Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Octubre  2017

Ma tikteititikan melauak titetlasojtlaj

Ma tikteititikan melauak titetlasojtlaj

“Amo matitetlasojtlakah san ika tokamak noso tonenepil, yej matimosepantlasojtlakah ika tlan tikchiwah” (1 JUAN 3:18).

TLAKUIKALMEJ: UAN 50

1. ¿Ken uelis tikteititiskej titetlasojtlaj uan tleka? (Xikita tlaixkopinal tlen ika peua tlamachtil).

JEHOVÁ ye akin okachi tetlasojtla (1 Juan 4:7). Uan nin tlasojtlalistli moyekana ika principios uan Biblia kitekitiltia tlajtoli agápe ika griego para tlajtos itech nin tlasojtlalistli. Nin tlasojtlalistli amo san kijtosneki tlen tikmachiliaj, kijtosneki tikteititiaj ika tlen tikchiuaj para tikinpaleuiskej oksekimej. Tla titetlasojtlaj tikinchiuiliskej tlen kuali oksekimej. Uan kichiua ma tiyolpakikan uan kuali ma tiyetokan.

2, 3. ¿Ken yokiteititi Jehová sapanoa tetlasojtla?

2 Jehová okiteititi techtlasojtla achto kichijchiuaskia Adán uan Eva. Se neskayotl, Tlaltikpak amo san okichijchi para nochipa itech ma tichantikan uan ma kipia tlen moneki. Okachi kuali, okichijchi para ma tiyolpakikan. Okichijchi nochi para tejuan uan amo para ye. Noijki itlaj okichi para uelis tiyetoskej itech Xochitlali.

3 Satepan ijkuak Adán uan Eva okixnamikej Jehová, okiteititi techtlasojtla. Jehová okimatiaya sekimej ixuiuan Adán uan  Eva kitlasojtlaskiaj, ik non, okijto kinmakixtiskia (Gén. 3:15; 1 Juan 4:10). Ijkuak Jehová okijto ikaj techmakixtiskia, yetoskia ken yokitemakak iKone. Opanok cuatro mil xiuitl uan Jehová okitemakak iKone para nochtin kinmakixtis maski sapanoa omoyolkoko (Juan 3:16). ¡Melauak tiktlasojkamatiliaj ijkon okichi!

4. ¿Ken tikmatij uelis titetlasojtlaskej?

4 Tejuan titetlasojtlaj porque Jehová otechchijchi ken ye. Uelis titetlasojtlaskej maski ualeua oui porque titlajtlakolejkej. Se neskayotl, Abel okiteititi okitlasojtlaya Jehová porque okimakak tlen okachi kuali okipiaya (Gén. 4:3, 4). Noé okiteititi otetlasojtlaya ijkuak miak xiuitl otetlapoui maski amo okikakej (2 Ped. 2:5). Uan Abrahán okiteititi okachi okitlasojtlaya Jehová ijkuak kitemakaskia ikone ken se tlamanali (Sant. 2:21). Ijkon ken ninmej tlakamej, tiknekij tikteititiskej titetlasojtlaj maski sapanoa oui.

IJKUAK MELAUAK TITETLASOJTLAJ UAN IJKUAK AMO

5. ¿Ken uelis tikteititiskej melauak titetlasojtlaj?

5 Biblia kijtoa “amo matitetlasojtlakah san ika tokamak noso tonenepil, yej matimosepantlasojtlakah ika tlan tikchiwah” (1 Juan 3:18). Nin amo kijtosneki amo tikijtoskej titetlasojtlaj (1 Tes. 4:18). Nin amo kijtosneki san tikinmiluiskej oksekimej tikintlasojtlaj, moneki tikteititiskej ika tlen tikchiuaj. Ualeua moneki tikteititiskej ken titetlasojtlaj. Se neskayotl, tla se tokni kipoloa tlen kikuas noso kipoloa itlaken, moneki tikpaleuiskej uan amo san tikiluiskej tiktlasojtlaj (Sant. 2:15, 16). Noijki tla tiktlasojtlaj Jehová uan oksekimej, amo san tikiluiskej ma kintitlani tokniuan ma tetlapouitij, okachi kuali, ma timochijchikauakan ma titetlapouikan (Mat. 9:38).

6. ¿Tlen kijtosneki melauak titetlasojtlaskej?

6 Tlatitlanil Juan okijto moneki ma tikteititikan timotlasojtlaj “ika tlan tikchiwah”. Nin kijtosneki melauak ma tikteititikan timotlasojtlaj uan amo ma tikpiakan ome toixko (Rom. 12:9; 2 Cor. 6:6). Sekimej san kijtoaj tetlasojtlaj maski amo melauak. Uan amo itlaj ipati tla amo melauak titetlasojtlaj.

7. ¿Akinmej san okijtojkej otetlasojtlayaj uan amo melauak?

7 Ma timotlapouikan itech sekimej tlen san okijtojkej otetlasojtlayaj uan amo melauak. Ijkuak Satanás omotlapoui iuan Eva omotaya melauak itech omotekipachoaya. Pero san okiteititijtoka okipiaya ome ixko uan itech omotekipachoaya (Gén. 3:4, 5). Noijki Ahitofel okiteititi melauak okinekiaya mouikas iuan David pero okikajkaya porque san okinekiaya itlaj kipias (2 Sam. 15:31). Axkan akinmej yomoxelojkej itech Jehová uan oksekimej kitemoaj ken kinxeloskej tokniuan uan ijkon kichiuaj ijkuak kualtsin kintlapouiaj uan kinmiluiaj melauak kuali tlen kichiuaj para ma kinneltokilikan kintlasojtlaj, pero amo melauak (Rom. 16:17, 18).

8. ¿Tlen moneki timotlajtlaniskej?

8 Tlajtlakoli tla san tikijtoaj titetlasojtlaj uan amo melauak. Tejuan uelis timokajkayauaskej pero Jehová amo uelis tikkajkayauaskej. Jesús okijto sapanoa kintlajyouiltiskej akinmej amo melauak tetlasojtlaj (Mat. 24:51). Tejuan akinmej tiktekichiuiliaj Jehová amo tiknekij tikpiaskej ome toixko. Ik non, moneki timotlajtlaniskej: “¿Melauak nitetlasojtla noso san nikneki nitlakajkayauas?”.  Axkan tikitaskej chiknaui tlamantli para tikteititiskej melauak titetlasojtlaj.

¿KEN UELIS TIKMATISKEJ KOX MELAUAK TITETLASOJTLAJ?

9. ¿Tlen tikchiuaskej tla melauak tikintlasojtlaj tokniuan?

9 Ma tiktechiuilikan tlen kuali maski oksekimej amo kitaj. Moneki “san ichtaka” tikinchiuiliskej tokniuan tlen kuali, nin kijtosneki amo ma kimatikan oksekimej (xiktlajtolti Mateo 6:1-4). Ananías uan Safira amo ijkon okichijkej. Yejuan okinekiayaj ma kimatikan oksekimej tlen okitetliokolijkej. Noijki otlakajkayajkej ijkuak okijtojkej kech tomin okitemakakej. Ik non, toTajtsin Dios okintlajyouilti porque okipiayaj ome inmixko (Hech. 5:1-10). Tla melauak tikintlasojtlaj tokniuan, itech toyolo kisas tikinpaleuiskej uan amo tikinmiluiskej oksekimej tlen otikchijkej. Tokniuan tlen kinpaleuiaj akinmej pouij itech Cuerpo Gobernante techmakaj se kuali neskayotl. Yejuan amo kijtojtinemij tlen tekitl kichiuaj.

10. ¿Ken uelis tikintlakaitaskej oksekimej?

10 Ma tikintlakaitakan oksekimej (xiktlajtolti Romanos 12:10). Jesús otechmakak se kuali neskayotl ijkuak okinmikxipajpaki itlatitlaniluan (Juan 13:3-5, 12-15). Yejuan okajsikamatkej tleka okinmikxipajpaki Jesús hasta ijkuak okiselijkej espíritu santo (Juan 13:7). Tejuan noijki moneki ma timochijchikauakan ma tiyetokan tiyolyamankej ken Jesús uan ma tikintlakaitakan oksekimej. ¿Ken uelis tikchiuaskej? Amo ma timoueyinekikan porque okachi otimomachtijkej, tikpiaj miak tlamantli noso porque okachi tiktekichiuiliaj Jehová (Rom. 12:3). Amo ma tichauatikan porque oksekimej kinmiluiaj kuali tlen kichiuaj, okachi kuali, ma tiyolpakikan maski amo tejuan techiluiaj.

11. ¿Tleka moneki ma tikinmiluikan tokniuan ika nochi toyolo tlen kuali kichiuaj?

11 Ma tikinmiluikan tokniuan ika nochi toyolo tlen kuali kichiuaj. Nochipa ma tikinmiluikan tokniuan kuali tlen kichiuaj uan non kinyolchikauas (Efes. 4:29). Pero ika nochi toyolo ma tikinmiluikan kuali tlen kichiuaj uan amo san ma tikinmiluikan para kuali ma techitakan noso kuali ma technotsakan. Noijki amo ma tikinmiluikan tlen amo melauak tikmachiliaj uan noijki amo tikijtoskej amo tikinnojnotsaskej para kuali ma techitakan (Prov. 29:5). Tikteititiskej tikpiaj ome toixko tla ikaj tikiluiskej kuali tlen kichiua uan satepan tikteneuaskej ijkuak tikatej iuan oksekimej. Tlatitlanil Pablo okiteititi melauak otetlasojtlaya. Se tonal, ika nochi iyolo okinmilui tokniuan tlen ochantiayaj Corinto kuali tlen okichiuayaj (1 Cor. 11:2). Pero noijki okinnojnotski uan okinyekilui ika tlasojtlalistli tlen amo kuali okichiuayaj (1 Cor. 11:20-22).

Tikteititiaj titetlasojtlaj ijkuak tikinpaleuiaj oksekimej. (Xikita párrafo 12).

12. ¿Ken uelis tikteititiskej kuali tikinseliaj tokniuan?

12 Kuali ma tikinselikan tokniuan. Jehová technauatia ma tikinmakakan tokniuan tlen tikpiaj (xiktlajtolti 1 Juan 3:17). Pero moneki tikchiuaskej ken moneki. Uan ma timotlajtlanikan: “¿San noyolikniuan noso akinmej nikinmita ueyititokej itech tlanechikol kuali nikinselia? ¿San nikinyoleua akinmej uelis nechpaleuiskej satepan? ¿Nechpaktia nikinmakas tlen nikpia tokniuan tlen amo nikinmixmati noso tokniuan tlen amo uelis nechpaleuiskej satepan?” (Luc. 14:12-14). Ma tikijtokan se tokni moneki ma tikpaleuikan porque amo kuali okipejpenki tlen kichiuas noso ijkuak ikaj tikyoleuaj uan  amo motlasojkamati. Tla ijkon techpanoa, ma tikchiuakan tlen kijtoa Biblia: “Xitekalotikah iwa amo ximotlatlajtolwikah” kijtosneki ma tikchiuakan ika nochi toyolo (1 Ped. 4:9). Tiyolpakiskej tla timoyekanaskej ika nin principio porque tikchiuaskej ika nochi toyolo (Hech. 20:35).

13. (1) ¿Keman moneki tikinmajsikamatiskej tokniuan? (2) ¿Ken uelis tikinpaleuiskej akinmej amo kipiaj chikauak intlaneltokilis?

13 Ma tikinpaleuikan akinmej amo kipiaj chikauak intlaneltokilis. Tikteititiskej titetlasojtlaj tla tiktlakamatij nin tlanauatil: “Xikimpalewikah akimeh amo chikawak intlaneltokalis, iwa xikinmajsikamatiltikah nochteh n oksikimeh” (1 Tes. 5:14). Sekimej tokniuan amo kipiaj chikauak intlaneltokilis pero satepan mochikajtiuij. Oksekimej moneki yolik tikinpaleuiskej. ¿Ken tikchiuaskej? Ma tikinyolchikauakan ika Biblia, ma tikinmiluikan touan ma tetlapouitij noso ijkuak techtlapouiaj kuali ma tikinkakikan. Noijki amo ma tikinpejpenakan akinmej okachi kipiaj chikauak intlaneltokilis uan akinmej amo, okachi kuali, ma tikilnamiktokan tlatlamantli toyelis. Hasta Pablo okijto tleka amo okatka chikauak (2 Cor. 12:9, 10). Tinochtin moneki ma techpaleuikan uan ma techyolchikauakan.

14. ¿Tlen moneki tikchiuaskej para tikpiaskej yolseuilistli iuan tokniuan?

14 Ma tikpiakan yolseuilistli iuan tokniuan. Moneki ma tikpiakan yolseuilistli iuan tokniuan uan noijki ijkuak techchiuiliaj itlaj tlen amo kuali (xiktlajtolti Romanos 12:17, 18). Tla ikaj tikyolkokoaj, ma tikiluikan ika nochi toyolo ma techtlapojpolui. Se neskayotl, tla ikaj otikkualanijkej amo ma tikiluikan: “Techtlapojpolui nesi otikualanki”. Okachi kuali, ma tikselikan totlajtlakol uan ma tikijtokan: “Techtlapojpolui onimitskualani”. Noijki miak ipati ma kipiakan yolseuilistli akinmej yomonamiktijkej. Amo kuali tla teixpan kiteititiaj motlasojtlaj uan ijkuak katej inselti mouijuikaltiaj noso mouitekij.

15. ¿Ken uelis tikteititiskej titetlapojpoluiaj ika nochi toyolo?

15 Ma titetlapojpoluikan. Tla ikaj techyolkokoa maski amo okinekiaya techyolkokos, ma tiktlapojpoluikan uan amo ma tikilnamiktokan tlen otechchiuili. Akinmej kichiuaj ken Cristo kitlakamatij nin “ximosepanxikokah ika tlasojtlálistli. Ximochijchikawakah para n Espíritu maseitito nomowah, ika n yolsewílistli, non seititok nomowah” (Efes. 4:2, 3). Para titetlapojpoluiskej ika nochi toyolo, amo ma timokuayejyekokan tlen amo moneki uan amo san ma tikilnamiktokan tlen otechchiuilijkej (1 Cor. 13:4, 5). Tla amo titetlapojpoluiskej ayakmo kuali timouikaskej iuan Jehová uan tokni tlen otechyolkoko (Mat. 6:14, 15). Noijki tikteititiskej  titetlapojpoluiaj tla timotlatlaujtiaj inpatka akinmej techchiuiliaj tlen amo kuali (Luc. 6:27, 28).

16. ¿Tlen uelis tikteititiskej ijkuak techmakaj okachi tekitl para tiktekichiuiliskej Jehová?

16 Ma tikchiuakan seki tlamantli tlen kinpaleuis oksekimej. Ijkuak ikaj kimakaj okachi tekitl para okachi ma kitekichiuili Jehová, uelis kiteititis melauak tetlasojtla. ¿Ken kichiuas? “Mamotekipacho tlan ye kineki kichiwas, yej noiwa mamotekipacho kenomi kinyolchikawas oksikimeh” (1 Cor. 10:24). Tokniuan tlen techiluiaj kanin timotlaliskej, achto kalakij kanin mochiuas ueyi nechikol uan uelis kinekiskej kixeloskej kanin motlaliskej yejuan uan inkalchanejkauan. Pero miakej amo kipejpenaj kanin motlaliskej. Ijkon kiteititiaj tetlasojtlaj uan amo san intech motekipachoaj. ¿Uelis tikchiuaskej ken yejuan?

17. Tla ikaj otlajtlakolchi, ¿tlen kichiuas tla tetlasojtla?

17 Ma tikijtokan tlajtlakoli tlen otikchijkej uan ayakmo ma titlajtlakolchiuakan. Sekimej tokniuan tlajtlakolchiuaj uan amo kinekij kijtoskej porque pinauaj uan amo kinekij teyolkokoskej (Prov. 28:13). Ijkuak ijkon kichiuaj, kiteititiaj amo tetlasojtlaj, motlajyouiltiaj uan noijki kintlajyouiltiaj oksekimej. Uan tlanechikol ayakmo kipias iespíritu santo toTajtsin Dios uan ayakmo yetos yolseuilistli (Efes. 4:30). Akin tetlasojtla, kinmiluis tlayekankej tlen tlajtlakoli okichi para ma kipaleuikan (Sant. 5:14, 15).

18. ¿Tleka miak ipati melauak ma titetlasojtlakan?

18 Akinmej tikchiuaj ken Cristo miak ipati ma titetlasojtlakan (1 Cor. 13:13). Ijkon techixmatij tlen tikchiuaj ken Cristo uan tikchiuaj ken Jehová akin sapanoa tetlasojtla (Efes. 5:1, 2TNM). Uan Pablo okijkuilo amo itlaj ipati yetoskia tla amo tetlasojtlaskia (1 Cor. 13:2). Ik non, ma tikteititikan melauak titetlasojtlaj uan amo san “ika tokamak noso tonenepil”, moneki “matimosepantlasojtlakah ika tlan tikchiwah”.