Xikita nochi

Tlen kiualika

¿Itlajtlakol toTajtsin Dios titlajyouiaj?

¿Itlajtlakol toTajtsin Dios titlajyouiaj?

LUCÍA AMO UELI NEJNEMI. Ijkuak okatka tsikitsin okajsik se kokolistli itoka poliomielitis uan nin kokolistli kijtlakoa nochi totlalnakayo. Ijkuak okipiaya 16 xiuitl, siuatl tlen okipaleuiaya, okilui: “ToTajtsin Dios mitstlajyouiltia ika non kokolistli porque amo otiktlakamatki monantsin uan amo otiktlakaitak”. Opanok seki xiuitl uan Lucía ok kilnamiki tlen okilui non siuatl.

IJKUAK DÁMARIS OKAJXILIJKEJ SE TUMOR ITECH ITSONTEKO, itajtsin okilui: “Xamo otikchi itlaj amo kuali, ik non, timokokoa. Uan toTajtsin Dios mitstlajyouiltijtok”. Dámaris sapanoa omoyolkoko.

Yimiak xiuitl kineltokaj toTajtsin Dios techtlajyouiltia ika kokolistli. Se amochtli itoka Usos y costumbres de las tierras bíblicas kijtoa ijkuak nikan okatka Jesús, okineltokayaj ijkuak ikaj omokokoaya kijtosneki ye otlajtlakolchi noso ikalchanejkauan otlajtlakolchijkej, ik non, otlajyouiayaj”. Okse amochtli itoka Medieval Medicine and the Plague (La medicina medieval y la peste) kijtoa yiuejkika “sekimej okineltokayaj toTajtsin Dios otetlajyouiltiaya ika kokolistli porque otlajtlakolchiuayaj”. Ik non, ¿kijtosneki toTajtsin Dios okintlajyouilti ika kokolistli akinmej ochantiayaj ompa Europa itech siglo catorce? ¿Noso okimajxiltijkej nin kokolistli ijkon ken okitakej ixtlamatkej? Xamo timotlajtlania kox toTajtsin Dios techtlajyouiltia ika kokolistli porque titlajtlakolejkej. *

XIMOKUAYEJYEKO: Tla toTajtsin Dios techtlajyouiltia ika kokolistli, Jesús amo kinpajtiskia akinmej omokokoayaj. Noijki kitlajtolnamikiskia iTajtsin (Mateo 4:23, 24). Uan Jesús amo keman kixnamiki iTajtsin. Porque okijto: “Nochipa nikchiwa tlan Ye kipaktia” uan ‘nikchiwa tlan nechnawatia Notajtsi’ (Juan 8:29; 14:31).

Biblia kijtoa Jehová yolmelauak (Deuteronomio 32:4). ToTajtsin Dios amo kinmiktis nochtin akinmej yauij itech se avión porque kineki san se kitlajyouiltis. Abrahán akin okitekichiuili toTajtsin Dios, kuali okimatiaya Jehová amo keman ijkon kichiuas. Ik non, okijto “amo nikneltoka tikmiktis akin yolmelauak ijkon ken akin amo yolkuali” (Génesis 18:23, 25). Noijki Biblia kijtoa toTajtsin Dios amo uelis kichiuas tlen amo kuali (Job 34:10-12).

BIBLIA KIJTOA TOTAJTSIN DIOS AMO TECHTLAJYOUILTIA

ToTajtsin Dios amo techtlajyouiltia porque otitlajtlakolchijkej. Jesús ijkon okiteititi ijkuak oyaya iuan imachtijkauan uan okinamikej se tlakatl amo otlachiaya. Imachtijkauan okitlajtlanijkej: “¿Tleka ijkó otlákatki nin tlakatl? ¿Akin otlajtlakolchi, itajwah, noso ye inewia?”. Jesús okinnankili: “Amo por ye otlajtlakolchi nion por itajwah” (Juan 9:1-3).

Imachtijkauan Jesús omotlajtlachialtijkej ijkuak Jesús okinmilui non tlakatl amo otlajtlakolchi nion itatajuan uan amo okinamikiaya ma tlajyoui. Uan Jesús okipajti non tlakatl uan okiteititi  toTajtsin Dios amo tetlajyouiltia (Juan 9:6, 7). Akinmej mokokoaj kinyolchikaua kimatiskej toTajtsin Dios amo techtlajyouiltia.

Jesús amo kinpajtiskia akinmej omokokoayaj tla toTajtsin Dios kintlajyouiltia

Biblia kijtoa:

  • “Amo xikijtokah Dios onomechtokti manomechyoltilana tlan amo kuali. Porke n amokuali amo weletis kitoktis Dios matlajtlakolchiwa, nion Dios weletis amaka kiyoltilanas matlajtlakolchiwa” (SANTIAGO 1:13). ToTajtsin Dios kitlajtlamis nochi kokolistli uan mikilistli porque yimiak xiuitl tinochtin titlajyouijtokej.

  • Jesucristo “okimpajti nochteh non omokokoayah” (MATEO 8:16). Ijkuak Jesús okinpajti akinmej omokokoayaj okiteititi tlen kichiuas iTekiuajkayo toTajtsin Dios itech nochi tlaltikpak.

  • ToTajtsin Dios “kinmixayowajwatsas nochteh, iwa ayakmó yetos mikílistli, nion chokílistli, nion neyolkókoli, nion tekipanólistli, porke nochi tlan yowejka okatka, nochi yotlatlajtlanki” (APOCALIPSIS 21:3-5).

¿AKIN ITLAJTLAKOL TITLAJYOUIAJ?

¿Tleka tinochtin titlajyouiaj? ¿Akin itlajtlakol tla toTajtsin Dios amo techtlajyouiltia? Yiuejkika miakej ijkon motlajtlaniaj. Itech okse tlamachtil tikajsis intlanankilis.

^ párr. 4 Yiuejkika toTajtsin Dios okintlajyouilti sekimej ika kokolistli noso okseki tlamantli okinpanok porque otlajtlakolchijkej. Pero Biblia amo kanaj kijtoa ok ijkon kichiua.