Xikita nochi

Tlen kiualika

Otechchijchijkej para ma tiyoltokan

Otechchijchijkej para ma tiyoltokan

¿TECHPAKTISKIA nochipa tiyoltoskej? Kualtsin yetoskia tla ayakmo kanaj techkokos uan tiyolpakiskej. Tiyetoskej iuan akinmej tikintlasojtlaj, tinemitiuij san kanin tiknekiskej, tikchiuaskej okseki tlamantli uan tikmatiskej ken uelis tikchiuaskej tlen techpaktia.

¿Tleka tiknekij nochipa tiyoltoskej? Biblia kijtoa toTajtsin Dios okitlali itech toyolo ma tiknekikan nochipa tiyoltoskej (Eclesiastés 3:11). Noijki Biblia kijtoa: “Ye n tlasojtlálistli” (1 Juan 4:8). Tla techtlasojtla, ¿tleka okitlali itech toyolo ma tiknekikan nochipa ma tiyoltokan tla amo ueli ijkon tikchiuaj?

Amikaj kinekij ixpoliuis. Ik non, Biblia kijtoa mikilistli ‘tokokolikni’ (1 Corintios 15:26). Sekimej ixpoliuij ijkuak ok telpokamej noso ichpokamej uan oksekimej ijkuak yikipiaj miak xiuitl. Pero tinochtin tiixpoliuij. Miakej momojtiaj ijkuak kikakij motlapouiaj itech mikilistli uan oksekimej amitlaj kinekij kimatiskej. Pero ¿ajsis tonal ayakmo techmomojtis mikilistli?

UELIS TIKNELTOKASKEJ NOCHIPA TIYOLTOSKEJ

¿Otikmatiaya toTajtsin Dios amo okinekiaya ma tiixpoliuikan? Biblia kipia se amochtli tlen itoka Génesis uan ompa kijtoa Jehová * okinekiaya nochipa ma tiyoltokan nikan tlaltikpak. Jehová kuali okichijchi tlaltikpak uan ijkon tiyolpakiskiaj. Noijki okichijchi Adán uan okitlali itech xochitlali Edén. Satepan toTajtsin Dios okitak “sapanoa kuali nochi tlen okichijchi” (Génesis 1:26, 31).

ToTajtsin Dios okichijchi Adán ken ye uan amo okipiaya tlajtlakoli (Deuteronomio 32:4).  Noijki okichijchi Eva uan amo okipiaya tlajtlakoli. Jehová okinmilui: “Ximomiaktilikan uan ximochiuakan nanmiakej, xiktemitikan tlaltikpak uan xikmaluikan uan xikinyekanakan michimej tlen katej ijtik ueyi atl uan nochtin yolkamej tlen patlanij iluikak uan nochtin tlen moliniaj itech tlaltikpak” (Génesis 1:28).

Uejkauaskia kitemitiskej tlaltikpak. Ik non, Eva omonekiaya kinpias miakej ikoneuan uan satepan yejuan noijki kinpiaskiaj inkoneuan uan ijkon kitemitiskiaj tlaltikpak (Isaías 45:18). Tla Adán uan Eva amo kitaskiaj tlen toTajtsin Dios okinekiaya uan san kinmitaskiaj ma moskaltikan inkoneuan uan inmixuiuan, ¿tleka ijkon okinnauati?

Noijki toTajtsin Dios okinnauati ma kinyekanakan yolkamej. Adán omonekiaya nochtin kintokayotis uan xamo ouejka (Génesis 2:19). Noijki omonekiaya kuali kinmixmatiskiaj uan ijkon kuali kinmaluiskiaj.

ToTajtsin Dios okinmakak ome tlanauatilmej Adán uan Eva ijkuak okinmilui ma kinyekanakan yolkamej uan ma momiaktilikan. Non kiteititia okinchijchi nochipa ma yoltokan. Ik non, Adán oyoltoka miak xiuitl.

TOTAJTSIN DIOS OKINEKIAYA MA TIYETOKAN ITECH XOCHITLALI

MIAK XIUITL OYOLTOKAJ

Adán oyoltoka 930 xiuitl

Matusalén oyoltoka 969 xiuitl

Noé oyoltoka 950 xiuitl

Axkan tiyoltokej 70 noso 80 xiuitl

Biblia kijtoa ijkuak ayamo oatemiaya tlaltikpak miak xiuitl oyoltokaj uan amo ken axkan. Génesis 5:5 kijtoa: “Adán oyoltoka novecientos treinta xiuitl uan omikik”. Satepan tlajtoa itech chikuase tlakamej tlen oyoltokaj kanaj novecientos xiuitl. Ijkin omotokayotiayaj: Set, Enós, Quenán, Jared, Matusalén uan Noé okipiaya seiscientos xiuitl ijkuak opejki atemi tlaltikpak (Génesis 5:6-27; 7:6; 9:29). ¿Tleka oyoltokaj miak xiuitl?

Yejuan oneskej ijkuak Adán uan Eva amo yokipiaya miak xiuitl ijkuak otlajtlakolchijkej. Xamo non okinpaleui okachi miak xiuitl ma yoltokan. Pero ¿okachi tiyoltoskiaj tla amo tikpiaskiaj tlajtlakoli? ¿Tlen tikchiuaskej para ayakmo tiixpoliuiskej? Tla tiknekij tikmatiskej, achto moneki tikmatiskej tleka tikokoxkatij uan tiixpoliuij.

^ párr. 6 Biblia kijtoa toTajtsin Dios itoka Jehová.