Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Diciembre de 2016

Ma tikiluikan Jehová nochi tlen techtekipachoa

Ma tikiluikan Jehová nochi tlen techtekipachoa

“Nochi tlan nomechtekipachoah, xiktlalikah imak Dios, porke Ye nomechmokuitlawia [noso namechmaluia]” (1 PEDRO 5:7).

TLAKUIKALMEJ: 38 UAN 23

1, 2. (1) ¿Tleka sekimej itekipanojkauan toTajtsin Dios motekipachoaj? (Xikita tlaixkopinal tlen ika peua tlamachtil). (2) ¿Tlen timomachtiskej?

AXKAN, Satanás “kitemojtinemi akin kixpolos, kemi yaskia se lío non kitemojtinemi akin kitlankokototsas iwa kikuas” (1 Pedro 5:8; Apocalipsis 12:17). Ik non, itlajtlakol timotekipachoaj. Tiitekipanojkauan toTajtsin Dios noijki timotekipachoaj. Uan tlen yiuejkika okatkaj noijki itlaj okintekipacho. Se neskayotl, Biblia kijtoa ueyi tekiua David ualeua sapanoa omotekipachoaya (Salmo 13:2). Uan tlatitlanil Pablo ‘okitekipacho kenomi okatkah sentetl n tokniwah’ (2 Corintios 11:28). Pero ¿tlen uelis tikchiuaskej tla sapanoa timotekipachoaj?

2 ToTajtsin Dios akin sapanoa techtlasojtla okinyolseui itekipanojkauan tlen yiuejkika okatkaj. Uan axkan noijki kineki techpaleuis. Biblia kijtoa ma tikiluikan Jehová nochi tlen techtekipachoa, pampa ye kineki techpaleuis (1 Pedro 5:7).  Itech nin tlamachtil tikitaskej naui tlamantli tlen uelis techpaleuiskej amo okachi ma timotekipachokan. Achto, ma timotlatlaujtikan. Ome, ma tiktlajtoltikan Biblia uan itech ma timokuayejyekokan. Eyi, ma tikkauilikan iespíritu santo Jehová ma techpaleui. Uan naui, ma tikiluikan se toyolikni ken timomachiliaj. Ijkuak timomachtiskej ninmej naui tlamantli, ma timokuayejyekokan ken uelis techpaleuis.

“XIKTLALI MOTLAMAMAL IPAN JEHOVÁ”

3. ¿Ken uelis tiktlaliskej “totlamamal ipan Jehová”?

3 Achto moneki ma tiktlalikan “totlamamal ipan Jehová”, kijtosneki ma tiktlatlaujtikan ika nochi toyolo uan ijkon okachi kuali timomachiliskej. Uan toTajtsin Dios kineki ma tikiluikan nochi tlen tikmachiliaj ijkuak itlaj techtekipachoa. David okitlatlaujti Jehová: “Oh toTajtsin Dios, xikkaki notlatlaujtilis”. Uan satepan okijto: “Xiktlali motlamamal ipan Jehová, uan ye mitspaleuis” (Salmo 55:1, 22). Ayakmo ma timotekipachokan tla yotikchijkej nochi tlen moneki pampa tikyektlaliskej se ouijkayotl. Ma timotlatlaujtikan ika nochi toyolo, non tlen okachi techpaleuis. Pero ¿ken uelis techpaleuis tlatlaujtilistli amo sapanoa ma timotekipachokan? (Salmo 94:18, 19).

4. ¿Tleka moneki ma timotlatlaujtikan ijkuak timotekipachoaj?

4 (Xiktlajtolti Filipenses 4:6, 7). ¿Ken technankilia Jehová ijkuak nochipa tiktlatlaujtiaj ika nochi toyolo? Ye uelis techpaleuis ma timoyolseuikan uan kichiuas amo ma techyolkoko tlen timokuayejyekoaj uan tlen tikmachiliaj. Ijkuak timotlatlaujtiaj itech itlaj tlen techtekipachoa noso techmomojtia, toTajtsin Dios okachi techyolseuia. Miakej tokniuan ijkon moyolseuiaj uan kuali momachiliaj uan tejuan noijki uelis ijkon timomachiliskej. “Iyolsewilis Dios” techpaleuis ma tikxikokan nochi ouijkayotl. Jehová kijtoa touan yetos, techyolchikauas uan techpaleuis, ik non, techiluia amo ma timomojtikan (Isaías 41:10). Uelis tikneltokaskej ika nochi toyolo tlen ye techiluia.

ITLAJTOL TOTAJTSIN DIOS TECHYOLSEUIA

5. ¿Ken uelis techpaleuis Biblia ma tikpiakan yolseuilistli?

5 Noijki tikpiaskej yolseuilistli tla tiktlajtoltiaj Biblia uan itech timokuayejyekoaj. ¿Tleka techpaleuia Biblia? Pampa iTlajtol toTajtsin Dios uan kipia tlanojnotsalmej tlen ye techmaka uan techpaleuia. Ik non, ijkuak timotekipachoaj, nochipa ma timokuayejyekokan itech iTlajtol toTajtsin Dios uan ken uelis techpaleuis tlen techiluia. Ijkon, uelis tikxikoskej tlen techtekipachoa noso ayakmo timotekipachoskej. Jehová kijtoa tla tiknekij ‘timoyolchikauaskej uan timochijchikauaskej’ uan amo timomojtiskej, moneki ma tiktlajtoltikan Biblia (Josué 1:7-9).

Tla titlaneltokaj itech Jehová ika nochi toyolo, tikneltokaskej techmakas tlen ika timopanoltiskej

6. ¿Ken techpaleuia tlen okijto Jesús?

 6 Ika Biblia noijki uelis tikmatiskej ken okintlapouiaya oksekimej Jesús. Tlaltikpaktlakamej okinpaktiaya kikakiskej Jesús pampa okinyolchikauaya uan okinyolseuiaya, okachi akinmej amo yolchikauakej uan akinmej omoyolkokoayaj (xiktlajtolti Mateo 11:28-30). Jesús okitekipachoaya ken omomachiliayaj oksekimej (Marcos 6:30-32). Ijkon ken Jesús okinpaleui itlatitlaniluan, axkan noijki kineki techpaleuis. Maski yejuan iuan okatkaj uan tejuan amo. Pero amo moneki tiyetoskej iuan Jesús pampa uelis techpaleuis. Ye toueyi tekiua uan techtlasojtla maski kajki iluikak. Ik non, ijkuak itlaj techtekipachos, ma tikilnamiktokan Jesús touan yetos uan techpaleuis ijkuak okachi monekis. Jesús techmaka chialistli uan yolchikaualistli, uan non techpaleuia ma tikxikokan tlen techtekipachoa (Hebreos 2:17, 18; 4:16).

TLEN KISA ITECH ESPÍRITU SANTO TECHPALEUIA

7. ¿Ken techpaleuia iespíritu santo toTajtsin Dios?

7 Axkan ma tikitakan tlamantli eyi tlen techpaleuis amo okachi ma timotekipachokan. Jesús okijto toTajtsin Dios techmakaskia iespíritu santo tla tiktlajtlaniliaj (Lucas 11:10-13). Espíritu santo kijtosneki ichikaualis toTajtsin Dios tlen tekiti uan techpaleuia ma tikpiakan toyelis ken ye (Colosenses 3:10). Biblia kijtoa toyelis moneki ma kisa itech espíritu santo (xiktlajtolti Gálatas 5:22, 23). Ijkuak ijkon tikpiaj toyelis, okachi kuali timouikaj iuan oksekimej uan amo okachi tikpiaj ouijkayotl tlen kichiuas ma timotekipachokan. Ma tikitakan ken techpaleuia espíritu santo.

8-12. ¿Ken techpaleuis ma tikpiakan toyelis tlen kisa itech espíritu santo?

8 “Tetlasojtla, kipia pakílistli, kipia yolsewílistli”. Amo okachi timotekipachoaj ijkuak tikintlakaitaj oksekimej uan tikintlasojtlaj. ¿Tleka? Pampa ijkuak titetlakaitaj uan titetlasojtlaj, amo san niman tikualanij, nion timotekipachoaj uan nion timoyolkokoaj. Ijkon, okachi kuali timouikaj iuan oksekimej (Romanos 12:10).

Ijkuak tikpiaj kuali toyelis, okachi kuali timouikaj iuan oksekimej

9 “Nochi kixikoa, kuali tlakatl, teiknomati”. Biblia kijtoa: “Xiyetokah nonkualtentlakah iwa xiteiknomatikah. Ximosepantlapojpolwikah” (Efesios 4:32). Ijkuak tiktlakamatij nin tlanojnotsalistli, tikpiaj yolseuilistli iuan oksekimej uan amo tikpiaj ouijkayotl tlen kichiua ma timotekipachokan. Noijki techpaleuis ma tikixnamikikan ouijkayotl tlen uelis tikpiaskej pampa titlajtlakolejkej.

10 “Tlaneltokak”. Ualeua techtekipachoa tomin noso tlen tiknekij tikpiaskej (Proverbios 18:11). ¿Tlen techpaleuis amo sapanoa ma techtekipacho non tlamantli? Tla tiktlakamatij tlen okijto tlatitlanil Pablo: “Xipakikah ika tlan ya nonkipiah”. Tla titlaneltokaj itech Jehová ika nochi toyolo, tikneltokaskej techmakas tlen ika timopanoltiskej. Ye techiluia: “Ayik nimitskajtewas moselti, nion nimitsilkawas”. Ik non, uelis tikijtoskej ken Pablo:  “Amo nimawi, amaka weletis itla nechtoktis porke Dios nechpalewia” (Hebreos 13:5, 6).

11 “Yolyamanki, kuali monawatia”. ¿Ken techpaleuia ma tiyetokan tiyolyamankej uan ma timonauatikan? Techpaleuis amo ma tikchiuakan nion ma tikijtokan tlamantli tlen uelis kichiuas ma timotekipachokan. Noijki amo tiyolchichiaskej, amo tikualaniskej, amo titetsatsajtsiliskej nion tikinuijuikaltiskej oksekimej (Efesios 4:31).

12 Moneki tiyetoskej tiyolyamankej uan ijkon titlaneltokaskej itech “imak Dios” tlen chikauak uan tikiluiskej nochi tlen techtekipachoa (1 Pedro 5:6, 7). Tla tiyolyamankej, Jehová techmaluis. Ijkuak tikmatij tlen ueli tikchiuaj uan tlen amo, tikteititiaj amo san totech titlaneltokaj. Ken titlaneltokaj itech toTajtsin Dios amo sapanoa timotekipachoaj (Miqueas 6:8).

“AMO XIMOTEKIPACHOKAH”

13. ¿Tlen okinekiaya kijtos Jesús ijkuak okijto “amo ximotekipachokah”?

13 Jesús okijto: “Amo ximotekipachokah” (xiktlajtolti Mateo 6:34). Uelis timokuayejyekoskej amo keman uelis ijkon tikchiuaskej. Pero ¿tlen okinekiaya kijtos Jesús? Amo okijto itekipanojkauan toTajtsin Dios amo keman motekipachoskej. Uan yotimomachtijkej, ueyi tekiua David uan tlatitlanil Pablo ualeua omotekipachoayaj. Jesús okinekiaya itekipanojkauan ma kajsikamatikan amo techpaleuia sapanoa uan nochipa timotekipachojtoskej. Mojmostla tikpiaj ouijkayotl, ik non, amo okachi ma timoouijtilikan pampa timokuayejyekojtoskej itech ouijkayotl tlen achto otechpanok noso tlen uelis tikpiaskej satepan. ¿Ken uelis techpaleuis tlen okijto Jesús amo okachi ma timotekipachokan?

14. ¿Ken uelis tikchiuaskej ken David uan ijkon amo sapanoa timotekipachoskej?

14 Ualeua techtekipachoa tlen yiuejkika otechpanok. Uelis ok techyolkokoaj tlen amo kuali otikchijkej maski yopanok miak xiuitl. Ualeua ueyi tekiua David ijkon omomachiliaya ijkuak okilnamikiaya itlajtlakol. Ijkuak otlajto itech tlen amo kuali okichi, ye sapanoa omotekipachoaya uan omoyolkokoaya (Salmo 38:3, 4, 8, 18). Ijkuakon, okichi itlaj tlen kuali, tlen noijki uelis tikchiuaskej. Okineltokak Jehová kiknomatiskia uan kitlapojpoluiskia. David sapanoa  oyolpakik ijkuak okimatki Jehová okitlapojpolui (xiktlajtolti Salmo 32:1, 5) *.

15. (1) ¿Tlen okse tlamantli timomachtiaj itech David? (2) ¿Tlen uelis tikchiuaskej uan ijkon amo sapanoa timotekipachoskej? (Xikita recuadro  “¿Tlen mitspaleuis amo okachi ximotekipacho?”).

15 Ualeua noijki techtekipachoa tlen axkan techpanotok. Se neskayotl, ijkuak David okijkuilo Salmo 55, omomojtiaya pampa sekimej okinekiayaj kimiktiskej (Salmo 55:2-5). Pero omochijchika amo sapanoa motekipachos uan otlaneltokak itech Jehová. David okitlatlaujti Jehová ma kipaleui. Pero noijki okimatiaya omonekiaya mochijchikauas kiyektlalis ouijkayotl tlen okipiaya (2 Samuel 15:30-34). Timomachtiaj okse tlamantli itech David. Amo san ma timotekipachokan, okachi kuali, ma timochijchikauakan tikyektlaliskej ouijkayotl uan ma tikneltokakan Jehová techpaleuis.

16. ¿Ken techyolchikaua tikmatiskej tlen kijtosneki itoka toTajtsin Dios?

16 Ualeua techtekipachoa tlen panos satepan. Pero amo ma timotekipachokan itech tlamantli tlen ayamo panoa. Ualeua miak tlamantli tlen techtekipachoa amo ijkon panoa. Uan noijki ma tikilnamikikan Jehová uelis kiyektlalis nochi ouijkayotl. Noijki tikajsikamatij itoka toTajtsin Dios kijtosneki “Ne Niyetos san tlen Nikpejpenas Niyetos”. Tikmatiskej nin, techyolchikaua (Éxodo 3:14). Tlen kijtosneki itoka toTajtsin Dios kiteititia ye kichiuas nochi tlen kineki pampa tejuan. Ik non, amo ma techtekipacho tlen panos satepan. Ma tikilnamiktokan toTajtsin Dios kinteochiuas itekipanojkauan yolmelajkej uan kinpaleuis amo sapanoa ma motekipachokan itech tlen yiuejkika opanok, tlen axkan panotok uan tlen panos satepan.

MA TIKILUIKAN SE TOYOLIKNI KEN TIMOMACHILIAJ

17, 18. ¿Ken techpaleuis ma timotlapouikan iuan se toyolikni ijkuak itlaj techtekipachoa?

17 Tla timotlapouiaj iuan se toyolikni uan tikiluiaj ken timomachiliaj uan tlen techtekipachoa, techpaleuis amo sapanoa ma timotekipachokan. Uelis timotlapouiskej iuan tonamik, se toyolikni noso se tlayekanki tlen techpaleuis ma tikajsikamatikan  tlen techpanoa. Biblia kijtoa: “Tlen kineki se tlakatl non tlen kitekipachojtok, pero se kuali tlajtoli non tlen kiyolchikaua” (Proverbios 12:25). Uan noijki kijtoa amo kuali kisa se tlamantli tla amo timotlapouiaj iuan oksekimej (Proverbios 15:22).

18 Nechikolmej noijki uelis techpaleuiskej amo sapanoa ma timotekipachokan. Ompa tikatej iuan tokniuan tlen techtlasojtlaj uan kinekij techyolchikauaskej (Hebreos 10:24, 25). Ken ompa ‘timoyolchikawakah’, non techpaleuis ma tikixnamikikan nochi ouijkayotl (Romanos 1:12).

TIMOUIKAJ IUAN TOTAJTSIN DIOS TECHYOLCHIKAUA

19. ¿Ken tikmati tla kuali timouika iuan Jehová mitspaleuis ijkuak tikpias ouijkayotl?

19 Se tlayekanki itech se nechikol tlen kajki itech ueyi altepetl Canadá, okajsikamatki moneki ma tikiluikan Jehová tlen techtekipachoa. Nin tokni kipia se tekitl oui. Tlamachtia uan kinpaleuia akinmej momachtiaj. Noijki kipia se kokolistli tlen kichiua sapanoa ma motekipacho. ¿Ken moyolchikaua? Sapanoa mochijchikaua kuali mouikas iuan Jehová. Noijki kipaleuiaj iyolikniuan uan kiluia isiua ken momachilia. Oksekimej tlayekankej uan tlayekanki itech circuito okipaleuijkej ma kita nochi tlamantli ken kita Jehová. Uan noijki akin tlapajtia okipaleui ma kajsikamati ikokolis. Ijkuakon, tokni okitak omonekiaya kipatlas seki tlamantli pampa okachi moseuiskia uan kichiuaskia ejercicio. Omochijchika ayakmo sapanoa motekipachos nion moyolkokos. Axkan kikaua imak Jehová tlen ye amo ueli kiyektlalia.

20. (1) ¿Ken uelis tikiluiskej Jehová tlen techtekipachoa? (2) ¿Tlen timomachtiskej chikome?

20 Itech nin tlamachtil otikitakej miak ipati ma tikiluikan Jehová tlen techtekipachoa noijki ma tiktlajtoltikan iTlajtol uan itech ma timokuayejyekokan. Noijki ma tikkauilikan iespíritu santo toTajtsin Dios ma techpaleui, ma timotlapouikan iuan se toyolikni uan ma timonechikokan. Itech okse tlamachtil tikitaskej ken techpaleuia tikmatiskej Jehová techteochiuas (Hebreos 11:6).

^ párr. 14 Salmo 32:1 kijtoa: “Yolpaki akin okitlapojpoluijkej itlajtlakol, uan itlajtlakol poliui”. Uan 32:5 kijtoa: “Saiktlami onikilui notlajtlakol; amo oniktlati tlen amo kuali onikchi. Onikijto: “Nikiluis Jehová nochi tlen amo kuali onikchi”. Uan te otinechtlapojpolui nochi notlajtlakoluan”.