneki kuali ma tikitakan tlen tikchiuaj. Itech seki altepemej akinmej pouij itech okseki religiones kipiaj kanin kichiuaj ejercicio, kanin ajkuij, kinmachtiaj akinmej kinekij tlatsotsonaskej noso sekimej kinpajtiaj. Noijki sekimej kinyoleuaj ma mauiltitij, iluichiuaj uan mijtotiaj. Sekimej kijtoaj tlen kichiuaj amo kipia tlen kitas iuan religión pero nochi kiteititia poui itech religión.

^ párr. 17 Revista Akin Tetlapouijtok 15 de abril 1999 itech sección “Sekimej techtlajtlaniaj”, techtlapouia tlen kijtoa Biblia ijkuak ikaj kineki techtlakeuas ma titekipanotij teopan.

^ párr. 83 FOTO: Sekimej katej kanin kinemakaj café uan motlajtlachialtiaj ijkuak kikakij itech televisión kijtoaj “axa kema ya tikateh ika kuali, iwa ya tikpiah yolsewílistli”. Pero se tokni uan isiua mochijchikauaj tetlapouiaj. Ik non, amo motlajtlachialtiaj ijkuak ijkon kijtoaj.