Xikita nochi

Tlen kiualika

¿Akin tiknekij ma techyekana?

¿Akin tiknekij ma techyekana?

“Ayakmó xinemikah kemi nemih n tlaltikpaktlakah” (ROM. 12:2).

TLAKUIKALMEJ: 88 UAN 45

1. ¿Tlen otlanankili Jesús ijkuak Pedro okilui “amo Dios makimonekilti”? (Xikita dibujo kanin peua tlamachtil).

IMACHTIJKAUAN Jesús amo okineltokayaj tlen okikakej. Omokuayejyekoayaj ye oksepa kinauatiskia altepetl Israel. Pero Jesús okinmilui tlajyouiskia uan kimiktiskiaj. Tlatitlanil Pedro okijto: “¡Noteko, amo Dios makimonekilti! ¡Ayik ijkó ximochiwa!”. Pero Jesús okilui: “¡Xio kan ayakmó nimitsitas, satanás! ¡San techtsatsakuilia! Porke amo mitstekipachoa tlan Dios kimonekiltia, yej mitstekipachoa tlan kinekih n tlakah itech nin tlaltíkpaktli” (Mat. 16:21-23; Hech. 1:6).

2. ¿Tleka Jesús ijkon okinankili Pedro?

2 Ijkuak Jesús ijkon okijto okiteititi ken mokuayejyekoa toTajtsin Dios uan ken mokuayejyekoaj tlen kinnauatia Satanás (1 Juan 5:19). Tlen okijto Pedro okiteititi omokuayejyekoaya ken akinmej tlaixnekij. Pero Jesús okimatiaya Jehová amo omokuayejyekoaya ken Pedro. Jesús  okimatiaya toTajtsin Dios okinekiaya ma moyektlali porque tlajyouiskia uan mikiskia. Jesús okiteititi amo omokuayejyekoaya ken akinmej amo kitekichiuiliaj toTajtsin Dios.

3. ¿Tleka oui timokuayejyekoskej ken Jehová?

3 ¿Timokuayejyekoaj ken toTajtsin Dios noso ken akinmej amo kitekichiuiliaj? Tejuan timoyekanaj ika itlanauatiluan Jehová. Pero ¿ken timokuayejyekoaj? ¿Timochijchikauaj timokuayejyekoskej ken toTajtsin Dios? Moneki timochijchikauaskej tla tiknekij timokuayejyekoskej ken Jehová. Pero tla amo timomaluiskej, timokuayejyekoskej ken akinmej amo kitekichiuiliaj toTajtsin Dios. San niman ijkon uelis timokuayejyekoskej porque Satanás tlanauatijtok (Efes. 2:2). Noijki akinmej amo kitekichiuiliaj Jehová san intech motekipachoaj uan xamo noijki tiknekiskej ijkon tikchiuaskej. Ik non, oui timokuayejyekoskej ken Jehová.

4. (1) ¿Tlen techpanos tla timokuayejyekoskej ken akinmej amo kitekichiuiliaj Jehová? (2) ¿Ken techpaleuis nin tlamachtil?

4 Tla timokuayejyekoskej ken akinmej amo kitekichiuiliaj Jehová, titlaixnekiskej uan san tikchiuaskej tlen tiknekij (Mar. 7:21, 22). Ik non, moneki ma timokuayejyekokan ken Jehová. Nin tlamachtil techpaleuis ijkon ma tikchiuakan. Axkan timomachtiskej sapanoa techpaleuia tla timokuayejyekoaj ken toTajtsin Dios. Porque nin amo kijtosneki amo techkauilia ma tikpejpenakan tlen tikchiuaskej. Noijki tikitaskej tlen techpaleuis amo ma timokuayejyekokan ken akinmej amo kitekichiuiliaj Jehová. Itech okse tlamachtil tikitaskej ken timokuayejyekoskej ken Jehová ijkuak itlaj tikpejpenaskej.

TECHPALEUIA TLA TIMOKUAYEJYEKOSKEJ KEN JEHOVÁ

5. ¿Tleka sekimej amo kinekij ikaj ma kinmilui ken mokuayejyekoskej?

5 Sekimej amo kinekij ma kinmiluikan ken mokuayejyekoskej. Kijtoaj: “Amo nikneki ikaj ma nechilui tlen nikchiuas”. Xamo ijkon kijtoaj porque kinekij inselti kipejpenaskej tlen kichiuaskej. Amo kinekij ikaj ma kinmilui ken mokuayejyekoskej nion ma kinchiualtikan ma kichiuakan ken oksekimej. *

6. (1) ¿Tlen techkauilia Jehová ma tikchiuakan? (2) ¿Uelis tikchiuaskej san tlen tiknekiskej?

6 Timokuayejyekoskej ken Jehová amo kijtosneki ayakmo itlaj uelis tikpejpenaskej. 2 Corintios 3:17 kijtoa: “Porke n Toteko Ye n Espíritu, iwa kan kajki Iespíritu Toteko ayakmó tiilpitos itech tlajtlákoli”. Jehová techkauilia ma tikpejpenakan ken tikpiaskej toyelis uan noijki techkauilia ma tikpejpenakan ma tikchiuakan tlen techpaktia. Ijkon ueli tikchiuaj porque Jehová ijkon otechchijchi. Pero amo uelis tikchiuaskej san tlen tejuan tiknekiskej (xiktlajtolti 1 Pedro 2:16). Jehová kineki ma tiktlakamatikan iTlajtol ijkuak tikpejpenaskej itlaj tikchiuaskej. Sapanoa techpaleuia maski mota amo itlaj techkauilia ma tikchiuakan.

7, 8. Xikijto kox techkauilia Jehová ma tikpejpenakan tlen tikchiuaskej.

 7 Tetajmej kinmachtiaj inkoneuan ma moyekanakan ika principios bíblicos para okachi kuali tekipanoskej, teajsikamatiskej uan amo tlachtekiskej. ¿Kijtosneki amo kinkauiliaj itlaj ma kichiuakan? Amo. Porque ijkon kinmachtijtokej inkoneuan kuali ma yetokan. Ijkuak moskaltiskej konemej yejuan kipejpenaskej tlen kichiuaskej. Tla yejuan moyekanaskej ika principios bíblicos tlen okinmachtijkej intatajuan, kuali kipejpenaskej tlen kichiuaskej uan amo tlajyouiskej.

8 Jehová kineki kuali ma tiyetokan porque techtlasojtla ken se teta (Is. 48:17, 18). Ik non, kineki ma timoyekanakan ika principios bíblicos tlen techpaleuiaj ma tikpiakan kuali toyelis uan ken timouikaskej iuan oksekimej. Techiluia ma timokuayejyekokan ken ye. ¿Kijtosneki amo techkauilia ma tikpejpenakan tlen tikchiuaskej? Amo. Porque ye kineki kuali ma timokuayejyekokan tlen tikchiuaskej (Sal. 92:5; Prov. 2:1-5; Is. 55:9). Kineki ma tikpejpenakan tlen kuali uan noijki tlen techpaktia. Ijkon sapanoa tiyolpakiskej (Sal. 1:2, 3). Sapanoa techpaleuia timokuayejyekoskej ken Jehová.

JEHOVÁ AMO MOKUAYEJYEKOA KEN AKINMEJ AMO KITEKICHIUILIAJ

9, 10. ¿Tleka tikijtoaj toTajtsin Dios amo mokuayejyekoa ken akinmej amo kitekichiuiliaj?

9 Akinmej tikchiuaj ken Cristo moneki tikajsikamatiskej toTajtsin Dios amo mokuayejyekoaj ken akinmej amo kitekichiuiliaj. Porque Satanás okse tlamantli kijtoa ma tikpiakan toyelis, ken tiyolpakiskej iuan tokalchanejkauan uan kineki ma tikpiakan se tekitl kanin tiktlaniskej miak tomin. Pero tlen mokuayejyekoa Satanás kixnamiki tlen mokuayejyekoa Jehová. Akinmej amo kitekichiuiliaj Jehová, san kinekij kichiuaskej tlen kinpaktia uan amo kitaj tlajtlakoli auilnemiskej. Kijtoaj uelis mokajkauaskej akinmej yomonamiktijkej tla amo yolpakij. Nochi nin tlamantli amo techpaleuis. Ik non, moneki okachi ma tikchiuakan tlen kijtoa Biblia.

10 Jesús okijto: “Ixtlamatilis Dios moixmati ika tlan kichiwah ipilwah akimeh kitlakitah” (Mat. 11:19). Maski axkan onka miak tlamantli tlen tepaleuia, sapanoa titlajyouiaj porque onka guerras, techikoitaj uan kichiuaj tlen amo kuali. Kijtoaj amo tlajtlakoli auilnemiskej uan nin tlamantli kintlajyouiltia kalchanejkej uan mokokoaj. Pero akinmej kichiuaj ken Cristo okachi yolpakij, mouikaj ika yolseuilistli uan amo kipiaj kokolistli porque amo auilnemij (Is. 2:4; Hech. 10:34, 35; 1 Cor. 6:9-11). Nochi nin tlamantli kiteititia toTajtsin Dios amo mokuayejyekoa ken akinmej amo kitekichiuiliaj.

11. ¿Akin okikauili Moisés ma kiyekana uan tlen tlateochiualistli okiseli?

11 Yiuejkika, itekipanojkauan toTajtsin Dios okajsikamatkej ye amo mokuayejyekoa ken akinmej amo kitekichiuiliaj. Ijkon okichi Moisés ijkuak okilui Jehová ma kimaka ixtlamatilistli maski “okixtlamachtijkeh ika nochi tlan egipsios okimatiah” (Hech. 7:22; Sal. 90:12). Noijki okilui ma kipaleui ma moyekana ika itlanauatiluan (Éx. 33:13). Ye okikauili Jehová ma kiyekana uan okimakak se tekitl miak ipati. Ik  non, Biblia kijtoa Moisés okipiaya chikauak itlaneltokilis (Heb. 11:24-27).

12. ¿Tlen ika omoyekanki Pablo?

12 Pablo okatka ixtlamatki uan otlajtoaya hebreo uan griego (Hech. 5:34; 21:37, 39; 22:2, 3). Pero ye okitlakamatiaya Biblia ijkuak itlaj okipejpenaya kichiuas (xiktlajtolti Hechos 17:2; 1 Corintios 2:6, 7, 13). Non okipaleui ma kitekichiuili Jehová uan okichiaya kipias yolilistli tlen amo keman tlamis (2 Tim. 4:8).

13. ¿Akin moneki techiluis kox timokuayejyekoskej ken toTajtsin Dios?

13 Nochi nin tlamantli techititia Jehová amo mokuayejyekoa ken akinmej amo kitekichiuiliaj. Noijki tiyolpakiskej uan kuali tiyetoskej tla tikchiuaskej tlen kijtoa Biblia. Pero Jehová amo techchiualtia ma timokuayejyekokan ken ye. Noijki “tlakeuali yolmelajki uan ixtlamatki” uan tlayekankej amo techchiualtiaj ken moneki timokuayejyekoskej (Mat. 24:45, TNM; 2 Cor. 1:24). Moneki tejuan tikpejpenaskej kox timokuayejyekoskej ken toTajtsin Dios. ¿Tlen amo moneki tikchiuaskej?

AMO MA TIMOKUAYEJYEKOKAN KEN AKINMEJ AMO KITEKICHIUILIAJ JEHOVÁ

14. ¿Tlen moneki tikchiuaskej tla tiknekij timokuayejyekoskej ken Jehová?

14 Romanos 12:2 techiluia: “Ayakmó xinemikah kemi nemih n tlaltikpaktlakah, yej xikpatlakah nomotlayejyekolis para ijkó manomechyankuili nomonemilis. Ijkó weletis nonkimatiskeh tlan kimonekiltia Dios, xikchiwakah tlan kuali, tlan kipaktia, iwa tlan yekmilajka”. Nin kijtosneki uelis tikpatlaskej ken timokuayejyekoaj maski achto okse tlamantli otimokuayejyekoayaj. Uelis ijkon tikchiuaskej maski yikajki itech toeso ken tikpiaj toyelis uan maski yotechpanok miak tlamantli. Noijki uelis ijkon tikchiuaskej tla timokuayejyekoaj tlen kuali. Tikmatiskej ken mokuayejyekoa toTajtsin Dios tla timokuayejyekoskej ken ye. Satepan nochipa timokuayejyekoskej ken Jehová.

15. Ijkon ken kijtoa Romanos 12:2, ¿tlen techpanos tla timokuayejyekoskej ken akinmej amo kitekichiuiliaj Jehová?

15 Amo ma timokuayejyekokan ken oksekimej tla tiknekij timokuayejyekoskej ken Jehová. Nin kijtosneki amo ma tikitakan tlen pitsotik, amo ma tikkakikan nion ma tiktlajtoltikan tlen amo kuali. Para tikajsikamatiskej nin tlamantli sapanoa miak ipati, ma tikijtokan ikaj kineki chikajtos uan peua kikua tlen kipaleuis. Pero amo chikajtos tla san tlen amo kikuajtinemis. Noijki ijkon techpanos tla tiknekij timokuayejyekoskej ken Jehová uan noijki ken akinmej amo kitekichiuiliaj.

16. ¿Tleka moneki timomaluiskej?

16 Pero ¿ken uelis ayakmo timoneloskej iuan akinmej amo kitekichiuiliaj Jehová tla noijki chantij nikan tlaltikpak? (1 Cor. 5:9, 10). Noijki ijkuak titetlapouiaj tikkakij tlen amo kuali kineltokaj. Pero amo ma timokuayejyekojtokan tlen kineltokaj oksekimej uan san niman ma tikilkauakan. Noijki ma tikchiuakan ken Jesús ijkuak okixtope tlen Satanás okilui. Moneki ma timomaluikan uan ijkon amo timokuayejyekoskej ken akinmej amo kitekichiuiliaj Jehová (xiktlajtolti Proverbios 4:23).

17. ¿Tlen moneki tikchiuaskej para amo timokuayejyekoskej ken akinmej amo kitekichiuiliaj Jehová?

17 Moneki kuali tikinpejpenaskej akinmej  inmiuan timouikaskej. Biblia kijtoa tla timouikaskej iuan akinmej amo kitekichiuiliaj Jehová, satepan noijki ijkon timokuayejyekoskej (Prov. 13:20; 1 Cor. 15:12, 32, 33). Noijki kuali ma tikpejpenakan tlen ika timoyolpaktiskej. Ma tikixtopeuakan evolución uan auilnemilistli. Amo ma timokuayejyekokan itech nin tlamantli porque kixnamiki iTlajtol toTajtsin Dios (2 Cor. 10:5).

¿Tikinmiluiaj tokoneuan amo ma moyolpaktikan ika tlen amo kuali? (Xikita párrafo 18 uan 19).

18. ¿Tlen tikchiuaskej tla amo tiknekij timokuayejyekoskej ken akinmej amo kitekichiuiliaj Jehová?

18 Noijki kuali ma tikitakan tlen amo kuali mokuayejyekoaj oksekimej uan ma tikixtopeuakan. Ualeua itech noticias itlaj kipanoltiaj tlen kinpaktis sekimej políticos. Xamo itech noticias kijtoaj okachi ipati ma timomachtikan uan ma tikpiakan miak tlamantli. Itech seki películas uan itech amochmej kijtoaj san totech ma timotekipachokan noso san itech tokalchanejkauan. Non tlamantli amo melauak uan kixnamiki tlen kijtoa iTlajtol toTajtsin Dios. Porque ompa kijtoa tejuan uelis tiyolpakiskej tla tiktlasojtla toTajtsin Dios (Mat. 22:36-39). Noijki miakej kinkajkayauaj konemej ika caricaturas, películas uan ijkuak kintlajtoltiaj amochmej uan ijkon yolik kichiuaskej tlen amo kuali.

19. ¿Tlen moneki timotlajtlaniskej uan tleka?

19 Nin amo kijtosneki tlajtlakoli timoyolpaktiskej ika tlen kuali. Pero ma timotlajtlanikan: “¿Nikmati tlen amo kuali mokuayejyekoaj akinmej amo kitekichiuiliaj Jehová? ¿Nikinmiluia nokoneuan tlen amo moneki kitaskej? ¿Ne noijki nikmati tlen amo moneki nikitas? ¿Nikinmachtia nokoneuan tlen mokuayejyekoa toTajtsin Dios uan ijkon amo kichiuaskej tlen amo kuali?”. Tla tikilnamiktoskej ken mokuayejyekoa Jehová, amo timokuayejyekoskej ken oksekimej.

¿AKIN TIKNEKIJ MA TECHYEKANA?

20. ¿Akin tiknekij ma techyekana?

20 Ma tikilnamiktokan Jehová amo mokuayejyekoa ken Satanás. Moneki kuali tikpejpenaskej akin techyekanas. Tla timokuayejyekoskej ken akinmej amo kitekichiuiliaj Jehová, timokuayejyekoskej uan tikchiuaskej tlen yejuan kichiuaj. Ik non, miak ipati ma tikitakan tlen tiktlajtoltiaj, tlen tikkakij uan tlen timokuayejyekoaj.

21. ¿Tlen timomachtiskej itech okse tlamachtil?

21 Moneki tikixtopeuaskej nochi tlen amo kuali tla tiknekij timokuayejyekoskej ken Jehová. Pero noijki ma timochijchikauakan ma timokuayejyekokan ken toTajtsin Dios. Itech okse tlamachtil tikitaskej ken tikchiuaskej.

^ párr. 5 Akinmej kichiuaj tlen san yejuan kinekij, kijtoaj amikaj kinnauatia pero non amo melauak. Yejuan ualeua kichiuaj tlen oksekimej kinmiluiaj. Porque ualeua kinneltokiliaj oksekimej ijkuak kinmiluiaj kanin tiuitsej. Noijki ijkuak kinmiluiaj ken motlakentiskej. Pero tinochtin uelis tikpejpenaskej akin tikkauiliskej ma techpaleui ken timokuayejyekoskej.