Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  número 2 de 2016

Tla titetlakamati ijkuak tlanejmachtiaj uelis timomakixtis

Tla titetlakamati ijkuak tlanejmachtiaj uelis timomakixtis

ITECH tonal 26, metstli diciembre, xiuitl 2004, se chikauak tlalolinilistli de 9.1, opanok itech isla de Simeulue, ik norte de Sumatra itech ueyi altepetl Indonesia. Akinmej okatkaj itempa ueyi atl okitakej ken opejki okachi oyaya atl. San niman, nochtin totoka omotlalojkej itech tepeyo uan okijtoayaj: “¡Smong! ¡Smong!”, non tlajtoli itech non altepetl kijtosneki “tsunami”. Ijkuak opanok kanaj 30 minutos, oualmonextijkej uejueyij olas itech itempa ueyi atl uan okinpojpolo nochtin kalmej uan altepetsitsintin.

Sapanoa temomojti tsunami tlen opanok, achto otlaxixinki itech isla de Simeulue. San omikej chikueyi itech 78,000 (setenta y ocho mil) tlaltikpaktlakamej tlen ompa inchan. ¿Tleka san chikueyi omikej? * Akinmej ompa chantij kimatij se tlajtoli tlen kijtoa: “Tla tlalolini uan tikita ueyi atl yaui, ximotlalo itech tepeyo, pampa oksepa uits okachi chikauak”. Pampa ompa ijkon panoa, akinmej ompa chantij kimatij uits se tsunami pampa kitaj ken mopatla ueyi atl. Ken non okinnejmachti, omomakixtijkej.

Biblia kijtoa uits se tlaxixinilistli itech nochi Tlaltikpak, se ueyi “tlaijyowílistli [tlen] yetos satlawel temojti non ayamaka ijkó okitak desde ijkuak omonexti n tlaltíkpaktli, iwa ayik oksepa ijkó tlamochiwas” (Mateo 24:21). Nin amo kijtosneki Tlaltikpak tlamis pampa intlajtlakol tlaltikpaktlakamej noso ika se tlaxixinilistli, pampa toTajtsin Dios kineki Tlaltikpak nochipa ma yeto (Eclesiastés 1:4). Pero kema ‘kimpojpolos akimeh kijtlakoah n tlaltíkpaktli’. Ompa tlamis nochi tlen amo kuali uan tlajyouilistli (Apocalipsis 11:18; Proverbios 2:22). ¡Non se ueyi tlateochiualistli!

Itech tsunamis, tlalolinilistli uan ijkuak toponi se volcán, mikij sapanoa miakej tlaltikpaktlakamej tlen amo itlaj intlajtlakol, pero ijkuak uits ueyi tlajyouilistli amo ijkon panos. Pampa Biblia kijtoa “Dios Ye n tlasojtlálistli”, toTajtsin Dios akin itoka Jehová, kijtoa “yolmelauakej yetoskej itech Tlaltikpak, uan itech chantiskej nochipa” (1 Juan 4:8; Salmo 37:29). ¿Tlen moneki tikchiuas pampa timomakixtis itech non ueyi tlajyouilistli uan tikselis tlateochiualismej tlen kintemakas Jehová? Xitetlakamati ijkuak tlanejmachtiaj.

XIKITA KEN MOPATLATOK NOCHI TLAMANTLI

Amo uelis tikijtoskej keman tlamis nochi tlen amo kuali uan tlajyouilistli, pampa Jesús okijto: “Pero n tonati iwa n ora ijkuak ijkó tlamochiwas amaka kimati, nion ángelteh non kateh ilwikak, nion Ne, yej sanwel Notajtsi kimatok”. Pero noijki okijto moneki ma titlachixtokan (Mateo 24:36; 25:13). ¿Tlen kijtosneki non? Biblia kijtoa ken yetoskia Tlaltikpak achto toTajtsin Dios kitlajtlamis nochi tlen amo kuali. Ijkon ken tlaltikpaktlakamej okitakej ken ueyi atl okinnejmachti ualaskia se tsunami,  noijki panos miak tlamantli itech nochi Tlaltikpak tlen technejmachtiskej yitlamis nochi tlen amo kuali. Itech recuadro tlen kajki itech ninmej páginas, mota seki tlamantli tlen Biblia okijto panoskia.

Seki tlamantli itech non yopanokej achto, ualeua san seki tlamantli uan san itech seki kauitl. Pero Jesús okijto ‘ijkuak nochi ni tikitaskeh’ tikmatiskiaj yitlamis nochi tlen amo kuali (Mateo 24:33). Ximotlajtlani keman itech nochi kauitl yomochi tlen okijto Jesús, keman omochijkej itech nochi Tlaltikpak, keman san semi omochijkej uan keman okachi omomiaktili tlen amo kuali. Kuali tikitaj tikatej itech nonmej tonalmej.

ITLAJ TLEN KITEITITIA ITLASOJTLALIS TOTAJTSIN DIOS

Se tekiua itech ueyi altepetl Estados Unidos okijto: “Tepostli tlen tsilini achto itlaj panos [...] uelis temakixtis”. Ijkuak opanok tsunami itech xiuitl 2004, itech nochi non altepetl okitlalijkej se tepostli tlen tsilini pampa ayakmo mikiskej sapanoa miakej tlaltikpaktlakamej. Noijki ijkon, toTajtsin Dios yokitlali se tepostli tlen tsilini tlen technejmachtiaj yitlamis nochi tlen amo kuali. Biblia kijtoa: “Uan ninmej kuali tlajtolmej itech Tekiuajkayotl motetlapouis itech nochi Tlaltikpak pampa ma kimatikan nochi uejueyij altepemej, ijkuakon tlamis nochi tlen amo kuali” (Mateo 24:14, TNM).

Yisexiuitl, iTlaixpantijkauan Jehová otetlapouijkej kanaj mil novecientos millones de horas itech 240 uejueyij altepemej uan oksekimej altepemej ika kanaj 700 tlatlamantli tlajtolmej. Nin tekitl noijki kiteititia ayakmo miak poliui pampa tlamis nochi tlen amo kuali. Uan pampa iTlaixpantijkauan Jehová kintlasojtlaj tlaltikpaktlakamej, mochijchikauaj miak kinnejmachtiskej uan kinmiluiskej yiuits tonal ijkuak toTajtsin Dios tlaixkomakas (Mateo 22:39). Nin revista tlen axkan tiktlajtoltijtok kiteititia  Jehová sapanoa mitstlasojtla. Xikilnamiki, ye “amo kineki aka mamoixpolo, yej tinochteh matimoyolpatlakah inawak” (2 Pedro 3:9). Uan tejuatsin, ¿tiktlasojkamatilis itlasojtlalis Jehová uan tiktlakamatis?

¡XIMOTLALO KANIN UELIS TIMOMAKIXTIS!

Xikilnamiki, tlaltikpaktlakamej tlen chantij itech altepemej tlen katej itempa ueyi atl itech Simeulue ocholojkej itech tepeyo ijkuak okitakej atl oksepa ualmokuepaskia; yejuan okinekiayaj momakixtiskej uan amo omochixkej ma mokuepa atl. Pampa totoka ocholojkej, omomakixtijkej. Uelis tikijtoskej, noijki ijkon uelis mitspanos, ik non, san niman moneki ticholos “itech tepeyo” pampa timomakixtis. ToTajtsin Dios okinauati Isaías ma kijkuilo se yoleualistli tlen noijki pampa tejuan, akinmej tikatej “itech itlamian tonalmej”. Ik non, moneki tikseliskej nin yoleualistli: “Xiualakan, ma titlejkokan itech itepe Jehová, [...] ye techmachtis itech iojui, uan melauak tinemiskej itech iojui” (Isaías 2:2, 3).

Ijkuak tiauij ipan se tepetl uelij tikitaj nochi uan tikmachiliaj ompa amo uelis itlaj techpanos. Noijki ijkon, miakej tlaltikpaktlakamej kixmatokej iojui toTajtsin Dios, tlen kajki itech Biblia, uan non kinpaleuijtok ma kiyektlalikan innemilis (2 Timoteo 3:16, 17). Non kinpaleuia ma yetokan “itech iojui” toTajtsin Dios, uan ye kinmaluia uan kinteochiua.

¿Tikkauilis toTajtsin Dios ma mitsmalui uan tikkakis tlen mitsiluia itech ninmej tonalmej tlen sapanoa oui? Timitstlatlaujtiaj xikita recuadro tlen kijtoa Biblia tlen panoskia “itech iksemi tonatijmeh” (2 Timoteo 3:1). ITlaixpantijkauan Jehová tetlapouiaj ik kanin tejuatsin tichantij uan ika miak pakilistli uelis mitspaleuiskej xikajsikamati uan xikchiua tlen Biblia tlamachtia. Itech página tlen tikpiaj itech Internet www.jw.org/ncx, uelis tikitas ken kinnankilia Biblia tlajtlanilmej.

^ párr. 3 Tsunami tlen opanok itech xiuitl 2004, okinmikti kanaj doscientos veinte mil tlaltikpaktlakamej, nin se tsunami tlen okachi otlaxixini.