Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  número 2 de 2016

 TLAMACHTIL TLEN IKA PEUA | ¿TLEKA JESÚS OTLAJYOUI UAN OMIKIK?

¿Melauak opanok?

¿Melauak opanok?

Itech xiuitl 33, Jesús akin omoskalti itech altepetl Nazaret okimiktijkej. Sekimej okijtojkej tlen amo melauak itech uan okijtojkej ye okinmixnamik tekiuajkej, sapanoa okiuitekej uan okipilojkej itech se kuauitl, kanin sapanoa otlajyoui uan omikik. Pero toTajtsin Dios okiyoliti uan ijkuak opanok 40 tonalmej, Jesús oyajki iluikak.

Nin tlapoualistli tlen tetlajtlachialtia, tikmatij pampa ijkuilitok itech naui Evangelios itech Nuevo Testamento noso Tlen omoijkuilo ika tlajtoli griego. Pero ¿melauak ijkon opanok? Nin tlajtlanilistli kipia miak ipati uan moneki ma monankili, pampa tla nin san se cuento, amo itlaj ipati tlen kineltokaj akinmej kichiuaj ken Cristo uan amo keman yetos Xochitlali nion yolilistli tlen amo keman tlamis (1 Corintios 15:14). Pero tla non tlamantli tlen moijtoa melauak opanok, uelis tikinseliskej miakej tlateochiualismej. Ik non, ¿melauak opanok tlen kijtoaj Evangelios?

¿TLEN KITEITITIA NOCHI TLEN YOPANOK?

Nochi tlen ijkuilitok itech Evangelios ajsitok uan melauak. Se neskayotl, itech Evangelios moijtoa intoka miakej tlaltikpaktlakamej uan altepemej tlen axkan ok katej uan kanin miakej yauij tlaixmatitiuij, uan akinmej tlajkuiloaj itech tlen yiuejkika opanok,  noijki tlajtoaj itech nonmej tlaltikpaktlakamej uan altepemej (Lucas 3:1, 2, 23).

Sekimej akinmej otlajkuiloayaj itech siglo se uan ome noijki otlajkuilojkej itech Jesús. * Ken okimiktijkej, ken kijtoa Evangelios, ijkon otemiktiayaj romanos itech nonmej tonalmej. Itech Evangelios omoijkuilo tlen melauak opanok uan noijki tlen amo kuali okichijkej sekimej imachtijkauan Jesús (Mateo 26:56; Lucas 22:24-26; Juan 18:10, 11). Nochi nin kiteititia akinmej okijkuilojkej Evangelios okijtojkej tlen melauak uan ajsitok itech Jesús.

¿MELAUAK OKIYOLITIJKEJ JESÚS?

Maski miakej kineltokaj Jesús melauak okatka, pero sekimej amo kineltokaj kox melauak okiyolitijkej. Nion itlatitlaniluan amo okineltokayaj (Lucas 24:11). Pero satepan otlaneltokakej ijkuak miak veces okitakej Jesús ijkuak yokiyolitijkej. Uan se tonal, okitakej kanaj 500 tlaltikpaktlakamej (1 Corintios 15:6).

Itlatitlaniluan omoyolchikajkej uan nochtin okinmatiltijkej Jesús okiyolitijkej, uan noijki akinmej okimiktijkej Jesús, maski yejuan noijki uelis kinmiktiskiaj (Hechos 4:1-3, 10, 19, 20; 5:27-32). ¿Kox ijkon kichiuaskiaj tla amo kimatiskiaj melauak okiyolitijkej Jesús? Amo. Uan ken melauak okiyolitijkej Jesús, axkan miakej tlaneltokaj ijkon ken miakej otlaneltokakej itech nonmej tonalmej.

Tlen kijtoaj Evangelios itech imikilis uan iyolitilis Jesús ajsitok, ik non, uelis tikneltokaskej nochi tlen itech ijkuilitok. Tla timomachtia nin, tikneltokas nochi tlen ompa ijkuilitok melauak opanok. Tla tikajsikamatis tleka opanok, non okachi mitspaleuis xitlaneltoka. Okse tlamachtil techyekiluis nin.

^ párr. 7 Se tlakatl tlen omotokayotiaya Tácito akin oneski kanaj itech xiuitl 55, okijkuilo: “[Akinmej kichiuaj ken Cristo] okikixtijkej intoka itech Cristo, akin tekiua Poncio Pilato otlanauati ma kimiktikan itech tonalmej ijkuak otlanauatijtoka Tiberio”. Oksekimej noijki otlajkuilojkej itech Jesús itech achto siglo, ken Suetonio akin okatka romano uan Josefo akin okatka judío uan Plinio el Joven, akin okatka tekiua itech Bitinia itech siglo ome.