Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Octubre  2017

Tikpiaj “tlanetéwili” noso ouijkayotl porque tiktekichiuiliaj Jehová

Tikpiaj “tlanetéwili” noso ouijkayotl porque tiktekichiuiliaj Jehová

“Amo xikmolikah Ne onikwalík yolsewílistli. Amó, yej Ne onikwalík tlanetéwili” (MAT. 10:34).

TLAKUIKALMEJ: 43 UAN 24

1. ¿Tlen techmaka Jehová axkan?

TINOCHTIN tiknekij tiyetoskej ika yolseuilistli uan amo itlaj ma techtekipacho. Melauak tiktlasojkamatiliaj Jehová porque techmaka “iyolsewilis”. Nin techpaleuia amo okachi ma timotekipachokan (Filip. 4:6, 7). Ken yotimotemakakej ixpan Jehová, axkan kuali iuan timouikaj (Rom. 5:1).

2. ¿Tleka amo sepa tikatej ika yolseuilistli? (Xikita tlaixkopinal tlen ika peua tlamachtil).

2 Pero ayamo yiajsi tonal ijkuak sepa tiyetoskej ika yolseuilistli. Tikatej itech saiktlami tonalmej, ik non, tikpiaj ouijkayotl iuan oksekimej (2 Tim. 3:1-4). Noijki akinmej tikchiuaj ken Cristo moneki tikixnamikiskej Satanás uan “nochi tlamantli tlen kixnamiki itlamatilis toTajtsin Dios” (2 Cor. 10:4, 5TNM). Pero ualeua amo tikpiaskej yolseuilistli iuan tokalchanejkauan porque  yejuan amo itlaixpantijkauan Jehová. Sekimej techpinauiaj porque okse tlamantli tikneltokaj uan kijtoaj tikinxexeloaj kalchanejkej. Tokalchanejkauan hasta uelis techiluiskej ayakmo techtlapouiskej. ¿Tlen moneki tikmatoskej tla se tokalchanejka amo kineki ma tiktekichiuilikan Jehová? ¿Tlen uelis tikchiuaskej tla ijkon techpanotok?

¿TLEN MONEKI TIKMATOSKEJ TLA SE TOKALCHANEJKA AMO KINEKI MA TIKTEKICHIUILIKAN JEHOVÁ?

3. ¿Tlen panoskia ika tlen Jesús otlamachti?

3 Jesús okijto tlen otlamachtiaya kinxexeloskia oksekimej uan imachtijkauan omonekiaya yetoskej yolchikauakej porque tlajyouiskiaj. Uan nin kichiuaskia ayakmo ma kipiakan yolseuilistli kalchanejkej. Jesús okijto: “Amo xikmolikah Ne onikwalík yolsewílistli. Amó, yej Ne onikwalík tlanetéwili. Ne oniwala para n tepiltsi kixnamikis ita, n teichpoch kixnamikis ina, iwa n montli kixnamikis imona. Nomokokolikniwah yetoskeh non chanchiwah nomowah” (Mat. 10:34-36).

4. ¿Tleka kipiaskiaj ouijkayotl akinmej okinekiayaj kichiuaskej ken Jesús?

4 ¿Tleka Jesús okijto: “Amo xikmolikah Ne onikwalík yolsewílistli”? Porque ye okinekiaya ma kimatikan kipiaskiaj ouijkayotl tla kichiuaskiaj ken ye. Jesús okinekiaya ‘kitematiltis tlan milák’ uan amo okinekiaya kinxexelos oksekimej (Juan 18:37). Pero non uelis panoskia. Ik non, Jesús okinekiaya ma kimatikan oui yetoskia porque inyolikniuan noso inkalchanejkauan amo kinpaktiskia tlen momachtiskiaj.

5. ¿Tlen kixikoaj imachtijkauan Jesús?

5 Jesús okijto imachtijkauan omonekiaya kinxikoskej inkalchanejkauan ijkuak kinmixnamikiskiaj porque amo kinekiskiaj ma kichiuakan ken ye (Mat. 10:38). Maski ijkon kinpanotiuits, kixikoaj ijkuak kinpinauiaj uan ijkuak inkalchanejkauan kinkokoliaj. Pero okachi kipiaj tlateochiualistli (xiktlajtolti Marcos 10:29, 30).

6. ¿Tlen moneki ma tikilnamiktokan tla tokalchanejkauan amo kinekij ma tiktekichiuilikan Jehová?

6 Ma tikintlasojtlakan tokalchanejkauan maski amo kinekij ma tiktekichiuilikan Jehová. Pero ma tikilnamiktokan okachi moneki tiktlasojtlaskej Jehová uan Jesús (Mat. 10:37). Noijki ken tikintlasojtlaj tokalchanejkauan, Satanás kinekis yejuan okachi ma tikintlasojtlakan uan amo ma tiyetokan tiyolmelajkej ixpan Jehová. Axkan ma kitakan tlen uelis techpanos uan ken uelis tikixnamikiskej.

IJKUAK TONAMIK AMO ITLAIXPANTIJKA JEHOVÁ

7. ¿Tlen moneki tikchiuaskej tla tonamik amo momachtia Biblia?

7 Biblia kijtoa akinmej monamiktiaj kipiaskej “miak tlaijyowílistli” (1 Cor. 7:28). Uelis okachi tikpiaskej ouijkayotl tla tonamik amo kitekichiuilia Jehová. Pero moneki timokuayejyekoskej ken Jehová. Tla tonamik amo kineki kitekichiuilis Jehová, amo kijtosneki uelis timoxeloskej noso timokajkauaskej ixpan tekiuajkej (1 Cor. 7:12-16). Siuatl moneki kitlakaitas inamik porque ye kiyekana maski amo momachtia Biblia. Noijki tlakatl moneki kitlasojtlas isiua uan kimaluis maski amo kitekichiuilia Jehová (Efes. 5:22, 23, 28, 29).

8. ¿Tlen uelis tikchiuaskej tla tonamik techiluia amo okachi ma titetlapouikan?

8 ¿Tlen uelis tikchiuaskej tla tonamik amo okachi techkauilia ma tiktekichiuilikan Jehová? Se neskayotl, Tla inamik se tokni kiluia amo okachi ma tetlapoui, ma motlajtlani: “¿Nechiluijtok nonamik ayakmo ma  niktekichiuili Jehová? Tla amo ijkon nechiluia, ¿uelis nikchiuas tlen nechtlajtlanilia?”. Uelis amo kipias ouijkayotl tla kuali mokuayejyekos (Filip. 4:5).

9. ¿Ken uelis tikinmachtiskej tokoneuan ma kitlakaitakan intajtsin maski amo momachtia Biblia?

9 Oui tikinmachtiskej tokoneuan tla tonamik amo kitekichiuilia Jehová. Se neskayotl, moneki tikinmachtiskej nin tlanauatil tlen kijtoa: “Xiktlakita mopapá iwa xiktlakita momamá” (Efes. 6:1-3). ¿Pero tla tonamik amo kintlakamati itlanauatiluan toTajtsin Dios? Moneki ma tiktlakaitakan. Ma tikitakan tlen kuali kichiua uan ma tikiluikan tikpatioitaj non tlamantli. Amo ma tikpinatikan inmixpan tokoneuan. Okachi kuali, ma tikinyekiluikan tokoneuan sejse moneki kipejpenas kox kitekichiuilis Jehová. Noijki tla tokoneuan kipiaj kuali inyelis kipaleuis tonamik ma kineki kixmatis Jehová.

Xikintlapoui mokoneuan itech Biblia. (Xikita párrafo 10).

10. ¿Ken uelis tikinmachtiskej tokoneuan ma kitlasojtlakan Jehová maski tonamik amo momachtia Biblia?

10 Tetajmej tlen amo momachtiaj Biblia ualeua kinekij inkoneuan ma iluichiuakan uan ma kineltokakan tlen kineltokaj itech tlaneltokalistli tlen amo melauak. Sekimej tetajmej amo kinkauiliaj innamik ma kinmachtikan inkoneuan. Pero ma timochijchikauakan tikinmachtiskej Biblia (Hech. 16:1; 2 Tim. 3:14, 15). Ualeua tetajmej amo kinekij innamik ma kinmachti konemej tsikitsitsintin nion kinkauiliaj ma kinuikakan ijkuak monechikoaj. Maski tiktlakaitaj tlen kijtoa tonamik, uelis tikintlapouiskej tokoneuan itech Biblia. Uan ijkon tikinmachtiskej itech Jehová uan itech itlanauatiluan (Hech. 4:19, 20). Maski satepan  yejuan konemej kipejpenaskej kox kitekichiuiliskej Jehová (Deut. 30:19, 20). *

IJKUAK TOKALCHANEJKAUAN AMO KINEKIJ MA TIYETOKAN TIITLAIXPANTIJKAUAN JEHOVÁ

11. ¿Tlen ouijkayotl uelis tikpiaskej iuan tokalchanejkauan?

11 Uelis amo otikinmiluijkej tokalchanejkauan ijkuak opejki timomachtiaj iuan iTlaixpantijkauan Jehová. Pero ijkuak opejki okachi titlaneltokaj itech Jehová, otikajsikamatkej omonekiaya tiyetoskej tiyolchikauakej uan tikinmiluiskiaj tlen tikneltokaj (Mar. 8:38). Tla tikpiaj ouijkayotl iuan tokalchanejkauan porque tiyolmelajkej ixpan Jehová, ¿tlen uelis tikchiuaskej para ma yeto yolseuilistli uan amo tikkauaskej Jehová? Ma tikitakan seki tlamantli.

12. ¿Tleka sekimej tokalchanejkauan amo kinekij ma tiktekichiuilikan Jehová uan tlen uelis tikchiuaskej?

12 Ma tikinmajsikamatikan tlen mokuayejyekoaj tokalchanejkauan tlen amo kitekichiuiliaj Jehová. Melauak tiyolpakij porque timomachtiaj Biblia. Pero sekimej tokalchanejkauan uelis kijtoskej yotechkajkayajkej noso yitipouij itech se tlaneltokalistli tlen amo tikixmatij. Mokuayejyekoaj ayakmo tikintlasojtlaj porque ayakmo inmiuan tiiluichiuaj. Noso momojtiaj ma techtlajyouilti toTajtsin Dios ijkuak timikiskej. Ma tikajsikamatikan tlen mokuayejyekoaj, kuali ma tikinkakikan uan ijkon tikmatiskej tlen kintekipachoa (Prov. 20:5). Ma tikchiuakan ken Pablo, ye omochijchikauaya kinmajsikamatis oksekimej uan ijkon okintlapoui itech iTlajtol toTajtsin Dios. Tla ijkon tikchiuaskej, uelis techpaleuis ma tikintlapouikan tokalchanejkauan tlen tikneltokaj (1 Cor. 9:19-23).

13. ¿Ken moneki tikintlapouiskej tokalchanejkauan?

13 Ma tikinyekinmiluikan tlen tikneltokaj. Biblia techiluia: “Nomotlajtol nochipa mateyolpakti” (Col. 4:6). Ma tikiluikan Jehová ma techmaka iespíritu santo para ma tikintlapouikan tokalchanejkauan ika tlasojtlalistli. Amo ma timokualanikan itech tlen yejuan kineltokaj. Tla itlaj techiluiskej, uelis tikchiuaskej ken tlatitlanilmej. Pablo okijkuilo: “Ijkuak n tlakah fiero techtenewah, tejwah tiktlatlaujtiah Dios makintiochiwa, ijkuak techtotojtokah tejwah tikxikoah. Tla techpojpoah, tejwah tikinyeknotsah” noso kuali titlanankiliaj (1 Cor. 4:12, 13).

14. ¿Ken techpaleuia kuali tikpiaskej toyelis?

14 Ma tikpiakan kuali toyelis. Maski tlasojtlalistli techpaleuia ma tikintlapouikan tokalchanejkauan, okachi techpaleuis tla tikpiaj kuali toyelis (xiktlajtolti 1 Pedro 3:1, 2, 16). Ma kitakan tikpiaj kuali toyelis, tiyolpakij iuan tonamik, tikinmaluiaj tokoneuan, tikpiaj chipauak tonemilis uan tikpiaj chipauak totlalnamikilis. Maski tokalchanejkauan amo keman mochiuaskej iTlaixpantijkauan Jehová, uelis tiyolpakiskej porque tiyolmelajkej uan tikyolpaktiaj Jehová.

15. ¿Tlen uelis tikchiuaskej para amo timokualaniskej iuan tokalchanejkauan?

15 Achto ma tikitakan tlen ouijkayotl uelis tikpiaskej. Ma timokuayejyekokan tlen uelis kinkualanis tokalchanejkauan uan sepa ma tikitakan ken uelis tikinnankiliskej (Prov. 12:16, 23). Se tokni tlen chanti Australia, okijto: “Nomonta amo okipaktiaya tlen tlamachtia Biblia. Achto tiknotsaskiaj ika teléfono, nonamik uan ne otikiluiayaj Jehová ma techpaleui uan amo ma tikualanikan ijkuak tiknankiliskiaj. Otimomachtiayaj itech tlen uelis timotlapouiskiaj uan ijkon amo  timokualaniskiaj. Noijki amo otiuejkauayaj para amo timokualaniskej”.

16. ¿Tlen uelis tikchiuaskej tla tikmachiliaj totlajtlakol touan kualanij tokalchanejkauan?

16 Pero amo kijtosneki amo keman touan kualaniskej tokalchanejkauan. Ualeua tikmachiliskej totlajtlakol ijkuak touan kualanij porque tikintlasojtla iuan timochijchikauaj tikchiuaskej tlen kinyolpaktia. Tla ijkon timomachiliaj, ma tikilnamiktokan okachi moneki tiyetoskej tiyolmelajkej ixpan Jehová uan amo iuan tokalchanejkauan. Tla ijkon tikchiuaskej, tokalchanejkauan uelis kajsikamatiskej sapanoa miak ipati tikchiuaskej tlen kijtoa Biblia. Noijki ma tikmatokan amo uelis ikaj tikchiualtiskej ma kitekichiuili Jehová. Pero uelis tikinmititiskej yotechpaleui tla tiktlakamatij Jehová. Jehová kintlasojtla uan noijki kinkauilia ma kipejpenakan kox kitekichiuiliskej noso amo (Is. 48:17, 18).

IJKUAK SE TOKALCHANEJKA KIKAUA JEHOVÁ

17, 18. ¿Tlen tikchiuaskej tla se tokalchanejka kikaua Jehová?

17 Sapanoa titlajyouiaj ijkuak se tokalchanejka kikixtiaj itech tlanechikol noso kijtoa ayakmo kineki yetos iTlaixpantijka Jehová. Yetoskia ken techtsoponiliaj se espada. ¿Tlen uelis tikchiuaskej ijkuak ijkon techpanos?

18 Nochipa ma tiktekichiuilikan Jehová. Para tikpiaskej chikauak totlaneltokilis moneki nochipa ma timomachtikan Biblia, ma timomachtikan para tiaskej nechikolmej, ma titetlapouikan uan ma tikiluikan Jehová ma techpaleui ma titlaxikokan (Jud. 20, 21NHY). Pero ¿tlen uelis tikchiuaskej tla san timoyolkokojtokej? Amo ma timosotlauakan. Ma tiktekichiuilijtokan Jehová uan non techpaleuis amo okachi ma timoyolkokokan. Ma tikitakan tlen okipanok akin okijkuilo Salmo 73. Opejki mokuayejyekoa amo kuali okisaya tlen okichiuaya, ik non, sapanoa omotekipacho. Pero opejki okachi kitekichiuilia Jehová uan non okipaleui ayakmo ijkon ma mokuayejyeko (Sal. 73:16, 17). Noijki techpaleuis tla ijkon tikchiuaskej.

19. ¿Ken tikteititiaj tiktlakaitaj ken techyektlalia Jehová?

19 Ma tiktlakaitakan ken techyektlalia Jehová. Jehová kimati ijkuak techyektlalia, tinochtin techpaleuia uan noijki kipaleuia akin otlajtlakolchi (xiktlajtolti Hebreos 12:11). Se neskayotl, Jehová technauatia amo ma timouikakan iuan akinmej tlajtlakolchiuaj uan amo moyolkuepaj (1 Cor. 5:11-13). Maski sapanoa techyolkokos, amo ma timouikakan iuan akin okikixtijkej itech tlanechikol, amo ma timotlapouikan iuan ika teléfono, amo ma tikintitlanilikan mensajes, cartas, correos electrónicos nion itech okseki tlamantli tlen motekitiltia itech Internet.

20. ¿Tlen moneki tikchiaskej?

20 Ma tikneltokakan tokalchanejka se tonal mokuepas iuan Jehová. Tla titetlasojtlaj, tikinchiaskej ma mokuepakan oksepa akinmej okikajkej Jehová (1 Cor. 13:7). Tla tikitaj yikipatlatok iyelis tokalchanejka, uelis tikiluiskej Jehová ma kipaleui ma kichiua tlen kiluia itech iTlajtol: “Nouan ximokuepa” (Is. 44:22).

21. ¿Tlen uelis tikchiuaskej tla tikpiaj ouijkayotl iuan tokalchanejkauan?

21 Jesús okijto ye okachi ma tiktlasojtlakan uan amo oksekimej. Pero kuali okimatiaya imachtijkauan kixikoskiaj ouijkayotl tlen kipiaskiaj inmiuan inkalchanejkauan. Tla tikpiaj ouijkayotl iuan tokalchanejkauan, ma tikiluikan Jehová ma techpaleui para uelis tikixnamikiskej ouijkayotl (Is. 41:10, 13). Ma tikilnamiktokan Jehová uan Jesús yolpakij ijkuak kitaj tiyolmelajkej uan yejuan techteochiuaskej.

^ párr. 10 Tla tikneki tikmatis okachi ken tikinmachtis mokoneuan maski monamik amo momachtia Biblia, xikita tlamachtil tlen itoka “Preguntas de los lectores” itech La Atalaya 15 de agosto 2002.