Xikita nochi

Tlen kiualika

¿Ken iyelis toTajtsin Dios?

¿Ken iyelis toTajtsin Dios?

Ijkuak tiknekij ikaj iuan timouikaskej, moneki tikmatiskej ken iyelis. Ik non, tla tiknekij timouikaskej iuan toTajtsin Dios moneki tikmatiskej ken iyelis. Tla okachi tikixmatiskej, okachi tiknekiskej iuan timouikaskej. ToTajtsin Dios kipia kualtsin iyelis uan kinpia naui tlen okachi inpati. Ye kipia sapanoa miak chikaualistli, ixtlamatki, nochi kichiua ika melajkayotl uan tetlasojtla.

TOTAJTSIN DIOS KIPIA SAPANOA MIAK CHIKAUALISTLI

“¡ToTeko Jehová akin Ueyititok! Te otikchijchi iluikak uan tlaltikpak ika moma tlen kipia miak chikaualistli” (JEREMÍAS 32:17).

Nochi tlen okichijchi toTajtsin Dios kiteititia kipia sapanoa miak chikaualistli. ¿Tlen tikmachiliaj ijkuak tikatej ixko tonaltsin? Titonaltlatlaj. Nin kiteititia Jehová kipia sapanoa miak chikaualistli. Pero ¿tleka titonaltlatlaj? Porque tonaltsin sapanoa totonik. Yetoskia ken ijkuak tikposoniaj atl pero moneki tikposoniskej kanaj 150,000 veces. Sejse segundo tonaltsin kikixtia totonik uan nin yetoskia ken miakej bombas atómicas.

Pero tonaltsin tsikitsin porque katej miakej sitlalimej tlen okachi uejueyij. Sekimej ixtlamatkej kijtoaj onka se sitlali tlen itoka UY Scuti uan nin sapanoa ueyi. Tla nin sitlali yetoskia kanin kajki tonaltsin, kitsakuas nochi tlaltikpak uan ajsiti kanin kajki Júpiter. Nochi nin techpaleuia ma tikajsikamatikan ijkuak Jeremías okijto Jehová okichijchi  iluikak uan tlaltikpak porque kipia sapanoa miak chikaualistli.

¿Ken techpaleuia ichikaualis toTajtsin Dios? Para uelis tiyoltoskej moneki ma techtlauili tonaltsin uan timopaleuiskej ika nochi tlen onka tlaltikpak. Noijki toTajtsin Dios techpaleuia ika ichikaualis. ¿Ken techpaleuia? Itech achto siglo, toTajtsin Dios okimakak Jesús chikaualistli para ma kinchiua milagros. Biblia kijtoa: “Non amo tlachiah ya tlachiah, n koxomeh, ya kuali nejnemih iwa non okipiayah lepra, yochipawakeh. Non amo otlakakiah, ya tlakakih, non omikkeh, yomoyolitijkeh” (Mateo 11:5). Pero ¿ken techpaleuia axkan Jehová? Biblia kijtoa: “Ye kimaka chikaualistli akin sotlaua” uan noijki kijtoa: “Akinmej kichiaj Jehová oksepa kipiaskej chikaualistli” (Isaías 40:29, 31). ToTajtsin Dios noijki techmaka chikaualistli uan ijkon uelis titlaxikoskej ijkuak tikixnamikiskej ouijkayotl (2 Corintios 4:7TNM). Okachi kuali timouikaj iuan toTajtsin Dios ijkuak tikmatij techpaleuia ika ichikaualis.

TOTAJTSIN DIOS IXTLAMATKI

“¡Jehová melauak miak tlamantli yotikchijchi! Ika ixtlamatilistli nochi otikchijchi. Tlaltikpak tentok ika nochi tlen otikchijchi” (SALMO 104:24).

Melauak tikitaj toTajtsin Dios ixtlamatki ijkuak okachi timomachtiaj nochi tlen okichijchi. Sekimej ixtlamatkej kichijchiuaj seki tlamantli ijkon ken mota tlen onka itech tlaltikpak. Ijkon kinyektlaliaj para ma motakan ken Jehová okinchijchi. Nin tlamantli kitokayotiaj biomimética. Ijkon kichiuaj ijkuak kichiuilia ilente se cámara uan noijki ijkuak kichijchiua se avión.

Tetlajtlachialti ken Jehová okinchijchi toixtololouan.

ToTajtsin Dios kiteititia ixtlamatki porque kualtsin otechchijchi. Ma timokuayejyekokan ken peua moskaltia se konetsintli ijtik inantsin. Nin panoa ijkuak espermatozoide kalaki itech óvulo uan ompa kisa nochi tlen kipias konetsintli. Satepan nin célula moxexelojti. Satepan peua mopatla uan kisaj células tlen kipias itech ieso konetl, células tlen ika moyektlaliskej iomiouan uan okseki células. Satepan konetl peua moskaltia uan peua tekiti nochi tlen kipia. Ik non, ijkuak panoa chiknaui metstli yomochi se konetsintli tlen kipia sapanoa miakej células. Ijkuak timokuayejyekoaj itech nin tlamantli, tikajsikamatij toTajtsin Dios ixtlamatki. Ik non, Biblia kijtoa: “Nimitsueyichiuas porque tetlajtlachialti ken otechchijchi” (Salmo 139:14).

¿Ken techpaleuia ixtlamatilis toTajtsin Dios? ToTajtsin Dios kimati tlen kichiua ma tiyolpakikan. Ye ixtlamatki, ik non, uelis techtlapouis ika iTlajtol. Ik non, ye technauatia ‘matimotlapojpolwikah’ (Colosenses 3:13). Sapanoa techpaleuia nin tlamantli. Sekimej ixtlamatkej kijtoaj ijkuak titetlapojpoluiaj techpaleuia kuali ma tikochikan uan kuali ma timomachilikan. Noijki amo timoyolkokoaj uan techpaleuia amo ma tikpiakan okseki kokolistli. ToTajtsin Dios nochipa technojnotsa porque tiktekipachoaj ken se toyolikni (2 Timoteo 3:16, 17). ¿Amo mitspaktiskia tikpias se moyolikni ken toTajtsin Dios?

 TOTAJTSIN DIOS NOCHI KICHIUA IKA MELAJKAYOTL

“Jehová kipatioita melajkayotl” (SALMO 37:28).

ToTajtsin Dios nochipa kichiua tlen kuali. Ye amo keman kichiua tlen amo kuali (Job 34:10). Nochipa tlaixkomaka ika melajkayotl, ijkon ken okijto se salmista: “Tikinmixkomakas altepemej ika melajkayotl” (Salmo 67:4). Ye kimati tlen timokuayejyekoaj, ik non, amo techixkomaka san ika tlen kita noso san tlen kikaki (1 Samuel 16:7). Noijki toTajtsin Dios kimati ijkuak techchiuiliaj tlen amo kuali uan ijkuak oksekimej san kinekij techtlachtekiskej. Ik non, kijtoa “kinmixpoloskej” akinmej amo yolkualmej (Proverbios 2:22).

Pero nin amo kijtosneki toTajtsin Dios kipaktia kintlajyouiltis akinmej amo yolkualmej. Ye kimati akinmej kinmiknomatis. Ik non, Biblia kijtoa: “Jehová teiknomati uan yolkuali”. Noijki kinmiknomati akinmej moyolkopaj. Nin techititia toTajtsin Dios nochi kichiua ika melajkayotl (Salmo 103:8; 2 Pedro 3:9).

¿Ken techpaleuia ma tikmatikan toTajtsin Dios nochi kichiua ika melajkayotl? Tlatitlanil Pedro okijto: “Axa nikajsikamati, Dios amo kintlasojtla san sikimeh, iwa oksikimeh amó, yej itech nochi nin tlaltíkpaktli, Dios kinselia akimeh kitlakitah iwa kichiwah tlan kuali” (Hechos 10:34, 35). Ye tinochtin techtlasojtla uan techpaleuia porque nochi kichiua ika melajkayotl. Tinochtin techselia uan techkauilia ma tikueyichiuakan porque ye amo kita itech tlen altepetl tiuitsej, amo kita kox tiixchipajkej, kox otimomachtijkej noso kox tikpiaj tomin.

ToTajtsin Dios tinochtin techtlasojtla, ik non, tinochtin techteochiuas porque ye amo kita itech tlen altepetl tiuitsej, amo kita kox tiixchipajkej, kox otimomachtijkej noso kox tikpiaj tomin.

ToTajtsin Dios otechchijchi uan kineki ma tikajsikamatikan nochi kichiua ika melajkayotl. Ik non, otechmakak totlalnamikilis. Biblia kijtoa totlalnamikilis yetoskia ken se tlanauatil tlen kajki itech toyolo tlen techpaleuia ma tikmatikan kox tikchijtokej tlen kuali noso tlen amo kuali (Romanos 2:15). ¿Ken techpaleuia nin tlamantli? Tla kuali tikmachtiskej totlalnamikilis, techpaleuis amo ma tikchiuakan tlen techtlajyouiltis. Tla tikchiuaskej itlaj amo kuali, techpaleuis ma timoyolkopakan  uan amo oksepa ma tikchiuakan tlen amo kuali. Techpaleuis tla tikajsikamatij toTajtsin Dios nochi kichiua ika melajkayotl uan iuan timouikaskej.

TOTAJTSIN DIOS TECHTLASOJTLA

“Dios Ye n tlasojtlálistli” (1 JUAN 4:8).

Biblia amo kijtoa toTajtsin Dios chikaualistli, ixtlamatilistli noso melajkayotl. Pero Biblia kijtoa ye tlasojtlalistli. ¿Tleka? Maski ika ichikaualis ueli kichiua miak tlamantli uan ika imelajkayo uan ixtlamatilis moyekana ika tlen kichiuas, nochi nin ueli kichiua porque tetlasojtla.

Tla Jehová kinekiskia uelis iselti yetoskia. Pero ye techtlasojtla, ik non, otechchijchi uan noijki nochi tlen onka. Ijkuak okichijchi tlaltikpak, amo okijto itlaj ma tikmakakan para itech tichantiskiaj. Tinochtin techtlasojtla porque “ye kichiwa makisa n tonati impa non kichiwah tlan kuali iwa kichiwah tlan amo kuali. Iwa kualtitlani n kiawitl impa n kualteh tlakah iwa n tlakah non amo kualteh” (Mateo 5:45).

Noijki “Toteko Dios satlawel tetlasojtlak iwa teiknoma” (Santiago 5:11). Kintlasojtla akinmej kinekij kixmatiskej uan kinekij iuan mouikaskej. Tisejse techixmati uan tinochtin tiktekipachoaj (1 Pedro 5:7).

¿Ken techpaleuia toTajtsin Dios ma techtlasojtla? ToTajtsin Dios tlatlamantli kiteititia techtlasojtla. Ijkuak techuetskitia se konetl, tokalchanejkauan techtlasojtlaj uan ijkuak kalaki tonaltsin kualtsin mota. Nochi nin tlamantli amo moneki pero techpaleuia ma tiyolpakikan.

Noijki kiteititia techtlasojtla porque techkauilia ma tiktlatlaujtikan. Biblia kijtoa: “Amitla manomechtekipacho, yej nochipa xikilikah n Toteko [toTajtsin Dios] tlan nonkinekih keman nonmotiotsajtsiliah, xiktlajtlanilikah iwa ximotlasojkamatikah”. Ye techtlasojtla uan kineki ma tikiluikan nochi tlen techtekipachoa. Ye kijtoa techpaleuis tla tikiluiskej tlen techtekipachoa (Filipenses 4:6, 7).

Itech nin tlamachtil otikitakej toTajtsin Dios kipia miak chikaualistli, ixtlamatki, kichiua nochi ika melajkayotl uan tetlasojtla. Axkan tiknekij timitsiluiskej okachi xiktlajtolti nin revista uan ijkon tikmatis tlen yokichi toTajtsin Dios uan tlen kichiuas satepan.

¿KEN IYELIS TOTAJTSIN DIOS? San Jehová kipia miak chikaualistli, ixtlamatki uan nochi kichiua ika melajkayotl. Pero okachi techtlasojtla.