Xikita nochi

Tlen kiualika

¡Ajsis tonal ijkuak ayakmo ikaj tekokolis!

¡Ajsis tonal ijkuak ayakmo ikaj tekokolis!

Maski tejuan ayakmo titekokoliaj, amo uelis tikchiuaskej oksekimej ayakmo ma tekokolikan. Miakej kinkokoliaj, ik non, kintlajyouiltiaj. ¿Tlen panos satepan?

Biblia techiluia san Jehová uelis kichiuas ayakmo ikaj ma tekokoli uan melauak ijkon panos (Proverbios 20:22).

TOTAJTSIN DIOS KICHIUAS AYAKMO IKAJ MA TEKOKOLI

  1. 1. SATANÁS, DIABLO. Ye kichiua miakej ma tekokolikan. ToTajtsin Dios kixpolos Satanás uan nochtin akinmej tekokoliaj (Salmo 37:38; Romanos 16:20).

  2. 2. SATANÁS KIYEKANA NOCHI TLEN AMO KUALI. ToTajtsin Dios kinmixpolos nochtin akinmej kichiuaj oksekimej ma mokokolikan, ken tekiuajkej uan akinmej tlayekanaj itech religiones. Ye noijki kinmixpolos nochtin akinmej tlanemakaj uan tekajkayauaj para kipiaskej miak tomin (2 Pedro 3:13).

  3. 3. TITLAJTLAKOLEJKEJ. Biblia kijtoua totatajuan otechpanoltilijkej tlajtlakoli, ik non, timokuayejyekouaj uan tikchiuaj tlen amo kuali (Romanos 5:12). Ik non, noijki titekokoliaj. Pero toTajtsin Dios techpaleuis ayakmo ma tiyetokan titlajtlakolejkej uan ayakmo ma titekokolikan (Isaías 54:13).

BIBLIA KIJTOUA SATEPAN AYAKMO IKAJ TEKOKOLIS

  1. 1. AMIKAJ KICHIUILISKEJ TLEN AMO KUALI. ITekiuajkayo toTajtsin Dios nochipa ualtlanauatis ipan nochi tlaltikpak (Daniel 2:44). Ayakmo ikaj techikoitas nion tekokolis uan toTajtsin Dios kinpaleuis nochtin tlen axkan tlajyouijtokej (Lucas 18:7).

  2. 2. NOCHTIN TIKPIASKEJ YOLSEUILISTLI. Ayakmo yetos guerras uan ayakmo ikaj kitlajyouiltiskej (Salmo 46:9). Itech nochi tlaltikpak kuali yetoskej nochtin akinmej tetlasojtlaj (Salmo 72:7).

  3. 3. KUALI TIYETOSKEJ. Nochtin motlasojtlaskej (Mateo 22:39). Amikaj tlajyouis, amikaj mokuayejyekos tlen amo moneki uan amikaj kilnamikis tlen okipanok (Isaías 65:17). Ijkuak ayakmo ikaj tekokolis, nochtin “melauak yolpakiskej porque yetos miak yolseuilistli” (Salmo 37:11).

¿Mitspaktiskia ijkon tiyetos? ITlaixpantijkauan Jehová tlen katej itech nochi tlaltikpak, tlapaleuiaj para ayakmo ma tekokolikan oksekimej. ¿Ken kichiuaj? Kichiuaj tlen kijtoua Biblia (Salmo 37:8). Maski tlatlamantli inmialtepe, nochtin kuali mouikaj porque motlasojtlaj (Isaías 2:2-4).

ITlaixpantijkauan Jehová uelis mitspaleuiskej para ayakmo titechikoitas. Tlen timomachtis mitspaleuis ayakmo xitekokoli uan yolik titetlasojtlas. Noijki tikitas ken uelis tikinchiuilis tlen kuali oksekimej, maski amo mitstlakaitaskej noso mitskokoliskej. Ijkon okachi tiyolpakis uan kuali timouikas iuan oksekimej. Noijki tikmatis tlen uelis tikchiuas para tiyolpakis ijkuak iTekiuajkayo toTajtsin Dios kichiuas ayakmo ikaj ma mokokoli (Salmo 37:29).