Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Octubre  2017

¿Tlen techmachtia tlen okitak Zacarías?

¿Tlen techmachtia tlen okitak Zacarías?

“Oksepa nouan xiualakan [...] uan ne namouan niyetos” (ZAC. 1:3).

TLAKUIKALMEJ: UAN 20

1-3. (1) ¿Tlen okichijtokaj israelitas ijkuak Zacarías opejki kijtoa tlen panoskia? (2) ¿Tleka Jehová okinmilui israelitas oksepa ma kiueyichiuakan?

SE ROLLO okiuikaya ejekatl, se siuatl tlen okatka ijtik se chikiuitl uan ome siuamej opatlaniayaj uan okinpiayaj inmiajasuan ken cigüeña. Nin tlamantli tikajsij itech amochtli tlen okijkuilo Zacarías (Zac. 5:1, 7-9). ¿Tleka Jehová okinextili nin tlamantli teotlajtojki Zacarías? ¿Ken okatkaj ijkuakon israelitas? ¿Ken techpaleuia axkan tlen okitak Zacarías?

2 Itech 537 achto itech xiuitl 1 (a.i.x. 1) sapanoa oyolpakiaya ialtepe Jehová. Okinuikakej setenta xiuitl ompa Babilonia pero okinkixtijkej. Ijkuak israelitas yikin oajsitoj Jerusalén sapanoa oyolpakiayaj porque kiyektlaliskiaj teokali uan ompa kiueyichiuaskiaj toTajtsin Dios. Se xiuitl satepan itech 536, okipeualtijkej tepamitl. Biblia kijtoa sapanoa oyolpakiayaj “chikauak otsajtsiayaj uan uejka omokakiaya” (Esd. 3:10-13).  Pero akinmej okinkokoliayaj amo okinekiayaj ma kiyektlalikan. Israelitas omoyolkokojkej uan ayakmo okiyektlalijkej. Opejki mokaltiaj uan opejki tlatokaj. Uan opanok dieciséis xiuitl uan amo okiyektlaliayaj teokali. Jehová okinmilui israelitas ma kikauakan tlen okichijtokaj uan ma kiueyichiuakan ika yolchikaualistli uan ika pakilistli.

3 Pero itech xiuitl 520 (a.i.x. 1) Jehová okititlanki teotlajtojki Zacarías ma kinmiluiti tleka okinkixti Babilonia. Melauak miak ipati porque itoka Zacarías kijtosneki “Jehová okilnamik”. Nin uelis okinpaleui israelitas ma mokuayejyekokan itech se tlamantli miak ipati: maski yejuan okilkajkej tlen Jehová okichi inpatka, ye amo keman okinmilkauaya (xiktlajtolti Zacarías 1:3, 4). Jehová okinmilui kinpaleuiskia ma kiyektlalikan kanin oksepa kiueyichiuaskiaj. Uan noijki okinmilui kinseliskia tla kiueyichiuaskiaj ika nochi inyolo. Ma tikitakan ken okitekitilti Jehová tlamantli chikuase uan chikome tlen okitak Zacarías para kinpaleuis israelitas uan noijki tejuan techpaleuis.

JEHOVÁ KINTLAJYOUILTIA AKINMEJ TLACHTEKIJ

4. (1) ¿Tlen okitak Zacarías itech tlamantli chikome? (2) ¿Tleka non rollo otlajkuilojkej itech ome ixko? (Xikita tlaixkopinal se tlen ika peua tlamachtil).

4 Itech amochtli Zacarías tlakotonal makuili peua moijtoa tlen okitak Zacarías (xiktlajtolti Zacarías 5:1, 2). Teotlajtojki okitak se rollo opatlaniaya tlen okipiaya kanaj chiknaui metro uan patlauak kanaj naui metro uan tlajko. Nin rollo yokatka para motlajtoltis (Zac. 5:3). Yiuejkika itech se amatl san se ixko otlajkuiloayaj pero itech rollo tlen okitak Zacarías otlajkuilojkej itech ome ixko, non okijtosnekiaya sapanoa miak ipati tlen ompa oijkuilitoka. Uan nin ika tlaixkomakaskiaj.

Amo tlachtekij akinmej kichiuaj ken Cristo. (Xikinmita párrafos 5 a 7).

5, 6. ¿Ken kinmita Jehová akinmej tlachtekij?

5 (Xiktlajtolti Zacarías 5:3, 4). Nochi tlen tikchiuaj tikmaktiliskej toTajtsin Dios. Noijki akinmej tipouij itech ialtepe Jehová tikmaktiliskej nochi tlen tikchiuaj porque tikpiaj itoka. Akinmej tiktlasojtlaj Jehová tikmatij tla titlachtekiskej tiksokiotiskej itoka (Prov. 30:8, 9). Miakej kijtoaj amo tlajtlakoli titlachtekiskej tla techpoloa. Pero akin tlachteki kiteititia okachi kipatioita tlen kineki kipias uan amo kipatioita Jehová, itoka uan itlanauatiluan.

6 Zacarías 5:3, 4 kijtoa tlajyouilistli ipan ajsiki akin tlachteki uan ompa mokauas hasta ijkuak mikis. Nin kijtosneki Jehová kita uan kixkomakas tla se itekipanojka tlajtlakolchiua. Sekimej amo kinmiluiaj tekiuajkej tlen okichijkej, akin iuan tekitij, tlayekankej noso intatajuan. Pero toTajtsin Dios amo uelis itlaj kitlatiliskej porque momatis tla ikaj tlachteki (Heb. 4:13). Tejuan akinmej tiitekipanojkauan toTajtsin Dios tiyolpakij porque amo titlachtekij (Heb. 13:18).

7. ¿Tlen techmachtia tlen okitak Zacarías itech rollo tlen opatlaniaya?

7 Jehová amo kipaktia ma titlachtekikan. Tiitekipanojkauan Jehová tikpatioitaj tikixmatiskej, tikintlakamatij itlanauatiluan uan noijki tikpiaj chipauak tonemilis para amo ma mosokioti itoka. Tla ijkon tikchiuaj, amo titlajyouiskej ijkuak Jehová kinmixkomakas akinmej amo kintlakamatij itlanauatiluan.

 MA TIKCHIUAKAN TLEN OTIKIJTOJKEJ TIKCHIUASKEJ

8. ¿Tlen kijtosneki ijkuak tikijtoaj itlaj tikchiuaskej?

8 Rollo tlen okitak Zacarías kinnejmachtia akinmej kajauilmatij itoka toTajtsin Dios (Zac. 5:4). Ijkuak tikijtoaj itlaj tikchiuaskej, kijtosneki melauak ijkon tikchiuaskej noso ijkuak tikijtoaj amo itlaj tikchiuaskej uan melauak amo tikchiuaj.

9, 10. ¿Tlen okijto Sedequías kichiuaskia?

9 Amo san ajauili tla tikijtoskej itoka Jehová ijkuak tikijtoaj itlaj tikchiuaskej. Ma tikitakan tlen okipanok Sedequías se ueyi tekiua tlen otlanauati Jerusalén. Okijto itoka toTajtsin Dios ijkuak okijto kimokauiliskia ma kitlanili ueyi tekiua itech Babilonia. Pero Sedequías amo okichi ijkon ken okijto. Ik non, Jehová okijto mikiskia ompa Babilonia (Ezeq. 17:16).

10 Jehová okichiaya Sedequías ma kichiua tlen okijto ijkuak okitekitilti itoka (2 Crón. 36:13). Pero nin tekiua amo okichi ken okijto uan okilui ueyi tekiua itech Egipto ma kipaleui para amo kitlaniliskiaj babilonios. Pero non amo okipaleui (Ezeq. 17:11-15, 17, 18).

11. ¿Tlen tlamantli okachi ipati otikiluijkej Jehová tikchiuaskej?

11 Jehová noijki kikaki ijkuak tikiluiaj itlaj tikchiuaskej. Ye amo kajauilmati tlen tikiluiaj tikchiuaskej uan moneki tikchiuaskej ken otikiluijkej uan ijkon techselis (Sal. 76:11). Ijkuak otimotemakakej ixpan Jehová non tlen okachi ipati otikiluijkej tikchiuaskej. Ijkuak otimotemakakej ixpan Jehová, otikiluijkej ika nochi toyolo tiktekichiuiliskej maski san tlen panos.

12. ¿Ken uelis tikteititiskej melauak otimotemakakej ixpan Jehová?

12 ¿Ken tikchiuaskej tlen otikiluijkej Jehová?  Mojmostla tikpiaj ouijkayotl. Uan ken tikyektlaliskej ouijkayotl tikteititiskej kox kuali timouikaj iuan Jehová (Sal. 61:8). Tla itech escuela noso kanin titekitij ikaj technojnotsa, ¿tikiluiaj amo ijkon ma techchiuili uan tikteititiaj tiknekij tikintlakamatiskej itlanauatiluan Jehová? (Prov. 23:26). Uan tla itech tokalchanejkauan san tejuan tiiTlaixpantijkauan Jehová, ¿tikiluiaj ma techpaleui ma tikpiakan toyelis ken ye kineki? Maski san tlen ouijkayotl tikpiaskej, tiktlasojkamatiliaj Jehová porque techtlasojtla uan techyekana? ¿Mojmostla tiktlajtoltiaj Biblia? Ijkuak otimotemakakej ixpan Jehová otikiluijkej tikchiuaskiaj nochi tlamantli tlen yotikijtojkej. Ik non, ijkuak timotemakaj ixpan Jehová kijtosneki nochipa tiktlakamatiskej. Tla timochijchikauaj tiktekichiuiliskej ika nochi toyolo, tikteititiskej tiktlasojtlaj uan noijki tikteititiskej melauak ixpan otimotemakakej. Melauak tiktekichiuiliaj ika nochi toyolo amo san tikchiuaj porque moneki ijkon tikchiuaskej. Tikchiuaskej ijkon ken otikijtojkej, techpaleuia porque Jehová okijto akinmej yolmelajkej chantiskej itech Xochitlali (Deut. 10:12, 13).

13. ¿Tlen techmachtia tlen okitak Zacarías itech tlamantli chikuase?

13 Tlen okitak Zacarías techpaleuia akinmej tiktlasojtlaj Jehová amo ma titlachtekikan uan ma tikchiuakan tlen yotikiluijkej. Noijki otikitakej Jehová amo okinmilkauaya israelitas maski yejuan okichijkej miak tlamantli amo kuali. Ye kuali okimatiaya okinyaualoayaj akinmej okinkokoliayaj, ik non, otlajyouiayaj israelitas. Jehová nochipa kichiua tlen kijtoa, ik non, tejuan noijki ijkon ma tikchiuakan. Noijki ma tikneltokakan ye techpaleuis ma tikchiuakan tlen otikiluijkej. Techyolchikaua ijkuak techiluia ayakmo miak poliui uan tlamis tlen amo kuali. Okse tlamantli tlen okitak Zacarías techititia melauak mochiuas tlen Jehová yokijto.

JEHOVÁ KINMIXPOLOS AKINMEJ AMO YOLKUALMEJ

14, 15. (1) ¿Tlen okitak Zacarías itech tlamantli chikome? (Xikita tlaixkopinal ome tlen ika peua tlamachtil). (2) ¿Tlen kijtosneki siuatl tlen okatka ijtik se chikiuitl?

14 Ijkuak Zacarías otlanki okitak rollo, se ángel okilui ma ajkotlachia. ¿Tlen okitak Zacarías itech tlamantli chikome? Okitak se chikiuitl tlen ika okitamachiuayaj efá (xiktlajtolti Zacarías 5:5-8). Nin chikiuitl otentsaktoka ika plomo. Ijkuak Zacarías okitlapo, okitak ompa oeuatoka se siuatl. Nin ángel okiyekilui okijtosnekiaya tlen amo kuali. Ma timokuayejyekokan ken amo kuali omomachili Zacarías ijkuak okitak nin siuatl okinekiaya kisas. Pero ángel san niman okikalaki uan okitsaki chikiuitl ika plomo. ¿Tlen kijtosneki?

15 Nin kiteititia Jehová amo kineki ikaj ma kichiua tlen amo kuali itech ialtepe. Ijkuak kita kichijtokej tlen amo kuali, san niman kipojpoloa (1 Cor. 5:13). Ijkon okiteititi ángel ijkuak san niman okitsaki chikiuitl.

Jehová okijto chipauak kiueyichiuaskiaj. (Xikinmita párrafos 16 a 18).

16. (1) ¿Tlen okipanok chikiuitl? (Xikita tlaixkopinal eyi tlen ika peua tlamachtil). (2) ¿Kanin okiuikakej chikiuitl?

16 Noijki Zacarías okinmitak ome siuamej opatlaniayaj uan okinpiayaj inmiajasuan ken cigüeña (xiktlajtolti Zacarías 5:9-11). Ninmej siuamej amo okatkaj ken siuatl tlen okatka ijtik se chikiuitl. Zacarías okinmitak ninmej siuamej okiuikakej chikiuitl  kanin okatka siuatl tlen okijtosnekiaya tlen amo kuali uan okiuikakej porque inmiajasuan okatkaj chijchikauakej. ¿Kanin okiuikakej chikiuitl? Okiuikakej Sinar noso Babilonia. ¿Tleka ompa okiuikakej?

17, 18. (1) ¿Tleka omonekiaya kiuikaskej Sinar noso Babilonia chikiuitl kanin okatka siuatl? (2) ¿Tlen moneki tikchiuaskej?

17 Zacarías uan israelitas okixmatiayaj Sinar noso Babilonia kanin okiuikayaj tlen okineskayotiaya tlen amo kuali. Porque yejuan ompa ochantikej uan okitakej ken oauilnemiayaj uan omonekiaya momaluiskej para amo ijkon kichiuaskiaj. Yejuan kuali okimatiayaj ompa okichiuayaj tlen amo kuali. Uan tlen okitak Zacarías uelis sapanoa okinyolchika israelitas porque Jehová okijto chipauak kiueyichiuaskiaj.

18 Tlen okitak Zacarías noijki okinmilnamikti judíos amo kitekauiliskiaj sokio ma kiueyichiuakan toTajtsin Dios. Jehová amo keman kitekauilis ma yeto itech ialtepe tlen amo kuali. Ye okichi ma tipouikan itech ialtepe chipauak kanin ye kiteititia techtlasojtla uan techmaluia. Pero tejuan moneki titlapaleuiskej ma yeto chipauak. ¿Tiknekij titlapaleuiskej? Itech ialtepe Jehová amo uelis tikchijtoskej tlen amo kuali.

SE ALTEPETL CHIPAUAK KIUEYICHIUA JEHOVÁ

19. ¿Tlen techmachtia tlen okitak Zacarías?

19 Tlamantli Chikuase uan chikome tlen okitak Zacarías kinnejmachtia akinmej tlachtekij. Techilnamiktia Jehová amo kitekauilia ma kichijtokan tlen amo kuali. Uan noijki tejuan moneki tikkokoliskej tlen amo kuali. Tlen okitak Zacarías techmachtia amo titlajyouiskej tla timochijchikauaj tikyolpaktiskej Jehová. Uan ye techmaluis uan techteochiuas. Jehová techpaleuis maski itech nin Tlaltikpak sapanoa oui tikchiuaskej tlen kuali. Pero ¿ken tikmatij tlaneltokalistli tlen melauak nochipa yetos? ¿Ken tikmatij Jehová kimaluis ialtepe maski ayakmo miak poliui peuas ueyi tlajyouilistli? Chikome timomachtiskej.