Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Diciembre de 2016

Otechmakixti itlasojtlalis toTajtsin Dios

Otechmakixti itlasojtlalis toTajtsin Dios

“Tlajtlákoli ayakmó kipias weletílistli nomotech, porke nomejwah [...] nonkateh imak itlasojtlalis Dios” (ROMANOS 6:14).

TLAKUIKALMEJ: UAN 29

1, 2. ¿Ken techpaleuia Romanos 5:12?

ROMANOS 5:12 kijtoa: “Por itlajtlakol se tlakatl n tlajtlákoli okalak itech nin tlaltíkpaktli iwa okualík mikílistli, ijkó noiwa nochteh mikkih porke nochteh otlajtlakolchijkeh”. Kuali tikixmatij nin tlaxelol pampa tiktekitiltiaj ijkuak tikintlapouiaj tlaltikpaktlakamej.

2 Nin tlaxelol miak uelta motekitiltia itech amochtli ¿Tlen melauak tlamachtia Biblia? Ijkuak timomachtiaj tlamachtilmej 3, 5 uan 6 iuan tokoneuan uan tlaltikpaktlakamej, tiktlajtoltiaj Romanos 5:12. Ika nin tlaxelol tikinpaleuiaj ma kajsikamatikan tleka axkan Tlaltikpak amo se xochitlali noijki tleka omonekiaya ikaj ma techmakixti uan tleka timikij. Pero noijki nin tlaxelol techpaleuia okachi ma tikpatioitakan ken timouikaj iuan Jehová. Noijki techpaleuia ma tiktlakamatikan Jehová uan ma tikchiakan nochi tlen yokijto techmakas.

3. ¿Tlen moneki tinochtin ma tikilnamikikan?

3 Ma tikilnamikikan tinochtin titlajtlakolejkej uan mojmostla tikchiuaj tlen amo kuali. Uan maski Jehová kimati titlajtlakolejkej,  techiknomati uan kineki techtlapojpoluis (Salmo 103:13, 14). Jesús otechmachti ma tikiluikan toTajtsin Dios ma techtlapojpolui (Lucas 11:2-4). Tla Jehová yotechtlapojpolui tlen achto otikchijkej, ayakmo ma timokuayejyekojtokan itech tlen amo kuali otikchijkej. Ma tikitakan tleka Jehová uelis techtlapojpoluis.

¿TLEKA JEHOVÁ UELIS TECHTLAPOJPOLUIS?

4, 5. (1) ¿Tlen techpaleuia ma tikajsikamatikan Jehová uelis techtlapojpoluis? (2) ¿Tlen kijtosneki “Dios ika iteiknomatilis”?

4 Carta tlen okinmijkuililijkej Romanos, okachi tlakotonal 6, techpaleuia ma tikajsikamatikan tleka Jehová uelis techtlapojpoluis. Itech Romanos 3:23, 24, tlatitlanil Pablo kiyekijtoa tinochtin titlajtlakolejkej uan noijki kijtoa: “Dios ika iteiknomatilis techchipawa tinochteh san ijki, akimeh tikneltokah, porke Cristo Jesús okitlaxtla ika iesso por totlajtlakolwah”. Ijkuak Pablo okijto “Dios ika iteiknomatilis”, okinekiaya kijtos toTajtsin Dios otechchiuili tlen kuali pero amo kichia itlaj ma tikmakakan, otikselijkej itlaj tlen amo otikmotlanilijkej uan amo technamiki tikpiaskej.

5 Se ixtlamatki kijtoa, iteiknomatilis toTajtsin Dios uan Cristo, kijtosneki tlen yejuan okichijkej pampa kinmakixtiskej tlaltikpaktlakamej itech tlajtlakoli uan mikilistli. Ik non, Traducción del Nuevo Mundo kijtoa “tlamantli kuali tlen amo technamiki tikpiaskej”. Ma tikitakan tlen toTajtsin Dios yokichi topatka uan ken itlasojtlalis techpaleuia axkan uan techmaka se chialistli.

Jehová okiteititi itlasojtlalis “por se tlakatl, Ye, Cristo Jesús”

6. ¿Akinmej uelis kinpaleuis itlasojtlalis toTajtsin Dios uan tlen kipiaskej satepan?

6 Ken Adán otlajtlakolchi, tinochtin titlajtlakolejkej uan timikij. Ik non, Biblia kijtoa “por se tlakatl” tlen itoka Adán opejki mikilistli. Pero Jehová okiteititi itlasojtlalis “por se tlakatl, Ye, Cristo Jesús” akin okinmakixti nochtin tlaltikpaktlakamej (Romanos 5:12, 15, 17). Ik non, tinochtin uelis techpaleuis itlasojtlalis toTajtsin Dios. Kema, “por se tlakatl, Cristo non otetlakitak, miakeh tlakah yetoskeh chipawakeh de intlajtlakol”. Noijki ‘kipiaskeh nemílistli nochipa’ (Romanos 5:19, 21).

7. ¿Tleka tlaxtlauili kiteititia itlasojtlalis toTajtsin Dios?

7 Imikilis Jesús se tetliokolil tlen amo technamiki tikpiaskej tlen otechmakak toTajtsin Dios. Ma timokuayejyekokan itech nin: Jehová sapanoa yolkuali, ik non, okitlali tlen ika techmakixtis itech tlajtlakoli uan mikilistli. Pero amo omonekiaya ma kitemaka iKone ken tlaxtlauili. Noijki amo technamiki tlen Jehová uan Jesús okichijkej pampa techtlapojpoluiskej uan tiyoltoskej nochipa. Ika tonemilis uelis tikteititiskej sapanoa tiktlasojkamatiliaj toTajtsin Dios.

MA TIKTLASOJKAMATILIKAN ITLASOJTLALIS TOTAJTSIN DIOS

8. ¿Tlen amo moneki ma timokuayejyekokan?

8 Kuali tikmatij toTajtsin Dios kineki techtlapojpoluis nochi tlajtlakoli tlen tikchiuaj.  Pero amo keman ma timokuayejyekokan uelis titlajtlakolchiuaskej uan Jehová san niman techtlapojpoluis pampa ye yolkuali. Ijkon okichijkej sekimej tokniuan itech achto siglo, maski ok oyoltokaj tlatitlanilmej (xiktlajtolti Judas 4). Axkan noijki amo ma tikinkauilikan oksekimej ma techchiualtikan ijkon ma timokuayejyekokan.

9, 10. ¿Tleka Pablo okijto ye uan oksekimej tokniuan ‘yomikkeh imak tlajtlákoli’?

9 Tlatitlanil Pablo okinmilui tokniuan amo ma mokuayejyekokan toTajtsin Dios kintlapojpoluiskia maski san tlen tlajtlakoli kichiuaskiaj. Noijki okinmilui amo ijkon ma mokuayejyekokan pampa yejuan ‘yomikkeh imak tlajtlákoli’ (xiktlajtolti Romanos 6:1, 2). ¿Tlen kijtosneki tlen okijto Pablo?

Moneki ma tikpejpenakan kox tikkauiliskej ma techyoltilana tlen amo kuali noso amo

10 Ika imikilis Jesús, toTajtsin Dios okitlapojpolui Pablo uan oksekimej tokniuan itech achto siglo. Jehová okinpejpenki ika espíritu santo uan ijkon ma yetokan ikoneuan. Tla yetoskiaj yolmelajkej, yoltoskiaj itech iluikak uan tlanauatiskiaj iuan Jesús. Pero ok okatkaj itech Tlaltikpak. Tla ijkon, ¿tleka Pablo okijto ‘yomikkeh imak tlajtlákoli’? Okipatlakej nochi innemilis. Pablo okitekitilti ineskayo Jesús pampa kiyekijtos non. Okijto mikilistli ayakmo okinauatiaya Jesús pampa Jehová okiyoliti ken se espíritu tlen amo keman mikis. Noijki ijkon, tokniuan ‘yomikkah imak tlajtlákoli’ pero ‘oyolitokah para Dios por oseititokah iwan Cristo Jesús’ (Romanos 6:9, 11). Ken ayakmo okichiuayaj tlen amo kuali, nochi innemilis omopatlak. Noijki sapanoa omochijchikauayaj kiyolpaktiskej toTajtsin Dios.

11. ¿Ken ‘yotimikkeh imak tlajtlákoli’ akinmej tikchiuaj ken Cristo?

11 ¿Uan tejuan ken noijki ‘yotimikkeh imak tlajtlákoli’? Achto otikchijkej miak tlamantli tlen amo kuali ijkuak amo otikmatiayaj ken kita Jehová tlen otikchiuayaj. Ijkon ken kijtoa Biblia, ‘otilpitokah itech tlajtlákoli’ (Romanos 6:19, 20). Pero ijkuak otimomachtijkej Biblia otikmatkej ken kineki toTajtsin Dios ma tikpiakan tonemilis, otikkajkej tlen amo kuali, otimotemakakej ixpan Jehová uan otimoapolaktijkej. Otiknekiayaj tiktlakamatiskej Jehová ika nochi toyolo uan tikpiaskej tonemilis ken ye kineki. Ijkuakon, ‘ayakmó otechnawati n tlajtlákoli’ uan otimochijkej ‘tlanémakteh itech n yekmilawálistli’ (Romanos 6:17, 18).

12. ¿Tlen moneki ma tikpejpenakan?

12 Pablo okijto: “Amo xikkawilikah manomechnawati n tlajtlákoli itech nomokuerpo non mikkis, para amo manomechtojtopewa itech tlan amokuali kineki kichiwas nomokuerpo” (Romanos 6:12). Ik non, moneki ma tikpejpenakan kox tikkauiliskej ma techyoltilana tlen amo kuali noso amo. Ma timotlajtlanikan: “¿Nikkauilia tlen amo kuali nikneki nikchiuas ma nechtlani uan nitlajtlakolchiua? ¿Noso san niman nikixtopeua tlen amo kuali?”. Tla melauak tiktlasojkamatiliaj itlasojtlalis toTajtsin Dios, timochijchikauaskej tikyolpaktiskej.

UELIS TIKTLANILISKEJ TLAJTLAKOLI

13. ¿Tlen neskayomej techititiaj uelis tikchiuaskej tlen kuali?

13 Ma tikitakan tlen okinpanok sekimej tokniuan itech achto siglo uan non techmachtis  uelis tikchiuaskej tlen kuali. Itech altepetl Corinto, sekimej otlachtekiayaj, omotlakakuepayaj noso omosiuakuepayaj, oauilnemiayaj, okinueyichiuayaj teotsitsintin uan otlauanayaj. Pero ijkuak okixmatkej Jehová uan okitlasojtlakej, opejkej pinauaj pampa okichijtokaj tlen amo kuali uan okipatlakej innemilis (Romanos 6:21; 1 Corintios 6:9-11). Tokniuan akinmej ochantiayaj itech altepetl Roma noijki okipatlakej innemilis. Pablo okinmilui: “Amo xiktemakakah nomokuerpo itech tlajtlákoli para kichiwas tlan amokuali. Yej ximotemaktikah inawak Dios kemi yaskia ononmikkeh iwa ononmoyolitijkeh. Xiktemakakah nomokuerpo ika yekmilawálistli para Dios” (Romanos 6:13). Pablo okimatiaya tokniuan uelis kichiuaskiaj tlen kuali uan kiseliskiaj itlasojtlalis toTajtsin Dios.

14, 15. ¿Tlen uelis timotlajtlaniskej?

14 Ijkon panoa axkan. Sekimej tokniuan amo kuali okipiayaj innemilis ken akinmej ochantiayaj itech altepetl Corinto. Pero ijkuak okixmatkej Jehová, okipatlakej innemilis uan omochijkej ‘yolchipawakeh’. Tinochtin otikpatlakej tonemilis uan ijkon tikyolpaktiaj Jehová. Pero nochipa ma tiktlasojkamatilikan itlasojtlalis toTajtsin Dios. ¿Ken uelis tikchiuaskej? Ma tikixtopeuakan tlen amo kuali uan ma tiktekichiuilikan Jehová.

15 Moneki timochijchikauaskej amo titlajtlakolchiuaskej ken akinmej ochantiayaj itech altepetl Corinto. Amo uelis titlajtlakolchijtoskej uan tikchiaskej Jehová ma techiknomati uan ma techtlapojpolui. Pero uelis timotlajtlaniskej: “¿Uelis nikchiuas itlaj tlen amo kuali maski sekimej kijtoa amo tlajtlakoli? ¿Tiktlakamatiskej Jehová itech nochi tonemilis?” (Romanos 6:14, 17).

16. ¿Ken techititia ineskayo Pablo amo ma tikchiuakan tlen moijtoa itech 1 Corintios 6:9-11?

16 Ma timokuayejyekokan itech tlatitlanil Pablo. Ye okijkuilo: “Pero ne ni tlaltikpaktlakatl onimonamák imak tlajtlákoli. Amo nikajsikamati tlan nikchiwa, porke amo nikchiwa tlan ne nikneki, yej nikchiwa tlan ne nikkokolia” (Romanos 7:14, 15). Maski amo okichijtoka tlen moijtoa itech 1 Corintios 6:9-11, Pablo okijto ok otlajtlakolchiuaya. Pero ken okinekiaya kiyolpaktis toTajtsin Dios, nochipa omochijchika kichiuas tlen kuali (xiktlajtolti Romanos 7:21-23). Ma tikchiuakan ken ye uan ma tiktlakamatikan Jehová.

17. ¿Tleka tejuan amo titlakajkayauaj?

17 Se neskayotl, kuali tikmatij tla tiknekij tiktekichiuiliskej Jehová moneki nochipa ma tikijtokan tlen melauak uan amo ma titlakajkayauakan (xiktlajtolti Proverbios 14:5; * Efesios 4:25). Amo tiknekij tiyetoskej ken Satanás, akin “teta de nochteh non tlakajkayawah”. Noijki tikilnamikij  Ananías uan isiua omikej ijkuak otlakajkayajkej. Ik non, tejuan amo titlakajkayauaj (Juan 8:44; Hechos 5:1-11). Pero tla tiknekij tiyetoskej tiyolmelajkej, amo san moneki amo ma titlakajkayauakan. Tla melauak tiktlasojkamatiliaj itlasojtlalis toTajtsin Dios, moneki tiyetoskej tiyolmelajkej itech okseki tlamantli.

18, 19. ¿Tlen amo tikchiuaskej tla tiknekij tiyetoskej tiyolmelajkej?

18 Tla tiknekij tiyetoskej tiyolmelajkej, amo san moneki amo ma titlakajkayauakan. Noijki moneki tikchiuaskej okseki tlamantli. Se neskayotl, Jehová okinmilui israelitas: “Amo xitlachtekikan nion xitlakajkayauakan uan amo xikinmiluikan oksekimej tlen amo melauak”. ¿Tleka omonekiaya kitlakamatiskej nin tlanauatil? Jehová okinmilui: “Moneki nanyetoskej nanchipauakej, pampa ne Jehová nimoDios nichipauak” (Levítico 19:2, 11). Maski amo titlakajkayauaj, amo tiyolmelajkej tla tikchiuaj oksekimej ma kineltokakan itlaj tlen amo melauak.

¿Melauak amo tiknekij titlakajkayauaskej? (Xikita párrafo 19).

19 Se neskayotl, ma timokuayejyekokan se tlakatl kiluia iteko moneki kisas okachi kualkan pampa mopajtiti. Pero non amo melauak. Ye kintlajpaloti iyolikniuan,  ik non, yikineki yas. Uan amo mopajtiti, san moneki kikoati pajtli. ¿Uelis tikijtoskej yolmelajki nin tlakatl? ¿Noso kineki tlakajkayauas? Nin tlakatl okichi oksekimej ma kineltokilikan tlen amo melauak. Ualeua, tlaltikpaktlakamej tlakajkayauaj pampa kinekij itlaj kipiaskej noso pampa amo tlajyouiskej. Pero tejuan tiktlakamatij Jehová akin kijtoa: ‘Amo xitlakajkayauakan’. Tiknekij tikchiuaskej tlen toTajtsin Dios kijtoa kuali uan chipauak (Romanos 6:19).

20, 21. ¿Tlen amo tikchiuaskej tla tiktlasojkamatiliaj itlasojtlalis toTajtsin Dios?

20 Kuali tikmatokej amo kuali ma tiauilnemikan, ma titlauanakan nion ma tikchiuakan okseki tlajtlakoli. Pero tla tiktlasojkamatiliaj itlasojtlalis toTajtsin Dios, noijki amo tikchiuaskej itlaj tlen amo kipaktia. Se neskayotl, tejuan amo tiauilnemij, pero noijki amo timoyolpaktiaj ika tlen pitsotik. Uan noijki amo titlauanaj, pero noijki amo tikonij miak alcohol tlen kichiuas ma tiuintikan. Oui tikixtopeuaskej tlen amo kuali, pero tla timochijchikauaj uelis tikchiuaskej tlen kuali.

21 Ma timochijchikauakan ma tikchiuakan tlen okijto Pablo: “Nomejwah amo xikkawilikah manomechnawati n tlajtlákoli itech nomokuerpo non mikkis, para amo manomechtojtopewa itech tlan amokuali kineki kichiwas nomokuerpo” (Romanos 6:12; 7:18-20). Ken titlajtlakolejkej, ualeua tikchiuaj itlaj tlen amo kuali. Pero tla timochijchikauaj tikixtopeuaskej tlajtlakoli, tikteititiskej tiktlasojkamatiliaj itlasojtlalis Jehová uan Jesús.

22. ¿Tlen tikseliskej tla tiktlasojkamatiliaj itlasojtlalis toTajtsin Dios?

22 Jehová yotechtlapojpolui uan ok uelis kichiuas. Sapanoa tiktlasojkamatiliaj itlasojtlalis. Amo ma tikchiuakan tlen toTajtsin Dios kijtoa amo kuali, maski tlaltikpaktlakamej kijtoskej amo tlajtlakoli. ¿Tlen tikseliskej tla ijkon tikchiuaj? Pablo okijto: “Axa ya nonteaxkatitokeh inawak Dios para nonkitlakitaskeh. Noni kema nomechpalewia, porke kichiwa xinemikah ika nomoyolo chipawak inawak Dios, iwa nonkipiaskeh nemílistli non ayik tlami” (Romanos 6:22).

^ párr. 17 Proverbios 14:5 kijtoa: “Se tlaixpantijka tlen yolmelajki amo tlakajkayauas, pero se tlaixpantijka tlen amo yolmelajki san tlakajkayajtok”.