Xikita nochi

Tlen kiualika

¿Keman ualtlanauatis iTekiuajkayo toTajtsin Dios?

¿Keman ualtlanauatis iTekiuajkayo toTajtsin Dios?

Sekimej imachtijkauan Jesús okitlajtlanijkej keman tlanauatis iTekiuajkayo toTajtsin Dios. Ye okinmilui amo uelis kimatiskej keman tlanauatis (Hechos 1:6, 7). Pero yokinmiluijka ijkuak panoskia seki tlamantli kijtosneki ayakmo miak poliui tlanauatis iTekiuajkayo toTajtsin Dios (Lucas 21:31).

¿TLEN OKIJTO JESÚS PANOSKIA?

Jesús okijto: “Tlanawatijkeh de se weyi tlali motekilmakaskeh iwa n tlanawatijkeh de ok se weyi tlali, iwa n tekiwajkeh de se altepetl motekilmakaskeh iwan tekiwajkeh de ok se altepetl. Tlalolinis chikawak, iwa sentetl yetos apisotl iwa kokólistli” (Lucas 21:10, 11). Nochi nin panos ijkuak yiualtlanauatis iTekiuajkayo toTajtsin Dios. ¿Ijkon tikitaj? ¿Nochi nin tlamantli panotok ipan tlaltikpak? ¿Tlen kiteititia nochi tlen panotok?

1. ONKA GUERRAS

Itech 1914 opejki se guerra tlen amo keman opanouaya. Ixtlamatkej kijtouaj itech non xiuitl opejki se guerra tlen sapanoua otetlajyouilti ipan nochi tlaltikpak. Okintekitiltijkej tanques, bombas, ametralladoras, gases tlen ika oteelsimayaj uan okseki tlamantli tlen amo keman ika otemiktiayaj. Ijkuak otlanki Segunda Guerra Mundial, opejki kintekitiltiaj bombas atómicas. Itech 1914 opejki mochiuaj miakej guerras uan sapanoua miakej yokinmiktijkej.

2. CHIKAUAK TLALOLINI

Enciclopedia Britannica Academic kijtoua sejse xiuitl kanaj 100 veces tlalolini uan tlaxixini. Servicio Geológico tlen kajki Estados Unidos kijtoua “desde 1900 kitaj kox tlalolini uan yokimatkej sejse xiuitl kanaj dieciséis veces okachi tlalolinis”. Sekimej kijtouaj axkan san niman momati kox tlalolinis pero amo melauak okachi tlalolini. Amo keman ijkon opanouaya pero ipan nochi tlaltikpak okachi tlalolini uan miakej tlajyouiaj uan ixpoliuij.

3. ONKA APISTLI

Amo onka miak tlakuali ipan nochi tlaltikpak porque onka guerras, miakej tlachtekij, amo onka tomin, san kijtlakouaj tlen kitokaj, amo kuali kinmaluiaj yolkamej uan ayakmo tlamochiua. Akinmej pouij itech Programa Mundial de Alimentos, okijtojkej: “Ipan nochi tlaltikpak apismikij kanaj 821 millones uan kanaj 124 millones yiixpoliuiskej porque amo kipiaj tlen kikuaskej” (2018 Year in Review). Sejse xiuitl ixpoliuij kanaj 3.1 millones konemej porque amo kipiaj tlen kikuaskej. Ik non, 2011 kanaj 45% konemej apismikij.

4. ONKA MIAK KOKOLISTLI

Akinmej pouij itech Organización Mundial de la Salud, okijtojkej: “Siglo veintiuno okachi onka miak kokolistli. Oksepa onka cólera, peste uan fiebre amarilla. Pero axkan noijki miakej ayakmo ueli mijyotiaj, kipiaj gripe pandémica, ébola uan zika”. Noijki axkan sekimej kinmajsi COVID-19. Ixtlamatkej uan tlapajtijkej kitemouaj ken tlapajtiskej pero amo kajsij ipajyo nochi kokolistli.

5. MOTETLAPOUIA IPAN NOCHI TLALTIKPAK

Jesús okijto panoskia okse tlamantli: “Kuali tlajtolmej itech Tekiuajkayotl motetlapouis itech nochi tlaltikpak para ma kimatikan nochi altepemej, ijkuakon nochi tlamis” (Mateo 24:14TNM). Axkan onka miak ouijkayotl ipan nochi tlaltikpak. Pero kanaj ocho millones kitematiltiaj iTekiuajkayo toTajtsin Dios itech 240 altepemej ika kanaj mil tlajtolmej. Amo keman ijkon opanouaya.

¿TLEN KIJTOSNEKI TLEN PANOTOK?

Axkan panotok nochi tlen okijto Jesús. ¿Tleka nin miak ipati? Ma tikilnamiktokan Jesús okijto: “Ijkuak nonkitaskeh ijkó ya tlamochijtok, xikmatikah itlanawatil Dios ya walajsi” (Lucas 21:31).

Nin Tekiuajkayotl san niman kichiuas tlen kineki Jehová ipan tlaltikpak.

Tlen okijto Jesús uan tlen moajsi itech Biblia, kiteititia toTajtsin Dios okitlali iTekiuajkayo ompa iluikak itech 1914. a Non xiuitl Jehová okitlali Jesucristo ma yeto tekiua (Salmo 2:2, 4, 6-9). Ijkuak ualtlanauatis iTekiuajkayo toTajtsin Dios, kinmixpolos nochtin tekiuajkej. Tlaltikpak kikopas se xochitlali uan nochipa ompa tichantiskej.

San niman mochiuas tlen okijto Jesús itech padrenuestro: “Ma uiki moTekiuajkayo. Ma mochiua motlanekilis ompa iluikak uan noijki nikan tlaltikpak” (Mateo 6:10TNM). Pero ¿tlen kichijtok iTekiuajkayo toTajtsin Dios desde 1914? ¿Ken techpaleuis ijkuak ualtlanauatis?

a Tla tikneki tikmatis okachi tlen opanok 1914, xikita Tiyoltos uan tiyolpakis itech tlamachtil 32, tlen kichijchiuaj iTlaixpantijkauan Jehová.