Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Diciembre de 2016

“Akin motekipachoa kichiwas tlan n Espíritu kineki, yolitos iwa kipias yolsewílistli”

“Akin motekipachoa kichiwas tlan n Espíritu kineki, yolitos iwa kipias yolsewílistli”

“Akimeh nemih kemi n Espíritu kineki, yejwah okachi kintekipachoa kichiwaskeh tlan n Espíritu kineki” (ROMANOS 8:5).

TLAKUIKALMEJ: 22 UAN 52

1, 2. ¿Tleka Romanos tlakotonal 8 sapanoa kinpaleuia tlapejpenalmej?

IJKUAK otikilnamikej imikilis Jesús uelis otiktlajtoltijkej Romanos 8:15-17. Ninmej tlaxelolmej kiyekijtoaj ken kimatij tlapejpenalmej nochipa yoltoskej iluikak. Romanos 8:1 kijtoa tlapejpenalmej “seititokeh iwan Cristo Jesús”. Pero ¿san tlapejpenalmej kinpaleuia tlen kijtoa Romanos tlakotonal 8? ¿Noijki kinpaleuia akinmej yoltoskej nochipa itech Tlaltikpak?

2 Romanos tlakotonal 8 okinmijkuililijkej tlapejpenalmej. Nin tlaxelol kijtoa tlapejpenalmej kiseliaj “Espíritu” uan kichiaj ‘tonati ijkuak Dios kinselis kemi ipilwah, ijkuak kiyankuilis inkuerpo non mikki’ (Romanos 8:23). Ijkuak yikatej iluikak, mochiuaj ipiluan toTajtsin Dios. Ika imikilis Cristo, Jehová yokintlapojpolui uan axkan katej yolmelauakej, ik non, uelis yetoskej ipiluan (Romanos 3:23-26; 4:25; 8:30).

3. ¿Tleka moneki momachtiskej Romanos tlakotonal 8 akinmej yoltoskej nochipa itech Tlaltikpak?

 3 Itech Romanos tlakotonal 4, Pablo otlajkuilo itech Abrahán. Nin tlakatl okatka yolmelajki uan oyoltoka miak xiuitl achto ualaskia Jesús uan topatka kitemakaskia iyolilis. Uan maski Abrahán amo okatka tlapejpenal, ixpan Jehová okatka yolmelauak (xiktlajtolti Romanos 4:20-22). Axkan, Jehová noijki kinmita yolmelauakej akinmej kichiaj yoltoskej nochipa itech Tlaltikpak. Ninmej tokniuan noijki moneki momachtiskej Romanos tlakotonal 8 pampa tlen ompa kijtoa uelis kinpaleuis.

4. ¿Tlen moneki timotlajtlaniskej ijkuak tiktlajtoltiaj Romanos 8:21?

4 Itech Romanos 8:21, Jehová kijtoa “nochi tlan onka itech nin tlaltíkpaktli momakixtis” itech tlajtlakoli uan mikilistli. Nin kijtosneki akinmej chantiskej itech Xochitlali “momakixtiskeh [...] iwa ijkó sansikah kipiaskeh weyílistli”. Ijkuak tiktlajtoltiaj nin tlaxelol ma timotlajtlanikan: “¿Nimota yinika itech Xochitlali?”. Ma tikitakan tlen moneki tikchiuaskej pampa tiyetoskej itech Xochitlali.

“AKIN SA KILNAMIKTOK KICHIWAS TLAN IKUERPO KELEWIA”

5. ¿Tlen okijto Pablo itech Romanos 8:4-13?

5 (Xiktlajtolti Romanos 8:4-13). Itech Romanos tlakotonal 8, Pablo otlajto itech ome tlaltikpaktlakamej tlen kipiaj tlatlamantli inyelis. Otlajto itech ‘akinmeh sa kilnamiktokeh kichiwaskeh tlan inkuerpo  kelewia’ uan itech ‘akinmeh motekipachoaj kichiwaskeh tlan n Espíritu kineki’. Uelis timokuayejyekoskej Pablo otlajtojtoka itech akinmej okichiuayaj ken Cristo uan akinmej amo. Pero Pablo okinmijkuilili non carta akinmej okichiuayaj ken Cristo tlen “yolchipawakeh” noso santos (Romanos 1:7). Ik non, ‘akinmeh sa okilnamiktokah kichiwaskeh tlan inkuerpo kelewia’ uan ‘akinmeh omotekipachoayaj kichiwaskeh tlan n Espíritu kineki’ okichiuayaj ken Cristo. Pero ¿tleka okatkaj tlatlamantli?

6, 7. (1) ¿Tlen kijtosneki tlajtoli ‘kuerpo’ itech Biblia? (2) ¿Tlen kijtosneki tlajtoli ‘kuerpo’ tlen okijto Pablo itech Romanos 8:4-13?

6 Itech Biblia tlajtoli ‘kuerpo’ tlatlamantli kijtosneki. Ualeua kijtosneki itlalnakayo se tlaltikpaktlakatl (Romanos 2:28; 1 Corintios 15:39, 50). Noijki kijtosneki sekimej omotayaj ken kalchanejkej. Se neskayotl, Biblia kijtoa Jesús “otlákatki kemi tejwah titlakatih, iwa walewatok itech rey David”. Uan Pablo okijto: “Nokniwah judíos non ken nikinmita” (Romanos 1:3; 9:3).

7 Ik non, ¿tlen kijtosneki tlajtoli ‘kuerpo’ tlen okijto Pablo itech Romanos 8:4-13? Pampa tikajsikamatiskej, ma tikitakan tlen kijtoa Romanos 7:5. Ompa Pablo okijto ye uan oksekimej ‘okichiwayah tlan inkuerpo okelewiaya’ achto tlaneltokaskiaj uan ‘okinyoltilanaya n tlajtlákoli para makichiwakah tlan amo kuali’. Ik non, akinmej ‘kichiwah tlan inkuerpo kelewia’ yejuan akinmej kichiuaj tlen amo kuali mokuayejyekoaj.

8. ¿Tleka Pablo okinmilui tlapejpenalmej amo ma ‘kichiwakah tlan inkuerpo kelewia’?

 8 ¿Tleka Pablo okinmilui tlapejpenalmej amo ma ‘kichiwakah tlan inkuerpo kelewia’? Pampa se itekipanojka toTajtsin Dios uelis san kipatioitas tlen ye kineki kichiuas. Se neskayotl, Pablo okijto sekimej tokniuan tlen ochantiayaj Roma san okichiuayaj tlen okinekiayaj. Uelis yejuan okachi okipatioitayaj itech innemilis tlakuali, ijkuak se tlakatl moteka iuan se siuatl, noso okseki tlamantli (Romanos 16:17, 18; Filipenses 3:18, 19; Judas 4, 8, 12). Uan itech altepetl Corinto, se tlakatl tlen okichiuaya ken Cristo omotekaya iuan isiua itajtsin (1 Corintios 5:1). Ken tikitaj, tokniuan itech achto siglo omonekiaya ijkon ma kinnejmachti Pablo pampa amo “kichiwaskeh tlan inkuerpo kelewia” (Romanos 8:5, 6).

9. ¿Tlen amo kijtosneki Romanos 8:6?

9 Tejuan noijki techpaleuia tlen okijto Pablo. Hasta ikaj tlen yikipia miak xiuitl kitekichiuilijtok Jehová uelis peuas ‘kichiwas tlan ikuerpo kelewia’. Pero Romanos 8:6 amo kijtosneki amo ma timokuayejyekokan itech tlakuali, tekitl, tlen ika timoyolpaktiaj noso itech tlasojtlalistli. Nochi non tlamantli tinochtin itech mokuayejyekoaj. Noijki Jesús oyolpakik ijkuak otlakua uan okintlamakak miakej tlaltikpaktlakamej. Ualeua noijki omoseuiaya. Noijki Pablo okijto tlakatl akin yomonamikti omonekiaya motekas iuan isiua.

¿Itech tlen techpaktia timotlapouiskej? (Xikinmita párrafos 10 uan 11).

10. ¿Tlen kijtosneki ijkuak ikaj “sa kilnamiktok [itlaj] kichiwas”?

10 ¿Tlen kijtosneki ijkuak ikaj “sa kilnamiktok [itlaj] kichiwas”? Pablo otlapojtoka itech ikaj tlen san se tlamantli mokuayejyekojtok. Se ixtlamatki okijto non kijtosneki ijkuak ikaj san mokuayejyekoa itech tlen kineki kichiuas uan nochipa itech tlapojtok. Tlen kineki kichiuas kiyoltilana uan kinauatia.

¿Tlen tlamantli okachi tikpatioitaj?

11. ¿Tlen tlamantli uelis okachi tikinpatioitaskej?

11 Akinmej okichiuayaj ken Cristo tlen ochantiayaj itech altepetl Roma omonekiaya ma mokuayejyekokan tlen okachi okipatioitayaj. ¿Okipatioitayaj “kichiwaskeh tlan inkuerpo kelewia”? Axkan tejuan noijki moneki tikitaskej tlen okachi tikpatioitaj. ¿Tlen tlamantli uelis okachi tikpatioitaskej? Pampa tikmatiskej, ma timotlajtlanikan: “¿Itech tlen okachi nechpaktia nimotlapouis? ¿Tlen okachi nechpaktia nikchiuas?”. Sekimej san mokuayejyekojtokej itech tlatlamantli vino tlen onka, ken uelis kualtsin yetos inkalijtik, kimokouiskej intlaken, ken kimiaktiliskej intomin noso kanin paxialotiuij. Ninmej tlamantli amo tikijtoaj amo kuali. Tinochtin itech timokuayejyekoaj. Uan itech vino ma tikilnamikikan ome neskayomej. Se, ijkuak Jesús okimiaktili vino ijkuak sekimej omonamiktijkej, uan okse, ijkuak Pablo okilui Timoteo ma koni “achitsi vino” pampa ayakmo okachi kikokoskia ijtik (1 Timoteo 5:23; Juan 2:3-11). Pero yejuan amo okachi okipatioitayaj vino. ¿Tejuan tlen okachi tikpatioitaj?

12, 13. ¿Tleka moneki ma tikitakan tlen okachi tikpatioitaj itech tonemilis?

 12 ¿Tleka moneki ma tikitakan tlen okachi tikpatioitaj itech tonemilis? Pablo okijto: “Akin sa kilnamiktok kichiwas tlan ikuerpo kelewia, san semi moixpolos” (Romanos 8:6). Tla ‘tikchiwaskeh tlan tokuerpo kelewia’, ayakmo uelis timouikaskej iuan toTajtsin Dios uan satepan hasta uelis timikiskej. Pero uelis itlaj tikchiuaskej uan amo ijkon techpanos. Tinochtin uelis tikpatlaskej tonemilis. ¿Tikilnamiki tlakatl tlen oauilnemiaya tlen ochantiaya itech altepetl Corinto uan okikixtijkej itech tlanechikol? Okipatlak inemilis, noijki ayakmo oauilnenki uan oksepa opejki kitekichiuilia Jehová (2 Corintios 2:6-8).

13 Maski non tlakatl sapanoa ‘okichiwaya tlan ikuerpo okelewiaya’, okipatlak inemilis. Tla se tokni opejki kichiua san tlen kineki uan ayakmo kintlakamati itlanauatiluan Jehová, ye noijki uelis kipatlas inemilis. Tla kilnamiki tlen okijto Pablo, non kiyolinis ma kipatla inemilis.

“AKIN MOTEKIPACHOA KICHIWAS TLAN N ESPÍRITU KINEKI”

14, 15. (1) ¿Itech tlen moneki ma timokuayejyekokan? (2) ¿Tlen amo kichiuas “akin motekipachoa kichiwas tlan n Espíritu kineki”?

14 Ijkuak Pablo okijto tlen kinpanos ‘akinmeh sa kilnamiktokeh kichiwaskeh tlan inkuerpo kelewia’, noijki okiyekijto: “Akin motekipachoa kichiwas tlan n Espíritu kineki, yolitos iwa kipias yolsewílistli”. Melauak non se tlateochiualistli.

15 Pero ijkuak okijto “akin motekipachoa kichiwas tlan n Espíritu kineki”, amo kijtosneki san timokuayejyekojtoskej itech Jehová, itech Biblia uan nochipa san itech non tlamantli timotlapouiskej. Akinmej tikchiuaj ken Cristo amo okse tlamantli tikpiaj tonemilis. Se neskayotl, tokniuan tlen okatkaj itech achto siglo otlakuayaj, itlaj okoniayaj, omonamiktiayaj, okinpiayaj inkalchanejkauan uan otekitiayaj (Marcos 6:3; 1 Tesalonicenses 2:9).

Pablo okachi okipatioitaya kitekichiuilis Jehová

16. ¿Tlen okachi okipatioitaya Pablo?

16 Pero nion Pablo uan oksekimej akinmej kichiuaj ken Cristo amo non tlamantli tlen okachi okipatioitakej. Se neskayotl, tikmatij Pablo okinchijchiuaya mantajkalmej uan ijkon kipiaskia tlen ika mopanoltiskia. Pero amo okachi okipatioitaya iteki. Ye okachi okipatioitaya kitekichiuilis Jehová. Ye ika nochi iyolo otetlapouiaya uan otlamachtiaya (xiktlajtolti Hechos 18:2-4; 20:20, 21, 34, 35). Tokniuan tlen ochantiayaj itech altepetl Roma omonekiaya kichiuaskej ken Pablo uan tejuan noijki ijkon ma tikchiuakan (Romanos 15:15, 16).

17. ¿Tlen tikseliskej tla tikchiuaj “tlan n espíritu kineki”?

17 ¿Tlen tikseliskej tla tikchiuaj “tlan n espíritu kineki”? Romanos 8:6 kijtoa: “Akin motekipachoa kichiwas tlan n Espíritu kineki, yolitos iwa kipias yolsewílistli”. Nin tlajtoli kijtosneki tikkauiliaj Jehová ma kiyekana tokuayejyekol ika iespíritu uan ijkon timokuayejyekoskej ken ye. Jehová techiluia tiyolpakiskej axkan uan  satepan tikpiaskej yolilistli tlen amo keman tlamis.

Jehová uelis techmakas yolseuilistli

18. ¿Ken tikpiaskej yolseuilistli tla ‘timotekipachoah tikchiwaskeh tlan n Espíritu kineki’?

18 Pablo noijki okijto “akin motekipachoa kichiwas tlan n Espíritu kineki, [...] kipias yolsewílistli”. Tinochtin tiknekij tikpiaskej yolseuilistli, okachi itech tokuayejyekol. Pero san sekimej kipiaj yolseuilistli. ¿Ken tikpiaskej yolseuilistli tla ‘timotekipachoah tikchiwaskeh tlan n Espíritu kineki’? Jehová uelis techmakas yolseuilistli. Noijki uelis tikpiaskej yolseuilistli iuan tokalchanejkauan uan noijki iuan tokniuan. Ken tinochtin titlajtlakolejkej, ualeua tikpiaj ouijkayotl iuan tokniuan. Tla ijkon techpanoa, tikchiuaj tlen okijto Jesús: “Ximotlapojpolwiti iwa mokni” (Mateo 5:24). Ma tikilnamikikan tokniuan noijki kitekichiuiliaj “Totajtsi Dios Akin techmaka yolsewílistli” (Romanos 15:33; 16:20).

19. ¿Iuan akin noijki tikpiaskej yolseuilistli tla ‘timotekipachoah tikchiwaskeh tlan n Espíritu kineki’?

19 Tla ‘timotekipachoah tikchiwaskeh tlan n Espíritu kineki’, noijki tikpiaskej yolseuilistli iuan toTajtsin Dios. Teotlajtojki Isaías okijto Jehová kinmaluis akinmej itech tlaneltokaj ika nochi inyolo uan nochipa kinmakas yolseuilistli (Isaías 26:3; xiktlajtolti Romanos 5:1).

20. ¿Tlen tikseliskej tla ‘timotekipachoah tikchiwaskeh tlan n Espíritu kineki’?

20 Maski tiyoltoskej nochipa itech Tlaltikpak noso itech iluikak, tinochtin techpaleuia tlen kijtoa Romanos tlakotonal 8. Tiktlasojkamatij Biblia techyoleua ma tiktekichiuilikan Jehová uan amo san ma tikchiuakan tlen tejuan tiknekij. Tla ‘timotekipachoah tikchiwaskeh tlan n Espíritu kineki’, tikseliskej se tlateochiualistli: “Nemílistli non ayik tlami” tlen tikseliskej ika imikilis Jesús (Romanos 6:23).