Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Noviembre  2017

¿Timopaleuiaj itech Jehová?

¿Timopaleuiaj itech Jehová?

“Jehová kinmakixtijtok itekipanojkauan uan akinmej itech mopaleuiaj amo itlaj kintlajtlakoltis” (SAL. 34:22).

TLAKUIKALMEJ: UAN 54

1. ¿Tlen mokuayejyekoaj sekimej tokniuan?

SE TONAL tlatitlanil Pablo okijto: “¡Nimialma!” (Rom. 7:24). Miakej tokniuan noijki ijkon momachiliaj. Maski timochijchikauaj tikyolpaktiskej Jehová, ualeua tikchiuaj tlen amo kuali porque titlajtlakolejkej. Sekimej sapanoa otlajtlakolchijkej uan mokuayejyekoaj Jehová amo keman kintlapojpoluis.

2. (1) Ijkon ken kijtoa Salmo 34:22, ¿tleka amo ma moyolkokokan akinmej otlajtlakolchijkej? (2) ¿Tlen timomachtiskej? (Xikita recuadro “ ¿Itlaj techmachtia noso itlaj kijtosneki?”).

2 Biblia techiluia akinmej mopaleuiaj itech Jehová amo ma moyolkokokan tla otlajtlakolchijkej (xiktlajtolti Salmo 34:22). ¿Tlen kijtosneki timopaleuiskej itech Jehová? ¿Tlen moneki tikchiuaskej para ma techiknomati Jehová uan ma techtlapojpolui? Ninmej tlajtlanilmej tikinnankiliskej itech nin tlamachtil uan tikitaskej tleka okintekitiltiayaj altepemej para mopaleuiskej tlen moijtoa itech Tlanauatil tlen okinmakakej israelitas. Maski nin tlajtolsenkaualistli okipatkayotijkej itech iluitl Pentecostés xiuitl 33 ma tikilnamiktokan ye Jehová okitemakak non Tlanauatil. Tlen moijtoa itech altepemej kanin sekimej omopaleuiayaj, techmachtia tlen mokuayejyekoa Jehová itech tlajtlakoli,  itech tlajtlakolejkej uan itech akinmej moyolkuepaj. Achto ma tikitakan tleka israelitas okinpiayaj altepemej kanin sekimej omopaleuiayaj uan ken okintekitiltiayaj.

“XIKINPEJPENAKAN ALTEPEMEJ KANIN MOPALEUISKEJ”

3. ¿Tlen omonekiaya kinchiuiliskej israelitas tlen otemiktiayaj?

3 Jehová okitaya sapanoa tlajtlakoli ijkuak se israelita otemiktiaya. Tla ikaj otemiktiaya, ikalchanejka akin okimiktijkej omonekiaya momakuepas uan kimiktis akin otemikti (Núm. 35:19). Ijkon okitlaxtlauaya iyolilis akin okimikti. Akin momakuepaskia omonekiaya totoka temiktis para amo mosokiotiskia altepetl kanin ochantiayaj porque Jehová okijto akin temiktia kisokiotia tlali. Uan noijki otlanauati: “Amo xiksokiotikan tlali kanin nanchantij” (Núm. 35:33, 34).

4. ¿Tlen opanoaya tla se israelita amo okinekiaya temiktis?

4 ¿Tlen opanoaya tla se israelita amo okinekiaya temiktis? Maski amo okinekiaya temiktis, itlajtlakol okatka porque okimikti se akin amo itlaj okichi (Gén. 9:5). Pero ken amo okinekiaya temiktis, Jehová okitekauiliaya ma kiknomatikan. Akin otemikti omonekiaya yas itech se altepetl kanin omopaleuiayaj akinmej amo okinekiayaj temiktiskej uan ijkon amo ikaj kimiktiskia. Pero amo uelis kisaskia itech non altepetl hasta ijkuak mikiskia ueyi teopixki (Núm. 35:15, 28).

5. ¿Tleka altepemej kanin sekimej omopaleuiayaj techpaleuia ma tikajsikamatikan Jehová?

5 Jehová okilui Josué ma kinpejpenakan altepemej kanin sekimej mopaleuiskiaj. “Xikinmilui israelitas: ‘Xikinpejpenakan altepemej kanin mopaleuiskej’”. Ineuian Jehová otlanauati ma kinpejpenakan ninmej altepemej para ompa sekimej mopaleuiskiaj (Jos. 20:1, 2, 7, 8). Ik non, ma timotlajtlanikan: “¿Ken techpaleuiaj altepemej kanin sekimej omopaleuiayaj ma tikajsikamatikan Jehová iteiknomatilis? ¿Uan ken techpaleuia ma timopaleuikan itech Jehová?”.

‘UAN YE OMONEKIAYA [...] KINMILUIS TLAYEKANKEJ’

6, 7. (1) ¿Tlen omonekiaya kichiuaskej tlayekankej tla ikaj amo okinekiaya temiktis? (Xikita tlaixkopinal tlen ika peua tlamachtil). (2) Akin otemikti, ¿tleka omonekiaya motlapouis iuan tlayekankej?

6 Tla se israelita amo okinekiaya temiktis omonekiaya yas itech altepetl kanin mopaleuiskia uan ijkuak ompa ajsiskia omonekiaya kinmiluis tlayekankej uan kipaleuiskiaj (Jos. 20:4). Satepan, omonekiaya kikuepaskej kanin otemikti uan kixkomakaskiaj tlen otlayekanayaj itech non altepetl (xiktlajtolti Números 35:24, 25). Tla ninmej tlayekankej okitayaj melauak amo okinekiaya temiktis, okikauiliayaj ma mokuepa itech altepetl kanin omopaleuito.

7 ¿Tleka akin otemikti omonekiaya motlapouis iuan tlayekankej? Ijkon yetoskia chipauak altepetl Israel uan noijki akin otemikti okipaleuiaya iteiknomatilis Jehová. Se ixtlamatki okiyekijto tla akin otemikti amo okinmiluiaya tlayekankej tlen opanok, uelis kimiktiskiaj. Noijki okijto: “Itlajtlakol tla kimiktiskiaj, porque amo okichiuaya tlen Jehová okijtoaya”. Akin amo okinekiaya temiktis okipaleuiayaj pero omonekiaya kitemos kanin kipaleuiskiaj uan omonekiaya kiselis ken kipaleuiskiaj. Tla amo yaskia itech se altepetl kanin mopaleuiskia, ikalchanejka akin okimikti uelis kimiktiskia.

8, 9. Tla ikaj otlajtlakolchi, ¿tleka moneki ma kinmilui tlayekankej?

8 Axkan, tla ikaj otlajtlakolchi moneki kinmiluis tlayekankej ma kipaleuikan. ¿Tleka  moneki ijkon ma kichiua? Achto, porque Jehová kijtoa itech iTlajtol yejuan tlayekankej ma kitakan tla ikaj otlajtlakolchi (Sant. 5:14-16). Ome, porque tlayekankej kinpaleuiaj akinmej moyolkuepaj oksepa ma mouikakan iuan Jehová uan ayakmo ma tlajtlakolchiuakan (Gál. 6:1; Heb. 12:11). Uan eyi, porque okintlalijkej tlayekankej uan yokinmachtijkej ken kinpaleuiskej akinmej moyolkuepaj ayakmo ma moyolkokokan ika tlen okichijkej. Jehová kijtoa tlayekankej yetoskiaj ken kanin ‘timotlatiskej ijkuak chikauak ejekakiaui’ (Is. 32:1, 2). ¿Amo melauak non kiteititia Jehová techiknomati?

9 Miakej moyolseuiaj ijkuak motlapouiaj inmiuan tlayekankej. Ma tikitakan tlen okipanok tokni Daniel akin noijki otlajtlakolchi, pero ye okika ma pano miak metstli uan amo omotlapouiaya iuan tlayekankej. Ye kijtoa: “Ken yopanok miak metstli, onimokuayejyekoaya ayakmo uelis nechpaleuiskiaj”. Daniel omomojtiaya uan amo okinekiaya ikaj ma kimati tlen okichi. Uan ijkuak omotlatlaujtiaya, okimachiliaya achto omonekiaya kiluis Jehová ma kitlapojpolui. Satepan okinmilui tlayekankej ma kipaleuikan. Daniel kilnamiki tlen opanok uan kijtoa: “Melauak onimomojtiaya nimotlapouis iuan tlayekankej. Pero ijkuak inmiuan onimotlapoui, onikmachili ken ayakmo onikmamajtoka tlen sapanoa etik. Axkan niktlatlaujtia Jehová uan ayakmo itlaj nechtsakuilia”. Axkan Daniel kipia kuali itlalnamikilis uan axkan tekiti ken siervo ministerial.

‘UAN YE OMONEKIAYA TOTOKA YAS ITECH ALTEPETL KANIN MOPALEUISKIA’

10. ¿Tlen omonekiaya kichiuas akin otemikti tla okinekiaya ma kiknomatikan?

10 Tla akin amo okinekiaya temiktis okinekiaya ma kiknomatikan, omonekiaya san niman yas itech se altepetl kanin mopaleuiaj tlen amo okachi uejka okatka (xiktlajtolti Josué 20:4). Amo kimiktiskiaj tla totoka yaskia itech altepetl kanin omopaleuiayaj  uan ompa mokauaskiaj hasta ijkuak mikiskia ueyi teopixki. Pero omonekiaya kikauas miak tlamantli, iteki, ikalijtik uan ayakmo kanaj yaskia (Núm. 35:25). * Tla ijkon kichiuaskia, kipaleuiskia. Tla akin otemikti okisaya itech non altepetl, okiteititiaya amo okitekipachoaya akin okimikti uan noijki uelis kimiktiskiaj.

11. ¿Ken kiteititia akin moyolkuepa kipatioita iteiknomatilis Jehová?

11 Axkan, akin moyolkuepa noijki moneki itlaj kichiuas para toTajtsin Dios ma kiknomati. Moneki ayakmo tlajtlakolchiuas uan kikauas nochi tlen okichiuaya ma tlajtlakolchiua. ToTajtsin Dios okinauati Pablo ma kinmilui tokniuan tlen ochantiayaj Corinto akinmej omoyolkuepkej uan ‘omoyolkokoayaj ken Dios kimonekiltia’. Pablo okinmilui: “Axan ya annemij ika melajkayotl iwan ya welis ankijtoskej tlanon oankichijkej. In tlajtlakole katlej onamechmatiltij itech nekáj notlajkuilolamaw, oamechkualanij iwan oamechmajmawtij. San niman ankinekiaj annechitanij, iwan ankinekiaj ankitlajyowiltianij katlej otlajtlakoj” (2 Cor. 7:10, 11NHY). Tla tejuan ayakmo titlajtlakolchiuaj, tikititiskej Jehová techtekipachoa tlen otikchijkej uan tikpatioitaj ye techiknomati.

12. ¿Tlen moneki kikauas akin otlajtlakolchi para ma kiknomati toTajtsin Dios?

12 ¿Tlen moneki kikauas akin otlajtlakolchi para ma kiknomati toTajtsin Dios? Moneki kikauas tlen kichiua ma tlajtlakolchiua maski sapanoa kipaktia (Mat. 18:8, 9). Tla timouikaj iuan akinmej amo kuali inyelis, ¿ok inmiuan timouikaskej? Tla amo tikmoxikoltiaj tikoniskej san tepitsin alcohol, ¿tiyetoskej kanin uelis kichiuas miak ma tikonikan? Tla timochijchikauaj tikmoxikoltiskej amo tiauilnemiskej, ¿tikitaskej se película noso tikitaskej itech Internet tlen uelis kichiuas ma timokuayejyekokan tlen pitsotik? Ma tikilnamiktokan techpaleuis tla timochijchikauaj tiyetoskej tiyolmelajkej ixpan Jehová. Ijkuak ikaj kimachilia toTajtsin Dios yokika, okachi kiyolkokoa. Pero sapanoa tiyolpakij porque Jehová nochipa techtlasojtla (Is. 54:7, 8).

“UAN NONMEJ ALTEPEMEJ KIPALEUISKEJ”

13. ¿Tleka akin otemikti kuali omomachiliaya itech altepetl kanin sekimej omopaleuiayaj?

13 Amo itlaj uelis kichiuiliskia akin otemikti ijkuak yokalakiaya itech altepetl kanin sekimej omopaleuiayaj. Jehová okijto: “Nonmej altepemej kipaleuiskej” (Jos. 20:2, 3). Jehová amo okinekiaya oksepa ma kixkomakakan akin otemikti. Uan ikalchanejka akin okimiktijkej amo okikauiliayaj ma kalaki itech non altepetl para kimiktis. Tla akin otemikti okatka itech non altepetl kanin omopaleuiayaj, toTajtsin Dios okimaluijtoka uan amo itlaj kimouiliskia. Amo otsaktoka akin otemikti, ye uelis tekitiskia, uelis kinpaleuiskia oksekimej uan kitekichiuiliskia Jehová ika yolseuilistli. Okichiuaya miak tlamantli uan oyolpakiaya.

Xikneltoka Jehová yomitstlapojpolui. (Xikinmita párrafos 14 a 16).

14. ¿Tlen moneki kilnamiktos akin moyolkuepa?

14 Sekimej itekipanojkauan Jehová yomoyolkuepkej pero ok kinyolkokoa tlen amo kuali okichijkej. Sekimej mokuayejyekoaj Jehová nochipa kilnamiktos tlen okichijkej. Tla ijkon timomachilia, xikneltoka Jehová mitsiknomati uan yomitstlapojpolui. Ayakmo ximokuayejyeko toTajtsin Dios ayamo mitstlapojpoluia. Daniel akin itech  otimotlapouijkej itech párrafo 9, okitak Jehová melauak okitlapojpolui. Ijkuak tlayekankej okipaleuijkej ma kipia chipauak itlalnamikilis, oksepa okipixki yolseuilistli. Uan okijto: “Ayakmo nechyolkokoa tlen onikchi uan ayakmo nitlajtlakolchiua. Jehová kijtoa uejka kiuika totlajtlakol uan uejka kitlalia. Amo oksepa tikilnamikiskej. Otikitakej ijkuak akin otemikti yokatka itech altepetl kanin sekimej omopaleuiayaj, ikalchanejka akin okimikti ayakmo itlaj kichiuiliskia. Noijki ijkuak Jehová techtlapojpoluia, ayakmo kilnamiki tlen otikchijkej noso oksepa techixkomakas (xiktlajtolti Salmo 103:8-12).

15, 16. ¿Ken techpaleuia Jesús porque topatka okitemakak iyolilis uan ye toueyi teopixki?

15 Ijkon ken israelitas otlaneltokakej itech Jehová, tejuan okachi moneki itech ma titlaneltokakan. Ken otikitakej itech achto párrafo, tlatitlanil Pablo omoyolkokoaya porque amo nochipa okitlakamatiaya Jehová. Pero omochijchika ayakmo tlajtlakolchiuas uan okijto: “Ika tlan Cristo Jesús okichiwako. ¡Niktlasojkamati Dios!” (Rom. 7:25). Ken omoyolkuepki, kuali okimatiaya Jehová okitlapojpolui ika Jesús. Cristo topatka okitemakak iyolilis uan ijkon tikpiaj chipauak totlalnamikilis uan tikpiaj yolseuilistli (Heb. 9:13, 14). Uan ken Jesús kajki ken toueyi teopixki “weletis kinmakixtis semijkak akimeh mijkuaniah inawak Dios por Ye, porke Cristo nochipa yolitok, iwa motlatlautijtos inawak Dios por yejwah” (Heb. 7:24, 25). Yiuejkika, tekitl tlen okichiuaya ueyi teopixki okinpaleuiaya israelitas ma kintlapojpolui Jehová. Axkan noijki Jesús tekiti ken toueyi teopixki uan kichiua okachi ma tikneltokakan Jehová “matechiknomati ika ikualtilis iwa matechpalewi keman itla techpoloa” (Heb. 4:15, 16).

16 Ma titlaneltokakan itech imikilis Jesús tla tiknekij timopaleuiskej itech Jehová. Amo san ximokuayejyeko ken nochtin kinpaleuia imikilis Jesús. Xikneltoka Jesús mopatka omikik (Gál. 2:20, 21). Xikneltoka Jehová kitekitiltia imikilis Jesús para mitstlapojpoluis. Xikneltoka ika imikilis Jesús uelis nochipa tiyoltos. Jehová okitemakak mopatka ikone uan non se tetliokolil tlen omitsmakak.

17. ¿Tleka tikneki timopaleuis itech Jehová?

17 Altepemej tlen yiuejkika okatkaj okiteititijkej Jehová teiknomati. Ika nonmej altepemej Jehová okiteititi kipatioita yolilistli. Pero noijki nonmej altepemej kinneskayotiaj tlayekankej ijkuak techpaleuiaj, tlen kijtosneki timoyolkuepaskej uan ken Jehová melauak techtlapojpoluia. ¿Timopaleuiaj itech Jehová? San ye uelis techpaleuis (Sal. 91:1, 2). Chikome timomachtiskej altepemej tlen yiuejkika okatkaj techpaleuiaj ma tikchiuakan ken Jehová, ma tikchiuakan nochi ika melajkayotl uan ma titeiknomatikan ken ye.

^ párr. 10 Miakej amochmej tlen tlajtoaj itech judíos, kijtoaj ikalchanejkauan akin otemikti iuan oyayaj chantitiuij itech non altepetl kanin sekimej omopaleuiayaj.