Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Noviembre de 2016

¿Melauak tikpatioitaj iTlajtol toTajtsin Dios?

¿Melauak tikpatioitaj iTlajtol toTajtsin Dios?

“Ijkuak nomejwah ononkikakeh itlajtol Dios, [...] ononkiselijkeh kemi milák itlajtol Dios” (1 TESALONICENSES 2:13).

TLAKUIKALMEJ: 37 UAN 51

1-3. (1) ¿Tlen ouijkayotl uelis okipixkej Evodia uan Síntique? (Xikita tlaixkopinal tlen ika peua tlamachtil). (2) ¿Tlen tikchiuaskej pampa amo tikpiaskej ouijkayotl iuan tokniuan?

AKINMEJ tikchiuaj ken Cristo sapanoa tikpatioitaj Biblia pampa iTlajtol toTajtsin Dios. Tlen Biblia kijtoa techpaleuia amo ma tikpiakan ouijkayotl uan techyektlalia ijkuak tikchiuaj tlen amo kuali. ¿Tikchiuaj tlen techiluia? Ma timokuayejyekokan itech Evodia uan Síntique, ome tokniuan tlapejpenalmej tlen okatkaj itech achto siglo. Biblia kijtoa okipixkej se ouijkayotl, pero amo kijtoa tleka ijkon opanok. Ma timokuayejyekokan tlen uelis opanok.

2 Uelis Evodia okinyole sekimej tokniuan ma tlakuatij ikalijtik, pero amo okiyole Síntique. Satepan, ijkuak Síntique okinkak tokniuan omotlapouijtokaj ken oyolpakej, sapanoa okualanki. Uelis omokuayejyeko: “¿Tleka Evodia amo onechyole? ¡Ne onikijto kuali timouikaj!”. Uelis Síntique omokuayejyeko Evodia okikokoliaya uan amo okinekiaya iuan motlapouis.  Ik non, Síntique okinyole akinmej oyajkej ikalijtik Evodia, pero amo okiyole Evodia. Uelis nin noijki amo okinpakti oksekimej tokniuan. Biblia kijtoa Pablo okinyektlali nonmej tokniuan siuamej uan okinmilui ma motlapojpoluikan. Yejuan okichijkej tlen okinmilui uan ika pakilistli okitekichiuilijkej Jehová (Filipenses 4:2, 3).

3 Axkan, tejuan noijki uelis tikpiaskej se ouijkayotl iuan se tokni. Pero uelis tikyektlaliskej ouijkayotl noso timochijchikauaskej amo ijkon ma techpano. ¿Ken uelis tikchiuaskej? Ma tiktlakamatikan tlen kijtoa Biblia. Ijkuak tiktlakamatij, tikteititiaj melauak tikpatioitaj iTlajtol toTajtsin Dios (Salmo 27:11).

BIBLIA TECHMACHTIA AMO SAN NIMAN MA TIKUALANIKAN NION MA TIMOYOLKOKOKAN

4, 5. ¿Ken techpaleuia Biblia amo san niman ma tikualanikan nion ma timoyolkokokan?

4 Ualeua san niman tikualanij noso timoyolkokoaj. Se neskayotl, uelis sapanoa timoyolkokoaj noso tikualanij ijkuak itlaj techiluiaj noso techchiuiliaj pampa tlatlamantli tikchiuaj noso tiuitsej itech okse altepetl. Nin okachi teyolkoko tla se tokni ijkon techiluia. ¿Ken techpaleuis iTlajtol toTajtsin Dios tla ijkon techpanos?

5 Jehová kimati tlen panos tla sapanoa tikualanij noso timoyolkokoaj. Tla ijkon timomachiliaj, uelis tikijtoskej noso tikchiuaskej itlaj tlen satepan techyolkokos. Biblia techiluia amo san niman ma tikualanikan nion ma timoyolkokokan. Kijtoa: “Amo san niman xikualani”. Tla tiktlakamatij nin tlanauatil uan amo san niman tikualanij nion timoyolkokoaj, amo tikpiaskej ouijkayotl (xiktlajtolti Eclesiastés 7:9 uan Proverbios 16:32). * Biblia noijki techiluia ma titetlapojpoluikan. Uan Jesús okijto tla amo titetlapojpoluiaj, Jehová amo techtlapojpoluis (Mateo 6:14, 15). ¿Moneki amo san niman ma tikualanikan uan ma titetlapojpoluikan?

6. ¿Tlen panos tla san niman tikualanij uan timoyolkokoaj?

6 Tla san niman tikualanij uan timoyolkokoaj, nochipa tikualantoskej uan hasta uelis ikaj tikkokoliskej. Noijki tikchiuaskej oksekimej tokniuan noijki ijkon ma momachilikan. Uelis timochijchikauaj pampa amo ma mota tikualanij noso ikaj tikkokoliaj. Pero oksekimej kitaskej tlen tikmachiliaj uan ayakmo technotsaskej (Proverbios 26:24-26). Tla ijkon techpanos, tlayekankej techpaleuiskej ika Biblia pampa ayakmo ijkon ma timomachilikan uan ma tikintlapojpoluikan oksekimej (Levítico 19:17, 18; Romanos 3:11-18). Tla ijkon techpanos, ¿tiktlakamatiskej tlen kijtoa Biblia?

JEHOVÁ KIYEKANA IALTEPE

7, 8. (1) ¿Ken kiyekana Jehová ialtepe? (2) ¿Tlen technauatia Biblia uan tleka moneki tiktlakamatiskej?

7 Axkan, Jehová kiyekana uan kimachtia ialtepe tlen kajki itech Tlaltikpak. ¿Ken kichiua? Okitlali “Cristo [ma] kinyakana akimeh kineltokah” (Efesios 5:23). Uan Cristo okitlali “tlakeuali yolmelajki uan ixtlamatki” pampa ma kimachti uan ma kiyekana ialtepe Jehová (Mateo 24:45-47, TNM). “Tlakeuali yolmelajki uan ixtlamatki” sapanoa kipatioita iTlajtol toTajtsin Dios. Ijkon ken  okipatioitaya cuerpo gobernante tlen okatka itech achto siglo (xiktlajtolti 1 Tesalonicenses 2:13). ¿Tlen technauatia Biblia?

8 Biblia techiluia nochipa ma timonechikokan (Hebreos 10:24, 25). Uan noijki techiluia san se tlamantli ma tikneltokakan (1 Corintios 1:10). Noijki techiluia achto ma ‘tikchiwakah tlan Dios technawatia’ (Mateo 6:33). Biblia kijtoa ma titetlapouikan inkalijtik tlaltikpaktlakamej, itech ojtli uan san kanin yetoskej tlaltikpaktlakamej (Mateo 28:19, 20; Hechos 5:42; 17:17; 20:20). Noijki kinnauatia tlayekankej ma kinpaleuikan tokniuan ma kipiakan chipauak innemilis (1 Corintios 5:1-5, 13; 1 Timoteo 5:19-21). Uan Biblia kijtoa ma tikpiakan chipauak totlalnakayo uan amo ma timokuayejyekokan tlen amo kuali nion ma tikchiuakan tlen Jehová kikokolia (2 Corintios 7:1).

“¿Niyetos niyolmelajki ixpan Jesús uan niktlakamatis tlakeuali yolmelajki?”

9. ¿Akin kitekitiltijtok Jesús pampa techpaleuis ma tikajsikamatikan iTlajtol toTajtsin Dios?

9 Sekimej mokuayejyekoaj amo moneki ma kinyekiluikan tlen tlamachtia Biblia. Pero desde 1919, Jesús kitekitiltijtok “tlakeuali yolmelajki uan ixtlamatki” pampa itekipanojkauan toTajtsin Dios ma kajsikamatikan Biblia uan ma kitlakamatikan. Ijkuak tiktlakamatij tlen kijtoa Biblia, tlanechikol kajki chipauak, san sekan uan ika yolseuilistli. Ik non, ma timotlajtlanikan: “¿Niyetos niyolmelajki ixpan Jesús uan niktlakamatis tlakeuali yolmelajki?”.

ICARRO JEHOVÁ TOTOKA YAUI

10. Itech amochtli Ezequiel, ¿ken moneskayotia ialtepe Jehová tlen kajki iluikak?

10 Biblia kijtoa itekipanojkauan Jehová tlen katej iluikak noijki san sekan tekitij. Se neskayotl, Ezequiel okitak ken Jehová okatka ipan se carro tlen oyaya totoka san kanin ye okinekiaya (Ezequiel 1:4-28). Nin carro kineskayotia ialtepe Jehová tlen kajki iluikak. Nin altepetl nochipa kitlakamati Jehová uan noijki kiyekana ialtepe toTajtsin Dios tlen kajki itech Tlaltikpak. Ma tikilnamikikan tlen yokipatlak ialtepe Jehová itech majtlaktli xiuitl tlen yopanok. Jehová ye akin kiyekana ialtepe pampa ma kipatla seki tlamantli. Cristo uan ángeles san niman kitlajtlamiskej nochi tlen amo kuali. Ijkon nochtin kitlakaitaskej Jehová, itoka uan kimatiskej san ye kinamiki tlanauatis.

Tikintlasojkamatiliaj tokniuan akinmej sapanoa mochijchikauaj kinchijchiuaskej kalmej (Xikita párrafo 11).

11, 12. ¿Tlen yokichi ialtepe Jehová itech itlamian tonalmej?

11 Ma tikitakan nochi tlen yokichi ialtepe Jehová itech itlamian tonalmej. Achto ma tikitakan ijkuak kinchijchiuaj kalmej. Miakej tokniuan sapanoa yotekitikej itech yankuik kali kanin kinyekanaj iTlaixpantijkauan Jehová itech altepetl Warwick, Nueva York, Estados Unidos. Uan itech nochi Tlaltikpak, sapanoa miakej tokniuan kinchijchiuaj miakej kalmej kanin timonechikoaj uan kalmej kanin tekitij iTlaixpantijkauan Jehová. Tekitl tlen ompa mochiua kiyekanaj tokniuan akinmej kijtoaj ken mochijchiuaskej kalmej  itech nochi Tlaltikpak. ¡Melauak tikintlasojkamatiliaj ninmej tokniuan akinmej chikauak tekitij! Ninmej kalmej ueli kinchijchiuaj pampa itekipanojkauan Jehová itech nochi Tlaltikpak kitemakaj tomin ika nochi inyolo. Jehová kinteochiua itekipanojkauan pampa kipaleuia uan amo kikauaj (Lucas 21:1-4).

12 Axkan ma tikitakan ken tlamachtia ialtepe Jehová. Jehová sapanoa kipaktia kinmachtis itekipanojkauan (Isaías 2:2, 3). Ma timokuayejyekokan itech nochtin escuelas tlen ika techmachtia: Tlamachtil tlen kiselia Precursor, Tlamachtil pampa ma tetlapouikan Tekiuajkayotl, Tlamachtil ika Biblia tlen kichiua Watchtower itech Galaad, Tlamachtil tlen kiseliaj akinmej yikin kalakij Betel, Tlamachtil tlen kiseliaj tlayekankej itech circuito uan insiuauan, Tlamachtil tlen kiseliaj tlayekankej, Tlamachtil itech Tekiuajkayotl uan Tlamachtil tlen kiseliaj akinmej tlayekanaj itech Betel uan insiuauan. Noijki tikpiaj página itech Internet jw.org, kanin uelis tiktlajtoltiskej Biblia uan amatlajkuilolmej ika miakej tlatlamantli tlajtolmej. Nin página noijki kinpia tlamachtilmej  pampa konemej uan kalchanejkej uan noijki kijtoaj tlen panoa itech ialtepe Jehová. ¿Tiktekitiltiaj página jw.org ijkuak titetlapouiaj uan ijkuak timomachtiaj iuan tokalchanejkauan?

MA TIYETOKAN TIYOLMELAJKEJ IXPAN JEHOVÁ UAN MA TIKPALEUIKAN IALTEPE

13. ¿Tlen moneki tikchiuaskej tiitekipanojkauan Jehová?

13 Se ueyi tlateochiualistli tikatej itech ialtepe Jehová uan tikmatij tlen kineki ma tikchiuakan. Uan ken tikmatij tlen kipaktia Jehová, moneki tiktlakamatiskej uan tikchiuaskej tlen kuali. Miakej kinpaktia kichiuaskej tlen amo kuali, pero tejuan moneki ‘ma tikkokolikan tlen amo kuali’, ken Jehová kikokolia (Salmo 97:10). Amo ma tikchiuakan ken akinmej kijtoaj “tlen kuali amo kuali uan tlen amo kuali kijtoaj kuali” (Isaías 5:20). Tiknekij tikyolpaktiskej Jehová. Ik non, chipauak tikpiaj totlalnakayo, tokuayejyekol uan tonemilis (1 Corintios 6:9-11). Tikmatij tlen Jehová techiluia ika Biblia techpaleuia kuali ma tiyetokan. Uan ken tiktlasojtlaj Jehová, tiknekij ixpan tiyetoskej tiyolmelajkej. Ik non, tikintlakamatij itlanauatiluan ijkuak tikatej tokalijtik, itech tlanechikol, kanin titekitij, kanin timomachtiaj noso san kanin tiyetoskej (Proverbios 15:3). Ma tikitakan keman moneki tiyetoskej tiyolmelajkej ixpan Jehová.

Tetajmej tlen kitlasojtlaj Jehová kinekij inkoneuan kuali iuan ma mouikakan

14. ¿Ken uelis tetajmej yetoskej yolmelajkej ixpan Jehová?

14 Ijkuak kinmachtiaj inkoneuan. Itech Biblia, Jehová kinmiluia tetajmej ken moneki kinmachtiskej inkoneuan. Ijkuak tetajmej kitlakamatij Jehová, katej yolmelajkej. Noijki ma momaluikan pampa amo ma mokuayejyekokan ken akinmej amo kitekichiuiliaj Jehová (Efesios 2:2). Se neskayotl, itech seki altepemej, sekimej tetajmej kijtoaj siuamej moneki kinmachtiskej inkoneuan. Pero Biblia kijtoa tetajmej ma kinmachtikan inkoneuan itech Jehová (Efesios 6:4). Tetajmej tlen kitlasojtlaj Jehová kinekij inkoneuan kuali iuan ma mouikakan, ijkon ken Samuel opejki kuali mouika iuan Jehová ijkuak okatka chokotsin (1 Samuel 3:19).

15. ¿Ken tikteititiaj tikatej tiyolmelajkej ixpan Jehová ijkuak tikpejpenaj tlen tikchiuaskej?

15 Ijkuak tikpejpenaj tlen tikchiuaskej. Achto tikpejpenaskej tlen tikchiuaskej, moneki tikmatiskej ken mokuayejyekoa Jehová. ¿Ken uelis tikmatiskej? Ijkuak tiktlajtoltiaj Biblia uan tikkauiliaj ialtepe ma techyekana. Ijkon tikteititiaj tiyolmelajkej ixpan Jehová. Se neskayotl, sekimej tetajmej tlen yauij tekititiuij itech okse ueyi altepetl ijkuak kinpiaj inkoneuan san niman kintitlanij iuan inkalchanejkauan pampa ma kinmiskaltikan. Ijkon, tetajmej okachi tekitij itech non altepetl. Tetajmej kipejpenaskej tlen kichiuaskej, pero moneki motlajtlaniskej ken kita Jehová tlen kichiuaj (xiktlajtolti Romanos  14:12). Ma tikilnamikikan achto tikpejpenaskej kanin titekitiskej noso tlen tikchiuaskej iuan tokalchanejkauan, moneki ma timokuayejyekokan tlen kijtoa Biblia. Moneki ma techyekana toTajtsin Dios (Jeremías 10:23).

16. (1) ¿Tlen omonekiaya kichiuas se siuatl ijkuak oneski ikone? (2) ¿Tlen okipaleui ma kichiua tlen kuali?

16 Se tlakatl uan isiua ochantitoj itech okse ueyi altepetl uan ompa okipixkej inkone. Okijtoayaj kititlaniskiaj inkone iuan ikojkoluan itech inmialtepe. Ijkuakon, siuatl opejki momachtia Biblia iuan iTlaixpantijkauan Jehová. Uan okitak ye omonekiaya kimachtis ikone itech Jehová (Salmo 127:3; Proverbios 22:6). Ik non, omonekiaya kipejpenas kox kititlaniskia ikone iuan ikojkoluan. Ijkon ken Biblia tlanauatia, siuatl okitlatlaujti Jehová ma kipaleui ma kichiua tlen kuali (Salmo 62:7, 8). Noijki omotlapoui iuan tokni akin okimachtiaya uan noijki iuan oksekimej tokniuan. Ikalchanejkauan siuatl uan iyolikniuan okiluiayaj ma kititlani ikone iuan ikojkoluan. Pero ye okajsikamatki non amo kuali. Inamik okitak tokniuan okipaleuiayaj isiua uan ikone. Nin sapanoa okitlajtlachialti, ik non, opejki momachtia Biblia uan opejki monechikoa. Ma timokuayejyekokan ken oyolpakik nin siuatl ijkuak okitak Jehová okinankili.

17. ¿Tlen moneki tikchiuaskej ijkuak titlamachtiaj ika Biblia?

17 Ijkuak techiluiaj tlen moneki tikchiuaskej. Noijki tiyolmelajkej ixpan toTajtsin Dios ijkuak tiktlakamatij tlen technauatia ialtepe. Se neskayotl, ma timokuayejyekokan tlen moneki tikchiuaskej ijkuak peua titlamachtiaj ika amochtli ¿Tlen melauak tlamachtia Biblia? Yotechiluijkej ijkuak tlamis ikaj tikmachtiskej, ma tikxelokan seki minutos pampa tikpaleuiskej okachi ma kixmati ialtepe Jehová. Uelis tiktekitiltiskej video ¿Ken tikchiuaj tonechikoluan?, uan amatlajkuilol ¿Akinmej kichiuaj itlanekilis Jehová itech ninmej tonalmej? Uan noijki yotechiluijkej ijkuak tlamis tikinmachtiskej ika amochtli ¿Tlen melauak tlamachtia Biblia? ma tikinmachtikan ika amochtli “Xiyetokan itech itlasojtlalis toTajtsin Dios”, maski yomoapolaktijkej. Ijkon tikinpaleuiskej ma kipiakan chikauak intlaneltokilis (Colosenses 2:7). ¿Tikchiuaj nochi tlen techiluia ialtepe toTajtsin Dios?

18, 19. ¿Tleka moneki tiktlasojkamatiliskej Jehová?

18 Onka miak tlamantli tlen moneki tiktlasojkamatiliskej Jehová. Achto, “porke itech Dios tikateh, timoliniah iwa tiyolitokeh” (Hechos 17:27, 28). Ome, pampa otechmakak Biblia. Ken tokniuan tlen ochantiayaj itech ueyi altepetl Tesalónica, tejuan noijki tikpatioitaj nin tetliokolil, “itlajtol Dios” (1 Tesalonicenses 2:13).

19 Eyi, ma tiktlasojkamatilikan Jehová pampa techmachtia ika Biblia ken uelis iuan timouikaskej (Santiago 4:8). Uan naui, ma tiktlasojkamatilikan pampa tikatej itech ialtepe. Timomachiliaj ken salmista, akin okijto: “Xiktlasojkamatilikan Jehová pampa ye yolkuali: pampa itlasojtlalis yolmelajki amo keman tlami” (Salmo 136:1). Itech non salmo miak uelta moijtoa “itlasojtlalis yolmelajki amo keman tlami”. Tla tiyolmelajkej ixpan Jehová uan tikintlakamatij itlanauatiluan tlen techmaka ika ialtepe, ye nochipa techtlasojtlas ika yolmelajkayotl.

^ párr. 5 Eclesiastés 7:9 kijtoa: “Amo san niman xikualani, pampa xoxojtin akinmej san niman kualanij”. Uan Proverbios 16:32 kijtoa: “Akin amo san niman kualani okachi kuali amo ken se tlakatl tlen kipia miak chikaualistli; uan akin moyolseuia, okachi kuali amo ken akin kimoaxkatia se altepetl”.