Xikita nochi

Tlen kiualika

¿Tlen itoka toTajtsin Dios?

¿Tlen itoka toTajtsin Dios?

Ijkuak ikaj tiknekij tikixmatiskej achto tiktlajtlaniaj tlen itoka. ¿Tlen techiluis toTajtsin Dios tla tiktlajtlaniskej tlen itoka?

“Ne niJehová. Ijkon notoka” (Isaías 42:8).

¿Otikmatiaya toTajtsin Dios ijkon itoka? Xamo amo otikmatiaya porque akinmej kitlajtolkopaj Biblia ayakmo okachi kijkuiloaj itoka toTajtsin Dios. Ualeua san kijkuiloaj TOTEKO. Pero itoka toTajtsin Dios okijkuilojkej kanaj siete mil veces itech Biblia tlen yiuejkika okijkuilojkej. Nin tokayotl kipia naui letras YHWH noso JHVH uan yimiak xiuitl kijkuiloaj “Jehová”.

Nikan mota ika hebreo kanin nesi itoka toTajtsin Dios uan itech okseki Biblias.

Rollo tlen okajsikej itech mar Muerto kanin ijkuilitok amochtli Salmos (itech achto siglo ika HEBREO)

Biblia tlen okitlajtolkopki Tyndale (1530 ika INGLÉS)

Versión Reina-Valera (1602 ika ESPAÑOL)

Union Version (1919 ika CHINO)

¿TLEKA MONEKI TIKMATIS TLEN ITOKA TOTAJTSIN DIOS?

Porque ye kineki xikmati tlen itoka. ToTajtsin Dios ineuian okimotlalili itoka. Jehová kijtoa: “Ijkon notoka uan amo keman nikpatlas uan ijkon nochipa nechilnamikiskej akinmej satepan nesiskej” (Éxodo 3:15). Itoka toTajtsin Dios okachi miak uelta ijkuilitok itech Biblia. Amo miak uelta okijkuilojkej toTajtsin, toTeko noso sapanoa kipia miak chikaualistli. Itoka toTajtsin Dios okachi miak uelta ijkuilitok porque itoka Abrahán, Moisés, David uan Jesús amo miak uelta ijkuilitok itech Biblia. Pero toTajtsin Dios kineki ma tiknotsakan ika itoka. Biblia kijtoa: “Para nochtin ma kimatikan te motoka Jehová, san te okachi tiUeyititok ipan nochi tlaltikpak” (Salmo 83:18).

Jesús okitekitiltiaya itoka toTajtsin Dios. Okinmachti imachtijkauan ijkin ma motlatlaujtikan: “Nochipa makiyektenewakah motoka” (Mateo 6:9). Noijki Jesús ijkin omotlatlaujti: “Notajtsi, maweyijkachito Motoka” (Juan 12:28). Jesús sapanoa okipatioitaya kiueyichiuas itoka toTajtsin Dios. Ik non, okijto: “Ne onikinmatilti motoka, iwa ok nikinmatiltijtos” (Juan 17:26).

ToTajtsin Dios kineki ma tikmatikan tlen itoka. Yiuejkika toTajtsin Dios okinmakixtiaya itekipanojkauan porque itech otlaneltokayaj. Se itekipanojka  okijto: “Itoka Jehová ken se chikauak tepamitl. Akin yolmelauak ompa motlaloa uan kimaluia” (Proverbios 18:10). Noijki okse okijto: “Momakixtiskej nochtin akinmej kijtoskej itoka Jehová” (Joel 2:32). Biblia kijtoa itekipanojkauan toTajtsin Dios kinmixmatiskiaj ika itoka. “Porque nochi altepemej nemiskej itech intoka inteotsitsiuan pero tejuan nochipa tinemiskej itech itoka Jehová toDios” (Miqueas 4:5; Hechos 15:14).

¿TLEN KIJTOSNEKI ITOKA TOTAJTSIN DIOS?

San toTajtsin Dios kinamiki itoka. Miakej ixtlamatkej kijtoaj itoka toTajtsin Dios kijtosneki “Ye Kichiua ma Mochiua”. Se tonal, Jehová omotlapoui iuan Moisés. Nin techpaleuia ma tikajsikamatikan tlen kijtosneki itoka. ToTajtsin Dios okijto: “Ne Niyetos san tlen Nikpejpenas Niyetos” (Éxodo 3:14). Ik non, toTajtsin Dios kinamiki itoka porque ye otlachijchi uan kichiua nochi ma yeto. Itoka toTajtsin Dios techmachtia ye ueli kichiua noso uelis kichiuas nochi tlen moneki uan ijkon mochiuas tlen kineki. Ijkuak toTajtsin Dios kinotsaj ika okseki tlajtolmej, kiteititia ye kinamiki ma tlanauati uan san ye kipia sapanoa miak chikaualistli. Pero san itoka kiteititia tlen ueli kichiua.

ToTajtsin Dios tiktekipachoaj. Itoka toTajtsin Dios noijki kiteititia techtlasojtla uan noijki kipatioita nochi tlen okichijchi. Techiluia tlen kijtosneki itoka uan non kiteititia kineki ma tikixmatikan. Ye okinek ma tikmatikan itoka uan yiuejkika okitematilti uan ijkon axkan tikmatij tlen itoka. ToTajtsin Dios amo kineki ma timokuayejyekokan amo uelis iuan timouikaskej. Ye melauak onka uan uelis iuan timouikaskej (Salmo 73:28).

Tikteititiaj tiktlasojtlaj toTajtsin Dios ijkuak tiknotsaj ika itoka. Ma tikijtokan tikneki ikaj iuan timouikas uan tikneki ma mitsnotsa ika motoka. ¿Ken timomachiliskia tla amo kineki mitsnotsas ika motoka? Xamo timokuayejyekos kox melauak kineki mouan mouikas. Noijki ijkon panoa iuan Jehová. Ye yotechmatilti itoka uan kineki ika ma tiknotsakan. Ijkuak tiknotsaj ika itoka, tikteititiaj tiknekij iuan timouikaskej. Biblia kijtoa toTajtsin Dios kimati akin kilnamiktok itoka (Malaquías 3:16).

Tla tiknekij tikixmatiskej ToTajtsin Dios moneki tikmatiskej tlen itoka. Pero amo san moneki tikmatiskej. Moneki tikmatiskej ken iyelis.

¿TLEN ITOKA TOTAJTSIN DIOS? Itoka Jehová. Itoka kiteititia san ye kichiua ma mochiua tlen kineki.