Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Noviembre  2017

Amo ma timokuayejyekokan ken akinmej amo kitekichiuiliaj Jehová

Amo ma timokuayejyekokan ken akinmej amo kitekichiuiliaj Jehová

“Ximotlachilikah; amo kichiwa nomechkuatlapololtiskeh iwa nomechkajkayawaskeh nekateh tlamachtijkeh ika tlamachtílisteh non amitla impati [...] tlan kiyejyekoliah n tlaltikpaktlakah” (COL. 2:8).

TLAKUIKALMEJ: 38 UAN 31

1. ¿Tlen okinnejmachti Pablo akinmej okichiuayaj ken Cristo? (Xikita tlaixkopinal tlen ika peua tlamachtil).

TLATITLANIL Pablo nesi okintlajkuilili colosenses ijkuak otsaktoka Roma itech xiuitl 60 noso 61. Itech non carta okinmilui: “Nochi kuali xikajsikamatikah”. Nin okijtosnekiaya kitaskiaj tlamantli ken kita Jehová (Col. 1:9). Noijki okinnemachti: “Ni nomechilia para amaka manomechkajkayawa ika kualtsi tlájtoli non amo milák”. Noijki okijto: “Ximotlachilikah; amo kichiwa nomechkuatlapololtiskeh iwa nomechkajkayawaskeh nekateh tlamachtijkeh ika tlamachtílisteh non amitla impati, porke yejwah amo kitemachtiah itlajtol Cristo, yej san tlan kiyejyekoliah n tlaltikpaktlakah” (Col. 2:4, 8). Pablo okiyekijto tleka seki tlamantli tlen miakej mokuayejyekoaj amo kuali uan tleka miakej kinpaktia. Se neskayotl, uelis ikaj mokuayejyekos okachi ixtlamatki noso okachi ueyititok. Ik non, Pablo okinmijkuilili nin carta para ma kixtopeuakan tlen amo kuali omokuayejyekoayaj oksekimej  uan okseki tlamantli tlen amo kuali (Col. 2:16, 17, 23).

2. ¿Tleka timomachtiskej itech tlen mokuayejyekoaj akinmej amo kitekichiuiliaj Jehová?

2 Akinmej amo kitekichiuiliaj Jehová amo kintlakamatij itlanauatiluan toTajtsin Dios. Tla inmiuan timouikaj, yolik kijtlakoskej totlaneltokilis. Tinochtin tikitaj amo kuali mokuayejyekoaj, itech televisión, Internet, kanin titekitij uan itech escuela. Itech nin tlamachtil tikitaskej tlen uelis tikchiuaskej para amo timokuayejyekoskej ken akinmej amo kitekichiuiliaj Jehová. Tikitaskej makuili tlamantli tlen yejuan mokuayejyekoaj uan noijki tikitaskej ken tikinmixtopeuaskej.

¿MONEKI TITLANELTOKASKEJ ITECH TOTAJTSIN DIOS?

3. ¿Tlen mokuayejyekoaj miakej uan tleka?

3 “Amo moneki nitlaneltokas itech toTajtsin Dios para nikpias kuali noyelis”. Itech miakej altepemej miakej kijtoaj amo tlaneltokaj itech toTajtsin Dios. Uelis amo kuali momachtiaj kox onka toTajtsin Dios noso amo uan kinekij kichiuaskej san tlen kinpaktia (xiktlajtolti Salmo 10:4). Oksekimej mokuayejyekoaj akinmej ixtlamatkej amo moneki tlaneltokaskej itech toTajtsin Dios para kipiaskej kuali inyelis.

4. ¿Ken uelis timotlapouiskej iuan akin kijtoa amo onka akin nochi otlachijchi?

4 ¿Melauak moneki ma titlaneltokakan itech toTajtsin Dios? Tla tiknankiliskej ika tlen kijtoaj ixtlamatkej, okachi techtlapololtiskej ika tlen oksekimej kijtoaj. Pero amo oui tiknankiliskej tla tiktlaliliskej se neskayotl. Ijkon ken se kali ikaj okichijchi, noijki nochi tlen onka ikaj okichijchi. Tla se kali ijtlakaui moneki ikaj kiyektlalis. Pero tla timotekij noso timouitekij uan tlileua, panoa seki tonalmej uan tipajtij. Ik non, ¿akin kichiua ma tipajtikan? Biblia technankilia: “Nochi kali non tikitah, onka se akin okichijchi, pero nochi tlan onka ilwikak iwa ipan tlaltíkpaktli, Dios okichijchi” (Heb. 3:4).

5. ¿Tlen tikijtoskej tla ikaj kijtoa amo moneki titlaneltokaskej itech toTajtsin Dios para tikmatiskej tlen kuali uan tlen amo kuali?

5 ¿Ken uelis timotlapouiskej iuan akin kijtoa amo moneki titlaneltokaskej itech toTajtsin Dios para tikmatiskej tlen kuali uan tlen amo kuali? Biblia kijtoa akinmej amo tlaneltokaj itech toTajtsin Dios uelis moyekanaskej ika principios (Rom. 2:14, 15). Se neskayotl, uelis kintlakaitaj intatajuan uan kintlasojtlaj. Pero tla amo kineltokaj Jehová ye akin kinamiki kijtos tlen kuali uan tlen amo kuali, uelis kintlajyouiltis (Is. 33:22). Miakej ixtlamatkej kijtoaj moneki ma techpaleui toTajtsin Dios para ma kiyektlali nochi tlen amo kuali kajki (xiktlajtolti Jeremías 10:23). Ik non, amo ma timokuayejyekokan amo moneki titlaneltokaskej itech toTajtsin Dios uan amo moneki tiktlakamatiskej para kuali tikpejpenaskej tlen tikchiuaskej (Sal. 146:3).

¿MONEKI TIPOUISKEJ ITECH SE TLANELTOKALISTLI?

6. ¿Tlen mokuayejyekoaj miakej itech tlaneltokalistli?

6 “Amo moneki nipouis itech se tlaneltokalistli para niyolpakis”. Ijkon kijtoaj akinmej mokuayejyekoaj tlaneltokalistli tesotlaj uan amo tepaleuia. Noijki miakej tlaneltokalismej tlamachtiaj tlen amo melauak itech toTajtsin Dios porque kijtoaj kintlajyouiltia ijtik tlitl tlen amo yolkualmej, sekimej kinchiualtiaj ma kitemakakan tomin uan mokajkalakiaj itech política. Ik non, amo techtlajtlachialtia ijkuak kijtoaj uelis yolpakiskej tla amo pouij itech se tlaneltokalistli. Uelis kijtoskej tlaneltokaj itech toTajtsin Dios pero amo kinekij pouiskej itech se tlaneltokalistli.

7. ¿Tleka tlaneltokalistli tlen melauak techpaleuia ma tiyolpakikan?

 7 ¿Melauak tiyolpakiskej tla amo tipouij itech se tlaneltokalistli? Uelis tiyolpakiskej tla amo tipouij itech tlaneltokalistli tlen amo melauak. Pero amo keman tiyolpakiskej tla amo timouikaj iuan Jehová akin sapanoa yolpaki (1 Tim. 1:11). Nochi tlen kichiua Jehová techpaleuia uan tejuan tiitekipanojkauan noijki tiyolpakij porque tikinpaleuiaj oksekimej (Hech. 20:35). Tlaneltokalistli tlen melauak tlapaleuia ma yolpakikan kalchanejkej. ¿Tleka? Porque Jehová techmachtia ma tiktlakaitakan tonamik, nochipa ma tiyetokan iuan tonamik, kuali ma tikinmiskaltikan tokoneuan uan ika nochi toyolo ma tikintlasojtlakan tokalchanejkauan. Tlaneltokalistli tlen melauak kinsetiliaj akinmej kitekichiuiliaj toTajtsin Dios uan noijki yolpakij iuan oksekimej tokniuan tlen katej itech nochi Tlaltikpak (xiktlajtolti Isaías 65:13, 14).

8. ¿Ken tiktekitiltiskej Mateo 5:3, TNM para tikteititiskej tlen kichiua ma tiyolpakikan?

8 ¿Uan tla ikaj kijtoa tiyolpakiskej maski amo tiktekichiuiliskej toTajtsin Dios? Ma timokuayejyekokan, ¿tlen kichiua sekimej ma yolpakikan? Sekimej kinyolpaktia inteki, tlen omomachtijkej uan tlen ika moyolpaktiaj. Sekimej yolpakij kinmaluiskej inkalchanejkauan uan inyolikniuan. Pero maski nin tlamantli kichiua ma tiyolpakikan, onka okse tlamantli tlen okachi uelis kichiuas ma tiyolpakikan. Tejuan tikmatij ken iyelis toTajtsin Dios uan ueli tiktekichiuiliaj pero yolkamej amo ueli kichiuaj. Uan nin techyolpaktia porque ijkon otechchijchi Jehová (xiktlajtolti Mateo 5:3TNM). Ik non, tiyolpakij timonechikoskej iuan tokniuan para tikueyichiuaskej Jehová (Sal. 133:1). Noijki tiyolpakij tipouij itech ialtepe Jehová, tikpiaj chipauak tonemilis uan tikpia se chialistli.

¿MONEKI CHIPAUAK MA TIKPIAKAN TONEMILIS?

9. (1) ¿Ken kitaj ijkuak se tlakatl moteka uan se siuatl? (2) ¿Tleka Biblia kijtoa tlajtlakoli san sekan ma motekakan akinmej ayamo monamiktiaj?

9 “Amo tlajtlakoli timotekaskej iuan akin amo tonamik”. Miakej kijtoaj ma timoyolpaktikan uan amo tlajtlakoli timotekaskej iuan akin amo tonamik. Pero Biblia kixnamiki non tlamantli, ik non, akinmej tikchiuaj ken Cristo techtlajyaltia non tlamantli * (xiktlajtolti 1 Tesalonicenses 4:3-8). Jehová otechchijchi, ik non, san ye kinamiki kijtos tlen uelis tikchiuaskej. Uan ye yokijto san uelis motekaskej akinmej yomonamiktijkej. Ijkon technauatia porque techtlasojtla uan kimati non techpaleuis. Kuali momachiliaj kalchanejkej ijkuak kitlakamatij toTajtsin Dios, motlasojtlaj uan motlakaitaj. Jehová kintlajyouiltis akinmej amo kitlakamatij (Heb. 13:4).

10. ¿Tlen tikchiuaskej para amo tiauilnemiskej?

10 Biblia techiluia tlen moneki tikchiuaskej para amo tiauilnemiskej. Sapanoa techpaleuis tla amo tikitaskej tlen amo kuali. Jesús okijto: “nochi tlakatl non kelewia se siwatl non amo iaxka, kijtosneki yokimomekati itech iyolo. Noiwa, tla moixtololo non kajki moyekma mitstoktia xitlajtlakolchiwa, wejka xiktlamotla” (Mat. 5:28, 29). Ik non, akinmej kichiuaj ken Cristo amo kitaj pornografía nion kinkakij tlakuikalmej tlen tlajtoaj itech auilnemilistli. Tlatitlanil Pablo okijkuilo: “Yika, xikpojpolokah tlan amo kuali kelewia nomo kuerpo. Amaka mamokalakijtinemi iwan se non amo isiwa” (Col. 3:5). Moneki timochijchikauaskej kuali timokuayejyekoskej uan noijki tlen tikijtoaj (Efes. 5:3-5).

 ¿MONEKI TIMOMACHTISKEJ PARA TIKPIASKEJ SE KUALI TEKITL?

11. ¿Tleka sekimej uelis kijtoskej moneki timomachtiskej para tikpiaskej se kuali tekitl?

11 “Moneki timomachtiskej para tikpiaskej se kuali tekitl uan ijkon tiyolpakiskej”. Miakej techiluia ma timomachtikan para tikpiaskej kuali tekitl. Uelis techiluiskej tla timomachtiskej tikpiaskej se kuali tekitl, san titlanauatijtoskej uan tikpiaskej miak tomin. Miakej ijkon mokuayejyekoaj kichiuaskej uan akinmej tikchiuaj ken Cristo uelis noijki ijkon timokuayejyekoskej.

12. ¿Melauak tiyolpakiskej tla timomachtiskej para tikpiaskej se kuali tekitl?

12 ¿Melauak tiyolpakiskej tla timomachtiskej para tikpiaskej se kuali tekitl? Amo. Ximokuayejyeko itech Satanás. Ye okinekiaya tlanauatis uan ma kiueyichiuakan. Pero maski axkan tlanauatia uan kiueyichiuaj, amo yolpaki uan san kualantok (Mat. 4:8, 9; Apoc. 12:12). Okachi tiyolpakij tikinpaleuiskej oksekimej ma kixmatikan toTajtsin Dios uan noijki tlen tlamachtia para nochipa tiyoltoskej. Uan itech nin Tlaltikpak katej miakej tlen tenexikolitaj uan kichiua ma timoueyinekikan. Pero non amo itlaj ipati, yetoskia ken tiknekiskiaj tikkitskiskej ejekatl (Ecl. 4:4).

13. (1) ¿Ken moneki tikitaskej toteki? (2) Itech carta tlen Pablo okinmijkuilili tlen ochantiayaj Tesalónica, ¿tlen okinmilui okachi okiyolpaktiaya?

13 Tinochtin moneki tikmotlaniliskej tlen ika timopanoltiskej uan amo tlajtlakoli tla techpaktia toteki. Pero amo kuali san titekitiskej. Jesús okijto: “Amaka tlakatl weletis kintekitilis ome inteko, porke se kitlawelitas iwa non ok se kitlasojtlas, noso se kitlakitas iwa non ok se mach kitlakitas. Amaka weletis kimopantis Dios tla satlawel momijmiktia para kitlawelpias tomi” (Mat. 6:24). Okachi tiyolpakiskej tla tikpatioitaj tiktekichiuiliskej Jehová uan tikinmachtiskej oksekimej. Pablo okimatiaya porque ijkon okichiuaya. Ijkuak okatka telpochtli omomachti judaísmo uan okinekiaya kipias se kuali tekitl. Pero okachi oyolpakik ijkuak opejki tetlapouia uan ijkuak otlamachtiaya uan okitaya ken okipatlayaj innemilis oksekimej (xiktlajtolti 1 Tesalonicenses 2:13, 19, 20). Melauak nin okachi teyolpakti.

Okachi tiyolpakij tikinpaleuiskej oksekimej ma kixmatikan toTajtsin Dios uan tlen techmachtia kichiua ma tiyolpakikan. (Xikinmita párrafos 12 uan 13).

¿SAN TEJUAN UELIS TIKYEKTLALISKEJ OUIJKAYOTL?

14. ¿Tleka miakej kijtoaj san tejuan uelis tikyektlaliskej ouijkayotl?

14 “San tejuan uelis tikyektlaliskej ouijkayotl”. Miakej ijkon mokuayejyekoaj uan tla yetoskia  melauak, amo moneki ma techpaleui toTajtsin Dios uan uelis tikchiuaskej san tlen tiknekiskej. Noijki akinmej momachtiaj itech tlen panoa, kijtoaj ayakmo okachi onka guerras, amo okachi tlachtekij noso amo okachi kichiuaj tlen amo kuali, amo okachi onka kokolistli uan ayakmo okachi miakej akinmej amo itlaj kipiaj. Akinmej ixtlamatkej okijtojkej: “Tlaltikpaktlakamej okachi yikuali katej porque yejuan kijtoaj kinekij kiyektlaliskej tlen panotok”. ¿Melauak tlen kijtoaj? ¿Melauak kiyektlalijtokej tlen yiuejkika techtlajyouiltijtok? Ma tikitakan.

15. ¿Tlen kiteititia amo uelis san tejuan tikyektlaliskej ouijkayotl?

15 Guerras. Itech ome guerras tlen yopanokej omikej kanaj 60 millones. Ijkuak otlanki Segunda Guerra Mundial, opejki okachi guerras. Itech 2015 kanaj 65 millones yokikajtejkej inkalijtik noso okintojtokakej porque onka guerras. Noijki itech non xiuitl kanaj 12.4 millones oksekan ochantitoj. Tlachtekij. Maski ayakmo okachi tlachtekij, kichiuaj ika okseki tlamantli ijkuak kitekitiltiaj Internet para tlachtekiskej noso kitechiuiliskej tlen amo kuali, kalchanejkej mouitekij uan okseki tlamantli tlen temomojti. Noijki miakej kijtoaj axkan okachi onka tlen amo kuali. Nin kiteititia amo uelis tikyektlaliskej tlen panotok. Kokolistli. Seki kokolistli yikipiaj pajtli. Noijki itech 2013, okijtojkej akinmej ixtlamatkej, mikij kanaj chiknaui millones tlaltikpaktlakamej tlen ayamo kajxitiaj 60 xiuitl ijkuak moketsa inyolo, ayakmo ueli mijyotiaj, ijkuak ijtlakaui intsonteko, kinkitskia diabetes uan cáncer. Amo itlaj kipiaj. Itech Banco Mundial okijtojkej okachi momiaktilijtokej akinmej amo itlaj kipiaj porque itech 1990 ompa África okatkaj kanaj 280 millones tlen amo itlaj kipiaj uan itech 2012 yokatkaj kanaj 330 millones.

16. (1) ¿Tleka san iTekiuajkayo toTajtsin Dios uelis kiyektlalis ouijkayotl? (2) ¿Tlen okijto Isaías uan salmista kichiuas iTekiuajkayo toTajtsin Dios?

16 Nin tlamantli amo techtlajtlachialtia. Akinmej pouij itech política uan ken motekitiltia tomin, kiyekanaj akinmej tlaixnekij uan amo keman kinpojpoloskej ichtekej, guerras, kokolistli uan amo uelis kinpaleuiskej akinmej amo itlaj kipiaj. San Jehová uelis nochi kipojpolos. Guerras. ITekiuajkayo toTajtsin Dios kipojpolos tlen kichiua ma yetokan guerras, tlaixnekij, tlen amo kuali, akinmej kinueyichiuaj altepemej, tlaneltokalistli tlen amo melauak uan kipojpolos Satanás (Sal. 46:8, 9). Ichtekej uan akinmej kichiuaj tlen amo kuali. ITekiuajkayo toTajtsin Dios kinmachtijtok miakej ma motlasojtlakan uan intech ma tlaneltokakan uan nin amo uelis kichiuas okse tekiuajkayotl (Is. 11:9). Kokolistli. Jehová kichiuas ayakmo ikaj ma mokoko (Is. 35:5, 6). Akinmej amo itlaj kipiaj. Jehová kichiuas nochtin ma kipiakan tlen ika mopanoltiskej, amo mokokoskej uan kipiaskej chikauak intlaneltokilis uan nin okachi miak ipati amo ken okseki tlamantli (Sal. 72:12, 13).

“XIKMATIKAH KENOMI NONTLANANKILISKEH”

17. ¿Ken tikixtopeuaskej tlen mokuayejyekoaj akinmej amo kitekichiuiliaj Jehová?

17 Ijkuak itlaj tikkakiskej tlen kixnamiki tlen tikneltokaj, ma timomachtikan itech Biblia tlen kijtoa uan ma timotlapouikan iuan se tokni tlen kipia chikauak itlaneltokilis. Ma timokuayejyekokan tleka ijkon kijtoaj, tleka amo melauak uan ken uelis tikinmiluiskej tlen melauak. Tla tiktlakamatij tlen okijto Pablo, amo timokuayejyekoskej ken akinmej amo kitekichiuiliaj Jehová. Ye okijto: “Xikmatikah ximowikakah kuali iwa n tlakah non amo kineltokah Dios” uan “xikmatikah kenomi nontlanankiliskeh ijkuak itla nomechtlajtlaniskeh” (Col. 4:5, 6).

^ párr. 9 Sekimej mopaleuiaj ika Juan 7:53–8:11 san akin amo tlajtlakolchiua uelis kixkomakas akin momekatia. Pero uelis amo kimatij ninmej tlaxelolmej amo melauak pouij itech Biblia. Tlanauatil tlen Jehová okinmakak israelitas okijtoaya tla okajsiayaj se tlakatl omotekak iuan akin amo inamik, ye uan siuatl, omonekiaya kinmiktiskej (Deut. 22:22).