Xikita nochi

Tlen kiualika

Ijkuak ixpoliui se tokalchanejka

Ijkuak ixpoliui se tokalchanejka

Se siuatl itoka Vanessa uan chanti Australia, okijto: “Nokni tlen tlayekana san oualixpoliuik uan amitlaj onikchi. Opanok seki metstli uan onikilnamikiaya. Onikmachiliaya onechtsoponiliayaj se cuchillo. Ualeua sapanoa onikualaniaya uan onimotlajtlaniaya: ‘¿Tleka oixpoliuik?’. Noijki onimotlajtlaniaya tleka amo okachi iuan onikatka”.

TLA noijki yoixpoliuik se mokalchanejka xamo noijki moselti timomachilia, tiknekiskia itlaj tikchiuas uan sapanoa timoyolkokoa. Xamo noijki tikualani, timomojtia uan xamo tikijtoa motlajtlakol nochi tlen opanok. Ik non, xamo tikijtoa kox ipati tiyoltos.

Tla tichoka porque oixpoliuik se mokalchanejka, amo kijtosneki amo tiyolchikauak. Tichoka porque otiktlasojtlaya. Pero ¿kijtosneki kuali timomachilis tla tichokas?

¿TLEN YOKINPALEUI SEKIMEJ?

Ualeua xamo timokuayejyekoa amitlaj mitspaleuis. Pero nin tlamantli mitsyolchikauas:

XICHOKA TLA TIKNEKI

Amo nochtin san se tlamantli kiteititiaj moyolkokoaj ijkuak ixpoliui se inkalchanejka. Pero mitspaleuis tla tichokas. Vanessa tlen itech yotimotlapouijkej, okijto: “San onichokatoka porque oniknekiaya nikkixtis tlen onikmachiliaya”. Noijki Sofía ijkuak ikni san oualixpoliuik, okijto: “Ualeua nimoyolkokoa uan amo kuali tlen nimokuayejyekoa. Yetoskia ken ijkuak kanaj temaloa totlalnakayo, kitekij uan kichipauaj. Sapanoa tekoko. Pero moneki tikxikoskej tla tiknekij ma tipajtikan”.

XIKIJTO TLEN TIMOKUAYEJYEKOA UAN TLEN TIKMACHILIA

Xamo ualeua tikneki tiyetos moselti. Pero tla san te tikmokauis tlen tikmachilia, yetoskia ken  itlaj san moselti tikneki tikmamajtos. Se telpochtli itoka Jared uan kipia 17 xiuitl, oixpoliuik itajtsin. Okijto: “Xamo san tlen amo onikijtoaya. Pero tepitsin kuali onimomachiliaya ijkuak onikinmiluiaya oksekimej tlen nikmachilia”. Janice tlen itech yotimotlapouijkej, okijto tlen okipaleui: “Onimoyolseuiaya ijkuak ikaj iuan onimotlapouiaya. Onikmachiliaya oksekimej nechajsikamatij uan ayakmo noselti onimomachiliaya”.

XIKSELI MA MITSPALEUIKAN

Se tepajti okijto: “Akinmej moyolkokoaj kinkauiliaj inkalchanejkauan uan inyolikniuan ma kinpaleuikan. Non kinpaleuia amo okachi ma moyolkokokan”. Xikinmilui moyolikniuan ken uelis mitspaleuiskej. Xamo yejuan kinekij mitspaleuiskej pero amo kimatij ken kichiuaskej (Proverbios 17:17).

OKACHI XIMOUIKA IUAN TOTAJTSIN DIOS

Se siuatl itoka Tina, okijto: “Nonamik oixpoliuik porque okipiaya cáncer. Sapanoa oniktlasojtlaya porque oniktlapouiaya nochi tlen onechpanoaya. Ijkuak ijkon onechpanok, opejki nikiluia toTajtsin Dios tlen onechpanotoka. Ijkuak oniijsaya, san niman onikiluiaya toTajtsin Dios ma nechmaka chikaualistli uan ijkon nitlaxikoskia nochi se tonal. ToTajtsin Dios sapanoa onechpaleui”. Tarsha okipiaya 22 xiuitl ijkuak inantsin oixpoliuik. Okijto: “Onimoyolseuiaya ijkuak oniktlajtoltiaya Biblia. Nochipa nechpaleuia kuali ma nimokuayejyeko”.

XIMOKUAYEJYEKO IJKUAK KINYOLITISKEJ AKINMEJ YOIXPOLIKEJ

Tina okijto: “Ijkuak yikin ijkon onechpanok amo onechyolseuiaya nimokuayejyekos ijkuak kinyolitiskej akinmej yoixpolikej. Ne oniknekiaya nouan ma yeto nonamik uan nokoneuan noijki okilnamikiayaj intajtsin. Yikipia naui xiuitl ijkon otechpanok. Pero axkan nimoyolchikaua ijkuak nimokuayejyekoa toTajtsin Dios oksepa kinyolitis akinmej yoixpolikej. Nin tlamantli sapanoa nechpaleuia. Ijkuak nimokuayejyekoa oksepa nikitas, niyolpaki uan nikpia yolseuilistli”.

Xamo amo san niman kuali timomachilis. Pero tlen okijto Vanessa xamo mitsyolseuis. Okijto: “Ualeua timokuayejyekoaj nochipa timoyolkokojtoskej. Pero ualeua kuali timomachiliskej”.

Xikilnamikto: Ximochijchikaua xiyolto maski ualeua moselti timomachilis. ToTajtsin Dios mitspaleuis xiyolpaki iuan moyolikniuan uan mitspaleuis xikpatioita monemilis. Ayakmo miak poliui uan toTajtsin Dios kinyolitis tlen yoixpolikej. Ye kineki oksepa xikinmita mokalchanejkauan uan ayakmo ximoyolkoko.