Xikita nochi

Tlen kiualika

Ijkuak tikmachiliaj ayakmo titlaxikoaj

Ijkuak tikmachiliaj ayakmo titlaxikoaj

TIYOLPAKIJ ijkuak amitlaj techpanoa. Pero ayakmo kuali tikatej ijkuak tikpiaj ouijkayotl.

Se siuatl itoka Sally * tlen chanti Estados Unidos uan nochi okipolo ijkuak ouala ejekakiauitl, okijto: “Onimokuayejyekoaya ayakmo nitlaxikoskia. Ouejka ijkon onimomachiliaya”.

Sapanoa timoyolkokoaj ijkuak se tokalchanejka ixpoliui. Se siuatl itoka Janice uan chanti Australia, okijto: “Sapanoa onimoyolkoko ijkuak oixpolikej ome nokoneuan. Ijkuak ijkon onechpanok oniknekiaya nimikis pero omonekiaya nimoyolchikauas. Onikiluiaya toTajtsin Dios: ‘¡Nimitstlatlaujtia toTajtsin Dios techpaleui porque ayakmo nitlaxikoa! San nikneki nikochis uan ayakmo ma niijsa’”.

Daniel sapanoa omoyolkoko ijkuak isiua okikajkaya. Okijto: “Ijkuak nosiua onechilui onechkajkaya, yetoskia ken onechtsoponili se cuchillo itech noyolo. Sapanoa onechkokoaya noyolo. Yetoskia ken miak uelta onechtsoponiliayaj cuchillo uan miak metstli ijkon onimochiliaya”.

Itech nin revista Akin Tetlapouijtok tikitaskej tleka moneki ma timochijchikauakan ma tiyoltokan maski tikixnamikij ouijkayotl.

Achto ma tikitakan tlen uelis kinpaleuis akinmej nochi okipolojkej ijkuak otlaxixinki.

^ párr. 3 Itech nin tlamachtil sekimej otikinpatilijkej intoka.