Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Octubre de 2016

Ma tikinpaleuikan akinmej uitsej itech okseki altepemej

Ma tikinpaleuikan akinmej uitsej itech okseki altepemej

“Nochipa xitekalotikah” (HEBREOS 13:2).

TLAKUIKALMEJ: 50 UAN 20

1, 2. (1) ¿Tlen kinpanoa akinmej uitsej itech okseki altepemej? (Xikita tlaixkopinal tlen ika peua tlamachtil). (2) ¿Tlen techilnamiktia Biblia? (3) ¿Tlen tlajtlanilmej tikinnankiliskej?

YIKIPIAJ kanaj 30 xiuitl, se tlakatl tlen itoka Osei, akin ochantiaya itech ueyi altepetl Ghana itech África, ochantito Europa [1] (xikita nota kanin tlami tlamachtil). Ijkuakon, ye ayamo okatka iTlaixpantijka Jehová. Tokni kilnamiki okipiaya miak ouijkayotl. Ye kijtoa: “San niman onikitak miakej amo notech omotekipachoayaj. Noijki amo onimomatiaya pampa amo okatka ijkon ken noaltepe. Ijkuak onikiski itech aeropuerto, opejki nisekui uan onichokak”. Ken omonekiaya momachtis okse tlajtoli, opanok kanaj se xiuitl pampa kajsiskia se kuali tekitl. Uan ken uejka okatkaj ikalchanejkauan, sapanoa okinmilnamikiaya uan iselti omomachiliaya.

2 Tla monekiskia tiaskej oksekan ken Osei, ¿ken techpaktiskia ma techselikan? Sapanoa techpaktiskia tokniuan ma techselikan ika tlasojtlalistli maski san kanin tiuitsej. Biblia kijtoa akinmej melauak tikchiuaj ken Cristo moneki ma tikinselikan  ika tlasojtlalistli akinmej uitsej itech okseki altepemej (Hebreos 13:2). Ik non, itech nin tlamachtil, tikinnankiliskej eyi tlajtlanilmej: ¿Ken kinmita Jehová akinmej uitsej itech okseki altepemej? ¿Moneki okse tlamantli tikinmitaskej akinmej uitsej itech okseki altepemej? ¿Ken uelis tikinseliskej akinmej uitsej itech okseki altepemej itech totlanechikol?

¿KEN KINMITA JEHOVÁ AKINMEJ UITSEJ ITECH OKSEKI ALTEPEMEJ?

3, 4. Ijkon ken kijtoa Éxodo 23:9, ¿ken okinekiaya Jehová israelitas ma kinselikan akinmej oualayaj itech okseki altepemej, uan tleka?

3 Ijkuak Jehová okinmakixti israelitas kanin okatkaj tlakeualmej, okinmilui ma kinchiuilikan tlen kuali akinmej inmiuan okiskej itech altepetl Egipto (Éxodo 12:38, 49; 22:21). Jehová okimatiaya tlajyouiaj akinmej uitsej itech okseki altepemej, ik non, okinmaluiaya ika tlasojtlalistli. Se neskayotl, okinkauiliaya ma motijtixikan tetlala (Levítico 19:9, 10).

4 Jehová amo san okinmilui israelitas ma kintlakaitakan akinmej oualayaj itech okseki altepemej. Ye okinekiaya ma kilnamikikan ken momachilia ijkuak ikaj yaui itech okse altepetl (xiktlajtolti Éxodo 23:9). * Uan ijkuak israelitas ayamo okatkaj tlakeualmej itech altepetl Egipto, egipcios okinchikoitayaj pampa amo okatkaj ken yejuan (Génesis 43:32; 46:34; Éxodo 1:11-14). Israelitas sapanoa otlajyouijkej ijkuak okatkaj Egipto. Ik non, Jehová okinekiaya ma kilnamikikan uan ma kintlasojtlakan akinmej inmiuan ochantiayaj uan oualayaj itech okseki altepemej (Levítico 19:33, 34).

Jehová kintlasojtla akinmej uitsej itech okseki altepemej

5. ¿Tlen techyolinis ma tikintlasojtlakan akinmej uitsej itech okseki altepemej ijkon ken Jehová kichiua?

5 Jehová amo kipatla iyelis. Ik non, ijkuak uitsej itech totlanechikol akinmej uitsej itech okseki altepemej, moneki ma tikilnamikikan Jehová kintlasojtla (Deuteronomio 10:17-19; Malaquías 3:5, 6). Moneki ma timokuayejyekokan itech ouijkayotl tlen kipiaj. Se neskayotl, uelis amo kajsikamatij totlajtol, ik non, sekimej kinchiuiliaj tlen amo kuali. Tla timokuayejyekoaj itech nochi nin, techyolinis ma tikinpaleuikan uan ma tikintlasojtlakan (1 Pedro 3:8).

¿MONEKI OKSE TLAMANTLI TIKINMITASKEJ AKINMEJ UITSEJ ITECH OKSEKI ALTEPEMEJ?

6, 7. Judíos tlen okichiuayaj ken Cristo, ¿ken okiteititijkej ayakmo otechikoitayaj?

6 Akinmej okatkaj judíos uan okichiuayaj ken Cristo omochijchikajkej ayakmo techikoitaskej ijkon ken okichiuayaj miakej judíos (xikita recuadro “¿Tlen kijtosneki?”). Itech iluitl Pentecostés itech xiuitl 33, akinmej okichiuayaj ken Cristo uan ochantiayaj Jerusalén, kuali okinselijkej tlen oualayaj itech okseki altepemej tlen yikin opejkej kichiuaj ken Cristo (Hechos 2:5, 44-47). Nin kiteititia okajsikamatkej tlen kijtosneki kuali ma kinselikan oksekimej. Uan noijki kijtosneki ma kintlasojtlakan akinmej amo kinmixmatij.

 7 Ijkuakon, sekimej tokniuan tlen otlajtoayaj griego, okijtojkej iknosiuamej amo okinmakayaj tlen omonekiaya (Hechos 6:1). Ik non, tlatitlanilmej okintitlankej chikome tlakamej tlen okinpiayaj intoka ika tlajtoli griego uan ijkon okiyektlalijkej ouijkayotl. ¿Tleka okintitlankej tlakamej tlen okinpiayaj intoka ika tlajtoli griego? Uelis ijkon iknosiuamej tlen otlajtoayaj griego okachi kuali momachiliskiaj (Hechos 6:2-6).

8, 9. (1) ¿Tlen moneki ma timotlajtlanikan uan ijkon tikmatiskej kox titechikoitaj? (2) ¿Tlen moneki tikchiuaskej? (1 Pedro 1:22).

8 Maski ualeua amo tikitaj, uelis timomachiliskej okachi topati amo ken oksekimej pampa tlatlamantli otimoskaltijkej (Romanos 12:2). Noijki akinmej chantij itech toaltepe, akinmej inmiuan timomachtiaj noso titekitij kinteneuaj akinmej uitsej itech okseki altepemej. Ik non, moneki ma timotlajtlanikan: “¿Peua timokuayejyekoaj ken yejuan? ¿Tlen tikchiuaj ijkuak ikaj techpinauia pampa tiuitsej itech okse altepetl noso tlatlamantli tlen tikchiuaj?”.

9 Seki kauitl, tlatitlanil Pedro okinchikoitaya akinmej amo okatkaj judíos. Pero satepan okajsikamatki amo kuali ijkon ma kichiua (Hechos 10:28, 34, 35; Gálatas 2:11-14). ¿Uan tlen tikchiuaskej tla peua tikinchikoitaj oksekimej? Moneki timochijchikauaskej amo ijkon tikchiuaskej (xiktlajtolti 1 Pedro 1:22). ¿Tlen techpaleuis? Moneki ma tikilnamiktokan tinochtin titlajtlakolejkej uan amo technamiki ma techmakixtikan maski san kanin tiuitsej (Romanos 3:9, 10, 21-24). Ik non, amo kuali ma timomachilikan okachi topati uan amo ken oksekimej (1 Corintios 4:7). Moneki timokuayejyekoskej ken tlatitlanil Pablo. Ye okinmilui tokniuan tlen oualayaj itech okseki altepemej, noijki okatkaj “itech ifamilia in Dios” (Efesios 2:19, ITlajtol toTajtzin Dios [NHY]). Tinochtin moneki ma timochijchikauakan amo titechikoitaskej. Ijkon okachi kuali tikpiaskej toyelis (Colosenses 3:10, 11).

¿KEN UELIS TIKINSELISKEJ AKINMEJ UITSEJ ITECH OKSEKI ALTEPEMEJ?

10, 11. ¿Ken okiteititi Boaz okinmitaya ken Jehová kinmita akinmej oualayaj itech okseki altepemej?

10 Biblia techtlapouia itech se tlakatl yolmelajki tlen omotokayotiaya Boaz. Ye okinmitaya akinmej oualayaj itech okseki altepemej ken Jehová kinmita. ¿Ken okichi? Se tonal otlachiato itlala ijkuak opixkatokaj. Ijkuakon, okitak se siuatl tlen oualaya itech altepetl Moab tlen omotokayotiaya Rut. Nin siuatl sapanoa otekititoka ijkuak okololoaya seki xinachtli. Uan maski Tlanauatil tlen okijkuilo Moisés okijtoaya uelis motijtixiti, achto otlajtlanki kox uelis kichiuaskia (xikita recuadro “¿Tlen kijtosneki?”). Ijkuak Boaz okimatki non, omotlajtlachialti uan okikauili noijki ma kololo tlen okipixkakej itekipanojkauan (xiktlajtolti Rut 2:5-7, 15, 16). *

11 Ijkuakon, Boaz okichi itlaj tlen okiteititi okitekipachoaya Rut uan tlen okipanoaya pampa oualaya itech okse altepetl. Okilui ma mokaua iuan ichpokamej tlen  okatkaj itlakeualuan pampa amo ma kikuejsokan tlakamej tlen otekitiayaj itech itlala. Noijki otlanauati ma kimakakan tlakuali uan tlen koniskia, ijkon ken itlakeualuan. Boaz okitlakaitak non siuatl tlen oksekan oualaya uan okiyolchika (Rut 2:8-10, 13, 14).

12. ¿Tlen uelis panos tla tikinpaleuiaj akinmej uitsej itech okseki altepemej?

12 Boaz okichiuili tlen kuali Rut pampa Rut okitlasojtlaya imonna, akin omotokayotiaya Noemí. Noijki Rut opejki kitekichiuilia Jehová uan noijki okinekiaya ma kipaleui. Ijkuak Boaz okichiuili tlen kuali Rut, okichijtoka ken Jehová, akin tetlasojtla (Rut 2:12, 20; Proverbios 19:17). Axkan noijki ijkon panoa. Tla tikinpaleuiaj nochtin tlaltikpaktlakamej, uelis momachtiskej tlen melauak uan kimatiskej Jehová sapanoa kintlasojtla (1 Timoteo 2:3, 4).

¿Kuali tikinseliaj akinmej uitsej itech okseki altepemej? (Xikinmita párrafos 13 uan 14).

13, 14. (1) ¿Tleka moneki kuali tikinseliskej akinmej uitsej nechikolmej? (2) ¿Tlen techpaleuis ma timotlapouikan iuan akin uits itech okse altepetl?

13 Uelis tikteititiskej tikintlasojtlaj akinmej uitsej itech okseki altepemej ijkuak kuali tikinseliaj ijkuak timonechikoaj. Ualeua pinauaj uan amo motlapouiaj iuan oksekimej. Uelis noijki momachiliaj amo okachi inpati pampa amo kipiaj tomin noso yejuan okse tlamantli. Ik non, moneki ma tikinnotsakan uan ma tikinpaleuikan ika tlasojtlalistli. Tla tikpiaj aplicación JW Language, ma tiktekitiltikan pampa tikmatiskej ken tikintlajpaloskej ika intlajtol (xiktlajtolti Filipenses 2:3, 4).

14 Ualeua tipinauaj ijkuak timotlapouiaj iuan akinmej uitsej itech okse altepetl. ¿Tlen techpaleuis? Uelis tikintlapouiskej itech tonemilis. Uelis noijki kipiaj inyelis ken tejuan noso yokinpanok itlaj ken tejuan.  Ma tikilnamikikan itech nochtin altepemej tlatlamantli kichiuaj.

NOCHTIN KUALI MA TIKINSELIKAN

15. ¿Tlen techpaleuis ma tikinmajsikamatikan akinmej yikin oajsikoj itech toaltepe?

15 ¿Ken kuali tikinseliskej nochtin itech tlanechikol? Moneki ma timotlajtlanikan: “Tla niyetoskia itech okse altepetl, ¿ken nechpaktiskia ma nechselikan?” (Mateo 7:12). Uelis yolik momatiskej akinmej uitsej itech okseki altepemej, pero amo ma timosotlauakan. Uelis amo san niman tikajsikamatiskej ken mokuayejyekoaj noso tlen kichiuaj. Pero amo ma tikchiakan ma kichiuakan ken tikchiuaj nion ma mokuayejyekokan ken timokuayejyekoaj. Okachi kuali, ma tikinmajsikamatikan uan ma tikinselikan ijkon ken yejuan kipiaj inyelis (xiktlajtolti Romanos 15:7).

Uelis yolik momatiskej akinmej uitsej itech okseki altepemej, pero amo ma timosotlauakan

16, 17. (1) ¿Ken uelis okachi tikinmixmatiskej akinmej uitsej itech okseki altepemej? (2) ¿Ken tikinpaleuiskej akinmej uitsej itech okseki altepemej tlen katej itech totlanechikol?

16 ¿Ken uelis okachi tikinmixmatiskej akinmej uitsej itech okseki altepemej? Uelis timomachtiskej itech inmialtepe uan tlen ompa kichiuaj. Ijkuak timomachtiskej iuan tokalchanejkauan uelis tikitaskej tlen kichiuaj itech inmialtepe akinmej katej itech totlanechikol noso itech toaltepe. Noijki  uelis tikinyoleuaskej ma tlakuatij tochan. Jehová ‘okintlapoli kaltlatsakuil akinmej amo judíos pampa tlaneltokaskej’ (Hechos 14:27, TNM). Ma tikchiuakan ken ye uan ma tikintlapolikan tokalijtik “tokniwah tlaneltokakeh” akinmej uitsej itech okseki altepemej (Gálatas 6:10; Job 31:32).

¿Tikteititiaj tikintlasojtlaj akinmej uitsej itech okseki altepemej? (Xikinmita párrafos 16 uan 17).

17 Tla tiyetoskej iuan akinmej uitsej itech okseki altepemej, techpaleuis ma tikajsikamatikan uan ma tikpatioitakan tlen kichiuaj pampa momatiskej itech toaltepe. Uelis tikinpaleuiskej ma momachtikan totlajtol. Noijki uelis tikinpaleuiskej ma kinmajsikan akinmej uelis kinmakaskej tekitl noso kanin chantiskej. Nochi nin tlamantli sapanoa kinpaleuis tokniuan (Proverbios 3:27).

18. ¿Ken uelis kichiuaskej ken Rut akinmej uitsej itech okseki altepemej?

18 Uan akinmej uitsej itech okseki altepemej, moneki mochijchikauaskej momatiskej. Uelis kichiuaskej ken Rut. Ye okitlakaitak tlen okichiuayaj itech altepetl kanin oajsito. ¿Ken okichi? Ijkuak otlajtlanki kox uelis motijtixis (Rut 2:7). Amo okijto san ijkon yaskia nion omokuayejyeko oksekimej omonekiaya kipaleuiskej. Uan noijki omotlasojkamatki ijkuak okipaleuijkej (Rut 2:13). Tla kichiuaj ken Rut akinmej uitsej itech okseki altepemej, kintlakaitaskej itech altepetl kanin oajsitoj.

19. ¿Tleka moneki kuali tikinseliskej akinmej uitsej itech okseki altepemej?

19 Tiyolpakij pampa Jehová nochtin kintlasojtla uan kinmachtia kuali tlajtolmej itech Biblia. Miakej akinmej uitsej itech okseki altepemej amo ueli omomachtiayaj Biblia nion monechikoskej itech inmialtepe. Pero ken axkan ueli touan monechikoaj, kuali ma tikinselikan uan ijkon kuali momachiliskej ken yetoskiaj itech inmialtepe. Uelis amo tikpiaj miak tomin noso amo uelis sapanoa tikinpaleuiskej. Pero tla tikinpaleuiaj, tikchiuaskej ken Jehová akin sapanoa kintlasojtla. Ik non, ma tikchiuakan ken Jehová uan ma timochijchikauakan kuali tikinseliskej akinmej uitsej itech okseki altepemej (Efesios 5:1, 2).

^ [1] (párrafo 1): Otikpatilijkej itoka.

^ párr. 4 Éxodo 23:9 kijtoa: “Amo xiktlajyouilti akin ochantiko kanin tichanti. Namejuan nankimatij ken momachiliaj akinmej chantitiuij itech okse altepetl, pampa namejuan onanchantitoj itech altepetl Egipto”.

^ párr. 10 Rut 2:5-7 kijtoa: “Satepan, Boaz okilui telpochtli akin okinyekanaya akinmej opixkayaj: ‘¿Akin ichpoch?’. Telpochtli akin okinyekanaya akinmej opixkayaj okinankili: ‘Nin ichpochtli se moabita, akin oualmokuepki iuan Noemí ijkuak okiskej itech altepetl Moab’. Ye okijto: ‘Nimitstlatlaujtia, ¿uelis nikololos uan nikpejpenas tlen mokajti itech tlen yokitekej?’. Uan kualkan oajsiko uan amo omoseui, san yikin axkan tepitsin omoseui”. Uan 2:15, 16 kijtoa: “Ijkuak omotijtixito, Boaz okinmilui telpokamej tlen okipaleuiayaj: ‘Xikkauilikan noijki ma motijtixi kanin ololitok tlen yonankitekej uan amo xikkuejsokan. Uan moneki nankikixtiskej seki xinachtli tlen yilpitok pampa ye ma kololo uan amo xikajuakan’”.