Xikita nochi

Tlen kiualika

¿Ken mitspaleuis itlasojtlalis toTajtsin Dios?

¿Ken mitspaleuis itlasojtlalis toTajtsin Dios?

ToTajtsin Dios kualtsin okichijchi totlalnakayo para iselti ma pajti. Ijkuak kanaj timotekij noso kanaj timotsopitiaj, totlalnakayo san niman kichiua amo ma eskisa uan iselti ma pajti.

XIMOKUAYEJYEKO: Tla toTajtsin Dios kualtsin otechchijchi para iselti ma pajti totlalnakayo, ¿uelis noijki techpaleuis amo ma timoyolkokokan? Se salmista okineltokaya toTajtsin Dios kinpajtia akinmej moyolkokoaj uan kilpia kanin kinkokoa (Salmo 147:3). Tla mitsyolkokoa nochi tlen yomitspanok, ¿tlen kiteititia toTajtsin Dios mitspaleuis axkan uan satepan?

BIBLIA KIJTOA TOTAJTSIN DIOS TECHTLASOJTLA

ToTajtsin Dios techiluia: “Amo ximomojti, ne mouan nika. Amo ximotekipacho, ne nimoDios. Ne nimitsyolchikauas, kema, ne nimitspaleuis” (Isaías 41:10). Techyolseuia tikmatij toTajtsin Dios techtlasojtla uan techmaka chikaualistli para ma tikixnamikikan ouijkayotl. Ik non, tlatitlanil Pablo okijto: “Iyolsewilis Dios, non amaka weleti kajsikamati”. Noijki okijto: “Para nochi tlamantli nikpia chikaualistli itech akin nechmaka chikaualistli” (Filipenses 4:4-7, 9, 13TNM).

Biblia techpaleuia okachi ma tikneltokakan tlen toTajtsin Dios yokijto kichiuas itech nochi tlaltikpak. Ma tikitakan tlen techiluia, Apocalipsis 21:4, 5 ompa kijtoa tlen kichiuas toTajtsin Dios uan tleka moneki itech ma titlaneltokakan (nin texto kajki itech okse página).

  • Jehová ‘techixayowajwatsas’. Kitlajtlamis nochi tlen techtlajyouiltia uan tlen techyolkokoa.

  • ToTajtsin Dios akin ueyi tekiua uan kipia miak chikaualistli ‘yayantitok’, kitekitiltis ichikaualis uan itlanauatilis para ayakmo ma titlajyouikan uan techpaleuis ijkuak monekis.

  • Jehová kijtoa tlen kichiuas “milák iwa kuali se kinneltokas”. Nin kijtosneki kichiuas tlen kijtoa uan amo san techkajkayaua.

“Ye kinmixayowajwatsas nochteh, iwa ayakmó yetos mikílistli, nion chokílistli, nion neyolkókoli, nion tekipanólistli, porke nochi tlan yowejka okatka, nochi yotlatlajtlanki. Ijkuakó Dios non oyayantitoka okijto: Xikita, ne nochi nikyankuilis. Noiwa okijto: Xikijkuilo tlan nimitsilis, porke tlan nimitsilijtok milák iwa kuali se kinneltokas”(Apocalipsis 21:4, 5).

Biblia uan nochi tlen okichijchi toTajtsin Dios techpaleuiaj kuali ma tikixmatikan. Nochi tlen onka techititia uelis timouikaskej iuan toTajtsin Dios. Pero Biblia techiluia: “Xiwalmijkuanikah [ximotokikan] inawak Dios, iwa Ye mijkuanis [motokis] nomonawak” (Santiago 4:8). Uan Hechos 17:27 kijtoa toTajtsin Dios “amo wejka kajki”.

Tla okachi timajxilis tikixmatis toTajtsin Dios, okachi tikitas ye melauak motech motekipachoa (1 Pedro 5:7). ¿Ken mitspaleuis tla okachi titlaneltokas itech Jehová?

Ma tikitakan tlen okipanok se tlakatl tlen itoka Toru uan chanti Japón. Maski inantsin kuali okixtlamachti, ye omosetili iuan sekimej tlen opouiaya itech mafia tlen motokayotiaj yakuza. Ye okijto: Ijkuak ikaj omikiaya onimokuayejyekoaya toTajtsin Dios onechkokoliaya uan onikmachiliaya onechtlajyouiltiaya. Toru okijto okipaktiaya tetlajyouiltis uan amo oteiknomatiaya. San okinekiaya kichiuas tlen ye okipaktiaya. Okijto: “Achto nimikiskia, oniknekiaya nikmiktis ikaj okachi chikauak”.

 Pero satepan okipatlak iyelis porque opejki momachtia Biblia iuan isiua tlen itoka Hannah. Isiua okijto: “Melauak otetlajtlachialti ken okipatlak iyelis”. Uan Turo okijto: “Axkan nikmati toTajtsin Dios onka uan totech motekipachoa. Amo kineki ikaj ma miki, ye kineki techtlapojpoluis tla timoyolkuepaj ika nochi toyolo. Uelis tiktlapouiskej nochi tlen tiknekiskej uan ye techajsikamati. Ajsis tonal toTajtsin Dios kitlajtlamis ouijkayotl uan tlen techtlajyouiltia. Noijki axkan sapanoa techpaleuia. Sapanoa totech motekipachoa uan techmaluia ijkuak timoyolkokoa” (Salmo 136:23).

Tlen okipanok Toru techititia toTajtsin Dios kitlajtlamis tlajyouilistli uan kichiuas tlen yokijto. Nin kichiua melauak ma tiyolpakikan. Maski axkan ok titlajyouiaj, tejuatsin mitspaleuis itlasojtlalis toTajtsin Dios.