Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Diciembre de 2016

Jehová kinteochiua akinmej kitemoaj ika nochi inyolo

Jehová kinteochiua akinmej kitemoaj ika nochi inyolo

“Akin mijkuania [noso motokia] inawak Dios, moneki makineltoka Ye onka, iwa Ye kinmakas intlatliokolil akimeh kitemoah” (HEBREOS 11:6).

TLAKUIKALMEJ: 26 UAN 55

1, 2. (1) ¿Ken yetos totlaneltokilis tla okachi tiktlasojtlaj toTajtsin Dios? (2) ¿Tlen tlajtlanilmej tikinnankiliskej?

TOTAJTSIN Jehová kijtoa kinteochiuas itekipanojkauan yolmelajkej. Ijkon ye kiteititia techtlasojtla. Uan tejuan tiktlasojtlaj Jehová “porke Ye achto otechtlasojtlak” (1 Juan 4:19). Tla okachi tiktlasojtlaj toTajtsin Dios, ijkon okachi chikauak tikpiaskej totlaneltokilis uan tikneltokaskej ye kinteochiuas akinmej kintlasojtla (xiktlajtolti Hebreos 11:6).

2 Jehová kineki kinteochiuas itekipanojkauan. Ye ijkon iyelis, ik non, ijkon kineki kichiuas. Pampa tikpiaskej chikauak totlaneltokilis, moneki tikneltokaskej Jehová kinteochiuas akinmej kitemoaj ika nochi inyolo. ¿Tleka ijkon tikijtoaj? Biblia kijtoa: “Tlaneltokilistli non tlen se kichia melauak ma pano” (Hebreos 11:1, TNM). Tikpiaskej chikauak totlaneltokilis kijtosneki tikneltokaskej ika nochi toyolo toTajtsin Dios melauak kinteochiuas  akinmej yolmelajkej. ¿Ken techpaleuia tikmatiskej Jehová techteochiuas? ¿Ken okinteochi Jehová itekipanojkauan tlen okatkaj yiuejkika? ¿Ken techteochiua Jehová axkan? Ma tikitakan.

JEHOVÁ KIJTOA KINTEOCHIUAS ITEKIPANOJKAUAN

3. ¿Tlen techiluia Jehová itech Malaquías 3:10?

3 Jehová yokijto kinteochiuas itekipanojkauan yolmelajkej. Pero techteochiuas tla tiktekichiuiliaj ika nochi toyolo. Jehová techiluia: “Xinechyejyekokan, [...] namechtlatlaujtia”. Uan satepan kijtoa: “Nankitaskej ken niktlapoa ikaltlatsakuil iluikak uan namopan niknokis se tlateochiualistli hasta ijkuak ayakmo itlaj namechpolos” (Malaquías 3:10). Tla ijkon tikchiuaj, tikteititiaj tiktlasojkamatiliaj toTajtsin Dios.

4. ¿Tleka uelis tikneltokaskej tlen Jesús okijto itech Mateo 6:33?

4 Jesús okinmilui imachtijkauan tla achto kichiuaskiaj tlen toTajtsin Dios okinnauati, Jehová kinteochiuaskia (xiktlajtolti Mateo 6:33). Jesús ijkon okijto pampa okimatiaya toTajtsin Dios nochipa kichiua tlen kijtoa (Isaías 55:11). Tejuan noijki moneki tikneltokaskej Jehová nochipa kichiua tlen kijtoa. Tla titlaneltokaj itech Jehová, ye ‘ayik techkajtewas toselti, nion techilkawas’ (Hebreos 13:5). Ninmej tlajtolmej techpaleuia tikneltokaskej tlen okijto Jesús itech Mateo 6:33.

Jesús okinmilui imachtijkauan, Jehová kinteochiuaskia pampa amo okitemoayaj miak tlamantli. (Xikita párrafo 5).

5. ¿Tleka techyolchikaua tlen Jesús okilui Pedro?

 5 Tlatitlanil Pedro okitlajtlani Jesús: “Noteko, tejwah otikkajtejkeh nochi tlan otikpiayah iwa mowah tikateh. ¿Tlan tikpiaskeh?” (Mateo 19:27). Jesús amo okajuak Pedro ijkuak ijkon okitlajtlani. Okachi kuali, Jesús okinmilui imachtijkauan, Jehová kinteochiuaskia pampa amo okitemoayaj miak tlamantli. Satepan tlatitlanilmej uan oksekimej tokniuan yolmelajkej tlanauatiskej iuan Jesús itech iluikak. Pero Jesús noijki okijto tikpiaskiaj nin tlateochiualistli: “Nochteh akimeh okikakajtejkeh incha, inmikniwah, inweltiwah, intajwah, impilwah noso intlalwah por tetlapowijtinemih notlajtol, kiseliskeh okachi de nochi tlan okikakajtejkeh, iwa mach ayik mikiskeh yej nochipa yolitoskeh” (Mateo 19:29). Itech ninmej tonalmej, akinmej tikchiuaj ken Cristo tikinpiaj miakej tokniuan itech tlanechikol akinmej tikinmitaj ken totatajuan uan tokoneuan. Uan tlateochiualistli tlen techmakas toTajtsin Dios okachi miak ipati uan amo tlen tikkauaj pampa achto tiktlaliaj iTekiuajkayo.

“TOTLANELTOKALIS, KEMI SE TÉPOSTLI ANKLA NON KITSOPONIA IJTIK ATL”

6. ¿Ken techpaleuia tikmatiskej Jehová kinteochiua itekipanojkauan yolmelajkej?

6 Tikxikoaj ouijkayotl ijkuak tikmatij Jehová kinteochiua itekipanojkauan yolmelajkej. Amo san axkan techteochiua, noijki techteochiuas satepan (1 Timoteo 4:8). Tikmatij Jehová “kinmakas intlatliokolil akimeh kitemoah”, non techpaleuia ma tiyetokan tiyolmelajkej (Hebreos 11:6).

7. ¿Tleka tikijtoaj totlaneltokilis ken se “tépostli ankla”?

7 Ijkuak Jesús otlamachti itech tepetl, okijto: “Ijkuakó xipakikah porke nonkiseliskeh se weyi tlatliokólili kan ilwikak. Ijkó noiwa okintlaijyowiltijkeh n profetas non yonenkeh ijkuak nomejwah ayamó ononkatkah” (Mateo 5:12). Sekimej itekipanojkauan toTajtsin Dios yaskej iluikak. Uan oksekimej yoltoskej nochipa itech Xochitlali nikan Tlaltikpak. Nin kichiua ma tiyolpakikan (Salmo 37:11; Lucas 18:30). Uan “Tlan tejwah tikchiah, tikchiah ika totlaneltokalis, kemi se tépostli ankla non kitsoponia ijtik atl” (Hebreos 6:17-20). Ijkon ken se “tépostli ankla” kichiua ma moketo se barco ijkuak chikauak ejekakiaui, totlaneltokilis techpaleuia ma tikxikokan nochi ouijkayotl.

Tikxikoaj ouijkayotl ijkuak tikmatij Jehová kinteochiua itekipanojkauan yolmelajkej

8. ¿Ken techpaleuia chialistli amo sapanoa ma timotekipachokan?

8 Chialistli noijki techpaleuia amo sapanoa ma timotekipachokan. Ijkon ken se bálsamo kipajtia totlalnakayo, tlen toTajtsin Dios yokijto kichiuas techyolseuia. Kuali timomachiliaj ijkuak  tikmatij Jehová techmaluis tla tikiluiaj nochi tlen techtekipachoa (Salmo 55:22). Uelis tikneltokaskej Jehová “kipia miak weletílistli para kichiwas okachi miak de tlan tejwah tiktlajtlani” (Efesios 3:20). Nin kijtosneki Jehová techmakas okachi miak tlen tiktlajtlaniliaj.

9. ¿Tlen moneki tikchiuaskej pampa Jehová ma techteochiua?

9 Moneki tikpiaskej chikauak totlaneltokilis uan tiktlakamatiskej Jehová uan ijkon ye techteochiuas. Moisés okinmilui israelitas: “Jehová melauak mitsteochiuas itech tlali tlen Jehová moDios mitsmakas tlen tikmoaxkatis, Pero tla melauak tiktlakamatis itlajtol Jehová moDios uan tikintlakamatis nochtin ninmej tlanauatilmej tlen axkan nimitsnauatijtok. Pampa Jehová moDios mitsteochiuas ijkon ken yomitsilui” (Deuteronomio 15:4-6). ¿Tikneltokaj ika nochi toyolo Jehová techteochiuas tla tiyolmelajkej? Uelis ijkon tikneltokaskej.

JEHOVÁ OKINTEOCHI ITEKIPANOJKAUAN TLEN OKATKAJ YIUEJKIKA

10, 11. ¿Ken Jehová okiteochi José?

10 Biblia okijkuilojkej pampa techpaleuis. Ompa moijtoa ken Jehová okinteochi itekipanojkauan tlen okatkaj yiuejkika (Romanos 15:4). José techmaka se kuali neskayotl. Ikniuan okinemakakej ken se tlakeuali. Satepan, isiua Potifar okijto José okinekiaya kipinatis maski amo melauak, ik non, José okitsakej. ¿Ayakmo omouikaya iuan Jehová ijkuak otsaktoka? Amo. Biblia kijtoa: “Jehová okatka iuan José uan okitlasojtlaya”. Satepan kijtoa: “Jehová okatka iuan José uan okipaleuiaya kuali ma kisa tlen okichiuaya” (Génesis 39:21, 23). Maski José otlajyouijtoka, omochixki ma kipaleui Jehová.

11 ¿Ken Jehová okiteochi José? Seki xiuitl satepan, Faraón okikixti José itech telpiloyan uan okitlali ma tlanauati (Génesis 41:1, 37-43). José uan isiua okinpixkej ome konemej. Achto ikone okitokayoti Manasés, “pampa okijto: ‘ToTajtsin Dios okichi ma nikilkaua nochi notlajyouilis uan nochi ikalijtik notajtsin’”. Uan okse ikone okitokayoti Efraín, “pampa okijto: ‘ToTajtsin Dios okichi ma nimomiaktili itech altepetl kanin onitlajyoui’” (Génesis 41:51, 52). Jehová okiteochi José pampa okatka yolmelajki. Ijkon José okinmakixti israelitas uan egipcios ijkuak ouala se apistli. Uan José okimatiaya nochi non opanok pampa Jehová okiteochi (Génesis 45:5-9).

Jesús sapanoa oyolpakik ijkuak okichipa itoka toTajtsin Dios

12. ¿Tlen okipaleui Jesús ma yeto yolmelajki?

12 Jesucristo noijki okitlakamatki toTajtsin Dios maski otlajyoui, ik non, Jehová okiteochi. ¿Tlen okipaleui Jesús ma yeto yolmelajki? Biblia kijtoa: “Jesús otlaijyowi itech [kuauitl, TNM],  iwa mach omotekipacho kox saikpanoa tepinati ijkuak se mikki itech [kuauitl, TNM], porke okimatia satepa de itlaijyowilis kipiaskia miak pakílistli”. Jesús sapanoa oyolpakik ijkuak okichipa itoka toTajtsin Dios. Uan Jehová okiseli uan okiteochi. Biblia kijtoa Jesús “axa ewatok ik iyekma kan Dios yayantitok” (Hebreos 12:2). Uan noijki kijtoa “Totajtsi Dios okiweyijkatlali, iwa okimák se Itoka non okachi weyi ke oksikimeh intokah” (Filipenses 2:9).

JEHOVÁ AMO KILKAUA TLEN TIKCHIUAJ

13, 14. ¿Ken kita Jehová tekitl tlen tikchiuaj ijkuak tiktekichiuiliaj?

13 Jehová kipatioita ken tiktekichiuiliaj. Ye techajsikamati ijkuak timomojtiaj noso timokuayejyekoaj amo uelis tikchiuaskej se tekitl. Noijki techiknomati ijkuak timosotlauaj noso ijkuak amo tikmatij ken tikinmakaskej tlen ika mopanoltiskej tokalchanejkauan. Noijki techajsikamati ijkuak timoyolkokoaj noso timokokoaj, ik non, amo okachi tiktekichiuiliaj. Jehová melauak kipatioita ma tiyetokan tiyolmelajkej maski titlajyouiaj (xiktlajtolti Hebreos 6:10, 11).

14 Ma tikilnamikikan Jehová ‘kinkaki tlatlaujtilmej’. Ye techkaki ijkuak tiktlatlaujtiaj (Salmo 65:2). Jehová akin “nochipa techiknomati iwa nochipa techyolchikawa”, techpaleuis ma tiyetokan tiyolmelajkej. Uelis techpaleuis ika tokniuan (2 Corintios 1:3). Jehová kineki ma titeiknomatikan uan ma tikinpaleuikan oksekimej. Biblia kijtoa: “Akin kipaleuia akin amo itlaj kipia, kipaleuia Jehová uan ye kitlaxtlauis tlen kichiua” (Proverbios 19:17; Mateo 6:3, 4). Ik non, ijkuak tiktemakaj tlen tikpiaj uan tikinpaleuiaj tokniuan, Jehová kipatioita uan kijtoa techteochiuas.

JEHOVÁ TECHTEOCHIUAS AXKAN UAN SATEPAN

15. ¿Tlen tlateochiualistli tikchia ma mitsmakakan? (Xikita tlaixkopinal tlen ika peua tlamachtil).

15 Tlapejpenalmej kichiaj kiseliskej ‘korona [...] yekmilajka’ tlen Jesús kinmakas (2 Timoteo 4:7, 8). Uan maski tejuan amo tikseliskej non, amo kijtosneki amo tikpiaj topati ixpan toTajtsin Dios. Sapanoa miakej “oksikimeh ichkameh” tlen Jesús kinpia kichixtokej chantiskej nochipa itech Xochitlali, kanin “yolpakiskej pampa yetos miak yolseuilistli” (Juan 10:16; Salmo 37:11).

16. ¿Ken techyolchikaua tlen kijtoa 1 Juan 3:19, 20?

16 Ualeua timokuayejyekoaj amo okachi tiktekichiuilijtokej Jehová. Noso timotlajtlaniaj kox kiyolpaktia tlen tikchiuaj. Hasta uelis timokuayejyekoaj amo technamiki ma techteochiua Jehová. Pero amo ma tikilkauakan “Dios okachi weyi ke toyolo, iwa nochi kimati” (xiktlajtolti 1 Juan 3:19, 20). Tla tiktekichiuiliaj Jehová pampa itech titlaneltokaj uan tiktlasojtlaj, ye techteochiuas maski timokuayejyekoskej amo miak ipati tlen tikchiuaj (Marcos 12:41-44).

17. ¿Ken techteochiua Jehová axkan?

 17 Axkan Jehová kinteochiua itekipanojkauan, maski tikatej itlamian tonalmej kanin tlanauatijtok Satanás. ¿Ken techteochiua? Ye techmaka miakej amatlajkuilolmej tlen ika techmachtia uan miakej tokniuan itech nochi Tlaltikpak akinmej techtlasojtlaj, ijkon ken okijto Jesús (Isaías 54:13; Marcos 10:29, 30). Totajtsin Dios noijki kinteochiua ika yolseuilistli uan pakilistli akinmej mochijchikauaj kitemoskej (Filipenses 4:4-7).

18, 19. ¿Ken timomachiliaj ijkuak tikilnamikij ken techteochiua Jehová?

18 Techtlajtlachialtia ken Jehová yokinteochi itekipanojkauan itech nochi Tlaltikpak. Se neskayotl, se tokni tlen itoka Bianca tlen chanti itech ueyi altepetl Alemania kijtoa: “Sapanoa niktlasojkamatilia Jehová pampa nechpaleuia uan nochipa nouan kajki ijkuak nikpia ouijkayotl. Itech Tlaltikpak onka miak tlajyouilistli. Pero ijkuak nitekiti iuan Jehová kuali nimomachilia. Ijkuak niktekichiuilia, ye okachi nechteochiua”.

19 Ma timokuayejyekokan itech tokni Paula tlen chanti itech ueyi altepetl Canadá uan kipia 70 xiuitl. Ye kikokoa ikuitlapan. Amo okachi ueli molinia, pero non amo kijtosneki ayakmo uelis tetlapouis. Ye kijtoa: “Nitetlapouia ika teléfono uan kanin nikinmita tlaltikpaktlakamej. Uan itech se cuaderno nikinmijkuiloa uan nikinojpauia tlaxelolmej uan tlen kijtoa seki amatlajkuilolmej tlen nechyolchikauaj. Nin cuaderno oniktokayoti ‘nocuaderno tlen kichiua ma niyolto’. Timoyolchikauaskej tla tikilnamikij tlen Jehová kichiuas satepan. Ye nochipa kineki techpaleuis, maski san tlen ouijkayotl tikpiaskej”. Uelis amo techpanoa ken Bianca uan Paula. Pero uelis tikilnamikiskej ken techteochiua Jehová uan ken kinteochiua oksekimej. Tinochtin tiitekipanojkauan Jehová techyolchikaua tikilnamikiskej ken techteochiua axkan uan ken kichiuas satepan.

20. ¿Tlen panos tla okachi tiktekichiuiliskej Jehová?

20 Amo keman ma tikilkauakan Jehová techteochiuas tla timotlatlaujtiaj ika nochi toyolo. Tikseliskej nochi tlen Jehová “yokijto kitemakas” tla ‘tikchiwah tlan Dios kineki’ (Hebreos 10:35, 36). Ik non, okachi ma titlaneltokakan uan okachi ma tiktekichiuilikan Jehová. Tla ijkon tikchiuaj, Jehová techteochiuas (xiktlajtolti Colosenses 3:23, 24).