Xikita nochi

Tlen kiualika

Amo ma titlakajkayauakan

Amo ma titlakajkayauakan

“Ayakmó ximokajkayawakah, yej nochipa xikijtokah tlan milák” (EFES. 4:25).

TLAKUIKALMEJ: 56 UAN 124

1, 2. (1) ¿Tlen tlamantli okachi tetlajyouilti? (2) ¿Akin itlajtlakol?

YIUEJKIKA okichijchijkej teléfono, carro uan refrigerador uan axkan nin tlamantli sapanoa tlapaleuiaj. Pero noijki okimatkej ken kichijchiuaskej pólvora, minas, cigarros, bomba atómica uan okseki tlamantli. Nin tlamantli sapanoa techtlajyouiltia. Pero onka okse tlamantli tlen okachi tetlajyouilti. ¿Tlen tlamantli? Porque akin tlakajkayaua moixmati ken amo kijtoa tlen melauak. Satanás ye achto otlakajkaya, ik non, Jesús okijto ye “teta de nochteh non tlakajkayawah” (xiktlajtolti Juan 8:44). ¿Keman otlakajkaya?

2 Yikipia miak xiuitl Satanás otlakajkaya itech xochitlali Edén. Adán uan Eva kualtsin oyolpakiayaj itech xochitlali. Pero toTajtsin Dios okinmilui amo ma kikuakan itlakilo “kuauitl tlen kitekauilia ma kimatikan tlen kuali uan tlen amo kuali”. Mikiskiaj tla amo tetlakamatiskiaj. Satanás okimatiaya nochi nin tlamantli pero okitekitilti se koatl para kikajkayauaskia Eva ijkuak okilui amo mikiskiaj tla kikuaskiaj tlakilotl. Noijki okilui: “Porque Dios kimati ijkuak nankikuaskej, motlaposkej namoixtololouan uan nanyetoskej ken  Dios, nankimatiskej tlen kuali uan tlen amo kuali” (Gén. 2:15-17; 3:1-5).

3. (1) ¿Tleka tikijtoaj Satanás melauak otlakajkaya? (2) ¿Axkan tlen panotok?

3 Satanás melauak okikajkaya Eva porque ye kuali okimatiaya mikiskia tla kikuaskia tlakilotl. Eva uan inamik amo okitlakamatkej Jehová uan satepan omikej (Gén. 3:6; 5:5). Noijki “tlajtlákoli okalak itech nin tlaltíkpaktli” uan “nochteh [...] okichijtinenkeh tlajtlákoli, pero mach por amo okitlakitakeh se tlanawátili, kemi okichi Adán” (Rom. 5:12, 14). ToTajtsin Dios okinekiaya nochipa ma tiyoltokan pero axkan san tikajxitiaj kanaj setenta noso ochenta xiuitl (Sal. 90:10). Ijkon opanok porque Satanás otlakajkaya.

4. (1) ¿Tlen tlajtlanilmej miak inpati tikinnankiliskej? (2) ¿Akinmej uelis mouikaskej iuan toTajtsin Dios ijkon ken kijtoa Salmo 15:1, 2?

4 Jesús okijto Satanás “ayik kijtoa tlan milák. Porke ye amo kixmati tlan milák”. Satanás amo kipatla iyelis. Ok “kinkajkayawa nochteh n tlaltikpaktlakah” (Apoc. 12:9). Tejuan amo tiknekij ma techkajkayaua. Ik non, miak ipati ma tikinnankilikan ninmej eyi tlajtlanilmej: ¿Tlen ika tlakajkayaua Satanás? ¿Tleka miakej tlakajkayauaj? ¿Ken tikteititiaj amo titlakajkayauaj uan ijkon nochipa kuali timouikaskej iuan toTajtsin Dios? (xiktlajtolti Salmo 15:1, 2).

¿TLEN IKA TLAKAJKAYAUA SATANÁS?

5. ¿Ken tlakajkayaua Satanás?

5 Tlatitlanil Pablo okijto tlen tikchiuaskej para amo ma techkajkayaua Diablo porque tejuan “kuali tikixmatih kenomi tlakajkayawa” (2 Cor. 2:11). Kuali tikmatij Satanás kinnauatia akinmej kinyekana, noijki religiones tlen amo melauakej, tekiuajkej uan nochtin tlasemankej (1 Juan 5:19). Amo techtlajtlachialtia Satanás uan amo kuali ejekamej kinnauatiaj sekimej tlakamej para ma tlakajkayauakan (1 Tim. 4:1, 2). Ma tikitakan tlen kichiuaj sekimej. Miakej tlakajkayauaj porque kinekij tlanemakaskej noso kinekij tlachtekiskej.

6. ¿Tleka tlakajkayauaj akinmej kinyekanaj religiones?

6 Akinmej kinyekanaj religiones tlakajkayauaj. ¿Tleka? Porque akinmej kinneltokiliaj uan kichiuaj tlen toTajtsin Dios amo kipaktia xamo ayakmo yoltoskej nochipa (Os. 4:9). Ijkuak Jesús nikan okatka okimatiaya teopixkej otlakajkayauayaj. Okinmixilui: “¡Miálmasteh tlamachtijkeh iwa fariseos, íxkopteh! Nomejwah non nentinemih itech nochi n tlaltíkpaktli para aka nonkichiwaltiskeh makitlakita nomotlamachtilis, iwa ijkuak yononkimotlanilijkeh, nonkikopah ome welta okachi amokuali ke nomejwah iwa ijkó makimotlanili n miktla” noso sepa kixpoloskej (Mat. 23:15). Jesús okinmilui: “Nomejwah nomota n diablo” porque “ye se temikti” (Juan 8:44).

7. ¿Ken tlakajkayauaj teopixkej?

7 Axkan katej miakej tlen kinyekanaj religiones, teopixkej uan oksekimej tlen kijtoaj tlamachtiaj. Noijki kichiuaj ken fariseos porque ‘kitsakuiliah tlan milák’ uan “okipatlakeh Dios non de milajka, iwa okineltokakeh tlan amo milák” (Rom. 1:18, 25). Amo melauak tlen tlamachtiaj porque kijtoaj toTajtsin Dios techtlajyouiltiaj ijtik tlitl uan kijtoaj ijkuak timikij itlaj mokaua tlen ok yoltok. Noijki  kijtoaj amo tlajtlakoli tla tlakamej mosiuakuepaj noso tla siuamej motlakakuepaj. Kijtoaj amo tlajtlakoli tla se tlakatl monamiktis iuan okse tlakatl noso tla se siuatl monamiktis iuan okse siuatl.

8. (1) ¿Ken kinekiskej techkajkayauaskej políticos? (2) ¿Tlen moneki tikchiuaskej?

8 Akinmej pouij itech política noijki tlakajkayauaj. Noijki ok poliui ijkuak kijtoskej “axa kema ya tikateh ika kuali, iwa ya tikpiah yolsewílistli”. Pero san niman “kualinmajsiki n tlaixpoliwílistli”. Amo ma techkajkayauakan nion ma timokuayejyekokan amo itlaj panotok. Porque Jehová “kalakiki ijkuak amaka kichia, kemi se yuali ijkuak se tlachtek walkalaki” (1 Tes. 5:1-4).

¿TLEKA MIAKEJ TLAKAJKAYAUAJ?

9. ¿Tleka miakej tlakajkayauaj?

9 Axkan sapanoa miakej tlakajkayauaj. Se revista tlen kipia se tlamachtil itoka “Tleka titlakajkayauaj”, kijtoa: “Yimiak xiuitl sapanoa tlakajkayauaj”. Sekimej tlakajkayauaj porque amo kinekij ma momati tlen amo kuali kichiuaj. Sekimej tlakajkayauaj porque kinekij kipiaskej se kuali tekitl, kinekij kitlaniskej tomin noso para kuali yetoskej. Noijki revista kijtoa miakej kinkajkayauaj akinmej inmiuan tekitij, akinmej amo kinmixmatij, akinmej inmiuan mouikaj uan akinmej kintlasojtlaj.

10. (1) ¿Tlen kinpanoa akinmej tlakajkayauaj? (2) ¿Tleka Jehová amo uelis tikkajkayauaskej?

10 ¿Tlen kinpanoa akinmej tlakajkayauaj? Ayakmo itlaj kinneltokiliaj uan ayakmo inmiuan mouikaj. Ma timokuayejyekokan ken momachilia se tlakatl tla isiua kikajkayaua uan kiluia miak tlamantli para kiteititis amo melauak ikaj iuan nemi. Noijki amo kuali tla se tlakatl kijtoa kitlasojtla isiua uan ikoneuan pero ijkuak katej inkalijtik kintlajyouiltia. Uelis kinkajkayauaskej oksekimej pero Jehová nochi “kita ik pánixko iwa ik tlaijtik” (Heb. 4:13).

11. ¿Tlen techmachtia tlen okichi Ananías uan Safira? (Xikita dibujo kanin peua tlamachtil).

11 Itech Biblia ijkuilitok tlen okichi Ananías uan Safira. Yejuan okikauilijkej Satanás ma kinyekana uan ijkon okinekiayaj kinkajkayauaskej tlatitlanilmej. Okinemakakej se tlali uan okinmiluijkej tlatitlanilmej okinmaktilijtokaj nochi tomin. Pero amo melauak ijkon okichijtokaj. Ananías uan Safira san okinekiayaj ma kitakan tlatitlanilmej yejuan melauak okitemakatokaj tlen okipiayaj. Pero Jehová okitak okinekiayaj kinkajkayauaskej tlatitlanilmej uan okintlajyouilti (Hech. 5:1-10).

12. ¿Tlen kinpanos akinmej tlakajkayauaj uan tleka?

12 ¿Ken kita Jehová ijkuak ikaj tlakajkayaua? Satanás uan nochtin akinmej tlakajkayauaj uan amo moyolkuepaj kinmixpoloskej “kan kuakualakatok tletl iwa asufre” (Apoc. 20:10; 21:8; Sal. 5:6). ¿Tleka? Jehová kinmita ken itskuintin nochtin akinmej tlakajkayauaj porque kichiuaj tlen Jehová amo kipaktia (Apoc. 22:15).

13. (1) ¿Tlen amo kichiua Jehová? (2) ¿Tlen moneki tikchiuaskej?

13 ToTajtsin Dios amo tlakajkayaua ken se tlakatl. Porque ye “amo weletis techkajkayawas” (Núm. 23:19; Heb. 6:18). Biblia kijtoa toTajtsin Dios kikokolia “akin tlakajkayaua” (Prov. 6:16, 17). Tla tiknekij ma techseli Jehová, moneki nochipa ma tikintlakamatikan itlanauatiluan uan amo ma titlakajkayauakan (Col. 3:9).

 TEJUAN AMO TITLAKAJKAYAUAJ

14. (1) ¿Tleka tejuan amo tikchiuaj ken oksekimej religiones? (2) ¿Tlen principio moajsi itech Lucas 6:45?

14 ¿Ken tikteititiaj amo tikchiuaj ken oksekimej religiones? Tejuan amo titlakajkayauaj (xiktlajtolti Efesios 4:25). Pablo okiyekijto: “Tikixnextiah milák titekitih inawak Dios” (2 Cor. 6:4, 7). Jesús okijto: “Nochi tlan kitenkixtia se tlakatl, ye noni tlan kipixtok itech iyolo” (Luc. 6:45). Nin kijtosneki akin amo tlakajkayaua kijtoa tlen melauak. Noijki amo kinkajkayauas akinmej amo kinmixmati, akinmej iuan tekipanoa, akinmej iuan mouika uan akinmej kintlasojtla. Tikitaskej seki tlamantli ken uelis tikteititiskej amo titlakajkayauaj.

¿Tlen ouijkayotl kipia nin ichpochtli? (Xikita párrafo 15 uan 16).

15. (1) ¿Tleka amo kuali xikpia ome moixko? (2) ¿Tlen mitspaleuis amo xikchiua tlen oksekimej kichiuaj? (Xikita tlajtoli tlen kiualika tlakxitlan).

15 Tla titelpochtli noso tiichpochtli xamo tiknekij oksekimej ma mitsselikan. Pero amo keman xitlakajkayaua uan amo xikpia ome moixko. Sekimej ijkuak katej iuan inkalchanejkauan noso iuan tokniuan, kiteititiaj kichiuaj ken Cristo. Pero ijkuak katej iuan oksekimej noso ijkuak motlapouiaj itech redes sociales, kichiuaj ken akinmej amo kitekichiuiliaj Jehová. Noijki tlauijuikaltiaj, amo kualtsin motlakentiaj, kikakij tlatsotsonali tlen pitsotik, tlauanaj uan kintekitiltiaj drogas. Sekimej nemij iuan se ichpochtli noso se telpochtli noso kichiuaj tlen sapanoa pitsotik. Yejuan kinkajkayauaj intatajuan, tokniuan uan noijki toTajtsin Dios (Sal. 26:4, 5). Pero Jehová kimati kox san tikijtoaj tiktlasojtlaj noso tikchiuaj ika nochi toyolo (Mar. 7:6). Okachi mitspaleuis tlen kijtoa nin texto: “Amo xikinnexikolita akinmej tlajtlakolchiuaj uan nochipa xikmauili Jehová” (Prov. 23:17). *

16. ¿Tleka amo xitlakajkayaua ijkuak tiktemitis se amatl para okachi tiktekichiuilis Jehová?

16 Xamo tikneki timochiuas precursor, tikneki titekipanoti Betel noso tikneki okachi tiktekichiuilis Jehová. Pero amo xitlakajkayaua ijkuak tiktemitis amatl kanin mitstlajtlanis kox timokokoa, tlen ika timoyolpaktia uan kox  tikpia chipauak monemilis (Heb. 13:18). ¿Tla otikchi itlaj amo kuali uan ayamo tikinmiluia tlayekankej? Xikinmilui ma mitspaleuikan uan ijkon uelis okachi tiktekichiuilis Jehová uan amo mitskuejsojtos motlalnamikilis (Rom. 9:1; Gál. 6:1).

17. ¿Tlen tikchiuaskej ijkuak techtlajtlaniskej itlaj itech tokniuan?

17 Pero ijkuak tekiuajkej ayakmo techkauiliskej ma titetlapouikan uan techtlajtlaniskej itlaj itech tokniuan, amo moneki tikinnankiliskej. Ma tikitakan tlen okichi Jesús. Ijkuak tekiua romano itlaj okitlajtlani, ye omoyekanki ika se principio kanin kijtoa onka “kauitl para amo itlaj se tikijtos uan onka kauitl para se tlajtos” uan amo itlaj okijto (Ecl. 3:1, 7; Mat. 27:11-14). Ijkuak ijkon panos kuali ximokuayejyeko tlen titlanankilis tlamo tikinmouijtilis tokniuan (Prov. 10:19; 11:12).

¿Tlen techpaleuis ma tikmatikan keman moneki itlaj tikijtoskej uan keman moneki titlajtoskej? (Xikita párrafo 17 uan 18).

18. ¿Tlen tikchiuaskej ijkuak itlaj techtlajtlaniaj tlayekankej?

18 Axkan ma tikijtokan tikmatij se tokni otlajtlakolchi. Xamo tlayekankej itlaj techtlajtlaniskej porque yejuan kitaj ma yeto chipauak tlanechikol. ¿Tlen tikijtoskej tla otlajtlakolchi se toyolikni noso akin iuan tichantij? Biblia kijtoa akin yolmelajki kijtoa tlen moneki uan amo tlakajkayaua (Prov. 12:17; 21:28). Ma tikinmiluikan tlayekankej tlen moneki uan amo itlaj ma tikintlatlatilikan. Ijkon uelis kipaleuiskej akin otlajtlakolchi oksepa ma mouika iuan Jehová (Sant. 5:14, 15).

19. ¿Tlen timomachtiskej itech okse tlamachtil?

19 David okitlatlaujti Jehová: “Te sapanoa mitsyolpaktia tla ikaj yolkuali” (Sal. 51:6). David okimatiaya miak ipati ma tikijtokan tlen melauak. Akinmej tikchiuaj ken Cristo amo titlakajkayauaj ijkon ken kijtoa texto tlen ika peua tlamachtil. Noijki tejuan tikinmachtiaj oksekimej uan nin tlamantli amo kichiuaj akinmej amo kitekichiuiliaj toTajtsin Dios. Itech okse tlamachtil tikitaskej ken titlamachtiaj.

^ párr. 15 Xikita amatlajkuilol MONANKILIAJ 10 TLAJTLANILMEJ TLEN TELPOKAMEJ UAN ICHPOKAMEJ KINMOCHIUILIAJ itech tlajtlanilistli 6 “¿Ken uelis nikxikos tlen oksekimej nechchiuiliaj?”. Noijki amochtli Los jóvenes preguntan volumen 2 itech tlamachtil 16 “Una doble vida. ¿Por qué confesarlo?”.