Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Noviembre  2017

Ma tiktlakuikilikan Jehová ika nochi toyolo

Ma tiktlakuikilikan Jehová ika nochi toyolo

“Miak ipati ma tikueyichiuakan toTajtsin Dios ika tlakuikalmej” (SAL. 147:1).

TLAKUIKALMEJ: 10 UAN 2

1. ¿Tlen kichiuaj tlakuikalmej?

SE TLAKATL tlen kinmijkuiloa tlakuikalmej uan miakej kixmatij, okijto: “Tlajtolmej kichiuaj ma timokuayejyekokan, tlatsotsonali kichiua itlaj ma tikmachilikan pero tlakuikalmej kichiuaj ma tikmachilikan tlen timokuayejyekoaj”. Melauak kuali ma tikititikan Jehová tlen tikmachiliaj uan ma tikueyichiuakan ika tlakuikalmej tlen kijtoaj tiktlasojtlaj. Tiitekipanojkauan Jehová tikmatij ijkuak tiktlakuikiliaj noijki tikueyichiuaj, maski san toselti titlakuikaskej noso ijkuak tiauij nechikol.

2, 3. (1) ¿Tlen kinpanoa sekimej tokniuan ijkuak tlakuikaj? (2) ¿Tlen tlajtlanilmej tikinnankiliskej?

2 ¿Techpaktia chikauak titlakuikaskej noso tipinauaj? Itech seki altepemej tlakamej amo kuali momachiliaj teixpan tlakuikaskej. Nin kichiuas noijki oksekimej amo chikauak ma tlakuikakan, okachi tlayekankej tla amo okachi kinpaktia tlakuikaskej noso kichijtinemij okseki tlamantli ijkuak tokniuan tlakuikaj (Sal. 30:12).

 3 Tla kuali tikajsikamatij ijkuak tiktlakuikiliaj Jehová noijki tikueyichiuaj, amo kanaj tiaskej ijkuak titlakuikaskej. Ma timotlajtlanikan: “¿Tlen nimokuayejyekoa ijkuak titlakuikaj? ¿Tlen nechpaleuis amo ma nimomojti ijkuak nitlakuikas? ¿Tlen nikchiuas para nitlakuikas ika nochi noyolo?”.

IJKUAK TITLAKUIKAJ NOIJKI TIKUEYICHIUAJ JEHOVÁ

4, 5. ¿Tleka tikijtoaj yiuejkika okintekitiltiayaj tlakuikalmej ijkuak okiueyichiuayaj Jehová?

4 Itekipanojkauan Jehová yimiak xiuitl kitekitiltiaj tlakuikalmej para ika kiueyichiuaskej. Israelitas okiueyichiuayaj Jehová ika tlakuikalmej ijkuak okitlakamatiayaj. Ijkuak ueyi tekiua David okitak ken kitekichiuiliskia Jehová itech teokali, okintlali 4,000 levitas ma tlatsotsonakan. Uan 288 kuali okimatiayaj kitlakuikiliskej Jehová (1 Crón. 23:5; 25:7).

5 Ijkuak otlanki okichijchijkej teokali sapanoa miak ipati otlakuikayaj uan otlatsotsonayaj. Biblia kijtoa: “Akinmej kinpitsaj trompetas uan akinmej tlakuikaj san niman san sekan opejki kitlakuikiliaj Jehová, okitlasojkamatkej uan okiueyichijkej ijkuak okinpitskej trompetas, címbalos uan okseki tlamantli tlen ika tlatsotsonaj, opejki kitlakuikiliaj Jehová, [...] iueyichiualis Jehová akin melauak toTajtsin Dios omotak itech nochi ikalijtik”. Nin uelis sapanoa okinyolchika israelitas (2 Crón. 5:13, 14; 7:6).

6. ¿Tlen okichi Nehemías ijkuak okatka ueyi tekiua ompa Jerusalén?

6 Ijkuak israelitas okiyektlalijtokaj tepamitl tlen okipiaya Jerusalén, Nehemías okintlali levitas ma tlatsotsonakan uan ma tlakuikakan. Uan ijkuak otlanki okiyektlalijkej tepamitl, otlatsotsontokaj para nochtin ma yolpakikan. Okintlalijkej ome tlanechikolmej ma tlakuikakan. Sejse onejnentiajkej ipan tepamitl uan omonamikej ik kanin okatka teokali. Sapanoa chikauak otlakuikakej uan uejka omokakiaya (Neh. 12:27, 28, 31, 38, 40, 43). Jehová sapanoa okipakti ijkuak okinkak itekipanojkauan okitlakuikiliayaj ika pakilistli.

7. ¿Ken okiteititi Jesús omonekiaya ma tlakuikakan imachtijkauan para kiueyichiuaskej toTajtsin Dios?

7 Ijkuak Jesús ouala Tlaltikpak, noijki okitlakuikiliayaj Jehová para kiueyichiuaskej. Ijkuak okichi iCena toTeko, Jesús uan imachtijkauan otlakuikakej (xiktlajtolti Mateo 26:30).

8. ¿Tlen kuali neskayotl otechmakakej tokniuan tlen okatkaj itech achto siglo?

8 Tokniuan tlen okatkaj itech achto siglo otechmakakej kuali neskayotl ijkuak otlakuikayaj para kiueyichiuaskej toTajtsin Dios. Maski omonechikoayaj itech inkalijtik oksekimej, okitlakuikiliayaj Jehová ika nochi inyolo. Jehová okitekitilti tlatitlanil Pablo para ma kinmilui oksekimej: “Ximosepannonotsakah iwa ximosepanyekuikakah ika kuali ixtlamatílistli. Xiktlakuikilikah Dios ika nochi nomoyolo ika salmos iwa ika tlakuíkalteh non kiweyiliah, iwa ika tlakuíkalteh non tlatiochiwah” (Col. 3:16). Ijkon moneki titlakuikaskej ika nochi toyolo. Tlakuikalmej tlen katej itech toamochtlakuikal techmaka “tlakeuali yolmelajki uan ixtlamatki” (Mat. 24:45TNM).

 ¿TLEN TECHPALEUIS AMO MA TIMOMOJTIKAN IJKUAK TITLAKUIKASKEJ?

9. (1) ¿Tleka sekimej momojtiaj tlakuikaskej ika nochi inyolo? (2) ¿Ken moneki tiktlakuikiliskej Jehová uan akinmej moneki achto kichiuaskej? (Xikita tlaixkopinal tlen ika peua tlamachtil).

9 Ualeua timomojtiaj titlakuikaskej porque amo nochipa ijkon tikchiuaj. Noso ijkuak tikinmitaj akinmej kimatij kuali tlakuikaj itech televisión noso itech radio, tikitaj tejuan amo tikmatij titlakuikaskej, ik non, tipinauaj. Pero non amo ma techtsakuili ijkuak tiktlakuikiliaj Jehová. Okachi kuali, ma timoyekketsakan, ma tikitakan toamochtlakuikal uan ma titlakuikakan ika nochi toyolo (Esd. 3:11; xiktlajtolti Salmo 147:1). Axkan kalmej kanin timonechikoaj kinpiaj televisiones kanin kintlaliaj tlakuikalmej. Nin techpaleuis ma titlakuikakan ika nochi toyolo. Noijki axkan itech Tlamachtil itech Tekiuajkayotl tlen kiseliaj tlayekankej noijki kintlaliaj ma tlakuikakan. Nin kiteititia miak ipati ma tlakuikakan tlayekankej uan ma kitemakakan kuali neskayotl.

10. ¿Tlen moneki tikilnamikiskej tla amo chikauak titlakuikaj?

10 Sekimej tokniuan amo chikauak tlakuikaj porque pinauaj kinkakiskej noso mokuayejyekoaj amo kualtsin tlakuikaj. Pero moneki ma timokuayejyekokan itech nin tlamantli. Ijkuak titlajtoaj “ualeua timotlapololtiaj” pero non amo kijtosneki ayakmo titlajtoskej (Sant. 3:2). Noijki amo tikijtoskej amo tiktlakuikiliskej Jehová porque amo techpaktia ken titlakuikaj.

11, 12. ¿Tlen techpaleuis kuali ma titlakuikakan?

11 Ualeua timomojtiaj titlakuikaskej porque amo tikmatij ken tikchiuaskej. Ma tikitakan seki tlamantli tlen techpaleuis okachi kuali ma titlakuikakan. *

 12 Tla tikmatij ken timijyotiskej, techpaleuis chikauak ma titlakuikakan. Ijkon ken electricidad kichiua ma xotlato se foco, ijkuak timijyotiaj kichiua chikauak ma titlajtokan noso chikauak ma titlakuikakan. Moneki ma titlakuikakan chikauak ijkon ken ijkuak titlajtoaj (xikita amochtli Benefíciese de la Escuela del Ministerio Teocrático, páginas 181 a 184, kanin kijtoa “Control del volumen de aire”). Biblia techiluia ika nochi toyolo ma tiktlakuikilikan Jehová (Sal. 33:1-3).

13. ¿Tlen moneki tikchiuaskej para kuali titlakuikaskej?

13 Ijkuak tikueyichiuaj Jehová ken kalchanejkej noso ijkuak tikatej toselti, ma tikinpejpenakan tlen tlakuikalmej okachi techpaktiaj uan ma tikintlajtoltikan, satepan ma timijyotikan uan ma titlakuikakan uan ijkon oksepa ma tikchiuakan (Is. 24:14). Ijkon chikauak titlakuikaskej uan non techpaleuis. Pero amo ma timomojtikan nion ma tipinauakan.

14. (1) ¿Tleka moneki kuali tiktlaposkej tokamak ijkuak titlakuikaskej? (Xikita recuadro “ Para kuali titlakuikaskej”). (2) ¿Tlen moneki tikchiuaskej para chikauak titlakuikaskej?

14 Para chikauak titlakuikaskej, moneki kuali tiktlaposkej tokamak. Ik non, moneki okachi ma tiktlapokan tokamak uan amo ken ijkuak titlajtoaj. ¿Pero tlen tikchiuaskej tla totlajtol amo chikauak mokaki noso sapanoa pitsauak titlajtoaj? Techpaleuis amochtli Benefíciese de la Escuela del Ministerio Teocrático, página 184 itech recuadro “Cómo superar problemas específicos”.

MA TITLAKUIKAKAN IKA NOCHI TOYOLO

15. (1) Itech 2016, ¿tlen omoijto itech nechikol tlen mochiua sejse xiuitl? (2) ¿Tleka okiyektlalijkej toamochtlakuikal?

15 Itech nechikol tlen mochiua sejse xiuitl Watch Tower Bible and Tract Society of Pennsylvania itech 2016, omoijto itlaj sapanoa miak ipati. Tokni Stephen Lett tlen  poui itech Cuerpo Gobernante okitematilti amochtlakuikal Ma tiktlakuikilikan Jehová ika nochi toyolo. Tokni Stephen Lett okijto okiyektlalijkej toamochtlakuikal para ma kipia tlajtolmej tlen kipia Traducción del Nuevo Mundo de las Santas Escrituras ika inglés tlen okiski itech 2013. Okinkixtilijkej noso okinpatilijkej tlajtolmej tlen ayakmo nesij itech Biblia tlen okiyektlalijkej. Noijki amochtlakuikal okintlalilijkej okseki tlakuikalmej tlen tlajtoaj itech tetlapouilistli uan ken tiktlasojkamatiskej otechmakixtiko Jesús. Ika toamochtlakuikal tiktlakuikiliaj Jehová, ik non, akinmej pouij itech Cuerpo Gobernante okijtojkej kuali ma mochijchiuakan amochtlakuikalmej uan ma yetokan ken yankuik Biblia tenextik.

16, 17. ¿Tlen okipatilijkej yankuik amochtlakuikal?

16 Para tikmatiskej tlen tlakuikalmej tikintekitiltiskej, katej ika temas. Se neskayotl, achto 12 tlakuikalmej tlajtoaj itech Jehová uan ok chikueyi tlakuikalmej tlajtoaj itech Jesús, temakixtilistli uan noijki okseki katej ika temas. Noijki kanin peua kinualika nochi temas. Nin kinpaleuia tokniuan ma kinpejpenakan tlen tlakuikalmej kintekitiltiskej ijkuak kitemakaskej se tlapoualistli.

17 Para titlakuikaskej ika nochi toyolo, seki tlakuikalmej okinpatilijkej tlajtolmej para okachi totoka ma tikajsikamatikan. Tlakuikali “Xikmalui moyolo” okipatilijkej tlajtolmej uan axkan itoka “Ma tikmaluikan toyolo”. ¿Tleka ijkon okichijkej? Porque tokniuan siuamej, telpokamej uan ichpokamej uan akinmej yikin touan monechikoaj, amo kuali omomachiliayaj ijkuak otlakuikayaj uan okinmiluijtokaj oksekimej tlen kichiuaskiaj.

Ijkuak tikueyichiuaj Jehová ken kalchanejkej, ma tikinmojpauikan tlakuikalmej. (Xikita párrafo 18).

18. ¿Tleka moneki kuali ma tikixmatikan toamochtlakuikal? (Xikita tlajtoli tlen kiualika tlakxitlan).

18 Miakej tlakuikalmej tlen katej itech amochtlakuikal Ma tiktlakuikilikan Jehová ika nochi toyolo omoijkuilojkej ken tiktlatlaujtijtoskiaj Jehová. Nin techpaleuia ma tikiluikan tlen tikmachiliaj. Okseki tlakuikalmej techpaleuiaj ma tikinyolchikauakan tokniuan ika tlasojtlalistli uan ma tiktechiuilikan tlen kuali (Heb. 10:24). Ik non, moneki kuali ma tikkakikan tlatsotsonali uan tlajtolmej tlen kipia tlakuikalmej. Kuali titlakuikaskej tla tikinmojpauiaj tlakuikalmej tlen katej itech jw.org. Tla tikinmojpauiskej, amo timomojtiskej uan titlakuikaskej ika nochi toyolo. *

19. ¿Ken uelis tinochtin tikueyichiuaskej Jehová?

19 Ma tikilnamiktokan ijkuak titlakuikaj noijki tikueyichiuaj Jehová. Ijkuak tiktlakuikiliaj Jehová tikteititiaj tiktlasojtlaj uan noijki tiktlasojkamatiliaj nochi tlen kichiua (xiktlajtolti Isaías 12:5). Ijkuak titlakuikaj ika nochi toyolo, oksekimej noijki ijkon tlakuikaskej. Uelis tiktlakuikiliskej Jehová maski titelpokamej noso tiichpokamej, yitikpiaj miak xiuitl noso yikin opejki timomachtiaj. Ik non, ma tiktlakuikilikan Jehová ika nochi toyolo. Ma tiktlakamatikan nin tlanauatil: “Xiktlakuikilikan Jehová”. ¡Ma tiktlakuikilikan Jehová ika pakilistli! (Sal. 96:1).

^ párr. 11 Tla tikneki okachi tikmatis ken titlakuikas xikita tlapoualistli “Listos para cantar las nuevas canciones”, itech JW Broadcasting, VIDEOS > DESDE NUESTRO ESTUDIO > DISCURSOS.

^ párr. 18 Achto peuas se ueyi nechikol, majtlaktli minutos kitlaliaj tlatsotsonali. Nin tlatsotsonali ika orquesta kichiua kuali ma timoyektlalikan para titlakuikaskej ika nochi toyolo uan noijki kuali tikkakiskej tlen techmachtiskej. Ik non, miak ipati ma timotlalikan uan kuali ma tikkakikan tlatsotsonali.