Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Octubre de 2016

Okachi ma titlaneltokakan itech tlen Jehová techmakas

Okachi ma titlaneltokakan itech tlen Jehová techmakas

“Tlaneltokilistli non tlen se kichia melauak ma pano” (HEBREOS 11:1, TNM).

TLAKUIKALMEJ: 54 UAN 55

1, 2. (1) ¿Tleka tlatlamantli tlen tikchiaj itekipanojkauan toTajtsin Dios uan tlen kichiaj tlaltikpaktlakamej? (2) ¿Tlen timomachtiskej?

JEHOVÁ techiluia kichiuas miak tlamantli tlen melauak kuali. Se neskayotl, yokijto kichipauas itoka uan kichiuas itlanekilis itech iluikak uan itech Tlaltikpak (Mateo 6:9, 10). Non tlen okachi ipati uan tlen okachi tikchiaj. Jehová noijki yokijto techmakas yolilistli tlen amo keman tlamis nikan Tlaltikpak uan sekimej yaskej iluikak (Juan 10:16; 2 Pedro 3:13). Noijki tikchiaj tikitaskej ken Jehová ok techyekanas uan techpaleuis itech ninmej tonalmej.

2 Biblia kijtoa tlaneltokilistli “non tlen se kichia” (xikita recuadro “¿Tlen kijtosneki?”). Nin kijtosneki tikneltokaj nochi tlen Jehová yokijto melauak kichiuas (Hebreos 11:1, TNM). Uan tlaltikpaktlakamej noijki kichiaj seki tlamantli, pero amo kuali kimatij kox se tonal kipiaskej. Se neskayotl, uelis ikaj kineki kitlanis lotería. Pero amo uelis kimatis kox melauak kitlanis. Itech nin tlamachtil tikitaskej tlen uelis  tikchiuaskej pampa okachi titlaneltokaskej itech tlen Jehová yokijto kichiuas. Noijki tikitaskej axkan Jehová techpaleuia ma tikpiakan chikauak totlaneltokilis.

3. ¿Tleka tikneltokaj Jehová kichiuas nochi tlen kijtoa?

3 Amo ikaj tlaneltoka ijkuak nesi. Tla tiknekij titlaneltokaskej, moneki ma tikkauakan ma techyekana iespíritu santo toTajtsin Dios (Gálatas 5:22). Espíritu santo techpaleuia ma tikixmatikan Jehová. Ijkuak tikajsikamatij ye kipia sapanoa miak chikaualistli uan ixtlamatki, tikneltokaj ika nochi toyolo kichiuas nochi tlen kijtoa. Jehová melauak kichiuas tlen yokijto, ik non, kijtoa: “Nochi yomochi” (xiktlajtolti Apocalipsis 21:3-6). Ken “toTajtsin Dios akin yolmelajki”, nochipa kichiua tlen kijtoa. Ik non, tikneltokaj ye kichiuas nochi tlen kijtoa (Deuteronomio 7:9).

ITEKIPANOJKAUAN JEHOVÁ TLEN OKIPIXKEJ CHIKAUAK INTLANELTOKILIS

4. ¿Itech tlen otlaneltokayaj yiuejkika itekipanojkauan toTajtsin Dios?

4 Tlakotonal 11 itech amochtli Hebreos tlajtoa itech 16 tlakamej uan siuamej tlen otlaneltokakej ika nochi inyolo itech tlen Jehová okijto kichiuas. Noijki techtlapouia itech oksekimej itekipanojkauan Jehová tlen okiyolpaktijkej “por intlaneltokalis” (Hebreos 11:39). Nochtin yejuan okichiayaj ixui siuatl tlen moijtoa itech Biblia. Okimatiayaj ixui siuatl kinpojpolos nochtin akinmej kikokoliaj toTajtsin Dios uan kikuepas Tlaltikpak se xochitlali (Génesis 3:15). Ninmej itekipanojkauan toTajtsin Dios okineltokayaj ika nochi inyolo ye kinyolitiskia tla mikiskiaj. Amo okichiayaj ma kinyolitikan itech iluikak, pampa Jesús ayamo okitemakaya non chialistli (Gálatas 3:16). Yejuan okichiayaj chantiskej nochipa itech Tlaltikpak tlen yetos se xochitlali (Salmo 37:11; Isaías 26:19; Oseas 13:14).

5, 6. (1) ¿Tlen okichiayaj Abrahán uan ikalchanejkauan? (2) ¿Tlen okichijkej pampa kipiaskiaj chikauak intlaneltokilis? (Xikita tlaixkopinal tlen ika peua tlamachtil).

5 Itech Hebreos 11:13 kijtoa nin itech itekipanojkauan Jehová tlen yolmelajkej: “Nochteh ninteh tlakah otlaneltokakeh asta omikkeh. Iwa mach okiselijkeh tlan Dios okinmili kinmakas, pero ken otlaneltokakeh, san wejka okitakeh tlan kinmakaskiah”. Yejuan okichiayaj xochitlali uan omokuayejyekoayaj ompa yochantiayaj. Ijkon okichiaya Abrahán. Jesús okijto Abrahán oyolpakik pampa “ika itlaneltokalis” okitak non tonal (Juan 8:56). Sara, Isaac, Jacob uan oksekimej okichiayaj tonal ijkuak iTekiuajkayo toTajtsin Dios kinauatis nochi Tlaltikpak (Hebreos 11:8-11).

6 ¿Tlen okichi Abrahán uan ikalchanejkauan pampa kipiaskiaj chikauak itlaneltokilis? Nochipa itlaj omomachtiayaj itech Jehová. Ualeua ika ángeles, ika kochtemikilistli noso ika tlen toTajtsin Dios okinnextili. Uelis noijki okinmachtiayaj inkojkoluan noso noijki omomachtijkej itech tlen yiuejkika okijkuilojkej. Abrahán uan ikalchanejkauan amo keman okilkajkej tlen okijto toTajtsin Dios kichiuas. Uan sapanoa okinpaktiaya itech mokuayejyekoskej. Ik non, amo keman omotlajtlanijkej kox mochiuaskia nochi tlen okijto Jehová. Ken otlaneltokakej, non okinpaleui ma yetokan yolmelajkej ixpan toTajtsin Dios maski okipixkej ouijkayotl noso okintojtokakej.

7. ¿Tlen techmaka Jehová pampa ma tikpiakan chikauak totlaneltokilis, uan tlen moneki ma tikchiuakan?

 7 ¿Tlen techpaleuis ma tikpiakan chikauak totlaneltokilis? Jehová otechmakak Biblia. Itech kijtoa tlen satepan kichiuas uan tlen moneki tikchiuaskej tla tiknekij tiyolpakiskej. Ik non, moneki mojmostla ma tiktlajtoltikan Biblia (Salmo 1:1-3; xiktlajtolti Hechos 17:11). Jehová noijki techmaka “tlakuali ijkuak moneki” ika “tlakeuali yolmelajki uan ixtlamatki” (Mateo 24:45, TNM). Ijkon ken yiuejkika okichijkej itekipanojkauan toTajtsin Dios, moneki ma tiktlajtoltikan tlen yokijto kichiuas uan kuali itech ma timokuayejyekokan. Nin techpaleuis ma tiyetokan tiyolmelajkej ixpan Jehová uan tikteititiskej tikchiaj iTekiuajkayo ma kinauati nochi Tlaltikpak.

Ijkuak Jehová technankilia, okachi itech titlaneltokaj

8. ¿Ken techpaleuia tlatlaujtilistli ma tikpiakan okachi chikauak totlaneltokilis?

8 ¿Tlen noijki okinpaleui yiuejkika itekipanojkauan Jehová ma kipiakan chikauak intlaneltokilis? Okiluijkej Jehová ma kinpaleui uan okitakej ken okinankili (Nehemías 1:4, 11; Salmo 34:4, 15, 17; Daniel 9:19-21). Noijki ijkon, okachi tikpiaj chikauak totlaneltokilis ijkuak tikiluiaj Jehová ma techpaleui uan tikitaj ye techkaki uan techmaka tlen tiktlajtlaniliaj ijkuak moneki (xiktlajtolti 1 Juan 5:14, 15). Nochipa ma tiktlatlaujtikan Jehová ma techmaka iespíritu santo uan ijkon tikpiaskej chikauak totlaneltokilis (Lucas 11:9, 13).

9. ¿Itech tlen tlamantli moneki ma timotlatlaujtikan?

9 Ijkuak tiktlatlaujtiaj Jehová, amo san ma tiktlajtlanilikan tlen tiknekij tikpiaskej. Noijki moneki mojmostla ma tiktlasojkamatilikan uan ma tikueyichiuakan, pampa ye kichiua miak tlamantli tlen sapanoa kuali (Salmo 40:5). Noijki ma timotlatlaujtikan inpatka nochtin tokniuan. Se neskayotl, itech tokniuan tlen “tsaktokeh” uan tlayekankej itech tlanechikol. Ijkuak tikitaj Jehová technankilia, tikmachiliaj okachi kuali iuan timouikaj uan okachi itech titlaneltokaj (Hebreos 13:3, 7).

ITEKIPANOJKAUAN JEHOVÁ TLEN OKATKAJ YOLMELAJKEJ

10. ¿Tleka miakej itekipanojkauan toTajtsin Dios okatkaj yolmelajkej uan omoyolchikajkej?

10 Itech Hebreos tlakotonal 11 tlatitlanil Pablo okijto: “Ika intlaneltokalis sikimeh siwameh, Dios okichi oksepa mamoyolitikah ichantlakawah non yomikkeh. Oksikimeh tlaneltokakeh mach okikajkeh Dios maya okintlaijyowiltijkeh, yej okimokawilijkeh makinmiktikah, ken yokimatiah moyolitiskiah iwa ijkó kiseliskeh ok se yankuik yolitílistli” (Hebreos 11:35). Miakej itekipanojkauan Jehová maski otlajyouijkej okatkaj yolmelajkej pampa okineltokakej kinyolitiskiaj. Okimatiayaj satepan toTajtsin Dios oksepa kinyolitiskia uan nochipa chantiskej itech Tlaltikpak. Ma timokuayejyekokan itech tlen okipanok Nabot uan Zacarías. Okinmiktijkej ika tetl pampa okitlakamatkej toTajtsin Dios (1 Reyes 21:3, 15; 2 Crónicas 24:20, 21). Daniel okitlamotlakej kanin okatkaj leones tlen oapismikiayaj uan eyi iyolikniuan okintlamotlakej  ijtik se horno tlen sapanoa okatka totonik. Okachi okinekiayaj kitlakamatiskej Jehová maski uelis mikiskiaj. Ninmej tlakamej okimatiayaj Jehová kinmakaskia iespíritu uan kinpaleuiskia ma kixikokan san tlen tlajyouilistli kipiaskiaj (Daniel 3:16-18, 20, 28; 6:13, 16, 21-23; Hebreos 11:33, 34).

Itekipanojkauan toTajtsin Dios yolmelajkej pampa ika nochi inyolo kineltokaj kinyolitiskej

11. ¿Tlen tlamantli okixikojkej sekimej teotlajtojkej pampa otlaneltokakej?

11 Miakej teotlajtojkej, ken Micaya uan Jeremías, okinpinauijkej noso okintsakej pero otlaxikojkej. Uan ken Elías, sekimej teotlajtojkej “sentetl onentinemiah kan amaka chanti, kan tepeyo, ijtik kúyokteh iwa wejweyi kuevajteh”. Nochtin yejuan otlaxikojkej uan okatkaj yolmelajkej maski otlajyouijkej pampa ‘okichiayaj melauak ma pano’ tlen Jehová okinmilui (Hebreos 11:1, TNM; 36-38; 1 Reyes 18:13; 22:24-27; Jeremías 20:1, 2; 28:10, 11; 32:2).

12. ¿Akin techmaka okachi kuali neskayotl, uan tlen okipaleui ma tlaxiko?

12 Jesucristo ye akin techmaka okachi kuali neskayotl. Ye okixiko tlen okachi oui uan okatka yolmelajki. ¿Tlen okipaleui ma tlaxiko? Pablo okijto Jesús otlaxiko, maski okipilojkej itech se kuauitl, “porke okimatia satepa de itlaijyowilis kipiaskia miak pakílistli, iwa axa ewatok ik iyekma kan Dios yayantitok” (Hebreos 12:2). Ik non, tlatitlanil Pablo okinmilui tokniuan kuali ma mokuayejyekokan itech ineskayo Jesús (xiktlajtolti Hebreos 12:3). Ijkon ken Jesús, miakej tokniuan itech achto siglo omikej pampa okatkaj yolmelajkej ixpan Jehová. Se neskayotl tikitaj itech Antipas (Apocalipsis 2:13). Ninmej tokniuan yokiselijkej intlaxtlauil, amo ken oksekimej itekipanojkauan toTajtsin Dios tlen okichiayaj chantiskej nikan Tlaltikpak (Hebreos 11:35). Jesús opejki tlanauatia itech xiuitl 1914 uan seki kauitl satepan, tlapejpenalmej tlen yomikej, okinyolitijkej iluikak uan ompa yoltoskej nochipa. Yejuan iuan Jesús kinnauatiskej tlaltikpaktlakamej (Apocalipsis 20:4).

ITEKIPANOJKAUAN JEHOVÁ KIPIAJ CHIKAUAK INTLANELTOKILIS

13, 14. (1) ¿Tlen ouijkayotl okixiko tokni Rudolf Graichen? (2) ¿Tlen okipaleui ma yeto yolmelajki ixpan Jehová?

13 Itech ninmej tonalmej miakej iTlaixpantijkauan Jehová kichiuaj ken Jesús. Mokuayejyekoaj itech tlen kijtoa Jehová kichiuas uan katej yolmelajkej maski tlajyouiaj. Ma timokuayejyekokan itech tlen okichi tokni Rudolf Graichen tlen oneski itech ueyi altepetl Alemania itech xiuitl 1925. Ye kilnamiki ijkuak okatka chokotsin okinmitaya seki tlaixkopinalmej tlen okatkaj itech ikalijtik tlen okinchijchijkej ken kijtoa Biblia. Tokni okijto: “Itech se tlaixkopinal okatka se lobo iuan se ichka, se tentsojkonetl iuan se leopardo, se torojkonetl iuan se león: nochtin san sekan okatkaj ika yolseuilistli uan se chokotsin okinuikaya” (Isaías 11:6-9). Nin okipaleui tokni Rudolf nochipa ma mokuayejyeko itech xochitlali uan okachi okichiaya. Nin okipaleui ma yeto yolmelajki ixpan  Jehová maski policías nazis okitlajyouiltijkej uan satepan policías tlen okinpiaya Alemania comunista.

14 Tokni Rudolf sapanoa otlajyoui pero otlaxiko. Inantsin omikik ika se kokolistli tlen itoka tifus ijkuak okatka kanin nazis okintsakuayaj tlaltikpaktlakamej. Uan itajtsin okitlali ifirma itech amatl kanin okijtoaya ayakmo yetoskia iTlaixpantijka Jehová. Pero Rudolf okipixki chikauak itlaneltokilis. Ijkuak okiski itech telpiloyan, omochi tlayekanki itech circuito. Satepan omomachtito itech Tlamachtil ika Biblia tlen kichiua Watchtower itech Galaad uan okititlankej itech ueyi altepetl Chile. Ompa oksepa okatka tlayekanki itech circuito uan omonamikti iuan se misionera tlen omotokayotiaya Patsy. Se xiuitl satepan, okipixkej intakotsin pero omikik. Uan seki kauitl satepan, Patsy noijki omikik, yikin okipiaya 43 xiuitl. Maski tokni Rudolf sapanoa otlajyoui, ok okitekichiuiliaya Jehová. Uan ijkuak yokipiaya miak xiuitl uan omokokoaya, okatka precursor regular uan tlayekanki itech tlanechikol.  Uelis tiktlajtoltiskej inemilis itech La Atalaya (ika náhuatl del centro Akin Tetlapouijtok) 1 de agosto 1997, páginas 20 a 25 [1] (xikita nota kanin tlami tlamachtil).

15. Xikijto se neskayotl itech sekimej tokniuan tlen kitekichiuiliaj Jehová ika pakilistli maski tlajyouiaj.

15 Axkan miakej tokniuan kitekichiuiliaj Jehová ika pakilistli maski tlajyouiaj uan kintojtokaj. Miakej tsaktokej itech ueyi altepetl Eritrea, Singapur uan Corea del Sur. ¿Tleka? Pampa amo kintekitiltiaj teposmej tlen ika tlamiktiaj (Mateo 26:52). Se neskayotl, tokni Isaac, tokni Negede uan tokni Paulos yitsaktokej kanaj 20 xiuitl itech ueyi altepetl Eritrea. Ompa sapanoa kintlajyouiltiaj. Ken nochi non xiuitl ompa tsaktokej, amo ueli monamiktiaj nion kinmaluiaj intatajuan. Pero kipiaj chikauak intlaneltokilis uan katej yolmelajkej ixpan Jehová. Akinmej tlamaluiaj itech telpiloyan kintlakaitaj. Itech www.jw.org, uelis tikitas se tlaixkopinal kanin katej tokniuan uan ixuetskatokej maski tlajyouijtokej.

¿Ken kiteititiaj tokniuan itech totlanechikol kipiaj chikauak intlaneltokilis? (Xikinmita párrafos 15 uan 16).

16. ¿Tlen tikchiuaskej tla tikpiaj chikauak totlaneltokilis?

16 Miakej tokniuan amo tsaktokej nion kintlajyouiltiaj ken tokniuan tlen intech yotimotlapouijkej. Pero miakej tlajyouiaj pampa amo kipiaj tlen kikuaskej, onka tlaxixinilistli noso onka guerras. Oksekimej tokniuan kichiuaj ken Abrahán, Isaac, Jacob uan Moisés kikauaj tomin uan okseki tlamantli uan ijkon okachi kitekichiuiliaj Jehová. ¿Tlen kinpaleuia ninmej tokniuan ma kitekichiuilikan Jehová ika pakilistli? Yejuan kitlasojtlaj uan kineltokaj kichiuas nochi tlen yokijto. Kimatij Jehová kinmakas yolilistli tlen amo keman tlamis itech Xochitlali. Ompa yetos melajkayotl (xiktlajtolti Salmo 37:5, 7, 9, 29). *

17. (1) ¿Tlen moneki tikchiuaskej tla tiknekij tikpiaskej chikauak totlaneltokilis? (2) ¿Tlen timomachtiskej chikome?

17 Itech nin tlamachtil yotikitakej tlaneltokilistli “non tlen se kichia”. Tla tiknekij tikpiaskej chikauak totlaneltokilis, moneki tiktlatlaujtiskej Jehová uan timokuayejyekoskej itech tlen yokijto kichiuas. Ijkon tiyetoskej tiyolmelajkej maski san tlen techpanos. Chikome timomachtiskej tlen kijtosneki ma titlaneltokakan.

^ [1] (párrafo 14): Noijki xikita inemilis Andrej Hanák tlen ochantiaya itech ueyi altepetl Eslovaquia, itech tlamachtil tlen itoka “Mi esperanza sigue brillante a pesar de las pruebas”. Okiski itech revista ¡Despertad! 22 de abril 2002.

^ párr. 16 Salmo 37:5 kijtoa: “Xikmaka Jehová moojui; itech xitlaneltoka, uan ye mitspaleuis”. Uan 37:7 kijtoa: “Amo itlaj xikijto ixpan Jehová uan xikchixto ika pakilistli. Amo xikualani pampa tlen amo kuali mokuayejyekoaj tlaltikpaktlakamej uan kuali kisa tlen kichiuaj”. Uan 37:9 kijtoa: “Akinmej amo yolkualmej kinmixpoloskej, pero akinmej mochiaj itech Jehová yetoskej itech Tlaltikpak”. Uan 37:29 kijtoa: “Yolmelauakej yetoskej itech Tlaltikpak, uan itech chantiskej nochipa”.