Xikita nochi

Tlen kiualika

TLAMACHTIL 21

TLAKUIKALI 107 Ma titetlasojtlakan ken Jehová

¿Tlen mitspaleuis xikajsi akin iuan timonamiktis?

¿Tlen mitspaleuis xikajsi akin iuan timonamiktis?

“¿Akin uelis kajsis se siuatl tlen sapanoua yolkuali? Ye okachi ipati amo ken corales” (PROV. 31:10).

NIN TLEN TIMOMACHTISKEJ

Tikitaskej seki principios bíblicos tlen kinpaleuis akinmej kinekij monamiktiskej. Noijki tikitaskej tlen uelis tikchiuaskej para tikinpaleuiskej akinmej kinekij ijkon kichiuaskej.

1, 2. (1) ¿Tlen achto moneki kitas akin kineki monamiktis? (2) ¿Tlen kijtosneki ijkuak ikaj peua ikaj kixmati? (Xikita nota “Tlen okachi ipati”).

 ¿MITSPAKTISKIA timonamiktis? Amo moneki timonamiktis para uelis tiyolpakis, pero miakej tokniuan kinekij monamiktiskej. Tla tikneki timonamiktis moneki tikitas kox kuali timouika iuan Jehová, kox tikpia tomin uan kox kuali timomachilia (1 Cor. 7:36). a Ijkon tipakis ijkuak timonamiktis.

2 Pero xamo amo san niman tikajsis akin iuan timonamiktis (Prov. 31:10). Xamo ikaj yotikixmatki uan mitspaktiskia okachi tikixmatis pero xamo tikitas oui tikiluis mayeto monovia. b Axkan tikitaskej tlen uelis kipaleuis se telpochtli makajsi akin iuan monamiktis uan ijkuak kiluis se ichpochtli mayeto inovia. Noijki tikitaskej ken uelis tikinpaleuiskej akinmej kinekij monamiktiskej.

¿TLEN MITSPALEUIS XIKAJSI AKIN IUAN TIMONAMIKTIS?

3. ¿Tlen moneki achto mamokuayejyeko akin kineki monamiktis?

3 Achto ximokuayejyeko ken mitspaktiskia mayeto akin iuan timonamiktis. Tla tikmati ken mitspaktiskia mayeto akin iuan timonamiktis, kuali tikpejpenas pero tlamo tikmati xamo san tikpejpenas akin amo kuali iuan timouikas. Miak ipati xikpejpena se iTlaixpantijka Jehová (1 Cor. 7:39). Pero amo san moneki mayeto iTlaixpantijka Jehová akin iuan timonamiktis. Ikinon moneki ximotlajtlani: “¿Tlen nikneki nikchiuas? ¿Ken nikneki makipia iyelis akin iuan nimonamiktis? ¿Nikchia makichiua miak tlamantli akin iuan nimonamiktis?”.

4. ¿Tlen kiluiaj Jehová akinmej kinekij monamiktiskej?

4 Xamo yotikilui Jehová tikneki timonamiktis (Filip. 4:6). Jehová amo kijtoua kitemos akin iuan timonamiktis. Pero ye kajsikamati ken timomachilia uan tlen tikneki. Mitspaleuis xiktemo akin iuan timonamiktis. Ikinon nochipa xikilui tlen tikneki uan ken timomachilia (Sal. 62:8). Xikilui mamitspaleui xikmati timochias uan noijki mamitspaleui xiyeto ixtlamatki (Sant. 1:5). Se tokni tlen chanti Estados Unidos uan itoka John, c okijto: “Nikiluia Jehová ken nikneki makipia iyelis ichpochtli tlen nechpaktiskia iuan nimonamiktis. Nikiluia manechpaleui manikixmati ikaj tlen kipia iyelis ijkon ken ne nikneki. Noijki nikiluia manechpaleui maniyeto niyolkuali para kuali nikmaluis nosiua ijkuak nimonamiktis”. Se tokni itoka Tanya uan chanti Sri Lanka, okijto: “Nikiluia Jehová manechpaleui maniktlakamati, kuali manimokuayejyeko, maniyolpaki uan manimochia manikajsi akin iuan nimonamiktis”. Pero ¿tlen panos tla timochia uan amo tikajsi akin iuan timonamiktis? Jehová kijtoua mitsmakas tlen moneki uan mitspaleuis xiyolpaki (Sal. 55:22).

5. ¿Tlen uelis kichiuaskej akinmej ayamo monamiktiaj? (1 Corintios 15:58; noijki xikita foto).

5 Biblia techyoleua ‘nochipa matiktekichiuilikan toTeko’ (xiktlajtolti 1 Corintios 15:58). Tikinmixmatis miakej tokniuan tla ijkon tikchiuas. Ijkon tikinpias miakej moyolikniuan uan tikinmixmatis miakej akinmej ayamo monamiktiaj tlen noijki kipatioitaj kitekichiuiliskej Jehová. Noijki sapanoua tiyolpakis porque tikchiua tlen Jehová kipaktia.

Tla tikpatioita tiktekichiuilis Jehová, tikinmixmatis miakej tokniuan uan xamo sekimej noijki kinekij monamiktiskej. (Xikita párrafo 5).


6. ¿Tlen moneki kilnamiktoskej akinmej kinekij monamiktiskej?

6 Pero amo san mamitstekipacho tikajsis akin iuan timonamiktis (Filip. 1:10). Okachi tiyolpakis tla timouika iuan Jehová uan amo porque timonamiktis (Mat. 5:3). Noijki okachi uelis tiktekichiuilis Jehová tla ayamo timonamiktia (1 Cor. 7:​32, 33). Ikinon ximochijchikaua xiktekichiuili Jehová maski ayamo timonamiktia. Se tokni itoka Jessica uan chanti Estados Unidos omonamikti ijkuak okipiaya kanaj 40 xiuitl. Ye okijto: “Oniknekiaya nimonamiktis pero okachi onikpatioitaya nitetlapouis uan non onechpaleui maniyolpaki”.

KUALI XIKITA AKIN IUAN TIMONAMIKTIS

7. ¿Tleka miak ipati ximochia achto ikaj tikiluis tlen tikmachilia? (Proverbios 13:16).

7 ¿Tlen tikchiuas tla yotikajsik akin uelis iuan timonamiktis? ¿Moneki san niman tikiluis tlen tikmachilia? Biblia kijtoua akin ixtlamatki achto mokuayejyekoua tlen kichiuas (xiktlajtolti Proverbios 13:16). Ikinon miak ipati achto kuali xikita tlen kichiua uan amo san niman xikilui tlen tikmachilia akin mitspaktia. Se tokni itoka Albert uan chanti Países Bajos okijto: “Amo uelis tikiluis se ichpochtli mayeto monovia san porque mitspaktia porque xamo satepan ayakmo mitspaktis. Ikinon ximochia, kuali xikita tlen kichiua uan amo san niman xikilui tlen tikmachilia”. Noijki tla timochias uan kuali tikitas tlen kichiua ichpochtli, xamo tikitas amo kipia iyelis ijkon ken te tikneki.

8. ¿Tlen uelis kichiuas se telpochtli tla kineki kitas tlen kichiua ichpochtli tlen kipaktia? (Noijki xikita foto).

8 Xamo timotlajtlania ken uelis tikitas tlen kichiua akin mitspaktia. Uelis tikitas ken iyelis uan kox kuali mouika iuan Jehová ijkuak nanmonechikouaj noso ijkuak nankichiuaj okseki tlamantli inuan tokniuan. Noijki uelis tikitas akinmej inuan mouika uan tlen kipaktia motlapouis inuan oksekimej (Luc. 6:45). Noijki xikita kox kineki kichiuas tlen te mitspaktiskia tikchiuas. Uelis timotlapouis inuan tlayekankej noso tokniuan tlen kipiaj chikauak intlaneltokilis. Yejuan mitsiluiskej tlen tikneki tikmatis (Prov. 20:18). Uelis tikintlajtlanis ken kitaj oksekimej non ichpochtli uan ken iyelis (Rut 2:11). Pero amitlaj xikchiua tlen uelis kikuejsos. Xiktlakaita, amo san tlen amo xikiluijto uan amo san iuan xiyeto.

Kuali xikita tlen kichiua akin mitspaktia uan satepan xikilui tlen tikmachilia. (Xikinmita párrafos 7 uan 8).


9. ¿Tlen moneki tikilnamiktos tla tikneki tikiluis ichpochtli tlen tikmachilia?

9 Xamo timotlajtlania keman uelis tikiluis ichpochtli tlen tikmachilia. Tla san niman tikiluis xamo mokuayejyekos amo tikmati timochias (Prov. 29:20). Pero tla amo tikiluis uan yokitak mitspaktia xamo mokuayejyekos amo tikmati tlen tikneki (Ecl. 11:4). Amo kijtosneki moneki timonamiktis iuan ichpochtli tla tikiluis tlen tikmachilia. Pero xikilnamikto ijkuak tikiluis ichpochtli tlen tikmachilia, kijtosneki kuali yotimokuayejyeko uan yotimoyektlali para timonamiktis.

10. ¿Tlen tikchiuas tla tikita ikaj tikpaktia pero te amo mitspaktia?

10 ¿Tlen tikchiuas tla tikita ikaj tikpaktia? Tla amo mitspaktia, xikilui uan amitlaj xikchiua tlen kiteititis mitspaktia. Ximokuayejyeko ken momachilis tla san tikyolkokos (1 Cor. 10:24; Efes. 4:25).

11. ¿Tlen tikchiuaskej tla techiluiskej matikinpaleuikan akinmej kinekij monamiktiskej?

11 Itech seki altepemej tetajmej uan oksekimej kinpejpeniliaj akinmej inuan monamiktiskej telpochmej uan ichpochmej. Itech okseki altepemej familiares noso inyolikniuan kinpaleuiaj akinmej katej inselti makinmixmatikan oksekimej telpochmej uan ichpochmej. Ijkon uelis kitaskej kox uelis inuan monamiktiskej. Tla techiluiskej matikinpaleuikan makajsikan akin iuan monamiktiskej, matikilnamiktokan tlen kinekij uan tlen kinpaktia. Tla yotikajsikej ikaj yolkuali para makixmati tofamiliar noso toyolikni, matimochijchikauakan matikitakan ken iyelis uan kox kuali mouika iuan Jehová. Okachi miak ipati mamouika iuan Jehová uan amo matikitakan kox kipia miak tomin, kox kuali omomachti noso ken okiskaltijkej. Pero matikilnamiktokan san yejuan uelis kijtoskej kox monamiktiskej noso amo (Gál. 6:5).

¿TLEN UELIS TIKCHIUAS TLA TIKNEKI TIKILUIS TLEN TIKMACHILIA AKIN MITSPAKTIA?

12. ¿Ken uelis tikiluis ichpochtli mayeto monovia?

12 ¿Ken uelis tikiluis tlen tikmachilia akin mitspaktia? d Xamo uelis iuan timotlapouis kanin katej miakej noso uelis tiknotsas por teléfono. Xikilui mitspaktia uan tikneki okachi tikixmatis (1 Cor. 14:9). Xikchia tla mitsiluis kineki mokuayejyekos tlen kichiuas (Prov. 15:28). Pero xiktlakaita tla mitsiluis amo kineki mitsixmatis.

13. ¿Tlen uelis tikchiuas tla ikaj kineki okachi mitsixmatis? (Colosenses 4:6).

13 ¿Tlen tikchiuas tla ikaj tikpaktia uan kineki okachi mitsixmatis? Xikilnamikto omoyolchika mitsiluis tikpaktia. Ikinon xiktlakaita uan kuali xiknankili (xiktlajtolti Colosenses 4:6). Xikilui mamitschia tla tikneki timokuayejyekos tlen tikchiuas. Pero amo xiuejkaua tiknankilis (Prov. 13:12). Xikyekilui tla amo tikneki iuan okachi timoixmatis. Se tokni tlen itoka Hans uan chanti Austria okijto tlen okichi ijkuak se ichpochtli okilui okinekiaya okachi kixmatis. Okijto: “Onikyekilui ne amo oniknekiaya iuan okachi nimoixmatis. San niman onikilui porque amo oniknekiaya okse tlamantli mamokuayejyeko. Ikinon satepan kuali onikitaya tlen onikchiuaya para amo mamokuayejyeko satepan okachi iuan nimoixmatis”. Pero tla tikneki ikaj okachi tikixmatis, xikilui tlen tikmachilia uan xikilui ken tikneki okachi iuan timoixmatis. Xamo tlatlamantli nanmokuayejyekoskej tlen nankichiuaskej porque tlatlamantli onanmoskaltijkej.

¿KEN UELIS TIKINPALEUISKEJ TELPOCHMEJ UAN ICHPOCHMEJ?

14. ¿Tlen moneki tikchiuaskej tla tiknekij tikinpaleuiskej telpochmej uan ichpochmej?

14 ¿Tlen uelis tikchiuaskej para tikinpaleuiskej akinmej kinekij monamiktiskej? Uelis tikinpaleuiskej tla kuali timokuayejyekouaj tlen tikijtouaj (Efes. 4:29). Matimotlajtlanikan: “¿Nikinmiluia itlaj tlen kinyolkokoua? ¿Nimokuayejyekoua motlasojtlaj ijkuak nikita se telpochtli motlapouiaj iuan se ichpochtli?” (1 Tim. 5:13). Noijki amitlaj matikchiuakan tlen kichiuas mamomachilikan amitlaj inpati akinmej ayamo monamiktiaj. Tokni Hans tlen yotimotlapouijkej itech párrafo 13, okiyekijto: “Sekimej tokniuan nechtlajtlaniaj: ‘¿Tleka ayamo timonamiktia? Yitikpia miak xiuitl uan ayakmo uelis timonamiktis’. Ijkuak ijkon kinmiluiaj telpochmej uan ichpochmej, kimachiliaj amitlaj inpati uan san kinekiskej monamiktiskej”. Ikinon okachi miak ipati matikinyolchikauakan (1 Tes. 5:11).

15. (1) Ijkon ken kijtoua Romanos 15:​2, ¿tlen moneki tikilnamiktoskej tla tikinpaleuiskej akinmej kinekij monamiktiskej? (Noijki xikita foto). (2) ¿Tlen okachi omitspakti tlen otikitak itech video?

15 ¿Tlen tikchiuaskej tla tikitaj se telpochtli uan se ichpochtli kuali mouikaj uan tikijtouaj uelis monamiktiskej? Biblia techmachtia moneki matimokuayejyekokan ken momachiliaj oksekimej (xiktlajtolti Romanos 15:2). Miakej telpochmej uan ichpochmej amo kinpaktia makinpaleuikan kitemoskej akin iuan monamiktiskej uan moneki matikintlakaitakan (2 Tes. 3:11). Oksekimej xamo kinekiskej matikinpaleuikan pero uelis ijkon tikchiuaskej tla techiluiskej matikinpaleuikan (Prov. 3:27). e Oksekimej xamo techiluiskej matikchiuakan seki tlamantli para tikinpaleuiskej. Se tokni tlen chanti Alemania uan itoka Lydia okijto: “Uelis tikinyoleuaskej sekimej tokniuan uan ompa mayetokan telpochtli uan ichpochtli. Ijkon uelis moixmatiskej uan yejuan kimatiskej tlen kichiuaskej”.

Telpochmej uan ichpochmej uelis moixmatiskej ijkuak monechikouaj inuan tokniuan uan moyolpaktiaj. (Xikita párrafo 15).


16. ¿Tlen moneki kilnamiktoskej telpochmej uan ichpochmej?

16 Tinochtin uelis tiyolpakiskej maski tikatej toselti noso yotimonamiktijkej (Sal. 128:1). Ikinon ximochijchikaua xiktekichiuili Jehová tla ayamo tikajsi akin iuan timonamiktis. Se ichpochtli tlen chanti Macao uan itoka Sin Yi okijto: “Itech xochitlali nochipa tiyetos iuan monamik noso mosiua. Ikinon tla ok moselti xiyolpaki uan xikchiua tlen moneki”. Pero ¿tlen tikchiuas tla yopejki ikaj okachi iuan timoixmati? Chikome timomachtiskej tlen mitspaleuis xipaki ijkuak yitikpias monovio noso monovia.

TLAKUIKALI 137 Jehová kinpatioita siuamej

a Xiktlajtolti tlamachtil itech jw.org tlen itoka “Ser novios | Parte 1: ¿Estoy listo para salir con alguien?”.

b TLEN OKACHI IPATI: Itech nin tlamachtil uan okse tikitaskej ijkuak ikaj kipia inovio noso inovia. Nin kijtosneki okachi moixmatiskej uan satepan kipejpenaskej kox monamiktiskej. Itech seki altepemej noijki kijtouaj peua moixmatij noso mochiuaj novios. Se tlakatl uan se siuatl mochiuaj novios ijkuak kimoluiaj tlen kimachiliaj. Satepan yejuan kipejpenaskej kox monamiktiskej noso amo.

c Otikinpatilijkej intoka.

d Itech seki altepemej telpochtli kiluia ichpochtli kineki kixmatis. Pero noijki ichpochtli uelis kiluis telpochtli kineki kixmatis (Rut 3:​1-13). Revista ¡Ma titlachixtokan! 22 de octubre 2004 kipia seki tlamantli tlen mitspaleuis uan itoka “Los jóvenes preguntan. ¿Cómo le digo lo que siento por él?”.

e Xikita itech jw.org se video tlen itoka Mochijchikauaj para nochipa tlaneltokaskej akinmej: Inselti.