Xikita nochi

Tlen kiualika

Uelis tiyoltos nochipa itech tlaltikpak

Uelis tiyoltos nochipa itech tlaltikpak

¡MELAUAK KUAJKUALTSIN YETOS! ToTajtsin Dios yotechilui tiyoltoskej tlaltikpak. Pero miakej amo kineltokaj. Mokuayejyekoaj ajsis tonal timikiskej porque ijkon tinochtin techpanoa. Oksekimej kijtoaj tiyoltoskej nochipa pero ompa iluikak ijkuak timikiskej. ¿Tejuatsin tlen timokuayejyekoa?

Ayamo xitlanankili. Achto ma tikitakan ken kinnankilia Biblia ninmej tlajtlanilmej: ¿Keski xiuitl moneki tiyoltoskej? ¿Tleka toTajtsin okichijchi tlaltikpak uan tejuan? ¿Tleka timikij?

OKSE TLAMANTLI OTECHCHIJCHIJKEJ

Ijkuak tikitaj nochi tlen yoltok, tikitaj san tejuan okse tlamantli otechchijchijkej. ¿Tleka ijkon tikijtoaj? Biblia techiluia san tejuan tikpiaj toyelis ken toTajtsin Dios (Génesis 1:26, 27). ¿Tlen kijtosneki nin? Otechchijchi ken ye, ik non, titetlasojtlaj uan tiknekij nochi ma mochiua ika melajkayotl.

Noijki toTajtsin Dios otechchijchi para ma tikmatikan tlen kuali uan tlen amo. Noijki ma tiktemokan ken tikixmatiskej uan iuan timouikaskej. Ik non, ueli tikitaj nochi tlen onka iluikak uan itech tlaltikpak uan noijki techtlajtlachialtia tlatsotsonali, poesía uan nochi tlen tikchijchiuaj. Pero tlen okachi ipati, san tejuan ueli tikueyichiuaj toTajtsin Dios. Nochi nin kiteititia toTajtsin Dios amo otechchijchi ken okseki tlamantli tlen yoltok.

Ximokuayejyeko, tla toTajtsin Dios kinekiskia san kanaj keski xiuitl ma tiyoltokan, ¿tleka tikmatij tikchiuaskej miak tlamantli uan noijki miak tlamantli timomachtijtiuij? Porque toTajtsin Dios kineki nochipa ma tiyolpakikan nikan tlaltikpak.

TOTAJTSIN DIOS OKINEKIAYA MA TIYOLPAKIKAN

Sekimej kijtoaj toTajtsin Dios amo okinekiaya ma tiyolpakikan nochipa nikan tlaltikpak. Kijtoaj nikan san techyejyekoaj para kitaskej kox uelis tiyoltoskej nochipa iuan toTajtsin Dios ompa iluikak. Pero tla melauak tlen kijtoaj, ¿amo yetoskia itlajtlakol toTajtsin Dios nochi tlen amo kuali panoa itech tlaltikpak? Tla ijkon toTajtsin Dios motlajtolnamikiskia. Porque Biblia kijtoa: “Porque nochi iojuiuan kipiaj melajkayotl. ToTajtsin Dios akin amo keman tekaua amo keman kichiua tlen amo melauak; ye yolmelauak uan nochi kichiua ika melajkayotl” (Deuteronomio 32:4).

 Biblia techiluia tleka toTajtsin Dios okichijchi tlaltikpak: “Iluikak iaxka Jehová pero tlaltikpak okinmakak tlaltikpaktlakamej” (Salmo 115:16). ToTajtsin Dios okichijchi tlaltikpak para nochipa itech ma tichantikan uan kuali okiyektlali para ma tiyolpakikan (Génesis 2:8, 9).

“Iluikak iaxka Jehová pero tlaltikpak okinmakak tlaltikpaktlakamej” (Salmo 115:16).

Noijki Biblia techiluia tleka otechchijchi. Adán uan Eva okinmilui: “Ximomiaktilikan uan ximochiuakan nanmiakej, xiktemitikan tlaltikpak uan xikmaluikan uan xikinyekanakan [...] nochtin tlen moliniaj itech tlaltikpak” (Génesis 1:28). Melauak se tlateochiualistli tikmaluiskej tlaltikpak uan tikchiuaskej ma yeto se xochitlali! Adán uan Eva nochipa yoltoskiaj itech tlaltikpak iuan nochtin inmixuiuan.

¿TLEKA TIMIKIJ?

Biblia kiyekijtoa se ángel tlen omoixmatki ken Satanás okixnamik toTajtsin Dios porque amo okinekiaya ma mochiua itlanekilis. ¿Ken okixnamik?

Satanás okikajkaya Adán uan Eva para noijki ma kipaleuikan ma kixnamikikan toTajtsin Dios. Ye okijto toTajtsin Dios amo okinkauiliaya ma kipejpenakan tlen kuali uan tlen amo kuali. ¿Tlen opanok? Adán uan Eva omikej ijkon ken okinmilui toTajtsin Dios. Ik non, ayakmo ochantikej itech xochitlali (Génesis 2:17; 3:1-6; 5:5).

Axkan titlajyouiaj porque Adán uan Eva okixnamikej toTajtsin Dios. Uan Biblia kijtoa: “Por itlajtlakol se tlakatl n tlajtlákoli okalak itech nin tlaltíkpaktli iwa okualík mikílistli, ijkó noiwa nochteh mikkih porke nochteh otlajtlakolchijkeh” (Romanos 5:12). Ik non, timikij porque Adán uan Eva otechkajteuilijkej tlajtlakoli uan mikilistli. Amo ijkon okinekiaya toTajtsin Dios ma techpano.

UELIS TIYOLTOS NOCHIPA ITECH TLALTIKPAK

Maski Adán uan Eva okixnamikej toTajtsin Dios, ye amo okipatlak tlen okinekiaya kichiuas. Uan ye techtlasojtla uan kichiua nochi ika melajkayotl, okichi itlaj miak ipati para techmakixtis itech tlajtlakoli uan mikilistli. Tlatitlanil Pablo okiyekijto: “Tlajtlákoli tetlaxtlawia ika mikílistli, pero tlan Dios kitetliokolia ye n nemílistli non ayik tlami keman tiseititokeh iwan Toteko Cristo Jesús” (Romanos 6:23). Sapanoa techtlasojtla, ik non, ye “okitemakti non sanwel Ye se Ikone, para nochteh akimeh kineltokaskeh amo mamoixpolokah, yej makipiakah se yankuik nemílistli non ayik tlami” (Juan 3:16). Jesús okinek topatka mikis uan ijkon uelis tikpiaskej tlen okipolo Adán. *

Ayakmo miak poliui uan tlaltikpak melauak mochiuas se kualtsin xochitlali. Tla tikneki tikpias nin tlateochiualistli, moneki tikchiuas tlen Jesús okijto: “Xikalakikah kan ik kaltentli non tsopijtik, porke patlawak n kaltentli iwa kuyawak n ojtli non tewika kan moixpoloah, iwa miakeh ik ompa yajtokeh. Pero n kaltentli iwa n ojtli non tewika kan nochipa se yolitos, saikpanoa tsopijtik iwa san sikimeh kajsi non ojtli” (Mateo 7:13, 14). San tejuatsin tikpejpenas kox tikneki nin tlateochiualistli.

^ párr. 17 Tla tikneki tikmatis okachi ken techpaleuia temakixtilistli, xikita amochtli itech tlamachtil 5, ¿Tlen melauak tlamachtia Biblia?, tlen kichijchiuaj iTlaixpantijkauan Jehová. Noijki uelis tikkixtis itech jw.org/ncx.