Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  número 2 de 2016

 TLAMACHTIL TLEN IKA PEUA

¿Tleka Jesús otlajyoui uan omikik?

¿Tleka Jesús otlajyoui uan omikik?

“Por itlajtlakol se tlakatl [Adán] n tlajtlákoli okalak itech nin tlaltíkpaktli iwa okualík mikílistli” (Romanos 5:12).

¿Tlen tikijtoskia tla ikaj mitstlajtlaniskia kox mitspaktiskia tiyoltos nochipa? Miakej uelis tlanankiliskej kema, pero mokuayejyekoaj non amo keman panos, pampa kijtoaj moneki timikiskej uan ijkuak timikij, ompa tlami nochi.

Ma tikijtokan mitstlajtlaniskej kox tikneki timikis axkan, ¿tlen tikijtoskia? Amo ikaj kijtoskia kineki mikis. Uan maski onka sapanoa miak ouijkayotl, tinochtin tiknekij tiyoltoskej. Biblia kijtoa toTajtsin Dios ijkon okinchijchi tlaltikpaktlakamej, kijtoa: “Okitlali itech inyolo tlaltikpaktlakamej ma kinekikan yoltoskej nochipa” (Eclesiastés 3:11).

Pero tinochtin tikmatij axkan amo tiyoltokej nochipa. ¿Tleka? ¿Tlen opanok? ¿Yokichi itlaj toTajtsin Dios pampa tlayektlalis? Tlen technankilia Biblia techyolchikaua uan kipia tlen kitas ika itlajyouilis uan imikilis Jesús.

¿TLEN AMO KUALI OKISKI?

Itech achto eyi tlakotonalmej tlen kipia amochtli Génesis kijtoa toTajtsin Dios okinmilui Adán uan Eva, uelis yoltoskiaj nochipa uan okinmilui tlen omonekiayaj kichiuaskej. Noijki kijtoa yejuan amo otetlakamatkej uan omikej. Nochi nin moyekijtoa san ika keski tlajtolmej, ik non, miakej kijtoaj non san se cuento. Pero nochi tlen kijtoa amochtli Génesis melauak, ijkon ken Evangelios. *

¿Tlen opanok pampa Adán amo otetlakamatki? Biblia kijtoa: “Por itlajtlakol se tlakatl [Adán] n tlajtlákoli okalak itech nin tlaltíkpaktli iwa okualík mikílistli, ijkó noiwa nochteh mikkih porke nochteh otlajtlakolchijkeh” (Romanos 5:12). Adán otlajtlakolchi ijkuak amo okitlakamatki toTajtsin Dios. Ye ayakmo uelis yoltoskia nochipa, ik non, okokoxkatik noso oueuejtik uan omikik. Uan ken tiikoneuan, axkan tejuan noijki titlajtlakolejkej. Ik non, timokokoaj, tikokoxkatij noso tiueuejtij uan timikij. Nin mouika ika tlen kijtoaj ixtlamatkej ken konemej kinmokixtiaj intatajuan. Axkan ma timomachtikan tlen okichi toTajtsin Dios pampa kiyektlalis.

 ¿TLEN OKICHI TOTAJTSIN DIOS?

ToTajtsin Jehová okichi itlaj pampa oksepa yetoskia tlen Adán okipolo uan ijkon ikoneuan uelis yoltoskiaj nochipa. ¿Tlen okichi?

Biblia kijtoa: “Tlajtlákoli tetlaxtlawia ika mikílistli” (Romanos 6:23). Nin kijtosneki timikij pampa titlajtlakolejkej. Adán omikik pampa otlajtlakolchi. Noijki ijkon techpanoa tejuan, ken titlajtlakolejkej satepan timikij. Pero ken amo totlajtlakol otineskej titlajtlakolejkej, toTajtsin Dios otechiknomatki, ik non, okiualtitlanki iKone, Jesucristo, pampa ma “kitlaxtlaua” tlen otikteuikiliayaj. ¿Ken okitlaxtla?

Ika imikilis Jesús uelis tikpiaskej yolilistli tlen amo keman tlamis uan ika yolpakilistli.

Adán amo okipiaya tlajtlakoli, pero ken amo otetlakamatki, nochtin ikoneuan oneskej ika tlajtlakoli uan mikilistli, ik non, omonekiaya okse tlakatl tlen amo okipiaya tlajtlakoli tlen itech nochi iyolilis tetlakamatiskia, uan ijkon techmakixtiskia itech tlajtlakoli. Biblia techyekiluia non ika ninmej tlajtolmej: “Por se tlakatl non amo otetlakitak, miakeh omokopkeh tlajtlakolejkeh. Pero ijkó noiwa, por se tlakatl, Cristo non otetlakitak, miakeh tlakah yetoskeh chipawakeh de intlajtlakol” (Romanos 5:19). Uan ye Jesús non “tlakatl”. Ye amo okipiaya tlajtlakoli * uan okika iluikak uan omikiko topampa. Uan ken ijkon okichi, toTajtsin Dios techita ken ‘tichipawakeh’ uan noijki uelis tikpiaskej yolilistli tlen amo keman tlamis.

¿TLEKA JESÚS OTLAJYOUI UAN OMIKIK?

Pero ¿omonekiaya ma miki Jesús pampa mochiuaskia nochi non? ¿Amo ueliskia toTajtsin Dios kijtoskia se tlanauatil kanin kijtoskia nochtin ikoneuan Adán uelis yoltoskiaj nochipa? ToTajtsin Dios uelis ijkon kichiuaskia. Pero tla ijkon kichiuaskia, nion ye amo kitlakamatiskia itlanauatil tlen kijtoa tlajtlakoli motlaxtlaua ika mikilistli. Uan non tlanauatil miak ipati, ik non, amo uelis ikaj kipatlas pampa mopaleuis nion ikaj amo uelis kikachiuas. Nin tlanauatil nochipa moneki pampa ma mochiua melajkayotl (Salmo 37:28).

Tla toTajtsin Dios amo moyekanaskia ika non tlanauatil, uelis sekimej motlajtlaniskiaj tla satepan itech okseki tlamantli oksepa ijkon kichiuaskia.  Se neskayotl, ¿uelis ika melajkayotl kijtoskia akinmej ikoneuan Adán uelis yoltoskiaj nochipa? ¿Uelis tikneltokaskiaj ye kichiuas nochi tlen okijto? Ken toTajtsin Dios okitlakaitak itlanauatil pampa techmakixtis, axkan kuali tikmatokej nochi tlen kichiuas uan kichiuas ika melajkayotl.

Pampa Jesús okitemakak iyolilis, toTajtsin Dios okijto tlaltikpaktlakamej uelis yoltoskej nochipa itech se Xochitlali. Jesús okiyekijto: “Totajtsi Dios saikpanoa okintlasojtlak n tlaltikpaktlakah, yika okitemakti non sanwel Ye se Ikone, para nochteh akimeh kineltokaskeh amo mamoixpolokah, yej makipiakah se yankuik nemílistli non ayik tlami” (Juan 3:16). Imikilis Jesús amo san kiteititia imelajkayo toTajtsin Dios, noijki kiteititia ye sapanoa techtlasojtla.

Pero ¿omonekiaya sapanoa ma tlajyoui Jesús uan temomojti ma kimiktikan? Kema, pampa nochipa otetlakamatki maski sapanoa otlajyoui, okiteititi tlen Diablo okijto amo melauak, akin okijto tlaltikpaktlakamej amo yetoskiaj yolmelajkej ijkuak tlajyouiskiaj (Job 2:4, 5). Ijkuak Adán amo otetlakamatki, motaskia melauak tlen achto okijto Diablo. Pero Jesús, akin amo okipiaya tlajtlakoli, otetlakamatki maski sapanoa otlajyoui (1 Corintios 15:45). Ijkon okiteititi tla Adán kinekiskia, noijki uelis kitlakamatiskia toTajtsin Dios. Uan pampa otlaxiko, otechkauili neskayotl pampa noijki ijkon ma tikchiuakan (1 Pedro 2:21). Pampa Jesús nochipa otetlakamatki, toTajtsin Dios okimakak yolilistli tlen amo keman tlamis itech iluikak.

¿KEN MITSPALEUIA?

Jesús melauak omikik, ik non, uelis tiyoltoskej nochipa. ¿Mitspaktiskia tiyoltos nochipa? Jesús okijto tlen moneki tikchiuaskej tla tiknekij tiyoltoskej nochipa: “Tla mitsixmatiskeh sanwel Tejwatsi n de milajka Dios, iwa Cristo Jesús, Akin Tejwatsi otikwaltítlanki, kipiaskeh n yolílistli tlan ayik tlamis” (Juan 17:3).

Akinmej kichijchiuaj nin revista mitsyoleuaj xikixmati Jehová, akin melauak toTajtsin Dios uan Jesucristo. ITlaixpantijkauan Jehová tlen katej ik kanin tejuatsin tichanti mitspaleuiskej ika miak pakilistli. Tla tikneki tikmatis okachi, xikalaki itech www.jw.org/ncx.

^ párr. 8 Xikita tlamachtil tlen itoka: “Carácter histórico de Génesis”, xikalaki kanin kijtoa “Génesis, Libro de” itech amochtli Perspicacia para comprender las Escrituras, volumen 1, página 1017, nin amochtli kichijchiuaj iTlaixpantijkauan Jehová. Uelis tikajsis itech jw.org (Xikita kanin kijtoa PUBLICACIONES > BIBLIOTECA EN LÍNEA).

^ párr. 13 ToTajtsin Dios okitlali iyolilis iKone ijtik María, uan ika iespíritu santo okimalui pampa konetl amo kipiaskia tlajtlakoli tlen okipiaya María (Lucas 1:31, 35).