Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Octubre  2017

José tlen ochantiaya Arimatea okijto okatka imachtijka Jesús

José tlen ochantiaya Arimatea okijto okatka imachtijka Jesús

JOSÉ TLEN OCHANTIAYA ARIMATEA amo momati ken omoyolchika para motlapouis iuan Poncio Pilato tlen otlanauatiaya Roma, nin tekiua amo okipaktiaya ma kiluikan tlen kichiuaskia. Pero ikaj omonekiaya kitlajtlanilis itlalnakayo Jesús uan ijkon kitokaskiaj ken moneki. Nin ueyi tekiua okichi tlen José okitlajtlanili. Ijkuak se soldado otlanauatito Jesús yomikik, Pilato okitemaktili itlalnakayo Jesús. Uan maski José sapanoa omoyolkokojtoka, oyajki kanin okimiktijkej Jesús (Mar. 15:42-45).

  • ¿Akin okatka José tlen ochantiaya Arimatea?

  • ¿Tlen okipiaya kitas iuan Jesús?

  • ¿Tleka moneki ma tikmatikan akin okatka José?

 JOSÉ OPOUIAYA ITECH SANEDRÍN

Itech Evangelio tlen okijkuilo Marcos kijtoa José “tewa okatka de n Sanedrín”. Ninmej teopixkej okinauatiayaj altepetl, tekiuajkej uan tlaneltokalistli (Mar. 15:1, 43). José noijki okiyekanaya altepetl, ik non, omotlapoui iuan Poncio Pilato. Uan okipiaya miak tomin (Mat. 27:57).

¿Tiyolchikauak uan tikijtoa tiimachtijka Jesús?

Ninmej teopixkej tlen otlayekantokaj, amo okinpaktiaya tlen otlamachtiaya Jesús uan okitemojkej ken kimiktiskiaj. Pero José “okatka se kualitlakatl” (Luc. 23:50). Amo okatka ken oksekimej, ye omochijchikauaya kintlakamatis itlanauatiluan toTajtsin Dios. Noijki “okichiaya ijkuak pewas tlanawatis Dios”, ik non, omochi imachtijka Jesús (Mar. 15:43; Mat. 27:57). Melauak okipatioitaya iTlajtol toTajtsin Dios uan noijki melajkayotl, ik non, okipaktiaya tlen Jesús otlamachtiaya.

AMO OKIJTOAYA OKATKA IMACHTIJKA JESÚS

Juan 19:38 kijtoa: “José okatka imomachti n Jesús san ichtaka porke okinmawiliaya n tiopixkeh judíojteh”. ¿Tleka okinmauiliaya? Porque teopixkej okikokoliayaj Jesús uan kikixtiskiaj tla kijtoskia itech otlaneltokaya (Juan 7:45-49; 9:22). Ijkuak ikaj okikixtiayaj itech sinagoga, nochtin okikokoliayaj. José amo okijtoaya otlaneltokaya itech Jesús porque kipoloskia nochi iteki.

Pero amo san ye ijkon okipanok. Juan 12:42 kijtoa: “Miakeh judiojteh okineltokakeh n Jesús, iwa asta sikimeh tlayakankeh itech Weyi Tiopa. Pero amo okitenextiayah teixpa porke okinmawiliayah n fariseos, para amo makinkixtikah itech sinagogas”. Uan Nicodemo noijki “tewa okatka de n Sanedrín” (Juan 3:1-10, TNM; 7:50-52).

José okatka imachtijka Jesús pero amo okimatiayaj oksekimej. Melauak okipiaya ouijkayotl porque nin amo san ajauili, ye okimatiaya tlen okijto Jesús: “Tla aka kijtos inmixpa n tlakah, Ne Iteko, Ne noiwa nikijtos ye noaxka ixpa n Notajtsi non kajki ilwikak. Iwa tla aka kijtos teixpa, amo nechixmati, Ne noiwa nikijtos ixpan Notajtsi non kajki ilwikak amo nikixmati” (Mat. 10:32, 33). Ye amo okikokoliaya Jesús, ye san amo okatka yolchikauak para kijtoskia okatka imachtijka. ¿Uan tejuan tlen tikchiuaj?

Biblia kijtoa José amo okinpaleui teopixkej tlen okitemoayaj uan kimiktiskiaj Jesús (Luc. 23:51). Ye uelis amo ompa okatka ijkuak okixkomakakej Jesús. Maski ompa yetoskia noso amo, José  sapanoa kiyolkokoskia tlen okichiuilijkej Jesús uan amo itlaj uelis kichiuaskia para kipaleuis.

OMOYOLCHIKA UAN OKIJTO OKATKA IMACHTIJKA JESÚS

Pero ijkuak omikik Jesús, ayakmo omomojtiaya uan okinpaleui imachtijkauan Jesús. Tikmatij porque Marcos 15:43 kijtoa: “Omoyolchika iwa okitlatlaujtito n Pilato makimaktili ikuerpo n Jesús”.

José nesi okitak ijkuak omikik Jesús porque okimatki achto kimatiskia Pilato. Ijkon tikajsikamatij porque ijkuak okilui ma kimaktili itlalnakayo Jesús, Pilato “okónnotski n soldado tlayákanki romano iwa okiyektlajtlani kox milák yomikki n Jesús” (Mar. 15:44). Tla José okitak ijkuak Jesús otlajyouijtoka itech kuauitl, ¿okipaleui ma mokuayejyeko uan omoyolchika kijtos okatka imachtijka Jesús? Uelis ijkon opanok. Pero tikmatij okipaleui itlaj ma kichiua. Uan ayakmo yetoskia san ichtaka imachtijka Jesús.

OKITOKAK JESÚS

Tlanauatil okijtoaya akinmej okinmiktiaya itech se kuauitl omonekiaya kintokaskej achto kalakiskia Tonaltsin (Deut. 21:22, 23). Pero romanos okinkauayaj itech non kuauitl kanin omikiaya hasta ijkuak opalaniayaj noso okintlamotlayaj ijtik se tekochtli kanin  okintlamotlayaj mikamej. Uan José amo okinekiaya ijkon ma kichiuilikan Jesús. José amo uejka okipiaya se mikakoyoktli kanin okimiktijkej Jesús. Itech nin mikakoyoktli ayamo ikaj ompa okitokayaj, nin kijtosneki José ochantiaya Arimatea * uan satepan ochantito Jerusalén uan okinekiaya ompa ma kintokakan ikalchanejkauan (Luc. 23:53, TNM; Juan 19:41TNM). Okiteititi yolkuali ijkuak otlanauati ma kitokakan Jesús kanin ye kitokaskiaj uan noijki okichi tlen omoijto itech Jesús: kitokaskiaj iuan akinmej okipiayaj tomin (Is. 53:5, 8, 9).

¿Tikpatioita timouikas iuan Jehová noso okachi tikpatioita okseki tlamantli?

Naui Evangelios kijtoaj ijkuak Jesús okitemouijkej itech kuauitl, José okikimilo ika se tsotsoli tlen itoka lino tlen sapanoa patio uan okitlali ijtik mikakoyoktli (Mat. 27:59-61; Mar. 15:46, 47; Luc. 23:53, 55; Juan 19:38-40). Moijtoa okipaleui Nicodemo akin okiualikak seki ajuiak para kitlaliliskiaj Jesús. Ken ninmej ome tlakamej sapanoa okinmixmatiayaj, amo yejuan okiuikakej itlalnakayo Jesús. Uelis okinmiluijkej intlakeualuan ma kinpaleuikan ma kitokatij. Pero yejuan okichijkej itlaj miak ipati. Akin okikitskiaya se mikatl amo ueliskia kiueyichiuas toTajtsin Dios chikome tonal uan nochi sokio omokauaya tlen okikitskiaya (Núm. 19:11; Ageo 2:13). Noijki amo yetoskiaj itech Pascua uan nochi tlen okseki omochiuaya itech nonmej tonalmej (Núm. 9:6). José noijki uelis kikokoliskiaj porque okitokak Jesús. Pero maski ijkon panoskia ye okitokak Jesús ken moneki uan ijkon okiteititi okatka imachtijka Jesús.

¿SATEPAN TLEN OKICHI JOSÉ?

Biblia ayakmo itlaj kijtoa itech José satepan ijkuak okitokak Jesús. Ik non, uelis timotlajtlaniskej: “¿Satepan tlen okichi José?”. Amo tikmatij. Itech nochi tlen otimomachtijkej, uelis okiteititi okatka imachtijka Jesús. Ken okipanok miak tlamantli uan omoyejyeko itlaneltokilis, non okipaleui okachi ma tlaneltoka uan okiteititi okatka yolchikauak. Ika nin tlamantli okiteititi okatka imachtijka Jesús.

Uelis timokuayejyekoskej itech tlen okichi José uan ijkon tikitaskej kox okachi tikpatioitaj timouikaskej iuan Jehová noso okachi tikpatioitaj tikpiaskej se tekitl, tikpiaskej miak tlamantli, tokalchanejkauan noso amo tiknekij ma techtsakuakan.

^ párr. 18 Uelis Arimatea okatka Ramá, tlen axkan moixmati ken Rentis (Rantis), itech non altepetl oneski teotlajtojki Samuel uan omokauaya kanaj 35 kilómetros ik noroeste ompa Jerusalén (1 Sam. 1:19, 20).