Xikita nochi

Tlen kiualika

¿Ken uelis tikpiaskej yolseuilistli?

¿Ken uelis tikpiaskej yolseuilistli?

OUI tikpiaskej yolseuilistli porque axkan onka miak ouijkayotl. Maski yitikpiaj yolseuilistli oui nochipa tikteititiskej. ¿Tlen principios techpaleuiskej nochipa ma tikpiakan yolseuilistli? ¿Ken tikinpaleuiskej oksekimej ma kipiakan yolseuilistli?

¿TLEN MONEKI TIKCHIUASKEJ PARA TIKPIASKEJ YOLSEUILISTLI?

Para tikpiaskej yolseuilistli, moneki kuali timomachiliskej uan kuali tiyetoskej. Noijki moneki ma timouikakan iuan akinmej kichiuaj tlen kuali. Pero tlen okachi ipati ma timouikakan iuan Jehová uan ijkon tikpiaskej yolseuilistli. ¿Tlen techpaleuis ijkon ma tikchiuakan?

Ayakmo tikpiaskej yolseuilistli tla sapanoa timotekipachoaj.

Tla tikintlakamatij itlanauatiluan Jehová uan principios bíblicos, tikteititiskej itech titlaneltokaj uan tiknekij iuan timouikaskej ika yolseuilistli (Jer. 17:7, 8; Sant. 2:22, 23). Uan toTajtsin Dios touan mouika uan techmaka yolseuilistli. Isaías 32:17 kijtoa: “Uan itech melajkayotl kisas yolseuilistli uan melajkayotl kichiuas ma yeto yolseuilistli uan kichiuas nochtin nochipa kuali ma yetokan”. Tikpiaskej yolseuilistli tla tiktlakamatij Jehová ika nochi toyolo (Is. 48:18, 19).

Para tikpiaskej yolseuilistli, Jehová techmaka espíritu santo (Hech. 9:31).

TECHPALEUIA IESPÍRITU SANTO JEHOVÁ

Ijkuak tlatitlanil Pablo okijkuilo tlen poui itech espíritu santo, okijkuilo achto pakilistli uan satepan “yolsewílistli” (Gál. 5:22, 23). Ik non, tla tiknekij tikpiaskej yolseuilistli, moneki  tikkauiliskej ma techpaleui espíritu santo. Axkan ma tikitakan ome tlamantli tlen techpaleuis ma tikkauilikan iespíritu santo Jehová ma techpaleui.

Achto, moneki nochipa ma tiktlajtoltikan Biblia (Sal. 1:2, 3). Ijkuak timokuayejyekoaj tlen kijtoa Biblia, espíritu santo techpaleuia ma tikajsikamatikan ken mokuayejyekoa Jehová. Tikajsikamatij tlen kichiua para ma tikpiakan yolseuilistli uan tleka sapanoa kipatioita. Tikpiaskej yolseuilistli tla tikchiuaj tlen kijtoa iTlajtol (Prov. 3:1, 2).

Ome, moneki ma tiktlajtlanilikan iespíritu santo Jehová (Luc. 11:13). Akinmej kinekij ma kinpaleui Jehová, kinmiluia: “Iyolsewilis Dios, non amaka weleti kajsikamati, kimokuitlawis [kimaluis] nomoyolo iwa nomotlayejyekolis por Cristo Jesús” (Filip. 4:6, 7). Tla tiktlajtlaniliaj iespíritu santo Jehová, ye techpaleuia ma tikpiakan yolseuilistli uan san kinmaka akinmej inmiuan mouika (Rom. 15:13).

Biblia yokinpaleui miakej ma kipatlakan innemilis, axkan kipiaj yolseuilistli, kuali mouikaj iuan Jehová uan noijki kuali mouikaj iuan oksekimej. Ma tikitakan ken okichijkej.

¿KEN OKICHIJKEJ PARA KIPIASKEJ YOLSEUILISTLI?

Miakej tokniuan achto san niman okualaniayaj pero axkan teajsikamatij, tetlasojtlaj, ayakmo san niman kualanij uan kimatij mochiaskej * (Prov. 29:22). Ma tikitakan tlen okichijkej ome tokniuan tlen sapanoa okualaniayaj uan axkan kimatij ken mouikaskej iuan oksekimej.

Ma timoyekanakan ika principios bíblicos uan ma tiktlajtlanilikan iespíritu santo Jehová uan ijkon tikpiaskej yolseuilistli.

David sapanoa okualaniaya, ik non, oteyolkokoaya ijkuak itlaj okijtoaya. Ijkuak ayamo okitekichiuiliaya toTajtsin Dios, okinteneuaya oksekimej uan amo okintlakaitaya ikalchanejkauan. Se tonal, okitak omonekiaya kipatlas iyelis. ¿Tlen okipaleui ma kipia yolseuilistli? Ye  okijto: “Opejki nimoyekana ika principios bíblicos. Ik non, ne uan nokalchanejkauan opejki okachi timotlakaitaj”.

Ijkuak omoskalti Rachel nochtin omokualaniayaj. Ye okijto: “Ualeua ok nikualani porque ijkuak onimoskalti nochtin nokalchanejkauan omokualaniayaj”. ¿Tlen okipaleui ma kipia yolseuilistli? Ye okijto: “Nochipa nikiluia Jehová ma nechpaleui”.

David uan Rachel techititiaj uelis timoyekanaskej ika principios bíblicos uan moneki ma tikiluikan Jehová ma techmaka iespíritu santo. Maski axkan onka miak ouijkayotl, uelis tikpiaskej yolseuilistli uan kuali timouikaskej iuan tokalchanejkauan uan tokniuan. Uan Jehová noijki techiluia “nomejwah xiktemolikah kenijki nonmoyekwikaskeh ika yolsewílistli iwan nochteh” (Rom. 12:18). ¿Ken tikpiaskej yolseuilistli? ¿Tlen tlateochiualistli tikpiaskej tla tikteititiskej tikpiaj yolseuilistli?

MA TIMOCHIJCHIKAUAKAN MA TIKPIAKAN YOLSEUILISTLI

Ijkuak titetlapouiaj tikinmiluiaj oksekimej ma kixmatikan iTlajtol toTajtsin Dios uan iTekiuajkayo (Is. 9:6, 7; Mat. 24:14TNM). Uan tiyolpakij porque miakej kinekij kixmatiskej iTlajtol toTajtsin Dios uan kinekij kipiaskej yolseuilistli. Jehová kinpaleuia ayakmo sapanoa ma kualanikan porque kinpanoa miak tlamantli. Axkan kineltokaj tlen satepan kichiuas Jehová uan kitlakamatij nin tlanauatil: “Xiktemo yolseuilistli uan itech xiyeto” (Sal. 34:14).

Amo nochtin kuali techkakij ijkuak yikin tikintlapouiaj (Juan 3:19). Iespíritu santo Jehová techpaleuia ma tikintlapouikan ika yolseuilistli uan noijki tikintlakaitaj maski amo kuali techkakij. Ijkon tikteititiskej tiktlakamatij tlen otlanauati Jesús ijkuak okijto: “Iwa ijkuak nonkalakiskeh itech se kali, xontetlajpalokah. Tla n chanejkeh nomechyekseliah, kiseliskeh nomoyolsewilis, pero tla amo nomechyekseliah, nomoyolsewilis mokopas nomowah” (Mat. 10:11-13). Ijkuak tikchiuaj tlen okijto Jesús techkauilia amo ma timokualanikan inmiuan akinmej tikintlapouiaj uan satepan techkakiskej.

Akinmej tikchiuaj ken Cristo, noijki tiknekij ma yeto yolseuilistli, ik non, tikintlakaitaj tekiuajkej maski ualeua amo kinekij ma titetlapouikan. Ma tikitakan tlen opanok se tonal ompa África se tekiua amo okinkauiliaya tokniuan ma kinchijchiuakan kalmej kanin monechikoskiaj. Ik non, okititlankej se tokni misionero ma uia Londres (Inglaterra) para kiyekiluiskia tekiua tejuan amo timoteuiaj. ¿Tlen opanok?

Tokni okijto: “Ijkuak oniajsito, onikitak ken otlakentitoka recepcionista uan onikitak otlajtoaya se tlajtoli tlen ne onimomachti. Ik non, oniktlajpalo ika itlajtol. Omotlajtlachialti uan onechtlajtlani tlen oniknekiaya. Onikyekilui oniknekiaya nimotlapouis iuan tekiua. Okinotski uan okiski onechtlajpaloko ika itlajtol. Uan onechkaki ijkuak onikyekilui tlen otikchiuayaj tiiTlaixpantijkauan Jehová”.

Tokni okitlakaitak nin tekiua ijkuak okiyekilui tlen tikchiuaj, ik non, nin tekiua ayakmo otechchikoitaya. Uan satepan okinkauilijkej ma kinchijchiuakan kalmej para ma monechikokan. ¡Tokniuan sapanoa oyolpakej! Tikpiaj yolseuilistli tla tikintlakaitaj oksekimej.

NOCHIPA MA TIKPIAKAN YOLSEUILISTLI

Axkan tikatej ika yolseuilistli uan kuali timouikaj iuan Jehová. Uan nochipa ijkon tiyetoskej tla timochijchikauaj tikchiuaskej tlen poui itech espíritu santo. Pero Jehová techteochiuas uan noijki tikpiaskej yolseuilistli itech xochitlali (2 Ped. 3:13, 14).

^ párr. 13 Itech okse tlamachtil timotlapouiskej itech akin kuali tlakatl uan satepan kisaskej okseki tlamachtilmej tlen tlajtoskej itech okseki tlamantli tlen poui itech espíritu santo.